31 C
Phnom Penh

អតីត​អគ្គនាយក​ទូរទស្សន៍​ជាតិ​កម្ពុជា​​ចូល​ធ្វើការ​វិញ​បន្ទាប់ពី​លាលែង​ពី​តំណែង​​

ដោយ ឌឹ ខេមបូឌា ដេលី

បទវិភាគ

លោក កឹម គុណវឌ្ឍន៍ អតីត​អគ្គនាយក​របស់​ទូរទស្សន៍​ជាតិ​កម្ពុជា​(ទទក)បាន​វិល​ត្រឡប់​មក​ធ្វើ​ការ​នៅ​ស្ថានីយទូរ​ទស្សន៍​វិញ​ហើយ​កាលពី​ម្សិលមិញ បន្ទាប់ពី​ការ​លាលែង​ពីតំណែង​របស់លោកដែល​ត្រូវ​បាន​ផ្សព្វ​ផ្សាយ​ជាសាធា​រណៈ​​​​យ៉ាង​​​ព្រោង​​​ព្រាត​​​កាលពី​សប្ដាហ៍មុន​។

ប៉ុន្តែ​គេ​នៅ​មិន​ច្បាស់​ថាតើ​លោក​បានវិល​ត្រឡប់មក​វិញកាន់​តួនាទី​អ្វី​​​​នោះ​​​ទេ ដោយ​​​​​​បណ្ដាញ​ព័ត៌មានក្នុង​ស្រុកធ្វើ​​​សេចក្ដី​​​​រាយការណ៍​ថា លោក​ត្រឡប់​មក​កាន់​តួនាទីចាស់​របស់​លោក​ ខណៈ​​​ដែល​​​​អ្នក​ជំនួសលោក​ជា​បណ្ដោះអាសន្ន​បាន​ឲ្យ​ដឹង​ថា ពេល​នេះលោក​​​ជា​ “មន្ត្រី​ជាន់​ខ្ពស់​” មួយរូប​នៅ​ក្រសួង​ព័ត៌មាន​។

គេហទំព័របណ្តាញ​ព័ត៌មាន​ក្នុង​ស្រុកបាន​ចុះ​​​​ផ្សាយ​​​​កាលពី​ម្សិលមិញ​ ដោយ​លើក​ឡើង​ពី​ប្រភព​មិនបង្ហាញឈ្មោះ​មួយ​នៅ​ក្នុង​ស្ថានីយ​នេះ ដោយអះអាង​ថា លោក គុណវឌ្ឍន៍ ត្រូវ​បាន​តែង​តាំង​​ជា​អគ្គនាយក​ជា​ថ្មី។

លោក ប៉ាង ណាត អគ្គនាយក​ស្ដីទី​នៃ​ទូរទស្សន៍​ជាតិ​កម្ពុជា​បាន​បញ្ជាក់កាលពី​ម្សិលមិញ​ថា អតីត​ចៅហ្វាយ​នាយ​របស់​លោក​បាន​វិល​ត្រឡប់​មក​​ធ្វើការ​វិញ​ហើយ ប៉ុន្តែ​បាន​ឲ្យ​ដឹង​ថា លោក​ឈប់​គ្រប់​គ្រង​ព័ត៌មាន​ប្រចាំ​ថ្ងៃទៀត​ហើយ។​​ លោក​បាន​មាន​ប្រសាសន៍​ថា “ការិយាល័យ​របស់​គាត់​​​​​​គឺ​​​​​រក្សា​ទុក​សម្រាប់​គាត់​​​។​ គាត់​​​​បាន​លាលែង​ពីតួនាទី​អគ្គនាយកហើយ​​​​ ប៉ុន្តែ​គាត់​​​​នៅ​តែ​​ជា​មន្ត្រី​ជាន់​ខ្ពស់​មួយ​​​រូប​​​​នៅ​ក្រសួង​ព័ត៌មាន​”។

ទាំង​ក្រសួង​ព័ត៌មាន​ និង​លោក គុណវឌ្ឍន៍ នៅតែ​មិន​​​និយាយ​​​ស្ដី​​​អ្វី​​​ទាំង​​​អស់​​​​ ចាប​់​តំាំង​ពី​អគ្គនាយក​ដែល​បម្រើការ​យ៉ាង​យូរ​ដែល​បាន​ជួយ​បង្កើត​ស្ថានីយនេះឡើង​ក្នុង​ឆ្នាំ​១៩៨៣​  បាន​លាលែង​​ពី​តំណែង​កាលពី​ថ្ងៃទី​១៧ ខែ​ឧសភាមក​​​ ដែល​តាម​ការ​​​អះអាង​​​ថា មក​​​ពី​​​​​​មិន​បាន​ផ្សាយ​បន្ត​ផ្ទាល់​នូវ​ព្រះ​រាជពិធី​ច្រត់​ព្រះ​នង្គ័ល​ប្រចាំឆ្នាំ​។

ទាំង​លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន​ និង​លោក​ គុណវឌ្ឍន៍ មិនអាច​ទាក់​ទង​សុំការ​អត្ថាធិប្បាយ​បានទេ​កាលពីម្សិលមិញ។ ក៏ប៉ុន្តែ​អតីត​អគ្គនាយក​​​​ ទូរទស្សន៍ជាតិ​កម្ពូជារូប​នេះ​​ត្រូវ​បាន​ដក​ស្រង់​សម្ដី​នៅលើ​គេហទំព័រព័ត៌មាន​ ថ្មីថ្មី កាលពីម្សិលមិញ​ ដោយ​និយាយ​ថា លោក​បាន​វិល​ត្រឡប់​មក​កាន់​ការ​ងារ​របស់​ខ្លួន​នៅ​ឯ​ស្ថានីយ​នេះ​​​​វិញ​​​ហើយ​​​ ក្នុង​ឋានៈ​ជា​មន្ត្រី​ម្នាក់​នៃ​ក្រសួង​ព័ត៌មាន​។

លោកបានឲ្យដឹង​ថា “ខ្ញុំ​អង្គុយ​​​ធ្វើការនៅ​ក្នុង​ស្ថានីយ​​ទូរទស្សន៍ជាតិ​កម្ពុជា​ ក្នុង​ឋានៈ​ជា​មន្ត្រីធម្មតា​មួយ​រូប​ប៉ុណ្ណោះ​នៅឯ​ក្រសួង​ព័ត៌មាន​ មិនមែន​ឋានៈ​ជា​អគ្គនាយក​នោះ​ឡើយ”។ លោក​បាន​បន្ថែម​ថា ” ខ្ញុំ​គោរព​​​​តាម​សេចក្ដី​សម្រេច​របស់​លោក​​​រដ្ឋមន្ត្រី​ក្រសួង​ព័ត៌មាន​ដែល​​​ឲ្យ​​​ខ្ញុំ​​​​ឈប់​សម្រាក​រយៈ​ពេល​មួយ​សប្ដាហ៍​ ហើយ​មិន​ដឹង​អ្វី​ទៀត​ឡើយ”។

នៅ​លើ​គេហទំព័រ​របស់​លោក​ កាលពីថ្ងៃសុក្រ លោក គុណវឌ្ឍន៍​​​ បាន​សុំ​ឲ្យ​អ្នក​យក​ព័ត៌មាន​ឈប់​សរសេរ​អំពីការ​លាលែង​ពី​តំណែង​របស់​លោក​ពី​ស្ថានីយ​ទូរទស្សន៍​នេះ​។ លោក​បាន​លើក​ឡើង​ថា ” ខ្ញុំសូម​ឲ្យអស់​លោក​ឈប់​និយាយ​អំពី​ខ្ញុំ​​​ទៀត​​​ទៅ។ ​សូម​មេត្តា​កាសែត​​​ វិទ្យុ និង​ហ្វេស​ប៊ុក​​​​​អាណិត​​​ខ្ញុំ​​​ផង”។

លោក មឿន ឈានណារិទ្ធ នាយក​វិទ្យាស្ថាន​កម្ពុជា​សម្រាប់​ការ​សិក្សា​ផ្នែកព័ត៌មាន​បាន​មាន​ប្រសាសន៍​ថា លោក​មិនភ្ញាក់​ផ្អើល​ទេ​ ប្រសិន​បើ​អតីត​អគ្គនាយក​រូប​នេះ​វិល​មក​កាន់តួនាទី​របស់​ខ្លួនវិញ​នោះ។ លោក​បាន​ឲ្យ​ដឹង​ថា ” កាល​​​ពី​​​ដំបូង​ ខ្ញុំមាន​មោទនភាព​ដែល​​​ប្រព័ន្ធ​​​​ផ្សព្វផ្សាយ​ព័ត៌មាន​រដ្ឋ​​​មួយ​​​នេះ​​​អាច​​​ធ្វើ​​​ជា​​​​គំរូ​ និង​បង្ហា​ញ​ដល់​សាធារណជន​ថា ខ្លួន​​​មាន​​​ការ​ទទួល​ខុស​ត្រូវ​ ក៏​​​ដោយ​​​សារ​​​តែ​​​វា​​​ជា​​​ប្រព័ន្ធ​​​​ផ្សព្វផ្សាយ​ព័ត៌មាន​រដ្ឋ​ វា​គ្មាន​​​អ្វី​​​គួរ​​​ឲ្យ​​​​ភ្ញាក់​ផ្អើល​ទេ ប្រសិន​បើ​គាត់​វិល​មក​វិញ​”។ លោក​បាន​មាន​ប្រសាសន៍​ថា “កន្លង​មក​ មន្ត្រីជា​ច្រើន​ត្រូវ​បាន​ដក​ចេញពី​តួនាទី​របស់​ខ្លួន​ បន្ទាប់ពី​ប្រព្រឹត្ត​ខុស​​ ប៉ុន្តែ​មិន​​​យូរ​​​ប៉ុន្មាន​​​ត្រូវ​បាន​តែង​តាំង​ឡើង​វិញ​ឲ្យ​កាន់​តួនាទី​ជាន់​ខ្ពស់”៕ ប៊ុននី​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស