32 C
Phnom Penh

តំណាង​រាស្ត្រ​​​មក​ពី​គណបក្ស​ប្រជាជន​កម្ពុជា​​រិះ​គន់​ការ​អនុវត្ត​ច្បាប់​ព្រៃ​ឈើ​

ដោយ ឌឹ ខេមបូឌា ដេលី

បទវិភាគ

សេចក្តី​ព្រាង​ច្បាប់​ចំនួន​ពីរ​ស្តី​ពី​កំណែ​ទម្រង់​ប្រព័ន្ធ​តុលាការ​ ត្រូវ​បាន​រដ្ឋ​សភា​ឯក​បក្ស​អនុម័ត​យ៉ាង​ងាយស្រួល​កាល​ពី​ម្សិល​មិញ ប៉ុន្តែ សម័យ​ប្រជុំ​នេះ​​ត្រូវ​​បាន​ផ្តោត​ការ​ចាប់​​អារម្មណ៍​ខ្លាំង​​លើ​ការ​រិះ​គន់​របស់​តំណាង​រាស្ត្រ​ថ្មី​ថ្មោង​​មួយ​រូប ចំ​ពោះ​ការ​អនុវត្ត​ច្បាប់​ព្រៃ​ឈើ​ធូររលុង​នៅ​ក្នុង​ខេត្ត​ស្ទឹង​ត្រែង​។​

សម័យ​ប្រជុំ​សភា​ពេញ​អង្គ​លើក​ទី​៣​ ដែល​ឈាន​ចូល​ដល់​ថ្ងៃទី​៤​ និ​ង​ដែល​តំណាង​រាស្ត្រ​ជាប់ឆ្នោត​ទាំង​៥៥រូប​របស់​គណបក្ស​សង្គ្រោះ​ជាតិ​បន្ត​ធ្វើ​ពហិការ​មិន​ចូល​រួម​ដោយ​អះ​អាង​ថា ការ​បោះ​ឆ្នោត​ជាតិ​កាល​ពី​ឆ្នាំ​២០១៣​​មាន​ការ​លួច​បន្លំ​នេះ​ តំណាង​រាស្ត្រ៦៥​រូប​មក​ពី​គណ​បក្ស​ប្រជា​ជន​កម្ពុជា​ដែល​មាន​វត្ត​មាន បាន​អនុម័ត​សេចក្តី​ព្រាង​ច្បាប់​ស្តី​ពី​លក្ខ​ន្តិកៈ​​ចៅក្រម​ និង​ព្រះ​រាជ​អាជ្ញា​ និង​ច្បាប់​ស្តី​ពី​ឧត្តម​ក្រុម​ប្រឹក្សា​នៃ​អង្គ​ចៅ​ក្រម​ជា​ឯកច្ឆន្ទ។

ប៉ុន្តែ ខណៈ​ដែល​ច្បាប់​ទាំង​ពីរ​នេះ​ត្រូ​វ​បាន​ជំរុញ​ឲ្យ​ចេញ​យ៉ាង​ឆាប់​រហ័ស​តាម​រយៈ​រដ្ឋ​សភា​នោះ​ លោក ឡូយ សុផាត​ អតីត​អភិបាល​ខេត្ត​ស្ទឹង​ត្រែង ​ដែល​បាន​ក្លាយ​ជា​តំណាង​រាស្ត្រ​គណបក្ស​ប្រជា​ជន​កម្ពុជា​សម្រាប់​នីតិកាល​ទី​៥​នេះ​ បាន​លើកឡើង​ពី​ច្បាប់​ផ្សេងទៀត​ដែល​លោក​អះ​អាង​ថា មិន​ត្រូវ​បាន​អនុវត្ត​។

លោក ឡូយ សុផាត បាន​មាន​ប្រសាសន៍​ថា “រដ្ឋាភិបាល​បាន​អនុញ្ញាត​ឲ្យ​សាង​សង់​ទំនប់​វារីអគ្គិសនី​សេសាន​ក្រោម​២ ហើយ​បង្កើត​ច្បាប់​ស្តី​ពី​ការ​សាង​សង់​ទំនប់​នេះ​ និង​ការ​ឈូស​ឆាយ​ធ្វើ​អាង​ស្តុក​ទឹក​ ប៉ុន្តែ អ្នក​ឈូស​ឆាយ​ដី​ធ្វើ​អាង​ស្តុក​ទឹក​បាន​ឆ្លៀត​ឱកាស​កាប់​ឈើ​ និង​បាន​ឲ្យ​អ្នក​ផ្សេង​ទៀត​កាប់​ឈើ​នៅ​ខាង​ក្រៅ​​តំបន់​អាង​ស្តុ​ក​ទឹក​ដើម្បី​យក​ទៅ​លក់​”។

កាល​ពី​ខែ​មីនា​ ឆ្នាំ​២០១៣​ កម្មករ​បាន​ចាប់​ផ្តើម​ឈូស​ឆាយ​ដី​ទំហំ​ ៣៦.០០០ហិកតា​ជុំ​វិញ​ចំណុច​ប្រសព្វ​នៃ​ទន្លេ​សេសាន​ និង​ទន្លេ​ស្រែ​ពក ​ក្នុង​ស្រុក​សេសាន​ ខេត្ត​ស្ទឹងត្រែង ដែល​នឹង​ក្លាយ​ជា​ទំនប់​វារីអគ្គិសនី​សេសាន​ក្រោម​២ កម្លាំង​៤០០មេហ្គាវ៉ាត់​។

ដៃគូ​នៅ​ក្នុង​ការ​សាង​សង់​ទំនប់​នេះ គឺ​ក្រុមហ៊ុន​រ៉ូយ៉ាល់​គ្រុប ជា​ក្រុមហ៊ុន​រួម​ដ៏​ធំ​របស់​កម្ពុជា​ ដែល​មាន​អ្នក​ឧកញ៉ា គិត​ ម៉េង ដ៏​មាន​ឥទិ្ធ​ពល​ជា​ប្រធាន​ និង​ក្រុម​ហ៊ុន​ចិន​ឈ្មោះ Hydrolancang International Energy Co.Ltd. បាន​ទទួល​ការ​អនុញ្ញាត​ឲ្យកាប់ឈើ​ទាំង​អស់​នៅ​លើ​ដី​ដែល​ត្រូ​វ​ឈូស​ឆាយ​ធ្វើ​អាង​ស្តុក​ទឹក ហើយ​យក​ឈើ​ទាំង​នោះ​ទៅ​លក់​។

ប៉ុន្តែ លោក ឡូយ សុផាត បាន​អះ​អាង​នៅ​ក្នុង​រដ្ឋ​សភា​កាល​ពី​ថ្ងៃ​សុក្រ​ថា ក្រុមហ៊ុន​ទាំង​នេះ​បាន​កាប់​ឈើ​ប្រណីត​នៅ​ខាង​ក្រៅ​តំបន់​សម្បទាន​របស់​ខ្លួន ហើយ​យក​វា​ចូល​​ក្នុង​តំបន់​សម្បទាន​ ធ្វើ​ឲ្យ​អាជ្ញាធរ​មិន​អាច​បញ្ជាក់​បាន​ថា ឈើ​ទាំង​នោះ​ជា​ឈើ​ខុស​ច្បាប់​​។

លោក​មាន​ប្រសាសន៍​ទៀត​ថា “នៅ​ក្នុង​តំបន់​នោះ ​ការ​កាប់​ឈើ​គ្មាន​អ្នក​នរណា​គ្រប់​គ្រង​ទេ​។​បុគ្គល​មាន​អំណាច​មួយ​ចំនួន​មិន​គោរព​ច្បាប់​ ហើយ​ឆ្លៀត​ឱកាស​កាប់​ឈើ​ក្នុង​ឧទ្យាន​ជាតិ​វីរ​ជ័យ​ និង​តំបន់​ផ្សេង​ៗ​ទៀត​ រួច​ដឹក​ជញ្ជូន​វា​ចូល​មក​តំបន់​នេះ [ សេសាន២]”។

លោក​ ម៉ាក​ ហាន​ណា (Mark Hanna) ប្រធាន​ផ្នែក​ហិរញ្ញវត្ថុ​នៅ​ក្រុម​ហ៊ុន​រ៉ូយ៉ាល់​គ្រុប​ បាន​មាន​ប្រសាសន៍​ថា ខណៈ​ដែល​ការ​ចាប់ដៃ​គូ​​នេះ​ធ្លាប់​ប្រឈម​នឹង​ការ​ចោទ​ប្រកាន់​​បែប​នេះ​កាល​ពី​លើក​មុន ការ​កាប់​ឈើ​ត្រូវ​បាន​ផ្អាក​ជា​បណ្តោះ​អាសន្ន​កាល​ពី​ខែ​តុលា​ បន្ទាប់​ពី​មាន​សេចក្តី​រាយការណ៍​អំពី​ការ​កាប់​ឈើ​នៅ​ខាង​ក្រៅ​​តំបន់​អាង​ស្តុក​ទឹក​ ហើយ​លោក​មិន​បាន​ដឹង​អំពី​ការ​តវ៉ា​​​ចំពោះ​​ការ​បន្ត​កាប់​ឈើ​ណា​មួយ​ឡើយ។

លោក​​បាន​​មាន​ប្រសាសន៍​ថា ក្រុម​ហ៊ុន​​ទី​៣​មួយ​ទៀត​ដែល​លោក​មិន​ចាំ​ឈ្មោះ​ គឺ​ជា​អ្នក​ទទួល​ខុស​ត្រូវ​ចំពោះ​ការ​ឈូស​ឆាយ​ដី​។ លោក​លើក​ឡើង​ទៀ​ត​ថា “អ្នក​មើល​ការ​ខុស​ត្រូវ​រឿង​នោះ​ស្ថិត​នៅ​ក្នុង​ខេត្ត​ស្ទឹង​ត្រែង​ ហើយ​ពួកគេ​មិន​ចេះ​និយាយ​ភាសា​អង់​គ្លេស​ទេ”។

ឧទ្យាន​ជាតិ​វីរ​ជ័យ​ ដែល​លាត​សន្ធឹង​ពី​ចុង​ភាគ​ឦ​សាន​នៃ​ខេត្ត​រតនគិរី ​ក្បែរ​ខាង​ចូល​ទៅ​ដល់ក្នុង​​ខេត្ត​ស្ទឹង​ត្រែង គឺ​ជា​ព្រៃ​មាន​ទំហំ​ ​៣៣០.០០០ ​ម៉ែត្រ​ក្រឡា​ដែល​លាត​សន្ធឹង​ដល់ព្រំ​ដែន​ជាប់​ប្រទេស​​វៀត​ណាម​ និង​​ប្រទេស​ឡាវ​។ ព្រៃ​នេះ​ត្រូវ​បាន​ការ​ពារ​ពី​អ្នក​កាប់​ឈើ​ ប៉ុន្តែ ជាក់​ស្តែង​ឈើ​ប្រណីត​ត្រូវ​បាន​កាប់​បំផ្លាញ​នៅ​ក្នុង​ឧទ្យាន​ជាតិ​​នេះ​ជា​ញឹក​ញាប់​។

លោក ឡូយ សុផាត បាន​ចោទ​ប្រកាន់​ថា ខណៈ​ដែល​ព្រៃ​អភិរក្ស​នេះ​កំពុង​ទទួល​រង​ការ​កាប់​បំផ្លាញ​ដោយ​សារ​តែ​តំបន់​សម្បទាន​សេសាន​២​គឺជា​តំបន់​សុវត្ថិភាព​មួយ​សម្រាប់​ការ​កាប់​ឈើ​នោះ​ អាជ្ញាធរ​ធ្វើ​ព្រងើយ​ចំពោះ​អ្នក​ដែល​ទទួល​ខុស​ត្រូវ​ច្រើន​​បំផុត​ចំពោះ​ការ​​កាប់​បំផ្លាញ​ព្រៃ​ឈើ​ ហើយ​បែរ​ជា​ផ្តោត​លើ​អ្នក​កាប់​ឈើ​តូច​តាច​ទៅ​វិញ។ លោក​បាន​មាន​ប្រសាសន៍​ថា “យើង​បង្ក្រាប​លើ​ប្រជា​ពល​រដ្ឋ​ ប៉ុន្តែ ឈ្មួញ​ឈើ​ធំ​ៗ​រួច​ខ្លួន​។​ យើង​មាន​តួនា​ទី​ការ​ពារ​ព្រៃ​នេះ​ ប៉ុន្តែ យើង​បង្ក្រាប​ប្រជា​ពល​រដ្ឋ​ដែ​ល​គ្រាន់​តែ​កាប់​ឈើ​នៅ​ក្នុង​តំបន់​ដែល​គ្មាន​ការ​អភិវឌ្ឍ​ន៍​ដើម្បី​ចិញ្ចឹម​គ្រួសារ​​។ ប្រជា​ពល​រដ្ឋ​ទាំង​នេះ​គ្រាន់​តែ​បើ​ប្រាស់​ធន​ធាន​ធម្ម​​ជាតិ​ដើម្បី​ចិញ្ចឹម​ជីវិត​ប៉ុណ្ណោះ​”។

លោក​បាន​លើក​ឡើង​ពី​ករណី​មួយ​មក​​ធ្វើ​ជា​ឧទាហរណ៍ ​ដែល​ក្នុង​នោះ​អ្នក​ភូមិ​មក​ពីស្រុក​ សៀម​ប៉ាង ខេត្ត​ស្ទឹង​ត្រែង ​បាន​ទាក់ទង​មក​លោក​កាល​ពី​ថ្ងៃ​ព្រហស្បតិ៍​ និង​ថ្ងៃសុក្រ​ ដោយ​លើកឡើង​ថា កង​រាជ​អាវុធ​ហត្ថ​ និង​ព្រះ​រាជ​អាជ្ញា​​អម​សាលា​ដំបូង​ខេត្ត​បាន​ដក​ហូត​ឈើ​កាប់​ខុស​ច្បាប់​មួយ​ចំនួន​តូច​ដែល​រក្សា​ទុក​នៅ​ក្រោម​ផ្ទះ​របស់​ពួក​គាត់​។ លោក​បាន​បន្ត​ថា “ពួកគេ​បាន​ដក​ហូត​ឈើ​ពីរ​បី​ដុំ។ ប្រជា​ពល​រដ្ឋ​ទាំង​នោះ​​បាន​ទូរស័ព្ទ​មក​ខ្ញុំ​បណ្តើរ​​យំ​បណ្តើ​រ”។

លោក លី កន នាយ​រដ្ឋ​បាល​ព្រៃ​ឈើ​ស្រុក​សៀម​ប៉ាង​បាន​បញ្ជាក់​ថា កង​រាជ​អាវុធ​ហត្ថ​ និង​ព្រះរាជ​អាជ្ញា​អម​សាលា​ដំបូង​ខេត្ត ប៉ែន សារ៉ាត់​ បាន​ធ្វើ​ការ​ឆ្មក់​បង្ក្រាប​​ដោយ​ដក​ហូត​បាន​ឈើ​ប្រហែល​មួយ​ម៉ែត្រ​គូប​ពី​អ្ន​ក​ភូមិ​ទាំ​ង​នេះ​។ លោក​ក៏បាន​មាន​ប្រសាសន៍​ដែរ​ថា អ្នក​ភូមិ​ទាំង​នោះ​រួម​ជា​មួយ​អ្នក​ភូមិ​ប្រហែល​២០០នាក់ផ្សេង​​ទៀត​បាន​លើក​គ្នា​មក​វាយ​​កម្ទេច​សោ​ទម្លុះ​ចូល​​អគារ​រដ្ឋ​បាល​ព្រៃ​ឈើ​ស្រុក​សៀម​ប៉ាង ដើម្បី​រំដោះ​​ឈើ​ទាំង​នោះ​ គោយន្ត​កន្ត្រៃ​​ពីរ​គ្រឿង និ​ង​ទូក​មួយ​គ្រឿង​ដែល​អាជ្ញាធរ​បាន​រឹប​​អូស​ពី​ពួកគេ​​ពី​មុន យក​ត្រឡប់​ទៅវិញ​។

តែ​ទោះ​ជា​យ៉ាង​ណា លោក​បាន​បដិសេធ​មិន​ធ្វើ​អត្ថាធិប្បាយ​​ទេ​អំពី​ទស្សន​របស់​លោក ឡូយ សុផាត ជុំ​វិញ​កា​រអនុ​វ​ត្ត​ច្បាប់​នៅ​ក្នុង​ខេត្ត​នេះ​។ ចំណែក​ឯ​ព្រះ​រាជអាជ្ញា​ ប៉ែន សារ៉ាត់ មាន​ការ​ជឿ​ជាក់​តិច​តួច​ណាស់​ចំពោះ​ការ​អះអាង​របស់​អតីត​អភិបាល​ខេត្ត​ស្ទឹង​ត្រែង​រូប​នេះ​។ លោក​បាន​លើក​ឡើង​ថា “នេះ​គឺ​ជា​ទស្សន​របស់​គាត់​។ ប៉ុន្តែ អាជ្ញាធរ​ជា​ច្រើន​មាន​ទស្សន​ខុស​ៗ​គ្នា​”៕ សុខុម

(រាយការណ៍​បន្ថែម​ដោយ​ Matt Blomberg)​​​​​​​​​​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស