34 C
Phnom Penh

សម័យ​​​ដ៏ខ្មៅ​ងងឹតត្រូវបាន​រំឭក​​​ក្នុង​​​ ទិវាចងកំហឹង

ដោយ ឌឹ ខេមបូឌា ដេលី

បទវិភាគ

របបខ្មែរ​ក្រហម​​ត្រូវបាន​​រំឭក​កាល​ពីម្សិលមិញ​ ជាមួយ​សម្រែក​ដ៏សោក​សង្រេង និង​ការ​​​​សម្ដែង​​​ឡើង​​​វិញ​​​ឲ្យ​​​ដូច​​​ហេតុការណ៍​​​បាញ់សម្លាប់​ពិតៗ​​​យ៉ាង​​​ព្រៃផ្សៃ​​​ ការ​​​ស្រេក​​​ឃ្លាន​​​ និង​​​ការ​​​បង្ខំ​​​ឲ្យ​​​ធ្វើការ​​​​​​​ងារ​ហួសកម្លាំង​ និងការ​ប្រហារ​​ជីវិត​ ដែល​​កើតឡើង​ជា​​​ធម្មតា​​​ នៅ​ចន្លោះ​ឆ្នាំ​១៩៧៥ ដល់ឆ្នាំ​១៩៧៩​នៅក្នុង​ប្រទេស​កម្ពុជា។

តួ​សម្តែង​បាន​តុប​តែង​ខ្លួន​ក្នុង​របប​ខ្មែរ​ក្រហម​ក្នុង​ទិវា​ចង​កំហឹង​ដែល​បាន​ធ្វើឡើង​​ជា​​រៀង​​​រាល់​ឆ្នាំ​​​ ​​នៅ​មជ្ឈ​មណ្ឌល​ប្រល័យ​ពូជ​សាសន៍​​​ជើង​ឯក ។ Lauren Crothers/ The Cambodia Daily
តួ​សម្តែង​បាន​តុប​តែង​ខ្លួន​ក្នុង​របប​ខ្មែរ​ក្រហម​នៅក្នុង​ទិវា​ចង​កំហឹង​ដែល​បាន​ធ្វើឡើង​​ជា​​រៀង​​​រាល់​ឆ្នាំ​​​ ​​នៅ​មជ្ឈ​មណ្ឌល​ប្រល័យ​ពូជ​សាសន៍​​​ជើង​ឯក ។ Lauren Crothers/ The Cambodia Daily

“ទិវាចងកំហឹង” ​​ដែល​ត្រូវ​បាន​ធ្វើឡើង​​ជា​​រៀង​​​រាល់ឆ្នាំ​​ ចាប់​តាំង​​​ពីឆ្នាំ​​១៩៨៤ ត្រូវ​បាន​ធ្វើ​ឡើង​​នៅមជ្ឈមណ្ឌល​ប្រល័យពូជសាសន៍​​​ជើង​ឯក ក្នុង​ខណ្ឌ​ដង្កោ រាជធានីភ្នំពេញ និង​​​​មាន​​​ចូល​រួម​ពីសំណាក់​ប្រជាពលរដ្ឋ ព្រះសង្ឃ និងមន្ត្រីសាលារាជធានី​ប្រហែល​៦០០​អង្គ-នាក់​។

តួសម្តែងម្នាក់​ក្នុងចំណោមតួសម្តែង​បានលើកឡើង​​​នៅក្នុង​សុុន្ទរថាដើម្បី​​​​ចាប់​​​ផ្ដើម​​​ការ​​​សម្ដែង​​​នេះ​​​ថា “ប្រជា​ជនស្លូត​ត្រង់​​ជាង​បីលាននាក់​​បាន​បាត់បង់​អាយុ​ជីវិត​របស់​ខ្លួនដោយ​គ្មាន​កំហុស សង្គម​​ធ្លាក់​ក្នុង​​ភាព​ងងឹត​សែនជ្រៅ​”។

​ខណៈដែល​អ្នកស្រី​បាន​លើកឡើង​​​ដូច្នេះ​​​ អ្នក​ចូល​រួមខ្លះបាន​ដើរ​​យឺតៗ​​កាត់​ផ្នូរ​ ដែល​សាកសពរាប់​​ពាន់​ ត្រូវ​បាន​គាស់​​ឡើង​ ​បន្ទាប់​​ពី​ការ​ដួល​រលំនៃ​របប​នេះ។ទោះជា​យ៉ាងណា ​​​​​បទភ្លេង​​​រំជួល​​​ចិត្ត​​​បាន​​​បន្លឺ​​​ឡើង​​​ជា​​​សញ្ញា​​​​បង្ហាញថា ការ​សម្តែង​ជិត​​​ចាប់​ផ្តើម​ហើយ​​​។

សិល្បករ​ពាក់អាវ​ខ្មៅ និងបង់​ក​ក្រមា​ក្រហម​ បាន​​​ធ្វើ​​​ឲ្យ​​​ជីវិត​​ដ៏ខ្មៅ​ងងឹតនៅក្នុង​របប​នោះ រស់​​​ឡើង​​​វិញ​​​តាម​​​រយៈ​​​ការ​​​សម្ដែង​​​ឈុត​​​​​បំបែក​ទារក​ព្រាត់​ប្រាស់​ចេញពីម្តាយ​របស់​ខ្លួន​ ការ​​​ជ្រមុជទឹក​​​ ការ​​​ធ្វើទារុណ​កម្ម ការ​​​ធ្វើ​​​ឲ្យ​​​ពិការ​និងសម្លាប់​កង​ចល័តដែល​​ស្រេក​​ឃ្លាន​​​អាហារ។

​​​អ្នក​​​ឈរ​​​មើល​​​ជាច្រើន​​​លើក​​​ទូរស័ព្ទ​​​ស្មាត​​​ហ្វូន​​​ថត​​​ផ្ដិត​​​យក​​​ទស្សនីយភាព​​​នេះ​​​ ឬអ្នក​​​ខ្លះទៀត​​​ឈរមិន​​​កម្រើក​​​ ក្មេងតូចៗ​មួយ​ចំនួន​តូច​ប្រមូលផ្តុំគ្នា​​ទាំង​​ស្រឡាំងកាំង។

លោកតា ស៊ឹម ខុន វ័យ​៧៤ឆ្នាំ ​បាន​មានប្រសាសន៍ ខណៈ​​ដែលគាត់​ជក់បារីមួយដើម ឱន​​​ទៅ​​​មាត់​រណ្តៅ​​​​កប់​​​ជ​ន​​រងគ្រោះថា “វា​ធ្វើ​ឲ្យ​ខ្ញុំ​ចងចាំ​អំពី​ការ​ឈឺ​​ចាប់​​”។

យោងតាម​លោក លី សុខ​ឃាង ប្រធាន​​គម្រោង​​នៃ​កម្មវិធីស្វែងរក​យុត្តិធម៌​​នៅ​មជ្ឈមណ្ឌល​ឯកសារកម្ពុជា ​បាន​ឲ្យដឹងថា ​​”ទិវានេះ​រៀប​​​ចំ​​​ឡើង​​​ក្នុង​​​គោល​​​បំណង​​​កាត់​​​បន្ថយ​​​ការ​​​ខ្វែង​​​គំនិត​​​គ្នា​​​​​រវាង​អតីត​គូសត្រូវ​…ដើម្បី​ទុក​ពេល​​​ឲ្យ​ប្រជាពលរដ្ឋ​​បញ្ចេញ​​នូវ​​ទុក្ខសោក​និងកំហឹង​​​របស់​ខ្លួន​​​​ដោយ​សន្តិវិធី និង​ដើម្បី​ឲ្យ​ប្រជាពលរដ្ឋ​នឹក​ឃើញ​​​​ដល់​​​ភាព​​ឃោរឃៅ​​​របស់​​ពួកខ្មែរ​ក្រហម​​​​​ដែល​​​ប្រព្រឹត្ត​​​លើ​ប្រជា​ជនកម្ពុជា​”។

ក៏ប៉ុន្តែ​ព្រឹត្តិការណ៍​ដែលរៀបចំ​ឡើងដោយ​សាលារាជធានី​នេះ​​​ នៅតែ​ផ្តល់​ឱកាស​ឲ្យ​គណ​បក្សប្រជាជន​កម្ពុជា​ដែល​គ្រប់គ្រង​​អំណាច​លើក​សរសើរ​ពីគុណ​​បំណាច់​​​​​របស់​គណបក្ស​នេះ​ និង​មេដឹកនាំ​​​​របស់ខ្លួន​ គឺ​លោកនាយករដ្ឋមន្ត្រី ហ៊ុន សែន លោក ជា ស៊ីម ប្រធានព្រឹទ្ធសភា និង​លោក ​ហេង សំរិន ប្រធាន​រដ្ឋ​​​សភា​​​​ ដែល​ស្ថិត​​ក្នុង​​​កងកម្លាំង​​​​​​គាំទ្រ​ដោយ​វៀតណាម​ ដែល​បាន​​បណ្តេញ​ពួក​ខ្មែរ​ក្រហម​ចេញពីអំណាច។​​រូបថត​​​របស់​ពួកគាត់ ​និង​ទង់​បក្ស​មួយ​ត្រូវបា​ន​ដំឡើង​នៅក្រៅ​​​ស្ដូប​​​រំឭក​​​វិញ្ញាណក្ខន្ធ​​​ដែល​​​តម្កល់​​​ឆ្អឹង​សាកសព​រាប់​​ពាន់​​។

ស្ត្រីម្នាក់​ដែលមិនបាន​ប្រាប់ឈ្មោះ និងជាអ្នក​ឡើង​​ធ្វើចំ​ណាប់​​អារម្មណ៍​ផ្លូវការក្នុង​​​ពិធី​​​នេះ​​​​​បាន​លើក​ឡើងថា “បច្ចុប្បន្ន​​​មិន​​​ថា​​​មាន​​​​ជនអគតិ​ខ្លះ​​ដែលកំពុង​បង្កបញ្ហា អស្ថិរភាព និង​ជាការ​គំរាម​​​​​ដល់​​​រដ្ឋាភិបាល​​​ក្ដី​​​​​​ ក៏​​​គណបក្សប្រជាជនកម្ពុជា​​នៅតែ​ប្រកាន់​គោល​​ជំហរ​រឹង​​​មាំ​​​និង​ភាព​​អត់​ធ្មត់​​របស់​ខ្លួន​​​ចំពោះ​​គណ​បក្សប្រឆាំង​ តាម​​​រយៈ​​​ការ​​​​​ព្យាយាម​​ដោះស្រាយ​បញ្ហា​តាម​​​​ប្រព័ន្ធតុលាការ​ និង​គិត​​​ពី​​​ផលប្រយោជន៍​​​​ជាតិ​ជា​​​ធំ​​​​”៕ ប៊ុននី​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស