30 C
Phnom Penh

បុរសម្នាក់ដុត​មិត្តស្រីរបស់ខ្លួន​​​ក្នុង​កាស៊ីណូមួយនៅខេត្តកំពង់ចាម

ដោយ ឌឹ ខេមបូឌា ដេលី

បទវិភាគ

នគរ​​​បាល​​​បាន​​​និយាយ​​​កាលពីម្សិលមិញ​​​ថា ស្ត្រីអាយុ​​​២១​​​ឆ្នាំ​​​ម្នាក់​​​បាន​​​សម្រាក​​​ព្យាបាល​​​នៅ​​​មន្ទីរពេទ្យ​​​ដោយសារ​​​រង​​​របួស​​​ធ្ងន់​​​ធ្ងរ​​​បន្ទាប់ពី​​​បុរស​​​ពីរ​​​នាក់​​​បាន​​​ស្រោច​​​អាល់កុល​​​លើ​​​នាង​​​ហើយ​​​ដុត​​​​​​នៅ​​​កាស៊ីណូមួយ​​​ក្នុង​​​ខេត្ត​​​កំពង់ចាម កាលពី​​​រំលង​​​អធ្រាត្រ​​​ឈាន​​​ចូល​​​ព្រឹក​​​ថ្ងៃ​សុក្រ។

ស្ត្រីរូប​​​នេះ​​ឈ្មោះ វឹង គឹមអេង អាយុ​​​២១​​​ឆ្នាំ ជា​​​អ្នក​​​​​​ចែក​​​បៀ​​​នៅកាស៊ីណូ GMGស្ថិតក្នុង​​​ឃុំត្រពាំង​​​ផ្លុង ស្រុក​​​ពញាក្រែក ស្ថិត​​​នៅ​​​តាម​​​ព្រំដែនវៀតណាម។​​​យោងតាម​​​លោក បែន រ័ត្ន ស្នង​​​ការ​​​នគរ​​​បាល​​​ខេត្ត​​​បាន​​​ឲ្យ​​​ដឹង​​​ថា បន្ទាប់ពី​​​មាន​​​ជម្លោះជាមួយមិត្ត​​​ប្រុស​​​ខ្លួនឈ្មោះ រុន​​​ចំរើន អាយុ​​​២៨​​​ឆ្នាំ​​​ជា​​​ចុង​​​ភៅ​​​នៅ​​​កាស៊ីណូនេះ​​​មក បុរស​​​ឈ្មោះ ចំរើន និង​​​មិត្ត​​​ភក្ដិ​​ឈ្មោះ ពៅ  ពីដែន  អាយុ​​​២៣​​​ឆ្នាំ បាន​​​ដុត​​​នាង​​​នៅ​​​ក្នុង​​​បន្ទប់មួយ​​​ក្នុង​​​ចំណោម​​​បន្ទប់ដេក​​​របស់​​​បុគ្គលិក​​​នៅ​កាស៊ីណូ​​​នេះ។

លោក បែន រ័ត្ន បាន​​​មាន​​​ប្រសាសន៍ថា “បន្ទាប់ពី​​​នាង​​​ក្រចៅ​​​ដៃ​​​មិត្ត​​​ប្រុស​​​របស់​​​ខ្លួនមក​​​ ស្ត្រី​​​រូប​​​នេះ​​​ត្រូវ​​​បាន​​​ស្រោច​​​​​​អាល់កុល​​​លើ ហើយ​​​ដុត​​​តែម្ដង។ នាង​​​បាន​រង​​​ការ​​​លាក​​​មួយ​​​កំណាត់​​​ខ្លួន​​​ឡើង​​​លើ​​​រហូត​​​ដល់​​​ក្បាល​​​។ សក់​​​របស់​​​នាង​​​ត្រូវ​​​បាន​​​ឆេះ​​​អស់​​​”។

លោក​​​ បែន រ័ត្ន បាន​​​មាន​​​ប្រសាសន៍​​​ថា ពីដំបូង ស្ត្រី​​​ឈ្មោះ គឹមអេង ​​​ត្រូ​​​វ​​​បាន​​​បញ្ជូនទៅ​​​ព្យា​បាល​​​នៅ​​​មន្ទីរពេទ្យ​​​បង្អែ​​​ក​​​ស្រុក ប៉ុន្តែ​​​ដោយ​​​សារ​​​របួស​​​នាង​​​ធ្ងន់ធ្ងរពេក​​​ ក្រុម​​​គ្រួសារ​​​បាន​​​បញ្ជូន​​​​នាង​​​ទៅ​​​ព្យាបាល​​​បន្ថែមនៅ​​​ប្រទេសវៀតណាម កាលពីល្ងាច​​​ថ្ងៃសុក្រ​​​។

លោក​​​បាន​​​មាន​​​ប្រសាសន៍ថា “បើ​​​តាម​​​សម្ដីក្រុម​​​គ្រួសារ​​​នាង​​​ ពួកគាត់​​​គ្មាន​​​សង្ឃឹម​​​ថា កូន​​​ស្រី​​​របស់​​​ខ្លួន​​​រួចផុតពីគ្រោះថ្នាក់​​​ដល់​​​ជីវិត​​​ឡើយ ពីព្រោះ​​​នាង​​​ពិបាក​​​ដក​​​ដង្ហើម​​​នៅ​​​ក្នុង​​​មន្ទីរ​​​ពេទ្យ​​​”។ លោក​​​ បែនរ័ត្ន បាន​​​មាន​​​ប្រសាសន៍ថា ពីដំបូង​​​ កាស៊ីណូ​​​ GMG បាន​​​ព្យាយាម​​​លាក់បាំង​​​ហេតុ​​​ការណ៍​​​​​​នេះ ហើយមិន​​​បាន​​​រាយការណ៍​​​ប្រាប់​​​នគរ​​​បាល​​​ឲ្យ​ចុះមក​ពិនិត្យដល់​កន្លែង​កើត​​​មាន​​​បទ​​​ឧក្រិដ្ឋទេ។ លោក​​បានមាន​​​ប្រសាសន៍ថា “កាស៊ីណូ​​​បានព្យាយាម​​​លាក់​​​បាំង​​​ហេតុការណ៍​​​នេះ។

នគរ​​​​បាល​​​ទទួល​​​បានព័ត៌មាន​​​នេះពីក្រុម​​​អ្នកភូមិ​​​ដែល​​​បាន​​​ឃើញ​​​គេ​​​បញ្ជូនជន​​​រង​​​គ្រោះទៅ​​​ប្រទេស​​​វៀតណាម។ នគរ​​​បាល​​​បាន​​​ចាប់​​​ខ្លួន​​​បុរស​​​ឈ្មោះ ចំរើន និង​​​ ពីដែន​​​ នៅ​​​ជិត​​​កាស៊ីណូនេះ​​​កាលពីថ្ងៃ​​​សៅរ៍ បន្ទាប់ពី​​​ពួកគេ​​​ទាំង​​​ពីរ​​​នាក់​​​​​​ត្រូវ​​​បាន​​​រាយការណ៍ថា បាន​​​និយាយ​​​អំពី​​​ការ​​​វាយ​​​ប្រហារ​​​នេះជាមួយ​​​ក្រុម​​​អ្នកភូមិ​​​ ដោយ​​​ព្យាយាម​​​ធ្វើ​​​ឲ្យ​​​អ្នកភូមិ​​​ជឿថា  ស្ត្រីឈ្មោះ គឹមអេង បាន​​​ប៉ុន​​​ប៉ង​​​ធ្វើ​​​អត្តឃាត​​​។​លោក បែន រ័ត្ន បាន​​​មាន​​​ប្រសាសន៍ថា “នគរ​​​បាល​​​បាន​​​ចោទ​​​ប្រកាន់ពួកគេ​​​ពីបទ​​​ប៉ុន​​​ប៉ង​​​មនុស្ស​​​ឃាត​​​”។

យោ​​​ងតាម​​​លោក​​​ ជឹម សេងហុង ស្នង​​​ការ​​​រង​​នគរ​​​បាល​​​ខេត្ត​​​បាន​​​ឲ្យ​​​ដឹង​​​ថា បុរស​​​ទាំង​​​ពីរ​​​នាក់​​​នេះ​​​កំពុង​​​ត្រូវ​​​ឃុំខ្លួន​​​​​​នៅ​​​អធិការដ្ឋាន​​​នគរ​​​បាល​​​ស្រុក​​​ពញាក្រែក។ គេមិនអាច​​​ទាក់ទង​​​កាស៊ីណូ GMG បានទេ៕ សារុន

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស