27 C
Phnom Penh

វត្ត​សាមគ្គី​រង្សី ​​​ជា​​​​កន្លែង​​​​​​ជ្រក​​​កោន​​​សម្រាប់​​​​អ្នក​រង​គ្រោះ​​​​

ដោយ ឌឹ ខេមបូឌា ដេលី

បទវិភាគ

នៅពេល​​​ដែល​​​អ្នក​​​ភូមិ​​​២០០​​​នាក់​​​មក​​​ពី​​​ខេត្ត​​​ក្រចេះ​​​ ដើរ​​​ចូល​​​ទៅ​​​ក្នុង​​​វត្ត​​​សាមគ្គី​​​រង្សី ដើម្បី​​​រក​​កន្លែង​​​សុវត្ថិភាព​​​សម្រាប់​​​ស្នាក់​​​នៅ​​​កាល​​​ពី​​​ដើម​​​ខែ​​​នេះ​​​ ពួក​​​គេ​​​មិន​​​មែន​​​ជា​​​មនុស្ស​​​ដំបូង​​​​​​ដែល​​​ធ្វើ​​​ដូច្នេះ​​​ទេ​​​។

អ្នក​​​ភូមិ​​​ ដែល​មាន​​​​ទំ​នាស់​ដីធ្លី​មក​ពី​ខេត្ត​​​ក្រចេះ​បន្ត​ការ​ស្នាក់​​​នៅ​វត្ត​​​សាមគ្គី​​​រង្សី ក្នុង​ខណ្ឌ​មាន​ជ័យ​ រាជ​ធានី​ភ្នំពេញ។ ស៊ីវ​ ​ចាន់​ណា
អ្នក​​​ភូមិ​​​ ដែល​មាន​​​​ទំ​នាស់​ដីធ្លី​មក​ពី​ខេត្ត​​​ក្រចេះ​បន្ត​ការ​ស្នាក់​​​នៅ​វត្ត​​​សាមគ្គី​​​រង្សី ក្នុង​ខណ្ឌ​មាន​ជ័យ​ រាជ​ធានី​ភ្នំពេញ។ ស៊ីវ​ ​ចាន់​ណា

អ្នក​​​ភូមិ​​​ ដែល​​​អាជ្ញាធរ​​​បាន​​​ដុត​​​បំផ្លាញ​​​ផ្ទះ​​​របស់​​​ពួក​​​គាត់​​​កាល​​​ពី​​​ប៉ុន្មាន​​​ថ្ងៃ​​​មុន​​​នោះ​​​បាន​​​ដើរ​​​តាម​​​ផ្លូវ​​​ដែល​​​មាន​​​មនុស្ស​​​ច្រើន​ទៅ​​​កាន់​​​វត្ត​​​​​​ដែល​​​ស្ថិត​​​នៅ​​​ជាយ​​​ក្រុង​​​ភ្នំពេញ​​​នេះ។ កសិករ​​​ខេត្ត​​​ក្រចេះ​​​បាន​​​ធ្វើ​​​ដំណើរ​​​មក​​​ទីក្រុង​​​ភ្នំពេញ​​​ដើម្បី​​​សួរ​​​ពី​​​​​​មូល​​​ហេតុ​​​អំពី​​​ការ​​​លក់​​​ដី​​​ ដែល​​​ពួក​​​គាត់​​​កំពុង​​​រស់​​​នៅ​​​និង​​​ធ្វើ​​​កសិកម្ម​​​ ​​ទៅ​​​ឲ្យ​​​ក្រុមហ៊ុន​​​ចម្ការ​​​​​​កៅស៊ូរបស់​​​វៀតណាម​​​។ ពួក​​​គេ​​​មក​​ស្នើ​​​សុំ​​​ឲ្យ​​​រដ្ឋាភិបាល​​​ជួយ​​​រក​​​ដំណោះ​​​ស្រាយ​​​ និង​​​រក​​​កន្លែង​​​ស្នាក់​​​នៅ។

ពួក​​​គាត់​​​និយាយ​​​ថា ពួក​​​គាត់​​​ត្រូវ​​​បា​​​ន​​​ឲ្យ​​​ចាកចេញ​​​ពី​​​វត្ត​​​ចំនួន​​​ពីរ​​​មុន​​​ពេល​​​រក​​​កន្លែង​​​បាន​​​ស្នាក់​​​​​​នៅ​ក្នុង​​​​​វត្ត​​​សាមគ្គី​​​រង្សី​​ ដែល​​​គេ​​​ល្បី​​​ថា ជា​​​កន្លែង​ស្នាក់​​​នៅ​​​សម្រាប់​​​អ្នក​​​ប្រឆាំង​​​​​​នយោបាយ​​​ និង​​​ជន​​​ក្រីក្រ​​​គ្មាន​​​ទី​​​ជម្រក ជា​​​ពិសេស​​មនុស្ស​​​មក​​​ពី​​​កម្ពុជា​​​ក្រោម​​​ ដែល​​​មាន​​​ប្រហែល​​​៦០​​​ភាគ​​​រយ​​​នៃ​​​ព្រះ​​​សង្ឃ​​​គង់​​​នៅ​​​វត្ត​​​នេះ​​​។

កាល​​​ពី​​​១៧​​​ឆ្នាំមុន​​​ ព្រះសង្ឃ​​​ខ្មែរ​​​ក្រោម​​​មួយ​​​អង្គ​​​ព្រះ​​​នាម​​​ យឿង ស៊ីន គឺ​​​ជា​​​មនុស្ស​​​ដំបូង​​​គេ​​​ ដែល​​​បាន​​​បង្កើត​​​វត្ត​​​សាមគ្គី​​​រង្ស៊ី​​​ ពីព្រោះ​​​ព្រះ​​​អង្គ​​​ពិបាក​​​រក​​​កន្លែង​​​គង់​​​នៅ​​​ក្នុង​​​ទីក្រុង​​​ភ្នំពេញ​​​ បន្ទាប់ពី​​​បាន​​​ភៀស​​​​​​ខ្លួន​​​ពី​​​វៀតណាម​​​មក​​​កម្ពុជា​​​កាល​​​ពី​​​ទសវត្សរ៍​​​ឆ្នាំ​​​១៩៨០។ ខ្មែរ​​​ក្រោម​​​ គឺជា​​​ជនជាតិ​​​ខ្មែរ​​​ភាគតិច​​​រស់​​​នៅ​​​ក្នុង​​​តំបន់​​​ភាគ​​​ខាង​​​ត្បូង​​​នៃ​​​ប្រទេស​​​វៀតណាម​​​បច្ចុប្បន្ន​​​ ហើយ​​​ជា​​​រឿយៗ​​​ពួកគាត់​​​ប្រឈម​​​នឹង​​​ការ​​​ដាក់​​​សម្ពាធ​​​ធ្ងន់​​​ធ្ងរ​​​លើ​​​ភាសា  និង​​​សាសនា​​​ព្រះពុទ្ធ ពី​​​សំណាក់​​​រដ្ឋាភិបាល​​​វៀតណាម​​​។

ព្រះ​​​តេជគុណ​​​ ស៊ាង សុវណ្ណារ៉ា ព្រះ​​​ជន្ម​​​៣៤​​​វស្សា​​​ ជា​​​ព្រះ​​​ចៅ​​​អធិការ​​​​​វត្ត​​​សាមគ្គី​​​រង្សី​​​ បាន​​​មាន​​​សង្ឃ​​​ដីកា​​​ថា “ព្រះតេជគុណ​​​ យឿង ស៊ីន បាន​​​​​​ភៀសខ្លួន​​​ពី​​​ការ​​​គាប​​​សង្កត់​​​គ្រប់​​​ប្រភេទ​​​ ដូច​​​ជា​​​ការ​​​សួរ​​​ចម្លើយ​​​ និង​​​ការ​​​ធ្វើ​​​ទារុណកម្ម​​​នៅ​​​កម្ពុជា​​​ក្រោម​​​។ សូម្បី​​​តែ​​​វត្ត​​​ក៏​​​មិន​​​ទទួល​​​ព្រះ​​​អង្គ​​​​​​ដែរ​​​ ពីព្រោះ​​​ព្រះ​​​អង្គ​​​ជា​​​ខ្មែរ​​​ក្រោម​​​”។

ដោយ​​​មិន​​​មាន​​​វត្ត​​​ណាមួយ​​​ព្រម​​​ឲ្យ​​​ព្រះ​​​អង្គគង់​​​នៅ​​​ជា​​​អចិន្ត្រៃយ៍​​​នោះ​​​ព្រះ​​​តេជគុណ យឿង ស៊ីន ដែល​​​បាន​​​ចាប់​​​ផ្ដើម​​​ប្រមូល​​បច្ច័យ​​​ពី​​​សប្បុរស​​​ជន​​​នៅ​ក្នុង​​កម្ពុជា​​​ និង​​​នៅ​​​ក្រៅ​​​ប្រទេស​​​ បាន​​​ទិញ​​​ដី​​​មួយ​​​កន្លែង​​​នៅ​​​ជាយ​​​ក្រុង​​​ក្នុង​​​សង្កាត់​​​ស្ទឹង​​​មាន​​​ជ័យ​​​ ហើយ​​​បាន​​​ចាប់​​​ផ្ដើម​​​កសាង​​​វត្ត​​​នេះ។

ព្រះ​​​តេជគុណ​​​ ស៊ាង សុវណ្ណារ៉ា បាន​​​មាន​​​សង្ឃ​​​ដីកា​​​ពេល​​​គង់​​​នៅ​​ទីធ្លា​​​មួយ​​​នៅ​​​កណ្ដាល​​​អគារ​​​ដែល​​​មិន​​​ទាន់​​​សាង​​​សង់​​​រួច​​​​​ថា “ព្រះ​​​តេជគុណ​​​ យឿង ស៊ីន បាន​​​កសាង​​​វត្ត​​​សាមគ្គី​​​រង្សី ដោយ​​​មិនមាន​​​ការ​​​រើសអើង​​​ចំពោះ​​​ឋានៈ​​​ ឬ​​​ពូជ​​​សាសន៍​​​ឡើយ​​​។ ព្រះ​​​អង្គ​​​បាន​​​កសាង​​​វត្ត​​​នេះ​​​សម្រាប់​​​មនុស្ស​​​អនាថា។ ឈ្មោះ​​​វត្ត​​​នេះ​​​មាន​​​ន័យ​​​ថា ការ​​​បង្រួប​​​បង្រួមក្រោម​​​​​​ពន្លឺ​​​ដ៏​​​មាន​​​រស្មី”។

ទោះ​​​បី​​​ជា​​​វត្ត​​​ជាច្រើន​​​បាន​​​ទទួល​​​ការ​​​​​​បរិច្ចាគ​​​ពី​​​មន្ត្រី​​​រដ្ឋាភិបាល​​​ស្ដុក​​​ស្ដម្ភ​​​ក៏​​​ដោយ​​​ ក៏​​​វត្ត​​​សាមគ្គី​​​រង្សី ដែល​​​យោង​​​តាម​​​ព្រះ​​​សង្ឃ​​​គង់​​​នៅ​​​វត្ត​​​នេះ​​​ បាន​​​រៃ​​​អង្គាស​​​បច្ច័យ​​​ភាគ​​​ច្រើន​​​​​ពី​​​សប្បុរស​​​ជន​​​គណបក្ស​​​ប្រឆាំង។

ព្រះ​​​តេជគុណ​​​ សា៊ង សុវណ្ណារ៉ា ដែល​​​ជា​​​គ្រូ​​​សូត្រ​​​ស្ដាំ​​​  រហូត​​​ដល់​​​ព្រះ​​​ចៅ​​​អធិការ​​​ចាស់​​​សុគត​​​ក្នុង​​​ឆ្នាំ​​​២០១០​​​បាន​​​មាន​​​សង្ឃដីកាថា “​​​នេះ​​​គឺ​​​ជា​​​វិធី​​​តែ​​​មួយ​​​គត់​​​ក្នុង​​​ការ​​​ទទួល​​​បាន​​​បច្ច័យ​​​ពីមនុស្ស​​​រស់​​​នៅ​​​ក្រៅ​​​ប្រទេស​​​ដែល​​​ស្រឡាញ់​​​លទ្ធិ​​​ប្រជា​​​ធិបតេយ្យ​​​ដូច​​​យើង។​​​យើង​​​មិន​​​បាន​​​ទទួល​​​ការ​​​ឧបត្ថម្ភ​​​ពី​​​រដ្ឋាភិបាល​​​ទេ​​​ ទោះ​​​បី​​​ជា​​​យើង​​​គោរព​​​សាសនា​​​របស់​​​ជាតិ​​​ក៏​​​ដោយ”។

ប៉ុន្តែ​​​ទោះ​​​បី​​​ជា​​​ព្រះ​​​ចៅ​​​អធិការ​​​វត្ត​​​មាន​​​សង្ឃ​​​ដីកា​​​ថា វត្ត​​​នេះ​​​មិន​​​ជាប់​​​ពាក់ព័ន្ធ​​​នឹង​​​គណបក្ស​​​ណាមួយ​​​ក៏​​​ដោយ​​​ ក៏​​​វត្ត​​​នេះ​​​មាន​​​ទំនាក់ទំនង​​​ជិត​​​ស្និទ្ធ​​​ជាមួយ​​​គណបក្ស​​​សង្គ្រោះ​​​ជាតិ​​​ ដែល​​​បាន​​​ចូល​​​រួម​​​នៅ​​​ក្នុង​​​ពិធី​​​ជាច្រើន​​​នៅ​​​ក្នុង​​​វត្ត​​​នេះ​​​កាល​​​ពី​​​មុន​​​។

លោក​​​ អ៊ុំ​​​ សំអាន តំណាង​​​រាស្ត្រ​​​ជាប់​​​ឆ្នោត​​​គណបក្ស​​​ប្រឆាំង​​​ ដែល​​​បាន​​​ចុះ​​​ទៅ​​​វត្ត​​​សាមគ្គី​​​រង្សីកាល​​​ពី​​​ម្សិលមិញ​​​ ដើម្បី​​​ជួយ​​​ឧបត្ថម្ភ​​​ដល់​​​អ្នក​​​ភូមិ​​​ខេត្ត​​​ក្រចេះ​​​ បាន​​​មាន​​​ប្រសាសន៍​​​ថា “ខ្មែរ​​​ក្រោម​​​តស៊ូ​​​ ដើម្បី​​​ទឹក​​​ដី​​​របស់​​​ខ្លួន​​​ ហើយ​​​គណបក្ស​​​សង្គ្រោះ​​​ជាតិ​​​ដឹង​​​រឿង​​​នេះ​​​ និង​​​បាន​​​ជួយ​​​វត្ត​​​នេះ​​​”។

លោក​​​ លីវ ឡេក ដែល​​​បាន​​​និយាយ​​​ថា គាត់​​​ត្រូវ​​​បាន​​​បណ្ដុះបណ្ដាល​​​ដោយ​​​ CIA ចន្លោះ​​​ពីឆ្នាំ​​​១៩៦៤ ឆ្នាំ១៩៧២ ឲ្យ​​​ធ្វើ​​​ជា​​​ចារកម្ម​​​ដើម្បី​​​លុប​​​បំបាត់​​​ពួក​​​កុម្មុយនីស្ត​​​នៅ​​​ភាគ​​​ខាង​​​ត្បូង​​​ប្រទេស​​​វៀតណាម​​​នោះ គឺ​​​ជា​​​មនុស្ស​​​ម្នាក់​​​ក្នុង​​​ចំណោម​​​មនុស្ស​​​ដែល​​​បាន​​​ស្នាក់​​​នៅ​​​ទី​​​នោះ​​​។

លោក​​​ ឡេក​​​ ដែល​​​ឥឡូវ​​​នេះ​​​ជា​​​អាចារ្យ​​​វត្ត​​​មាន​​​អាយុ​​​៧៤​​​ឆ្នាំ​​​នៅ​​​វត្ត​​​សាមគ្គី​​​រង្សី​​​បាន​​​និយាយ​​​ថា ​​​គាត់​​​និង​​​ព្រះ​​​តេជគុណ​​​ យឿង ស៊ីន បាន​​​បួស​​​នៅ​​​វត្ត​​​ជិត​​​គ្នា​​​ក្នុង​​​ខេត្ត​​​សុកត្រាង​​​ នៅ​​​ភាគ​​​ខាង​​​ត្បូង​​​ប្រទេស​​​វៀតណាម​​​ និង​​​បាន​​​ធ្វើ​​​ការ​​​ជាមួយ​​​គ្នា​​​ជាភ្នាក់ងារ​​​សម្ងាត់​​​របស់​​​ CIA។

លោក​​​ ឡេក​​​ បាន​​​និយាយ​​​ថា គាត់​​​បាន​​​ភៀស​​​ខ្លួន​​​ចេញ​​​ពី​​​ប្រទេស​​​វៀតណាម​​ដោយ​​​សម្ងាត់​​​នៅ​​​ឆ្នាំ​​​១៩៨៩ រហូត​​​ដល់​​​ឆ្នាំ​​​២០១០ ដែល​​​នៅ​​​ពេល​​​នោះ​​​គាត់​​​បាន​​​ស្នើ​​​សុំ​​​សិទ្ធិ​​​ជ្រក​​​កោន ដែល​​​អាមេរិក​​​បាន​​​បដិសេធ​​​ ហើយ​​​គាត់​​​បាន​​​ឮពាក្យ​​​ចចា​​​ម​​​អារា៉ម​​​ថា វៀតណាម​​​កំពុង​​​ស្វែង​​​រក​​​គាត់​​​។​​​ គាត់​​​បាន​​​និយាយ​​​ថា គាត់​​​មិន​​​ដែល​​​ដឹង​​​ថា មាន​​​សុវត្ថិភាព​​​ទេ ដូច្នេះ​​​នៅ​​​ពេល​​​គេ​​​ហៅ​​​គាត់​​​ឲ្យ​ផ្លាស់ទៅ​​​នៅ​​​វត្ត​​​សាមគ្គី​​​រង្សី គាត់​​​ត្រូវ​​​តែ​​​ទៅ​​​។ លោក​​​ ឡេក បាននិយាយ​​​ថា “មាន​​​ព្រះ​​​ចៅ​​​អធិការ​​​ថ្មី​​​មួយ​​​អង្គ ហើយ​​​មនុស្ស​​​ជា​​​ច្រើន​​​មាន​​​គំនិត​​​ខុសៗ​​​គ្នា​​​ ប៉ុន្តែ​​​គេ​​​បាន​​​អញ្ជើញ​​​ខ្ញុំ​​​ ពីព្រោះ​​​ព្រះ​​​ចៅ​​​អធិការ​​​រូប​​​នោះ​​​ចង់​​​បាន​​​ខ្មែរ​​​ក្រោម​​​”។

គាត់​​​បាន​​​និយាយ​​​ថា ការ​​​ការពារ​​​វត្ត​​​នេះ​​​និង​​​សហគមន៍​​​ខ្មែរ​​​ក្រោម​​​ ជួយ​​​ឲ្យ​​​គាត់​​​ដឹងថា​​​មាន​​​​​សុវត្ថិភាព​​​ ជា​​​ការ​​​ការ​​​ពារ​​​ដែល​​​បាន​​​ធ្លាក់​​​ចុះ​​​បន្តិច​​​បន្តួច​​​ដោយ​​សារ​ការ​​​មក​​​ដល់​​​​​​របស់​​​អ្នក​​​ភូមិ​​​ខេត្ត​​​ក្រចេះ​​​ និង​​​ប្រព័ន្ធ​​​ផ្សព្វផ្សាយ​​​ និង​​​ស្ថានភាព​​​សន្ដិសុខ​​។ គាត់​​​បាន​​​និយាយ​​​ថា “ពីមុន​​​មាន​​​សុវត្ថិភាព​​​ ឥឡូវ​​​នេះ​​​មិន​​​សូវ​​​មាន​​​សុវត្ថិភាព​​​ទេ​​​”។

ប៉ុន្តែ​​​គាត់​​​មិន​​​មាន​​​ការ​​​អាក់​​​អន់​​ចិត្ត​​​ទេ​​​ ពីព្រោះ​​​អ្នក​​​ភូមិ​​​ខេត្ត​​​ក្រចេះ​​​បាន​​​ដើរ​​​ផ្លូវ​​​ដូច​​​គាត់​​​ដែរ​​​ ហើយ​​​ដើរ​​​ផ្លូវ​​​ដូច​​​មិត្តភក្ដិ​​​របស់​​​គាត់​​ គឺ​​​ព្រះ​​​តេជគុណ​​​ យឿង ស៊ីន កាល​​​ពី​​យូរ​​​ហើយ​​​នោះ​​​ដែរ។ គាត់​​​បាននិយាយ​​​ថា “ព្រះ​​​តេជគុណ​​​ យឿង ស៊ីន បាន​​​កសាង​​​វត្ត​​​ដើម្បី​​​គេច​​​វេះ​​​ពីការ​​​គាប​​​សង្កត់។ ព្រះ​​​អង្គ​​​បាន​​​កសាង​​​វត្ត​​​នេះ​​​សម្រាប់​​​ព្រះ​​​អង្គ និង​​​សម្រាប់​​​មនុស្ស​​​គ្រប់​​​គ្នា៕ គឹម​​​ហឿន

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស