29 C
Phnom Penh

អ្នកភូមិ​​ពាក់​​ព័ន្ធនឹង​ជម្លោះ​ដីធ្លី​ក្នុង​ខេត្ត​រតនគិរី បិទផ្លូវជាតិលេខ ៧៨ អា

ដោយ ឌឹ ខេមបូឌា ដេលី

បទវិភាគ

នគរបាល​និងអ្នក​ភូមិ​​បានឲ្យដឹងថា​ អ្នកភូមិ​​នៅ​ខេត្ត​រតនគិរី​​បាន​បិទផ្លូវ​​ជាតិ​លេខ​៧៨​​អា កាលពីម្សិលមិញ​​អស់​រយៈ​ពេល​​ជាងបីម៉ោង​ខណៈ​​ដែល​​អាជ្ញាធរ​​បាន​ព្យាយាម​​​ខ្នះ​ខ្នែង​​​បណ្តេញ​​​​ពួកគេ​​យកដីឲ្យក្រុម​ហ៊ុន​ចម្ការកៅស៊ូ​មួយ​។

យោងតាម​​លោក រ៉ាយ រ៉េ ​ស្នងការ​នគរបាល​ខេត្ត​ ដែល​​បាន​ហៅការ​បិទ​ផ្លូវនេះ​​ថា​ខុស​ច្បាប់ បាន​ឲ្យដឹងថា ​អ្នកភូមិប្រហែល​​៤០០​នាក់​​បាន​បិទ​កំណាត់ផ្លូវ​​ ដែលភ្ជាប់ស្រុក​​​អូរជុំ​និង​ស្រុក​​បានលុង។​​ លោកបានមាន​ប្រសាសន៍ថា “​វា​​​បណ្តាល​ឲ្យស្ទះ​ចរាចរណ៍​​រយៈពេល​​ច្រើន​ម៉ោង​។ នគរ​បាល​​របស់​យើង​​បានព្យាយាម​​សម្របសម្រួល​​ជាមួយ​​​អ្នកភូមិ​ និង​ឲ្យ​​ពួកគេបើក​ផ្លូវ យក​ឈើ​​ ដែល​​​ពួក​​គេ​ដាក់​​ ចេញ​​ពី​ផ្លូវ”។

កាលពីថ្ងៃ​ពុធ អ្នកភូមិ​ដដែល​​​នេះ​​បាន​ប៉ះ​​ទង្គិច​​ជាមួយ​​អាជ្ញាធរ​ ​ដែល​បាន​​និយាយ​​ថា ​​ពួក​​​អ្នក​​ភូមិ​​​រស់​​នៅ​ដោយខុស​ច្បាប់​លើ​ដី ​​ដែល​ត្រូវបាន​ផ្តល់​​ជា​ដី​សម្បទាន​​សេដ្ឋកិច្ច​ឲ្យ​​ទៅ​​ក្រុម​ហ៊ុន SwiftRubberLtd។ លំនៅដ្ឋាន​​របស់​ប្រជាពលរដ្ឋ​ប្រមាណ​​២០០គ្រួសារ​ ត្រូវបាន​ឈូស​កម្ទេច​កាលពីថ្ងៃពុធ​ ខណៈដែល​ប្រជាជន​ប្រហែល​១០០គ្រួសារបាន​ប្រឹងប្រែង​ជួយ ​សង្គ្រោះ​​​ផ្ទះ​​​របស់​​ខ្លួន​។

​លោក សៅ ធៀន តំណាង​អ្នកភូមិ​​បានមាន​ប្រសាសន៍ថា “កាលពីថ្ងៃ​ពុធ នគរបាល​មាន​កម្លាំង​ប្រមាណ​១០០​នាក់​ ប៉ុន្តែ​ថ្ងៃនេះ​មាន​កម្លាំង​​​ជាង​៣០០​នាក់​មក​​ទីនេះ​។ ពួកគេចង់​​បណ្តេញ​​ពួក​​យើង​ចេញ និង​​ឈូស​កម្ទេច​​ផ្ទះ​​​របស់​​ពួក​យើង​។ យើងនឹង​មិន​​អនុញ្ញាត​ឲ្យ​​​ពួក​គេ​ធ្វើ​ដូច្នេះ​ទេ​”។

លោក​ ឆាយ​ ធី អ្នក​សម្របសម្រួល​របស់​អង្គការ​សិទ្ធិ​មនុស្ស​អាដហុក​ប្រចាំ​នៅ​ខេត្ត​នេះបានមាន​ប្រសាសន៍ថា ​​អ្នក​ភូមិ​​បាន​ដក​របាំង​ផ្លូវ​​របស់​​ខ្លួន​​ចេញកាល​ពីម្សិល​មិញ​ នៅ​ពេល​​អាជ្ញាធរ​​យល់ព្រម​មិន​កម្ទេច​ផ្ទះ​​​របស់​​ពួកគេ​។

លោក ឆាយ ​ធី ​បានមាន​ប្រសាសន៍ថា “អាជ្ញាធរខេត្ត​​​បាន​យល់ព្រម​មិន​បណ្តេញ​ប្រជា​ពលរដ្ឋ​​ចំនួន​១០២គ្រួសារ ដែល​​បាននិងកំពុង​រស់​នៅ​​ទីនេះ​ជាយូរមកហើយ​”។ លោក​បាន​បន្ថែមថា ​ពេលនេះ ការ​​​ពិភាក្សា​ថែមទៀតនឹង​​​ធ្វើឡើង​​ជុំវិញ​​​អនាគត​ផ្ទះទាំង​នេះ​”។

លោក ង៉ែន ​​បូរិន ​អ្នកតំណាង​​​របស់​ក្រុម​ហ៊ុន​ចម្ការ​កៅស៊ូ​ SwiftRubber ​បានមាន​ប្រសា​សន៍ថា ដីនេះ​ពិតជា​របស់​​ក្រុមហ៊ុនមែន ហើយត្រូវតែ​បណ្តេញ​ចេញ។​ លោក បូរិន បានមាន​ប្រសាសន៍ថា ” អ្នកទាំងនោះ​​ចង់​​រស់នៅ​​ខុស​ច្បាប់​​នៅលើ​ដីនោះ​ ដែល​ជា​​​របស់​​ក្រុមហ៊ុន​។ ​​អាជ្ញាធរ​​បាន​​​ជូន​ដំ​ណឹង​ និងបា​ន​ព្រមាន​​ពួកគេ​​ច្រើន​លើក​​ហើយ​ ប៉ុន្តែ​​ពួកគេ​មិន​ចេញ​”។

​​លោកបានមាន​ប្រសាសន៍​​ថា គ្រួសារ​ខ្លះ​​​ដែល​​ពាក់​ព័ន្ធ​​​ក្នុង​ជម្លោះ​​នេះ​​បាន​ទៅ​នៅលើ​ដី​នោះ​​នាពេលថ្មីៗនេះ និង​មិនគួរ​​ទទួល​សំណង​ទេ​ ចំណែក​​​គ្រួសារ​ផ្សេងទៀត​​បាន​រស់​នៅ​​​ទីនោះ​រយៈ​​ពេល​ច្រើនឆ្នាំ​មកហើយ​។ លោក​បាន​មាន​ប្រសាសន៍ថា ក្រុម​ហ៊ុន​​នេះ​​នឹង​​ជជែក​​ពិភាក្សា​​ជាមួយ​​​អាជ្ញាធរ​​​អំពី​​ដំណោះ​ស្រាយ​​ដែល​អាច​​កើតមាន​​សម្រាប់​​ក្រុម​នេះ។

​យោងតាម​លោក ​​រ៉េ ​​ជាស្នងការ​​ខេត្ត​​បាន​ឲ្យដឹងថា ​​ជម្រើសមួយ​ គឺ​ត្រូវ​​បង្កើត​សម្បទាន​ដីសង្គម​កិច្ច​មួយ​សម្រាប់​ក្រុមគ្រួសារ​​ទាំង​នេះ​។ លោក រ៉េ ​បានថ្លែង​​ថា “យើងនឹង​មិន​បណ្តេញ​​គ្រួសារ​ចាស់​​ទេ ​​យើង​បណ្តេញ​​តែ​ពួក​​​អនាធិបតេយ្យ​ប៉ុណ្ណោះ​ ប៉ុន្តែ​​គ្រួសារ​​ចាស់​​​​ខ្លាចថា ​យើង​​បណ្តេញ​​ពួកគេទាំង​​អស់​​​”៕ ប៊ុននី​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស