29 C
Phnom Penh

លំនៅ​ដ្ឋាន​​​ប្រជាពល​​​រដ្ឋ​នៅ​រតនគិរី​ត្រូវ​បាន​ឈូស​​​កម្ទេច​​​ពេល​​​​អាជ្ញាធរ​ចូល​ដល់​ទី​នោះ​

ដោយ ឌឹ ខេមបូឌា ដេលី

បទវិភាគ

អ្នកភូមិ​បាន​ឲ្យដឺង​ថា ប្រជាពលរដ្ឋ​ជាង​៤០០​នាក់​បាន​ប៉ះទង្គិច​ជា​មួយនគរបាល​ និង​​កង​រាជអាវុធហត្ថ​នៅ​ក្នុង​ខេត្ត​រតនគិរី​កាល​ពី​ម្សិលមិញ​ ខណៈដែល​អាជ្ញាធរ​បាន​ព្យាយាម​ឈូស​កម្ទេច​​​​លំនៅ​ដ្ឋាន​របស់​ពួក​គេ​ ដើម្បី​បើក​​​ផ្លូវ​ឲ្យ​ក្រុមហ៊ុន​ចម្ការ​កៅស៊ូ​។

អាជ្ញាធរ​បាន​ឈូសកម្ទេច​​​​លំនៅ​ដ្ឋាន​របស់​ប្រជាពលរដ្ឋ​ប្រហែល​២០០​គ្រួសារ​ ដែល​បាន​និយាយ​ថា ថ្មីៗ​នេះពួក​គេ​​បាន​រើ​ទៅ​នៅ​ទី​កន្លែង​នោះ​ ដែល​ភ្ជាប់​ស្រុក​អូរ​​​ជុំ​ និងស្រុក​បាន​លុង ចំណែក​ឯ​ប្រជាពលរដ្ឋ​មួយ​ក្រុម​ប្រហែល​១០០​គ្រួសារ​ទៀត​ បាន​ធ្វើ​ការ​ទប់​ស្កាត់​ការ​បំផ្លាញ​ផ្ទះរបស់​ពួក​គាត់​។

ឈ្មោះ​ ឈុន​ សុជា អាយុ​៤៣​ឆ្នាំ ដែល​និយាយ​ថា ខ្លួន​បាន​រារាំង​អាជ្ញាធរ​​​​មិន​​​ឲ្យ​​​កម្ទេច​​​លំនៅ​​​ដ្ឋាន​​​របស់​​​ខ្លួន​​​ បាន​មាន​ប្រសាសន៍​ថា “ខ្ញុំ​រស់​នៅ​លើ​ដី​នេះ​តាំង​ពី​ឆ្នាំ​១៩៩៣​មក​ម៉្លេះ ប៉ុន្តែ​អាជ្ញាធរ​មិន​ដែល​បណ្ដេញ​យើង​ចេញ​ទេ ដូច្នេះ​ហេតុ​អ្វី​បាន​ជា​ពេល​នេះ​ពួក​គេ​ត្រូវ​ការ​ដី​នេះ​ និង​បង្ខំ​ឲ្យ​យើង​ចេញ?”។ លោក សុជា បាន​សួរ​ថា “តើ​ឲ្យ​​​ខ្ញុំ​ទៅ​ណា​? តើ​ឲ្យ​​​ខ្ញុំ​ទៅ​​​​រស់​នៅ​កន្លែង​​​ណា?”។

លោក​ ផេន​ ឌីណា ស្នង​ការ​រង​នគរបាល​ខេត្ត​បាន​មាន​ប្រសាសន៍​ថា គ្រួសារ​ប្រជាពលរដ្ឋ​ទាំង​នេះ​រស់​នៅ​លើ​ដី​ក្នុង​ស្រុក​អូរជុំ​ ដោយ​ខុស​ច្បាប់​ និង​ត្រូវ​បាន​​​តុលាការ​​​បង្គាប់​​​ឲ្យ​ចេញ។ លោក​បានមាន​ប្រសាសន៍ថា “កង​កម្លាំង​របស់​យើង​បាន​ទៅ​ទី​នោះ​ ដើម្បី​អនុវត្ត​តាម​សាល​ក្រម​​​​ពី​សាលា​ដំបូង​ខេត្ត​ឲ្យ​ប្រជាជន​ទាំង​នោះ​ចេញ​ពី​តំបន់​ដែល​ពួក​គេ​សាង​សង់​ផ្ទះ​នៅ​លើ​ដី​រដ្ឋ​។ វា​ជា​ជំហាន​ដំបូង​ក្នុង​ការ​បណ្ដេញ​ប្រជាពលរដ្ឋ​ដែល​កំពុង​តែ​រស់​នៅ​ខុស​ច្បាប់​លើ​ដី​រដ្ឋ​”។

លោក​ ឆាយ​ ធី អ្នក​សម្របសម្រួល​របស់​អង្គការ​សិទ្ធិ​មនុស្ស​អាដហុក​ប្រចាំ​នៅ​ខេត្ត​នេះ​​បាន​មាន​ប្រសាសន៍​ថា ក្រុមហ៊ុន​តាយ​សេង​ ត្រូវ​បាន​ផ្ដល់​ដីនេះ​​​ជា​​​ដី​​​សម្បទាន​សេដ្ឋកិច្ច​មួយ​ក្នុង​ឆ្នាំ​១៩៩៦​ ដែល​ត្រូវ​បាន​ផ្ទេរ​ទៅ​ឲ្យ​ក្រុមហ៊ុន​ Swift Rubber Company ក្នុង​ឆ្នាំ​២០១០។ លោក​ យ៉ាប​ តឿ អភិបាល​រង​ស្រុក​អូរជុំ​ បាន​មាន​ប្រសាសន៍​ថា អ្នក​ស្រុក​ត្រូវ​បាន​ជូន​ដំណឹង​អំពី​ការ​បណ្ដេញ​ចេញ​ជា​ច្រើន​លើក​ច្រើន​សា ហើយ​​​ការ​​​ឈូស​​​កម្ទេច​​​នេះ​​​ធ្វើ​​​ឡើង​​​នៅ​​​ពេល​​​ដីរដ្ឋ​​​នេះ​​​ត្រូវ​បាន​ផ្ដល់​ឲ្យ​ក្រុមហ៊ុន​ Swift Rubber Company។

អ្នក​ភូមិ​ម្នាក់​ឈ្មោះ​​ សៅ ប៊ុន អាយុ​៦៩​ឆ្នាំ​បាន​មាន​ប្រសាសន៍​ថា អ្នក​ស្រុក​​ដែល​រស់​នៅ​លើ​ដី​មាន​​វិវាទ​​​នេះ​ជាយូរ​មក​ហើយ​​ មិន​ត្រូវ​បាន​ផ្ដល់​សំណង​សម្រាប់​ដី​របស់​ពួក​គាត់​ឡើយ។

លោក​ ប៉ាក តុន​ អភិបាល​ស្រុក​អូរជុំ​ បានមាន​ប្រសាសន៍​ថា គ្មាន​​​​ការ​​​ផ្ដល់​​​សំណង​ណា​​​មួយ​​បែប​​​នេះ​​​ឡើយ​។លោក​បានមាន​ប្រសាសន៍​ថា “ប្រជាពលរដ្ឋ​អាច​ស្នើ​សុំ​ដី​សម្បទាន​សង្គម​កិច្ច​ពី​អាជ្ញាធរ​បាន​​​”។

លោក​ សៅ ប៊ុន បាន​មាន​ប្រសាសន៍​ថា អ្នក​ភូមិ​នឹង​តស៊ូរក្សា​ដី​ដែល​ខ្លួន​មាន​។ លោក​បាន​ឲ្យ​ដឹង​ថា “យើង​នឹង​រារាំង​​ពួក​គេ​រហូត​ដល់​យើង​ស្លាប់ ពីព្រោះ​យើង​នឹង​បាត់​បង់​អ្វីៗ​ទាំង​អស់​ ប្រសិន​បើ​យើង​បាត់​បង់​ទីកន្លែង​នេះ​។ ពួក​គេ​ជា​អាជ្ញាធរ​ខ្មែរ ប៉ុន្តែ​ពួក​គេ​មិន​ការពារ​ប្រជាជន​ខ្មែរ​ឡើយ​។ ផ្ទុយ​ទៅ​វិញ ​ពួក​គេ​ការពារ​ផល​ប្រយោជន៍​របស់​ក្រុមហ៊ុន​ចិន​”។ ក្រុម​អ្នក​តំណាង​របស់​ក្រុមហ៊ុន​ Swift Rubber Company មិន​អាច​ទាក់ទង​សុំ​អត្ថាធិប្បាយ​បាន​ឡើយ​៕ ប៊ុននី

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស