តំណាងសហជីពនិងមន្ត្រីក្រុមហ៊ុនប្រេងឥន្ធនៈកាល់តិច បានជួបប្រជុំរយៈពេលពីរម៉ោងនៅការិយាល័យរបស់ក្រុមហ៊ុនក្នុងរាជធានីភ្នំពេញ កាលពីម្សិលមិញ ប៉ុន្តែមិនបានឈានដល់ការព្រមព្រៀងដើម្បីបញ្ចប់កូដកម្មរបស់បុគ្គលិកក្រុមហ៊ុនប្រេងឥន្ធនៈដ៏ធំរបស់អាមេរិកនេះឡើយ។
បុគ្គលិកក្រុមហ៊ុនកាល់តិចប្រហែល៣០០នាក់បានធ្វើកូដកម្មទូទាំងរាជធានី ចាប់តាំងពីថ្ងៃទី១២ ខែឧសភាមក ទាមទារដំឡើងប្រាក់ឈ្នួលពី១១០ដុល្លារដល់១៦០ដុល្លារ។
លោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា បានមានប្រសាសន៍បន្ទាប់ពីកិច្ចប្រជុំថា “កិច្ចប្រជុំនេះបង្ហាញថា ក្រុមហ៊ុនមិនចង់រកដំណោះស្រាយសម្រាប់បុគ្គលិកឡើយ ពីព្រោះការទាមទាររបស់យើងទាំងអស់ត្រូវបានបដិសេធ”។
លោក ស ម៉ូរ៉ាបានបន្ថែមថា “បុគ្គលិកទាំងអស់នៅតែប្រកាន់ជំហរបន្តធ្វើកូដកម្មរបស់ខ្លួនដដែល ដោយហេតុថាក្រុមហ៊ុនបានបដិសេធការទាមទាររបស់ពួកគេទាំងអស់។ ដោយសារគ្មានដំណោះស្រាយ ក្នុងរយៈពេល៤៨ម៉ោង បញ្ហានេះនឹងត្រូវបញ្ជូនទៅក្រុមប្រឹក្សាអាជ្ញាកណ្ដាល”។
តំណាងក្រុមហ៊ុនកាល់តិចម្នាក់មិនបានឆ្លើយតបចំពោះសំណើសុំអត្ថាធិប្បាយទេ។ បុគ្គលិកក្រុមហ៊ុនកាល់តិចក៏បានទាមទារឲ្យមានកន្លែងថែទាំទារក ការជួលអ្នកសម្អាតបន្ថែម ការជប់លៀងប្រចាំឆ្នាំ និងប្រាក់ឧបត្ថម្ភប្រចាំឆ្នាំស្មើនឹងប្រាក់ឈ្នួលមួយខែផងដែរ។
លោក ស ម៉ូរ៉ា បានមានប្រសាសន៍ថា បច្ចុប្បន្ននេះបុគ្គលិកមួយចំនួនត្រូវបានផ្ដល់រង្វាន់ចំពោះការប្រឹងប្រែងធ្វើការងារ ដោយមានរៀបចំពិធីជប់លៀងប្រចាំឆ្នាំ និងប្រាក់ខែមួយខែបន្ថែម ប៉ុន្តែថា បុគ្គលិកទាំងអស់គួរទទួលបានផលប្រយោជន៍បន្ថែមលើប្រាក់ឈ្នួល។
កាលពីថ្ងៃសុក្រ ក្រុមហ៊ុនឈេហ្វរ៉ុន ជាក្រុមហ៊ុនប្រេងឥន្ធនៈដ៏ធំរបស់អាមេរិកដែលប្រើប្រាស់យីហោកាល់តិចក្នុងប្រទេសកម្ពុជា ទំនងជាបានបញ្ចប់ការធ្វើកូដកម្មនេះតាមរយៈការសម្រុះសម្រួលជាមួយបុគ្គលិកដែលធ្វើកូដកម្ម។
ក្រុមហ៊ុនបានសន្យាផ្ដល់ប្រាក់ឧបត្ថម្ភចំនួន២០ដុល្លារប្រសិនបើបុគ្គលិកទាំងអស់ត្រឡប់ទៅធ្វើការតាមស្ថានីយរបស់ខ្លួនវិញ អំឡុងការសិក្សាអំពីប្រាក់ឈ្នួលរយៈពេលពីរខែ។
លោក ស ម៉ូរ៉ា បានមានប្រសាសន៍ថា សហជីពបានយល់ព្រមជាគោលការណ៍ហើយ ប៉ុន្តែបានទាមទារថា ការសន្យាផ្ដល់ប្រាក់ឧបត្ថម្ភនេះត្រូវសរសេរជាលាយលក្ខណ៍អក្សរ ជាលក្ខខណ្ឌដែលមិនត្រូវបានឆ្លើយតប។
លោក យឿន រ៉េត អាយុ៣៧ឆ្នាំ ជាបុគ្គលិកក្រុមហ៊ុនកាល់តិចម្នាក់បាននិយាយកាលពីម្សិលមិញថា គាត់ខឹងពីការដែលក្រុមហ៊ុនបដិសេធមិនជួបប្រជុំជាមួយបុគ្គលិកនៅពាក់កណ្ដាលទី ។
លោក យឿន រ៉េត បាននិយាយថា “យើងខកចិត្តនឹងការសម្រេចរបស់ក្រុមហ៊ុនណាស់ ពីព្រោះយើងបានព្យាយាមបន្ទន់ជំហររបស់យើង ហើយទុកពេលឲ្យពួកគេសិក្សារយៈពេលពីរខែទៀត ខណៈដែលពួកគេផ្ដល់ប្រាក់ឧបត្ថម្ភ២០ដុល្លារនោះ”។ គាត់បានបន្ថែមទៀតថា “ប៉ុន្តែពួកគេមិនយល់ព្រមតាមសំណើរបស់យើងទេ ហេតុដូច្នេះហើយយើងបន្តធ្វើកូដកម្មរហូតទាល់តែមានដំណោះស្រាយ”៕ សារុន