ប្រធាននាយកដ្ឋានគយ និងរដ្ឋាករ នៅកំពង់ផែស្វយ័តក្រុងព្រះសីហនុ បានឲ្យដឹងកាលពីម្សិលមិញថា ភ្លុកដំរីខុសច្បាប់ទម្ងន់បីតោន ដែលមន្ត្រីកំពង់ផែរឹបអូសបានកាលពីថ្ងៃទី៩ ខែឧសភា មានប្រភពនៅក្នុងប្រទេសកេនយ៉ា ហើយបន្ទាប់នោះត្រូវបានដឹកកាត់តាមប្រទេសម៉ាឡេស៊ីមកកាន់ប្រទេសកម្ពុជា ក្នុងកុងតឺន័រចំនួនពីរ។
អគ្គនាយកដ្ឋានគយ បានធ្វើសន្និសីទសារព័ត៌មានមួយកាលពីម្សិលមិញ ដើម្បីផ្ដល់បច្ចុប្បន្នភាពដំបូង ចាប់តាំងពីថ្ងៃទី១២ ខែឧសភា មក តាមរយៈការស៊ើបអង្កេតលើការរឹបអូសភ្លុកដំរីខុសច្បាប់ ដ៏ធំបំផុតមិនដែលមានពីមុនមក នៅក្នុងប្រទេសកម្ពុជា។ ប៉ុន្តែមន្ត្រីគយមិនបានលើកឡើងថា តើការស៊ើបអង្កេតនេះបានបង្ហាញអត្តសញ្ញាណបុគ្គលណាម្នាក់ឬអ្នកដែលទទួលខុសត្រូវចំពោះភ្លុកដំរីរត់ពន្ធនេះទេ ហើយបានបដិសេធមិនឆ្លើយនឹងសំណួរអំពីអត្តសញ្ញាណរបស់អ្នករត់ពន្ធឡើយ។
លោក គីន លី ប្រធាននាយកដ្ឋានគយនិងរដ្ឋាករនៅកំពង់ផែស្វយ័តក្រុងព្រះសីហនុ បានប្រាប់ក្រុមអ្នកយកព័ត៌មានថា “បន្ទាប់ពីការស៊ើបអង្កេតករណីនេះ យើងបានរកឃើញថា ភ្លុកដំរីទម្ងន់៣.០០៨គីឡូក្រាម ត្រូវបានដឹកជញ្ជូនពីប្រទេសកេនយ៉ា ក្នុងទ្វីបអាហ្វ្រិក”។
លោកបានពន្យល់ថា អាជ្ញាធរកំពង់ផែត្រូវបានរាយការណ៍អំពីកុងតឺន័រនេះ ដោយការិយាល័យទំនាក់ទំនងស៊ើបអង្កេតប្រចាំតំបន់នៃបណ្ដាញអនុវត្តពន្ធគយ ដែលជាទីភ្នាក់ងារសើុបអង្កេតពិភពលោកដោយតាមដានការដឹកជញ្ជូនទំនិញ។
កុងតឺន័រនេះជាកុងតឺន័រដឹកសណ្ដែកពីប្រទេសម៉ាឡេស៊ី ប៉ុន្តែការឆែកឆេរមួយបន្ទាប់ពីកុងតឺន័រនេះមកដល់កំពង់ផែព្រះសីហនុបង្ហាញឲ្យឃើញថា វាជាទំនិញភ្លុកដំរីជាង៥០០ភ្លុក។
ភាគច្រើននៃភ្លុកដំរីទាំងនេះ ដែលត្រូវបានរត់ពន្ធកាត់តាមអាស៊ីភាគអាគ្នេយ៍នេះ មានគោលដៅឆ្ពោះទៅប្រទេសវៀតណាម និងប្រទេសចិន ដែលជាទីផ្សារងងឹតរកចំណូលបានច្រើនសម្រាប់ភ្លុកដំរី ហើយលោក ប៊ុន ជីវ អនុប្រធានការិយាល័យគយនៅកំពង់ផែនេះ បានមានប្រសាសន៍កាលពីម្សិលមិញថា គោលដៅចុងក្រោយរបស់ភ្លុកដំរី កេនយ៉ា នេះ គឺភាគច្រើនមិនមែនជាប្រទេសកម្ពុជានោះទេ។ លោកបានមានប្រសាសន៍ថា “ប្រទេសកម្ពុជាមិនមែនជាប្រទេសគោលដៅសម្រាប់ភ្លុកដំរីនេះទេ”។
ទាំងលោក និងទាំងលោក លី មិនឆ្លើយនឹងសំណួរអំពីក្រុមហ៊ុនដឹកជញ្ជូន Olair Worldwide Logistics ដែលដឹកកុងតឺន័រទាំងនេះ ដែលមានការចុះបញ្ជីការិយាល័យពីរ នៅក្នុងរាជធានីភ្នំពេញ និងមួយនៅក្នុងខេត្តព្រះសីហនុនេះទេ។
ក្រុមហ៊ុននេះត្រូវបានចុះបញ្ជីនៅក្រសួងហិរញ្ញវត្ថុ ដោយមានម្ចាស់ភាគហ៊ុនបីនាក់ ឈ្មោះ សៀង សុខន ឈ្មោះ អៀង ចាន់ថា និងឈ្មោះ ហ៊ុយ សូលី។
ទាំងក្រុមហ៊ុន និងភាគីពាក់ព័ន្ធមិនអាចទាក់ទងបានទេ កាលពីម្សិលមិញ។ ខ្សែទូរស័ព្ទមួយក្នុងចំណោមខ្សែទូរស័ព្ទរបស់ក្រុមហ៊ុននេះ បានភ្ជាប់ទៅផ្នែកទទួលកក់ ឈ្មោះខេមបូឌាន ខន់ទ្រី ក្លឹប (Cambodian Country Club) នៅក្នុងរាជធានីភ្នំពេញ ចំណែកអាសយដ្ឋានដែលបានចុះបញ្ជីមួយនៅលើមហាវិថីកម្ពុជាក្រោមរកមិនឃើញឡើយ”៕ ប៊ុននី