អ្នកភូមិប្រហែល២០០នាក់ដែលជាប់ពាក់ព័ន្ធក្នុងជម្លោះដីធ្លីជាមួយក្រុមហ៊ុនចម្ការកៅស៊ូវៀតណាមមួយនៅក្នុងខេត្តក្រចេះ កាលពីម្សិលមិញត្រូវបានរារាំងមិនឲ្យដើរក្បួននៅក្នុងរាជធានីភ្នំពេញ ដើម្បីប្រគល់ញត្តិឲ្យលោកនាយករដ្ឋមន្ត្រី ហ៊ុន សែន ឡើយ។
កសិករដែលផ្ទះរបស់ពួកគាត់នៅក្នុងស្រុកស្នួល ត្រូវបានអាជ្ញាធរដុតកាលពីដើមខែនេះ បាននិងកំពុងតែស្នាក់នៅក្នុងវត្តសាមគ្គីរង្សី ក្នុងសង្កាត់ស្ទឹងមានជ័យ ជាយរាជធានីភ្នំពេញ។នៅពេលដែលពួកគាត់ព្យាយាមចេញពីវត្ត ពួកគាត់ជួបនគរបាលប្រឆាំងកុបកម្មប្រហែល៤០នាក់ និងសន្តិសុខខណ្ឌ២០នាក់ ព្រមទាំងលោក ហៀក ចាន់លាង អភិបាលរងខណ្ឌមានជ័យ។
លោក ចាន់លាង បានមានប្រសាសន៍ថា “ខណៈដែលប្រទេសរបស់យើងមានការស្ទះចរាចរណ៍ច្រើន និងការរំខានដល់សណ្ដាប់ធ្នាប់សាធារណៈ យើងមិនអាចអនុញ្ញាតឲ្យអ្នកទាំងនេះដើរក្បួនឡើយ”។ លោកបានបន្ថែមថា លោកនឹងនាំយកញត្តិដែលមានការទាមទារប្រាំពីរចំណុចរបស់គ្រួសារដែលត្រូវបានបណ្ដេញចេញនេះប្រគល់ជូនលោក ហ៊ុន សែន។ លោកបានមានប្រសាសន៍ថា “នៅពេលខ្ញុំទទួលបានព័ត៌មាន ខ្ញុំនឹងឆ្លើយតបទៅអស់លោក”។
ការទាមទារមួយក្នុងចំណោមការទាមទារប្រាំពីរចំណុចនេះគឺថា គេត្រូវប្រគល់ដីឲ្យកសិករវិញ។ លោក ងួន វិបុល តំណាងឲ្យអ្នកភូមិបានមានប្រសាសន៍ថា ប្រសិនបើការទាមទារទាំងនេះមិនត្រូវបានដោះស្រាយទេនោះ អ្នកភូមិនឹងដើរក្បួនទៅកាន់គេហដ្ឋានរបស់លោក ហ៊ុន សែន ដោយមិនខ្វល់នឹងវត្តមាននគរបាលឡើយ។ លោក វិបុល បានឲ្យដឹងថា “ពួកគេបានបំផ្លាញផ្ទះ និងផលដំណាំរបស់យើង។ យើងទុកពេលឲ្យពួកគេប្រាំថ្ងៃ ហើយប្រសិនបើគ្មានការឆ្លើយតបទេនោះ យើងនឹងដើរក្បួនទៅកាន់គេហដ្ឋានរបស់លោកនាយករដ្ឋមន្ត្រី”៕ ប៊ុននី