26 C
Phnom Penh

លោក​ ហ៊ុន​ សែន​ បន្ត​ដំណើរ​ទស្សន​កិច្ច​នៅ​ប្រ​ទេស​ចិន

ដោយ ឌឹ ខេមបូឌា ដេលី

បទវិភាគ

យោង​តាម​​​ទីភ្នាក់ងារ​​សារ​​​ព័ត៌​មាន​កម្ពុជា​​​ (អាកាប៉េ) បានឲ្យដឹងថា លោក ហ៊ុន សែន ដែល​អម​ដំណើរ​​ដោយ​ភរិយារបស់លោក គឺ​លោកស្រី ប៊ុន រ៉ានី ​បាន​បន្តដំណើរ​ទស្សនកិច្ច​​​របស់​លោក​​នៅ​​​ប្រទេស​ចិន​​កាល​​ពីល្ងាច​ថ្ងៃអង្គារ​ ដើម្បី​ចូលរួម​​​ពិធី​​​លាង​​​សាយភោជន៍ រៀប​ចំ​​​ដោយ​​ប្រធានា​ធិបតី​ចិន លោក ស៊ី ជីនភីង។

ទីភ្នាក់ងារ​​សារ​​​ព័ត៌មាន​ ​អាកាប៉េ ​បានរាយការណ៍ថា លោក​​ ហ៊ុន សែន ​​និងគណៈ​ប្រតិភូ​​ជាន់​ខ្ពស់​របស់​លោក​ បាន​ចូល​រួម​​ការធ្វើ​បទ​បង្ហាញមួយ​រៀបរាប់លម្អិត​អំពី​កម្មវិធី​​​កំណែ​​​ទម្រង់​​និង​ប្រព័ន្ធ​វិមជ្ឈការរបស់​ចិន​​។ ទីភ្នាក់ងារ​ព័ត៌មាន​​រដ្ឋ​នេះបានឲ្យដឹងថា លោក​​ ហ៊ុន សែន ​បាន​ប្រាប់​​អ្នក​ចូល​រួម​​​​នៅ​​​ក្នុង​​​ការ​​​ធ្វើ​បទ​បង្ហាញ​អំពី​ការ​​លុប​បំបាត់អំពើ​​ពុករលួយ​ ការអនុវត្ត​ប្រព័ន្ធ​វិមជ្ឈការ និង​ការ​ទប់​​​ស្កាត់ការ​​បំពុល​​បរិស្ថាន​ ​ជាគម្រោង​ដែលកម្ពុជា​​​ចែក​​​រំលែក​​​ជាមួយ​​ប្រទេស​ចិន។

ទីភ្នាក់ងារនេះ​​បានរាយការណ៍ថា កាល​ពីថ្ងៃច័ន្ទ លោកនា​យករដ្ឋមន្ត្រី ​បាន​​ជួប​ជាមួយ​លោក ចាវ ប៉ីសុី (Cao Peixi) ប្រធាន​ក្រុម​ហ៊ុន​ China Huaneng​​​ Group ​​ដែល​ជា​​ក្រុមហ៊ុន​វិនិ​យោគមួយ​ចំណោម​​ក្រុមហ៊ុន​វិនិយោគចំនួនពីរ​ក្នុង​គម្រោង​សាងសង់​វារីអគ្គិសនី​​សេសាន​២កម្លាំង​៤០០​មេហ្គា​វ៉ាត់​​នៅក្នុង​​ខេត្តស្ទឹងត្រែង​។

លោក ចាវ​​​ បានប្រាប់លោក​នាយករដ្ឋមន្ត្រី​​ថា គម្រោងនេះ​នឹងត្រូវ​បញ្ចប់​នៅត្រឹមឆ្នាំ​២០១៧ ដែលត្រូវ​ចំណាយប្រាក់​សរុប​៩៧៧លាន​ដុល្លារ។ យោង តាម​ទីភ្នាក់ងារសារ​ព័ត៌មាន ​អាកាប៉េ បានឲ្យដឹងថា លោក ហ៊ុន សែន ​បាន​ស្នើសុំ​ឲ្យ​​​ក្រុម​ហ៊ុននេះ​កាត់​​​បន្ថយ​​​​​ផលប៉ះ​ពាល់​​បរិស្ថាន​​បង្ក​​​ដោយ​​​ទំនប់​នេះឲ្យមក​​​នៅ​​​តិច​​​បំផុត​​​​​ និង​​​ធានាថា​​​​​អ្នកស្រុកត្រូ​វ​​​បាន​​​ផ្លាស់ប្ដូរ​​​ទីលំនៅ​​​ឲ្យ​​​បាន​សមរម្យ​។ លោក ហ៊ុន សែន គ្រោងនឹង​ត្រឡប់​មកកាន់មាតុភូមិវិញ​នៅ​​ថ្ងៃអា​​​ទិត្យ៕​ប៊ុននី​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស