នគរបាលបានឲ្យដឹងថា រថយន្តស៊េរីទំនើបមួយគ្រឿងបានបុកម៉ូតូមួយគ្រឿងនិងធ្វើឲ្យស្ត្រីម្នាក់រងរបួសធ្ងន់នៅលើមហាវិថីព្រះសីហនុ ក្នុងរាជធានីភ្នំពេញនៅរំលងអធ្រាត្រចូលថ្ងៃម្សិលមិញ ខណៈដែលបើករត់ក្រោយកើតមានគ្រោះថ្នាក់ចរាចរណ៍តិចតួច។
យោងតាមលោក សែម គន្ធា នាយរងការិយាល័យនគរបាលចរាចរណ៍រាជធានីភ្នំពេញបានឲ្យដឹងថា រថយន្តម៉ាកឡិចស៊ីសព៌ណខ្មៅមួយគ្រឿងបានបុករថយន្តកាមរីមួយគ្រឿង ដែលចតចោលតាមផ្លូវនៅម៉ោងប្រហែលជា១រំលងអធ្រាត្រនៅក្បែរផ្សារទំនើបឡាក់គី មុនពេលជ្រុលទៅបុកម៉ូតូមួយគ្រឿងដែលដឹកមនុស្សបីនាក់។
លោក គន្ធា បានមានប្រសាសន៍ថា “ខ្ញុំបានទៅមន្ទីរពេទ្យឯកជនមួយ ហើយបានឃើញមនុស្សរងរបួសទាំងនៅទីនោះ ប៉ុន្តែជនសង្ស័យរត់បាត់ទៅហើយ”។ លោកបានមានប្រសាសន៍ថា “រថយន្តដែលបង្កគ្រោះថ្នាក់នេះ បានបុកចំហៀងរថយន្តមួយគ្រឿងដែលចតចោលនៅលើផ្លូវ បណ្ដាលឲ្យបែកកញ្ចក់ខាងឆ្វេង។ រថយន្តនោះមិនបានឈប់ឡើយ ហើយបន្តបើកទៅមុខទៀតរហូតដល់ជ្រុលទៅបុកម៉ូតូមួយគ្រឿង ដែលដឹកស្ត្រីពីរនាក់ និងបុរសម្នាក់”។
រូបភាពនៃការបុកនេះដែលបង្ហោះតាមហ្វេសប៊ុក បង្ហាញពីបុរសម្នាក់ពាក់វ៉ែនតាប្រវេប្រវាតោងចេញពីរថយន្តឡិចសុីស ដែលក្រឡាប់ផ្អៀង។ លោក គន្ធា បានឲ្យដឹងថា “កញ្ញា គឹមចាន់ រចនាពេជ្រស្រីនាង អាយុ១៨ និងបុរសឈ្មោះ កែវ រតនា អាយុ១៩ឆ្នាំ បានរងរបួសស្រាល។ ត្រគាក និងជើងរបស់កញ្ញា ជា ស្រីលក្ខណ៍ រងរបួសធ្ងន់ ហើយនាងត្រូវបានបញ្ជូនទៅមន្ទីរពេទ្យឯកជនមួយ”។ លោក គន្ធា បានមានប្រសាសន៍ថា នគរបាលកំពុងតែស៊ើបអង្កេតគ្រោះថ្នាក់នេះ៕ ប៊ុុននី