30 C
Phnom Penh

គណបក្ស​ជាប់ឆ្នោត​ទាំងពីរ​បន្ត​ការ​ចរចា​អំពី​ភាព​ទាល់​ច្រក​ន​យោ​បាយ​ឡើងវិញ

ដោយ ឌឹ ខេមបូឌា ដេលី

បទវិភាគ

យោងតាម​លោក គួយ ប៊ុនរឿន សមាជិក​សភាជាប់ឆ្នោតគណបក្ស​សង្គ្រោះជាតិ​បាន​ឲ្យដឹង​ថា ការ​ចរចា​ដ៏អូសបន្លាយ​រវាង​គណបក្ស​ប្រជា​ជនកម្ពុជានិង​គណបក្ស​សង្គ្រោះជាតិ​អំពី​ភាព​ទាល់ច្រក​នយោបាយ​ក្រោយ​ការ​បោះឆ្នោត ​បាន​បន្តឡើង​វិញកាលពី​ម្សិល​មិញ​​​​ដោយ​​​មាន​​​ជំនួប​រយៈ​ពេល​មួយ​ម៉ោង​ក្នុងរាជ​ធានី​ភ្នំពេញ​រវាង​សមាជិក​ជាន់​ខ្ពស់​នៃ​គណបក្ស​ទាំង​ពីរ​។

លោក​ គួយ ប៊ុន​រឿន បាន​មាន​ប្រសាសន៍​ថា លោក​បាន​ជួប​ប្រជុំ​ជាមួយ​លោក​ ព្រំុ សុខា រដ្ឋ​លេខាធិការ​ក្រសួង​មហាផ្ទៃ​មក​ពី​គណបក្ស​ប្រជាជន​កម្ពុជា​នៅ​ទី​កន្លែង​មួយ​ក្នុ​ងរាជ​ធានី​ភ្នំពេញ​ដើម្បី​បន្ត​ការ​ចរចា​ឡើង​វិញ​ បន្ទាប់​ពី​គណបក្ស​ទាំង​ពីរ​ជិត​ឈាន​ដល់​ការ​ព្រម​ព្រៀង​គ្នា​កាល​ពី​ដើម​ខែ​មុន​។

លោក គួយ ប៊ុនរឿន បាន​មាន​ប្រសាសន៍​ថា “វា​ជា​ជំនួប​រយៈ​ពេល​ប្រហែល​មួយ​ម៉ោង​ ដែល​យើង​បាន​ផ្លាស់ប្ដូរ​យោបល់​គ្នា​ទាក់ទង​កំណែ​ទម្រង់​ការ​បោះឆ្នោត​​១៤​ចំណុច ដែល​គណ​បក្ស​ទាំង​ពីរ​បាន​ព្រម​ព្រៀង​គ្នា​ក្នុង​ជំនួប​មុនៗ ប៉ុន្តែ​យើង​មិន​បាន​និយាយ​អ្វី​លម្អិត​ច្រើន​អំពី​ចំណុច​នីមួយ​ៗទេ ពីព្រោះ​វា​ជា​ជំនួប​ក្រៅ​ផ្លូវ​ការ​”។

គេ​មិន​អាច​ទាក់ទង​លោក​ ព្រុំ​ សុខា ដើម្បី​បញ្ជាក់ឲ្យបាន​លម្អិត​ពី​ជំនួប​នេះ​បាន​ទេ​។ ការ​ចរចា​​​ជា​លក្ខណៈ​ឯកជន​ជាច្រើន​លើក​រវាង​លោក​ ព្រុំ សុខា និង​លោក​ សុន ឆ័យ ប្រធានក្រុម​តំណាងរាស្ត្រគណបក្ស​សង្គ្រោះជាតិកាលពី​ដើម​ឆ្នាំនេះបាន​ឈានដល់ការ​សន្ទនាតាម​ទូរ​ស័ព្ទដោយផ្ទាល់​រវាងលោក​នាយករដ្ឋមន្ត្រី ហ៊ុន សែន និង​លោក សម រង្ស៊ី មេដឹក​នាំ​គណ​បក្ស​ប្រឆាំង​កាលពី​ដើមខែមុន។

មេដឹកនាំទាំងពីរបាន​លើកឡើងថា អ្វីដែលនៅសេសសល់ដើម្បី​បញ្ចប់​ភាព​ទាល់ច្រក​ក្រោយ​ការ​បោះឆ្នោតនោះ​គឺត្រូវ​ជ្រើសរើសកាលបរិច្ឆេទថ្មី​សម្រាប់​ការបោះឆ្នោត​ជាតិ​លើក​ក្រោយ ប៉ុន្តែ​លោក​ សម រង្ស៊ី បាន​ច្រានចោល​សំណើរបស់លោក ហ៊ុន សែន ជាសាធារណៈទាក់ទងការបោះឆ្នោត​នៅខែកុម្ភៈឆ្នាំ២០១៨។

លោក គួយ ប៊ុនរឿន បាន​មាន​ប្រសាសន៍ថា លោកនិង​លោក ព្រុំ សុខា បាន​យក​ឯកសារ​ជាលាយលក្ខណ៍អក្សរ​សម្រាប់ជំនួបកាលពី​ម្សិលមិញ ក្នុងបំណង​​​​ដាក់​​​បញ្ចូល​​​ខ្លឹម​​​សារ​នៃការ​ព្រមព្រៀង​កាលពី​ខែមុន​រវាង​លោក ហ៊ុន សែន និង​លោក សម រង្ស៊ី ជាលាយ​លក្ខណ៍​អក្សរ។ លោក គួយ ប៊ុនរឿន បាន​មានប្រសាសន៍ថា “យើង​បាន​បង្ហាញ​ឯកសារ​ព្រាងរបស់យើង​ ហើយ​ពួកគេ​បង្ហាញ​ឯកសារ​ព្រាង​របស់ពួកគេ ប៉ុន្តែ​យើង​មិន​បាន​ដោះដូរ​ឯកសារ​ព្រាង​របស់​យើង​ទេ”។ លោក​បាន​បដិសេធ​មិន​និយាយ ថាតើ​ការចរចា​នឹង​បន្តធ្វើនៅពេល​នោះឡើយ៕សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស