រដ្ឋសភាឯកបក្សបានអនុម័តច្បាប់ចំនួនបួនស្ដីពីទំនាក់ទំនងពាណិជ្ជកម្មនិងការទូតកាលពីម្សិលមិញក្នុងសម័យប្រជុំសភាមួយលើកទៀត ដែលសមាជិកសភាជាប់ឆ្នោតទាំង៥៥រូបរបស់គណបក្សសង្គ្រោះជាតិបានធ្វើពហិការ។
គណបក្សប្រជាជនកម្ពុជាមានសមាជិកសភាចូលរួម៦៥រូបក្នុងចំណោម៦៨រូប ហើយច្បាប់ទាំងបួននេះត្រូវបានអនុម័តដោយមានការពិភាក្សាដេញដោលតិចតួចប៉ុណ្ណោះ។
ច្បាប់ទាំងនេះទាក់ទងនឹងការគ្រប់គ្រងគយនៅក្រោមសមាគមអាស៊ាន បន្ទាប់ពីឆ្នាំ២០១៥ សុខដុមនីយកម្មនៃនីតិវិធីគយរបស់ប្រទេសកម្ពុជាតាមបទដ្ឋានអន្តរជាតិ ធម្មនុញ្ញអាស៊ានស្ដីពីការដោះស្រាយវិវាទ និងស្ដីពីអភ័យឯកសិទ្ធិ និងបុព្វសិទ្ធិមន្ត្រីរដ្ឋាភិបាលនៅក្រោមអាស៊ាន។
សមាជិកសភាគណបក្សប្រជាជនកម្ពុជាពីរបីរូបបានចោទសួរពីច្បាប់ដែលស្នើឡើងនេះ មុនពេលច្បាប់ទាំងនេះត្រូវបានអនុម័តជាឯកច្ឆន្ទ។ ទោះជាយ៉ាងណា លោក សួស យ៉ារ៉ា សមាជិកសភាមួយរូបក្នុងចំណោមសមាជិកសភាវ័យក្មេងរបស់គណបក្សកាន់អំណាចបានចោទសួរពីសមាហរណកម្មសេដ្ឋកិច្ចអាស៊ាននៅពេលខាងមុខនេះ។
លោក យ៉ារ៉ា បានប្រាប់សហសេវិករបស់ខ្លួនថា “កសិដ្ឋានចិញ្ចឹមត្រីរបស់យើងមិនអាចប្រកួតប្រជែងជាមួយកសិដ្ឋានចិញ្ចឹមត្រីរបស់ប្រទេសជិតខាង ដែលនាំចូលត្រីមកកាន់ប្រទេសយើងបានទេ ពីព្រោះយើងមិនមានច្បាប់ដើម្បីទប់ស្កាត់ពួកគេ”។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ដែលបានចូលរួមសម័យប្រជុំនេះផងដែរបានឆ្លើយតបថា នៅក្រោមអាស៊ាននឹងមានការយកពន្ធ១៥ភាគរយលើទំនិញភាគច្រើន មានន័យថា ក្រុមហ៊ុនផលិតក្នុងស្រុកនឹងនៅតែត្រូវបានការពារស្របច្បាប់ដដែល។
លោក ជាម យៀប សមាជិកសភាជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាក៏បានមានប្រសាសន៍យ៉ាងខ្លីអំពាវនាវឲ្យសមាជិកសភាគណបក្សសង្គ្រោះជាតិមកចូលរួមប្រជុំសភា។ លោក ជាម យៀប បានមានប្រសាសន៍ថា ដើម្បីដោះស្រាយជម្លោះដែលកើតឡើងក្នុងប្រទេសជាសមាជិកអាស៊ានណាមួយ…គេមិនដែលជ្រើសរើសមហាបាតុកម្មមកធ្វើជាមូលដ្ឋានទេ”៕ សារុន