31 C
Phnom Penh

សាលា​ក្រុង​ព្រ​មាន​ចុង​ក្រោយ​ដល់​អ្នកភូមិ​ដែល​រងការបណ្តេញ​ចេញ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ អ្នក​ភូមិ​​​មួយ​​​ក្រុម​​​មាន​​​គ្នា​​​ប្រហែល​​​២០០​​​នាក់​​​មកពី​​​ខេត្ត​​​ក្រចេះ​​​ បាន​​​បដិ​​សេធ​​​មិន​​​ព្រម​​​ចាក​​​ចេញពី​​​វត្ត​​​មួយ​​​ក្នុងរាជ​ធានីភ្នំពេញ​​​ ជាកន្លែង​​​ដែលពួកគាត់ស្នាក់នៅ​ដើម្បី​ធ្វើការ​​​តវ៉ា​​​ប្រឆាំង​​​នឹង​​​ការ​​​បណ្ដេញ​​​ចេញពី​​​ដីធ្លី ដោយ​​​សារ​​​ក្រុម​​​ហ៊ុន​​​ចម្ការ​​​កៅស៊ូ​​​វៀត​​​ណាម​ខណៈ​​​ដែល​​​អភិបាល​​​រង​​​រាជធានី​​​បាន​​​ព្រមាន​​​ពួកគាត់​​​ថា ​​​អាជ្ញាធរ​​​រាជ​​​ធានី​​​នឹង “អនុវត្ត​​​តាម​ច្បាប់​​​” ប្រសិន​​​បើពួក​គាត់​​​មិន​​​ព្រម​​​ត្រឡប់ទៅ​​​ផ្ទះ​​​របស់​​​ខ្លួនវិញ​​​នៅព្រឹកនេះ​​​ទេ។

អ្នក​ភូមិ​​​មក​ពី​ខេត្ត​​​ក្រ​ចេះ​ ដែល​មាន​ទំនាស់​ជា​មួយ​ក្រុម​ហ៊ុន​​​ចម្ការ​​​កៅស៊ូ​​​វៀត​​​ណាម​ បាន​​​​ស្នាក់​នៅ​ក្នុងវត្ត​​​មួយ​កន្លែង​ក្នុង​រាជ​ធានី​ភ្នំពេញ​​​​​ ដោយ​មាន​ការឃ្លាំ​មើល​ពី​អា​ជ្ញា​ធរ​ ។ ស៊ីវ​ ​ចាន់​​ណា
អ្នក​ភូមិ​​​មក​ពី​ខេត្ត​​​ក្រ​ចេះ​ ដែល​មាន​ទំនាស់​ជា​មួយ​ក្រុម​ហ៊ុន​​​ចម្ការ​​​កៅស៊ូ​​​វៀត​​​ណាម​ បាន​​​​ស្នាក់​នៅ​ក្នុងវត្ត​​​មួយ​កន្លែង​ក្នុង​រាជ​ធានី​ភ្នំពេញ​​​​​ ដោយ​មាន​ការឃ្លាំ​មើល​ពី​អា​ជ្ញា​ធរ​ ។ ស៊ីវ​ ​ចាន់​​ណា

លោក ឃួង ស្រេង អភិ​បាល​​​រង​​​រាជធានី​​​​​​បាន​​​មក​​​ដល់​​​វត្ត​​​សាម​​​គ្គីរង្សី នៅ​​​ម៉ោង​​​ប្រហែល​​​៩​​​ព្រឹក​​​ម្សិលមិញ ជាមួយ​​​មន្ត្រីមួយ​​​ក្រុម​​​ដែល​​​ត្រូវ​​​បាន​​​ចាត់​​​តាំង​​​ឲ្យ​​​មក​​​ស្រង់​​​ព័ត៌មានពីកន្លែងអ្នក​​​ភូមិ​​​រស់​​​នៅ​​​មុនពេល​​​ផ្លាស់មក​​​រស់​​​នៅ​​​លើ​​​ដីដែល​​​មាន​​​វិវាទ​​​ក្នុង​​​ឃុំឃ្សឹម ស្រុក​​​ស្នួល។

លោក ឃួង ស្រេង ​ដែលមាន​​​លោក ខាន់ ចំណាន អភិបាល​​​រង​​​ខេត្ត​​​ក្រចេះឈរ​​​ក្បែរ​​​នោះ បាន​​​ប្រាប់​​​ក្រុម​​​អ្នកភូមិ​​​ថា “ខ្ញុំសូម​​​ជម្រាប​​​ថា បង​​​ប្អូន​​​ទាំង​​​អស់​​​កំពុង​​​រស់​​​នៅ​​​លើ​​​ដីនោះ​​​​​ដោយ​​​ខុស​​​ច្បាប់​​​ ពីព្រោះ​​​វាជាដី​​​របស់​​​រដ្ឋ”។

យោងតាម​​​លោក ខាន់ ចំណាន បាន​​​ឲ្យ​​​ដឹង​​​ថា ​​​បន្ទាប់ពី​​​ស្រង់​​​ព័ត៌មាន​​​​​អ្នក​​​ភូមិ​​​ ក្រុម​​​ការ​​​ងារ​បាន​​​រក​​​ឃើញ​​​ថា អ្នកភូមិ​​​១៤៨​​​នាក់​​​បាន​​​រស់​​​នៅ​​​ក្នុង​​​ខេត្ត​​​កំពង់ចាម មុនពេល​​​ផ្លាស់​​​មក​​​រស់​​​នៅ​​​លើ​​​ដីដែល​​​មានវិវាទ​​​ក្នុង​​​ខេត្ត​​​ក្រចេះ​​​នេះ ហើយ​​​អ្នក​​​ភូមិ​​​៥០​​​នាក់​​​​​មកពី​​​ខេត្ត​​​ក្រចេះ បួ​​​ន​​​នាក​​​់​​​មក​​​ពី​​​ខេត្ត​​​ព្រៃវែង ម្នាក់​​​មកពី​​​ខេត្ត​​​កណ្ដាល និង​​​ម្នាក់​​​ទៀត​​​មកពី​​​ខេត្ត​​​តាកែវ។

លោក ឃួង ស្រេង បាន​​​ប្រាប់​​​ក្រុម​​​អ្នកភូមិ​​​ថា រថយន្ត​​​នឹង​​​មក​​​ដល់​​​នៅ​​​ម៉ោង​​​២​​​រសៀល​​​ដើម្បី​​​ដឹក​​​ពួកគាត់​​​ត្រឡប់​​​ទៅ​​​ស្រុកកំណើត​​​របស់​​​ខ្លួនវិញ​​​ ប៉ុន្តែ​​​ទីបំផុត​​​ផែន​​​ការនេះ​​​ត្រូវ​​​បាន​​​ផ្អាក​ ហើយ​​​​​​គេ​​​បាន​​​ប្រាប់​​​ក្រុម​​​អ្នកភូមិថា ពួកគាត់អាច​​​ស្នាក់​​​នៅ​​​វត្ត​​​នេះ​​​មួយ​​​យប់ទៀត​​​។

កង​​​រាជអាវុធហត្ថ​​​មួយ​​​ក្រុម​​​មាន​​​គ្នា​​​ប្រហែល​​​១០​​​នាក់​​​បាន​​​​​​មក​​​ដល់​​​នៅ​​​ម៉ោង​​​ប្រហែល​​​២​​​រសៀល ប៉ុន្តែ​​​មិន​​​បាន​​​ប្រឈម​​​មុខ​​​ជាមួយ​​​អ្នក​​​ភូមិ​​​ទេ ហើយ​​​បាន​​​ឈរ​​​នៅ​​​ជុំវិញ​​​បរិវេណ​​​វត្ត​​​ពេញ​មួយ​​​រសៀល​​​តែម្ដង​​​។

លោក ឃួង ស្រេង បាន​​​មាន​​​ប្រសាសន៍​​​ថា អាជ្ញាធរ​​​នឹង​​​ត្រឡប់​​​មកវិញ​​​នៅ​​​ថ្ងៃ​​​នេះ ដើម្បី​​​មក​​ដឹក​​​អ្នក​​​ភូមិ​​​ត្រឡប់​​​ទៅវិញ។ “យើង​​​នឹង​​​អនុវត្ត​​​តាម​​​ច្បាប់​​​ប្រសិន​​​បើពួកគាត់​​​មិន​​​​​​ព្រម​​​ត្រឡប់​ទៅវិញ”។

នៅពេល​​​ត្រូវ​​​​​​បាន​​​សួរ​​​ថា តើ​​​អាជ្ញាធរ​​​នឹង​​​ប្រើ​​​ប្រាស់​​​កម្លាំង​​​មក​​​បណ្ដេញ​​​អ្នក​​​ភូមិ​​​ឬយ៉ាង​​​ណា​​​នោះ លោក ឃួង ស្រេង បាន​​​បដិសេធ​​​មិនធ្វើ​​​អត្ថាធិប្បាយ​​​ទេ។

អ្នកភូមិ​​​បាន​​​ស្នាក់​​​នៅ​​​​ក្នុង​​វត្ត​​​នេះ​​​រយៈពេល​​​មួយ​​​សប្ដាហ៍​​​មក​​​ហើយ ខណៈ​​​ដែល​​​ពួកគាត់​​​បាន​​​ធ្វើ​​​យុទ្ធនាការ​ដាក់ញត្តិ​​​នៅការិយាល័យ​​​រដ្ឋាភិបា​​​ល​​​និង​​​ស្ថានទូត​​​នានា​​​ឲ្យ​​​ជួយ​​​ដោះ​​​ស្រាយ​​​វិវាទ​​​បន្ទាប់ពី​​​ក្រុម​​​ហ៊ុន​​​ប៊ិញភឿក២ (Binh Phouc 2) ជាក្រុម​​​ហ៊ុន​​​ចម្ការ​​​កៅស៊ូ​​​របស់​​​វៀតណាម​​​បាន​​​បណ្ដេញពួកគាត់​​​ចេញកាលពីថ្ងៃទី២ ខែឧសភា។

អ្នកស្រី យង់ ផល្លា ​​​អាយុ​​​២៦​​​ឆ្នាំ​​​ដែល​​​បាន​​​និយាយ​​​ថា គាត់​​​​​​មកពី​​​ខេត្ត​​​កំពង់ចាម​​​កាលពី​​​ឆ្នាំ​​​២០០៨ ទៅ​​​រស់​​​នៅ​​​លើ​​​ដី​​​ក្នុង​​​ស្រុក​​​ស្នួល​​​នេះ​​​លើកឡើងថា “ខ្ញុំ​​​នឹង​​​ស្នាក់​​​នៅវត្ត​​​នេះ​​​រហូត​​​ដល់ពួកគេ​​​ប្រគល់​​​ដី​​​ឲ្យ​​​ខ្ញុំវិញ”។​ អ្នក​​​ស្រី​​​បាន​​​និយាយ​​​ថា “ខ្ញុំមាន​​​កូន​​​ពីរ​​​នាក់ ប៉ុន្តែ​​​ម្នាក់​​​បាន​​​ស្លាប់​​​ដោយសារ​​​ខ្ញុំ​​​គ្មាន​​​ប្រាក់ព្យាបាល។ ខ្ញុំព្រួយ​​​បារម្ភ​​​អំពី​​​កូន​​​ខ្ញុំ​​​ដែល​​​នៅ​​​រស់ នោះហើយជា​​​មូល​​​ហេតុ​​​ដែល​​​ខ្ញុំ​​​ទាម​​​ទារ​​​ដីស្រែ​​​របស់​​​ខ្ញុំវិញ”។

ដោយ​​​ប្រើ​​​ពាក្យ​​​ប្រមាថ​​​ជន​​​ជាតិ​​​វៀតណាម អ្នកស្រី​​​ ផល្លា បាន​​​និយាយ​​​ថា “ប្រសិន​​​បើ​​​ពួកគេ​​​អះអាង​​​ថា វា​​​ជាដី​​​របស់រដ្ឋ​​​ ពួកគេ​​​គួរ​​​តែ​​​ប្រគល់​​​ដីនេះ​​​ទៅ​​​ឲ្យ​​​ប្រជា​​​ពល​​​រដ្ឋ​​​ មិន​​​មែន​​​ប្រគល់​​​ទៅ​​​ឲ្យ​​​ក្រុម​​​ហ៊ុន​​​របស់​​​យួនទេ”។

​​​ដោយ​ចាត់​​​ទុក​​​​អ្នកភូមិ​​​​ទាំង​​​នេះ​​ថា ជា “ជន​​​ភៀស​​​ខ្លួន​ក្នុង​​​ប្រទេស​​​នោះ​​​” ​​​កាលពី​​​ថ្ងៃពុធ លោក ឃួង ស្រេង បាន​​​លើក​​​ឡើង​​​ថា អ្នក​​​ភូមិ​​​​ទាំង​​​នេះ​​មិន​​​មែន​​​ត្រឹមតែ​​​មក​​​ទាមទារ​​​ដីរបស់​​​ខ្លួន​​​ទេ ពួកគាត់​​​ថែមទាំង​​​បម្រើ​​​ផល​​​ប្រយោជន៍​​​នយោបាយ​​​គណបក្ស​​​សង្គ្រោះជាតិ​​​ទៀតផង ដែលមាន​​​លោក សម រង្ស៊ី ជា​​​ប្រធាន​​​ បាន​​​គាំទ្រ​​​ដល់​​​ក្រុមនេះ​​​។

លន វឿន អាយុ​​​៤៥​​​ឆ្នាំ​​​បាន​​​បដិសេធ​​​ការ​​​អះអាង​​​នេះកាលពីម្សិលមិញ​​​។ គាត់បាន​​​និយាយថា “យើង​​​គ្រាន់​​​តែមក​​ទាមទារ​​​ដី​​​របស់​​​យើង​​​វិញ​​​តែ​​​ប៉ុណ្ណោះ មិនមែន​​​មក​​​ក្នុង​​​ហេតុ​ផល​​​នយោបាយ​​​ណាមួយ​​​ឡើយ​​​”។

ព្រះតេជគុណ ស៊ាង សុវណ្ណារ៉ា ព្រះចៅអធិការ​​​វត្ត​​​សាមគ្គីរង្សី ​​​បាន​​​មាន​​​សង្ឃដីកាថា​​​ ព្រះ​​​អង្គ​នឹង​​​​​​ប្រឹង​​​ប្រែង​​​ឲ្យ​​​អស់​​​លទ្ធភាព​​​ដើម្បី​​​ការ​​​ពារ​​​ក្រុម​​​អ្នកភូមិ​​​ បើទោះណា​​​ជាលោក  ឃួង ស្រេង​​​ អះអាង​​​ថា ព្រះសង្ឃ​​​បានយល់​​​ព្រម​​​អនុញ្ញាត​​​ឲ្យ​​​អាជ្ញាធរ​​​ “ដឹកពួកគាត់​​​ទៅវិញ​​” នៅ​​​ម៉ោង​​​៨ព្រឹក​​​ថ្ងៃនេះក៏ដោយ។ ព្រះតេជគុណ​​​បាន​​​មាន​​​សង្ឃដីកាថា “យើង​​​នឹង​​​មិន​​​អនុញ្ញាត​​​ឲ្យ​​​អាជ្ញាធរ​​​ដឹកពួកគាត់ទៅ​​​វិញទេ លុះណា​​​តែពួកគេ​​​សរសេរ​​​លិខិត​​​ដោយ​​​មាន​​​បោះត្រា​​​ដើម្បី​​​បង្ហាញថា ពួកគេ​​​ព្រម​​​ផ្ដល់​​​ដីស្រែ​​​ដល់​​អ្នកភូមិទាំង​​​នេះវិញ​​​”៕ សារុន​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស