31 C
Phnom Penh

ដី​​​មន្ទីរពេទ្យ​​​ចំការមន​​​ត្រូវ​​​បាន​​​ដាក់​​​ប្រកាស​​​លក់​​​តាម​​​អីុនធើណិត​​​

ដោយ ឌឹ ខេមបូឌា ដេលី

បទវិភាគ

ដី​​​ដែល​​​កាល​​​ពី​​​មុន​​​ជា​​​ទីតាំង​​​មន្ទីរពេទ្យ​​​បង្អែក​​​ខណ្ឌ​​​ចំការ​​​មន​​​ត្រូវ​​​បាន​​​ដាក់​​​ប្រកាស​​​លក់​​​ក្នុង​​​តម្លៃ​​​១២,១លាន​​​ដុល្លារ​​​ កាល​​​ពី​​​ថ្ងៃ​​​សុក្រ​​​ គ្រាន់​​​តែ​​​ប៉ុន្មាន​​​ថ្ងៃ​​​បន្ទាប់ពី​​​មន្ត្រី​​​សុខាភិបាល​​​រាជ​​​ធានីភ្នំពេញ​​​​​​បាន​​​បដិសេធ​​​ថា ដី​​​នេះ​​​នឹង​​​មិន​​​ត្រូវ​​​បាន​​​លក់ទេ​​​។

យោង​​​តាម​​​សេចក្ដី​​​ប្រកាស​​​ក្នុង​​​គេហទំព័រ​​​ផ្សាយ​​​ពាណិជ្ជកម្ម​​​ខ្លី​​​ៗ​​​ Khmer24 បាន​​​ឲ្យ​​​ដឹង​​​ថា ដី​​​នេះ​​​មាន​​​ទំហំ​​​៨គុណ៨០​​​ម៉ែត្រ​​​ និង​​​ត្រូវ​​​បាន​ប្រកាស​​​ដាក់​​​លក់​​​ក្នុង​​​តម្លៃ​​​៣.៨០០​​​ដុល្លារ​​​ក្នុង​​​មួយ​​​ម៉ែត្រ​​​ក្រឡា​​​។ រូប​​​ថត​​​អម​​​សេចក្ដី​​​ប្រកាស​​​នេះ​​​បង្ហាញ​​​ច្បាស់​​​ថា នេះ​​​ជា​​​អគារ​​​មន្ទីរពេទ្យ​​​ និង​​​ដី​​​នៅ​​​ជុំ​​​វិញ​​​នោះ។

ភ្នាក់ងារ​​​អចលនទ្រព្យ​​​ ដែល​​​នៅ​​​ពីក្រោយ​​​សេចក្ដី​​​ប្រកាស​​​នេះ​​​បាន​​​បញ្ជាក់​​​តាម​​​ទូរស័ព្ទ​​​ថា ក្រុមហ៊ុន​​​ឯកជន​​​មួយ​​​ គឺ​​​ជាម្ចាស់​​​ដី​​​ដែល​​​កាល​​​ពី​​​មុន​​​ជា​​​ទីតាំង​​​មន្ទីរពេទ្យ​​​សាធារណៈ​​របស់​​​រដ្ឋ​​​នេះ​​​។ នៅ​​​ពេល​​​សួរ​​​ថា តើ​​​ទីតាំង​​​នោះ​​​មាន​​​អគារ​​​មន្ទីរពេទ្យ​​​ដែរ​​​ឬ​​​អត់​​​នោះ​​​ ភ្នាក់ងារ​​​នោះ​​​បាន​​​និយាយ​​​ថា “បាទ​​​ រដ្ឋ​​​បាន​​​ប្រគល់​​​ដីនោះ​​​ឲ្យ​​​ក្រុមហ៊ុន​​​ឯកជន​​​មួយ​​​សម្រាប់​​​លក់​​​”។

កាល​​​ពី​​​ថ្ងៃ​​​អង្គារ​​​ លោក​​​ សុខ សុឃុន​​​ ប្រធាន​​​មន្ទីរ​​​សុខាភិបាល​​​រាជធានី​​​បាន​​​បដិសេធ​​​ថា មិន​​​មាន​​​ផែន​​​ការ​​​លក់​​​អគារ​​​ដែល​​​ធ្លាប់​​​មាន​​​ការ​​​ផ្ដល់​​​ឲ្យ​​​នូវ​​​សេវាកម្ម​​​កាកបាទ​​​ក្រហម​​​នេះ​​​ទេ។ មន្ទីរពេទ្យ​​​នេះ​​​បាន​​​បិទ​​​ទ្វារ​​​សម្រាប់​​​ជួស​​​ជុល​​​ កាល​​​ពី​​​ឆ្នាំ​​​២០១១ ហើយ​​​បច្ចុប្បន្ន​​​មិន​​​មាន​​​អ្វី​​​នៅ​​​ខាង​​​ក្នុង​​​ទេ​​​។

នៅ​​​ពេល​​​សាក​​​សួរ​​​កាល​​​ពី​​​ថ្ងៃ​​​សុក្រ​​​អំពី​​​មូល​​​ហេតុ​​​ ដែល​​​នំា​​​ឲ្យ​​​មាន​​​ការ​​​ដាក់​​​ប្រកាស​​​លក់​​​ដី​​​នេះ​​​ លោក សុឃុន បាន​​​លើក​​​ឡើង​​​ថា លោក​​​មិន​​​ដឹង​​​រឿង​​​នេះ​​​ទេ។

លោក​​​បាន​​​មាន​​​ប្រសាសន៍​​​ថា “វា​​​ជា​​​ព័ត៌មាន​​​បំផ្លើស​​​មួយ​​​។ មិន​​​មាន​​​ដី​​​សម្រាប់​​​លក់​​​នៅ​​​មន្ទីរ​​​ពេទ្យ​​​នោះ​​​ទេ​​​”។ លោក​​​បាន​​​មាន​​​ប្រសាសន៍​​​បន្ត​​​ទៀត​​​មុន​​​ពេល​​​បដិសេធ​​​មិនធ្វើ​​​សេចក្ដី​​​អត្ថាធិប្បាយ​​​បន្ថែម​​​ថា “ខ្ញុំ​​​ជា​​​ប្រធាន​​​។​​​ម៉េចបាន​​​ជា​​​ខ្ញុំ​​​មិន​​​ដឹង​​​រឿង​​​នេះ​​​? វា​​​មិនមែន​​​សម្រាប់​​​លក់​​​ទេ​​​។ វា​​​នៅ​​​តែ​​​ជា​​​មន្ទីរពេទ្យ​​​ដូច​​​មុន​​​អ៊ីចឹង​​​ បន្ទាប់​​​ពី​​​មាន​​​កា​​​រជួស​​​ជុល​​​រួច​​​”។

ក្នុង​​​រយៈ​​​ពេល​ប៉ុន្មាន​​​ខែ​​​កន្លង​​​មក​​​នេះ​​​ ទីតាំង​​​មិន​​​មាន​​​របង​​​ព័ទ្ធ​​​ជុំវិញ​​​នេះ​​​មិន​​​មានសកម្ម​​​​​​ភាព​​​ច្រើន​​​ទេ​​​ ក៏ប៉ុន្តែ​​​វា​​​ត្រូវ​​​បាន​​​ប្រើប្រាស់​​​សម្រាប់​​​រក្សាទុក​​​បន្លា​​​លួស​​​ជា​​​ច្រើន​​​ ដែល​​​អាជ្ញាធរ​​​យក​​​ទៅ​​​ប្រើប្រាស់​​​ក្នុង​​​ការ​​​បិទ​​​ផ្នែក​​​នានា​​​នៃ​​​មហាវិថី​​​នរោត្តម​​​ អំឡុង​​​ពេល​​​មាន​​​សកម្មភាព​​​តវ៉ា​​​។

អតីត​​​បុគ្គលិក​​​នៅ​​​មន្ទីរពេទ្យ​​​នោះ​​​ ដែល​​​ត្រូវ​​​បាន​​​ផ្ទេរ​​​ទៅ​​​មន្ទីរពេទ្យ​​​បង្អែករាជ​​​ធានី​​​ភ្្នំពេញ​​​បាន​​​ឲ្យ​​​ដឹង​​​ថា ពួក​​​គេ​​​បាន​​​ឮថា មន្ទីរពេទ្យ​​​នោះ​​​ នឹង​​​មិន​​​បើក​​​ដំណើរ​​​ការ​​​ឡើង​​​វិញ​​​ទេ ពីព្រោះ​​​វា​​​ត្រូវ​​​បាន​​​លក់​​​រួច​​​ទៅ​​​ហើយ​​​។

លោក ផៃ ស៊ីផាន​​​ អ្នក​​​នាំពាក្យ​​​ទីស្ដី​​​ការ​​​គណៈ​​​រដ្ឋ​​​មន្ត្រី​​​បាន​​​លើក​​​ឡើង​​​​​​កាល​​​ពី​​​ថ្ងៃ​​​សុ្រ​ក​​​ថា លោក​​​ក៏​​​ឆ្ងល់​​​អំពីអគារ​​​នោះ​​​ផង​​​ដែរ។ លោក​​​បាន​​​មាន​​​ប្រសាសន៍​​​ថា “រឿង​​​នោះ​​​ខ្ញុំ​​​មិន​​​ច្បាស់​​​ទេ​​​ថា តើ​​​វា​​​ជា​​​របស់​​​កាកបាទ​​​ក្រហម​​​នៃ​​​ក្រសួង​​​សុខាភិបាល​​​ ឬ​​​ក៏​​​ជា​​​របស់​​​សាលា​​​រាជធានីភ្នំពេញ​​​។ វា​​​ប្រហែល​​​ជា​​​ត្រូវ​​​បន្ត​​​​​​ជួល​​​ពី​​​ភាគី​​​ឯក​​​ជន​​​មួយ​​ ក៏​​​មិន​​​ដឹង​​​”។ មន្ត្រី​​​ក្រសួង​​​សុខា​​​ ភិបាល​​​និង​​​សាលា​​​រាធានីភ្នំពេញ​​​មិន​​​អាច​​​ទំនាក់​​​ទង​​សុំ​​​ធ្វើ​​​សេចក្តី​​​ អត្ថាធិប្បាយ​​​បាន​​​ទេ​​​៕ ប៊ុននី

(រាយការណ៍​​​បន្ថែម​​​ដោយ​​​ Lauren Crothers)​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស