មន្ត្រីនគរបាលម្នាក់បាននិយាយថា រថយន្តមួយគ្រឿងដែលជាកម្មសិទ្ធិរបស់លោកស្រី លី ធីតា ប្រធានមន្ទីរសេដ្ឋកិច្ច និងហិរញ្ញវត្ថុខេត្តកំពង់ចាម បានជាប់ពាក់ព័ន្ធនឹងការបុកមនុស្សស្លាប់ហើយបានបើករត់កាលពីម្សិលមិញ នៅក្នុងស្រុកជើងព្រៃ ខេត្តកំពង់ចាម។
លោក ឈាង សែ អធិការរងនគរបាលស្រុកបានមានប្រសាសន៍ថា មនុស្សពីរនាក់បានស្លាប់ និងពីរនាក់ទៀតរងរបួសនៅពេលដែលរថយន្តតូយ៉ូតាហាយឡិនឌ័ររបស់លោកស្រី លី ធីតា បានជ្រុលទៅបុកគោយន្តកន្ត្រៃមួយគ្រឿង និងម៉ូតូមួយគ្រឿងទៀតកាលពីវេលាទៀបភ្លឺថ្ងៃម្សិលមិញ។
លោក ឈាង សែ បានមានប្រសាសន៍ថា “រថយន្តហាយឡិនឌ័ររបស់លោកស្រី លី ធីតា បានបុកគោយន្តកន្ត្រៃ និងម៉ូតូមួយគ្រឿងទៀតនៅលើផ្លូវដែលកំពុងស្ថាបនានៅម៉ោង៥ទៀបភ្លឺតាមផ្លូវជាតិលេខ៦”។ លោកបានមានប្រសាសន៍ថា លោកស្រី លី ធីតា ជិះក្នុងរថយន្តនោះដែលបានបើកបរសំដៅមករាជធានីភ្នំពេញ ប៉ុន្តែថា លោកស្រីមិនមែនជាអ្នកបើកទេ។ លោកបានមានប្រសាសន៍ថា នៅពេលលោកស្រីចេញពីរថយន្តបន្ទាប់ពីបុករួច អ្នកបើកបរបានរត់គេចខ្លួនបាត់។
លោក ឃុត សល្យ អាយុ៣៧ឆ្នាំ និងប្រពន្ធរបស់គាត់ឈ្មោះ ខាំ ស្រីឡឹង អាយុ៣៥ឆ្នាំបានធ្វើដំណើរតាមម៉ូតូមួយគ្រឿងពីក្រោយគោយន្តកន្ត្រៃ ដែលរថយន្តហាយឡិនឌ័របានបុកនោះ។
លោក ឈាង សែ បានមានប្រសាសន៍ថា ប្ដីប្រពន្ធដែលជិះម៉ូតូមួយគ្រឿងនោះបានស្លាប់ភ្លាមៗនៅកន្លែងកើតហេតុ”។ លោកបានមានប្រសាសន៍ថា លោក ម៉េង ស្រ៊ុន អាយុ៣២ឆ្នាំជាអ្នកបើកបរគោយន្តកន្ត្រៃបានរងរបួសក្បាលធ្ងន់ធ្ងរ ហើយត្រូវបានបញ្ជូនមកមន្ទីរពេទ្យក្នុងរាជធានីភ្នំពេញ ប៉ុន្តែ បុរសម្នាក់ទៀតដែលបានរងរបួសក្នុងគ្រោះថ្នាក់នោះដែរបានចាកចេញពីកន្លែងកើតហេតុ។ លោកបានមានប្រសាសន៍ថា “ប្ដីប្រពន្ធដែលស្លាប់នោះ ហូរឈាមតាមច្រមុះ និងរយះក្បាល”។
លោក អ៊ុល គា នាយនគរបាលចរាចរស្រុកបានមានប្រសាសន៍ថា លោកស្រី លី ធីតា បានសុំឲ្យនគរបាលអនុញ្ញាតឲ្យគាត់ទៅដើម្បីព្យាបាលជំងឺនៅមន្ទីរពេទ្យក្នុងរាជធានីភ្នំពេញដែរ។ លោកបានមានប្រសាសន៍ថា “អ្នកបើកបររថយន្តឲ្យលោកស្រីបានរត់គេចខ្លួន ហើយយើងមិនទាន់ស្គាល់ឈ្មោះគាត់នៅឡើយទេ”។ លោកបានបន្ថែមថា “លោកស្រីបានយករថយន្តមួយគ្រឿងទៀតដែលជាកម្មសិទ្ធិរបស់មន្ទីរបន្ទាប់ពីលោកស្រីបានទូរស័ព្ទទៅមនុស្សម្នាក់។ លោកស្រីមិនមែនជាអ្នកបើករថយន្ត”ដែលជាប់ពាក់ព័ន្ធក្នុងគ្រោះថ្នាក់ចរាចរណ៍នេះទេ។
លោក អ៊ុល គា បានមានប្រសាសន៍ថា នគរបាលកំពុងស៊ើបអង្កេតរកកន្លែងលាក់ខ្លួនរបស់អ្នកបើកបរដែលលោកស្រី ធីតា មានប្រសាសន៍ថា លោកស្រីនឹងប្រាប់ឈ្មោះជននោះប្រសិនបើលោកស្រីត្រូវបានអនុញ្ញាតឲ្យចេញពីកន្លែងកើតហេតុទៅព្យាបាលនៅមន្ទីរពេទ្យ។
កាលពីខែវិច្ឆិកា លោក ជាម យៀប សមាជិកសភាជាន់ខ្ពស់គណបក្សប្រជាជនកម្ពុជាបានបង្គាប់ឲ្យអ្នកបើកបររបស់ខ្លួនបើកគេចខ្លួនពីកន្លែងកើតហេតុនៅក្នុងស្រុកកៀនស្វាយ ខេត្តកណ្ដាល បន្ទាប់ពីរថយន្តរបស់លោកបានបុកប្ដីប្រពន្ធវ័យក្មេងជិះម៉ូតូមួួយគ្រឿងបណ្ដាលឲ្យស្ត្រីជាប្រពន្ធស្លាប់ និងបុរសជាប្ដីរងរបួសធ្ងន់។
មាត្រា៣៦នៃច្បាប់ចរាចរណ៍ហាមឃាត់ “អ្នកប្រើប្រាស់ផ្លូវទាំងអស់” ដែលពាក់ព័ន្ធនឹងគ្រោះថ្នាក់ចរាចរណ៍តាមដងផ្លូវមិនឲ្យចាកចេញពីកន្លែងកើតហេតុដោយគ្មានការអនុញ្ញាតពីនគរបាលចរាចរឡើយ។ គេមិនអាចទាក់ទងក្រុមមន្ត្រីនៅមន្ទីរសេដ្ឋកិច្ច និងហិរញ្ញវត្ថុបានទេ៕ សារុន