តំណាងរាស្ត្រជាន់ខ្ពស់គណបក្សប្រជាជនកម្ពុជាមួយរូបបានឲ្យដឹងកាលពីម្សិលមិញថា រដ្ឋសភាបានកោះហៅលោក ស៊ុយ សែម រដ្ឋមន្ត្រីក្រសួងរ៉ែនិងថាមពលមកសាកសួរជុំវិញការអះអាងអំពីការកាប់ឈើខុសច្បាប់នៅជុំវិញការដ្ឋានសាងសង់ទំនប់វារីអគ្គិសនីសេសានក្រោម២ ក្នុងខេត្តស្ទឹងត្រែង។
លោក ជាម យៀប បានមានប្រសាសន៍ថា “សម្ដេចប្រធានរដ្ឋសភាបានចុះហត្ថលេខាលើលិខិតអញ្ជើញលោក ស៊ុយ សែម មកសាកសួរនៅថ្ងៃទី១៩ ខែមិថុនា អំពីការកាប់ឈើនៅទំនប់វារីអគ្គិសនីសេសានក្រោម២ និងបញ្ហាផ្សេងៗទៀត។ យើងបានផ្ញើលិខិតនោះជូនសម្ដេចនាយករដ្ឋមន្ត្រីនៅព្រឹកមិញនេះ ប៉ុន្តែសម្ដេចទើបតែត្រឡប់មកពីក្រៅប្រទេសដូច្នេះសម្ដេចមិនទាន់មានពេលឆ្លើយតបនៅឡើយទេ”។ លោក ជាម យៀប បានមានប្រសាសន៍ថា នេះគឺជាលើកដំបូងហើយដែលរដ្ឋសភាកោះហៅរដ្ឋមន្ត្រីមកសាកសួរក្នុងនីតិកាលទី៥នេះ។
កង្វល់អំពីការកាប់ឈើនៅអាងស្តុបទឹករបស់ទំនប់វារីអគ្គិសនី សេសាន ក្រោម២ត្រូវបានលើកឡើងនៅក្នុងរដ្ឋសភា កាលពីសប្ដាហ៍មុន ដោយលោក ឡូយ សុផាត អតីតអភិបាលខេត្តស្ទឹងត្រែង ដែលឥឡូវនេះជាតំណាងរាស្ត្រគណបក្សកាន់អំណាច។
លោក ឡូយ សុផាត បានប្រាប់សភាកាលពីសប្ដាហ៍មុនថា អាជ្ញាធរកំពុងចំណាយពេលវេលា និងធនធានផ្សេងទៀត ដើម្បីតាមប្រមាញ់អ្នកកាប់ឈើខុសច្បាប់តូចតាច ប៉ុន្តែឈ្មួញកាប់ឈើធំៗកំពុងគេចវេសពីការដាក់ទោស។ លោកបានមានប្រសាសន៍ថា ក្រុមហ៊ុន ដែលទទួលបានសិទ្ធិកាប់រានតំបន់ទំហំ៣៦.០០០ហិកតានៅចំណុចប្រសព្វនៃទន្លេសេកុង និងទន្លេសេសាន ដូចជាក្រុមហ៊ុនរ៉ូយ៉ាល់គ្រុបរបស់ឧកញ៉ា គិតមេ៉ង និងក្រុមហ៊ុនថាមពលអន្តរជាតិហៃត្រូល ឡានកាង (Hydrolancang) របស់ចិននោះកំពុងធ្វើការត្រួតពិនិត្យការកាប់ឈើនៅខាងក្រៅដីសម្បទាននេះ។
សាខារបស់ក្រុមហ៊ុនរ៉ូយ៉ាល់គ្រុប គឺក្រុមហ៊ុន Ang & Associates Lawyer Co.Ltd បានទទួលកិច្ចសន្យាកាប់រានដីនេះ។ លោក ឡូយ សុផាត បានអះអាងថា ក្រុមហ៊ុននេះកំពុងកាប់ឈើនៅក្នុងឧទ្យានវីរៈជ័យ ដែលជាតំបន់ការពារនៅជិតនោះ ហើយបន្ទាប់មកយកឈើដែលកាប់រួចទាំងនោះទៅដាក់ក្នុងតំបន់សម្បទានសេសាន ដូច្នេះហើយវាធ្វើឲ្យគេពិបាករកប្រភពឈឺនោះ។
ការកាប់ឈើបានផ្អាកជាបណ្ដោះអាសន្នកាលពីខែតុលា បន្ទាប់ពីមានសេចក្ដីរាយការណ៍ស្រដៀងគ្នានេះអំពីការកាប់ឈើខុសច្បាប់។ លោក ជាម យៀប បានមានប្រសាសន៍កាលពីម្សិលមិញថា លោក ហ៊ុន ណេង បងប្រុសរបស់លោកនាយករដ្ឋមន្ត្រី ហ៊ុន សែន ត្រូវបានបញ្ជាឲ្យទៅស៊ើបអង្កេតអំពីការអះអាងនេះ ប៉ុន្តែលោកមិនព្រមផ្ដល់ព័ត៌មានលម្អិតទៀតទេ។ កាលពីម្សិលមិញ គេមិនអាចទាក់ទងលោក ហ៊ុន ណេង សុំការអត្ថាធិប្បាយបានទេ៕ គឹមហឿន