31 C
Phnom Penh

សាលា​រាជ​ធា​នី​ភ្នំពេញ​កំពុង​ស្វែង​រក​ការ​សហ​ការ​ជា​មួយ​​ក្រុម​ហ៊ុន​ប្រមូល​សំរាម​ទី២​

ដោយ ឌឹ ខេមបូឌា ដេលី

បទវិភាគ

ដោយ​ក្រុម​ហ៊ុន​ស៊ីនទ្រី​ ដែល​ជា​ក្រុម​ហ៊ុន​គ្រប់​គ្រង​​ការ​ប្រមូល​សំរាមក្នុង​​រាជធានី​​មិន​បាន​ដោះ​ស្រាយ​បញ្ហាប្រមូល​សំរាម​ដែល​កាន់​តែ​គរ​ឡើង​យ៉ាង​ខ្លាំងមិនដែលមាន​ពីមុនមក​​ក្នុង​រាជធានីភ្នំពេញប្រកបដោយ​ប្រ​សិទ្ធភាព​នោះ​ សាលា​រាជធានី​បាន​ឲ្យដឹង​កាលពី​ម្សិលមិញ​ថា ខ្លួន​កំពុង​តែ​ស្វែង​រក​ក្រុម​ហ៊ុន​ថ្មីមួយ​ដើម្បី​ឲ្យ​ធ្វើ​ជា​ដៃគូ​ជាមួយក្រុម​ហ៊ុន​កាណាដា​ដ៏​ចម្រូង​ចម្រាសនេះ ​មុនពេល​បញ្ហា​សំរាម​ក្លាយ​ជា​បញ្ហា​ពិបាក​ដោះ​ស្រាយ​។

ក្នុង​ឆ្នាំ​២០០២​ក្រុមហ៊ុន​ប្រមូល​សំរាម​ស៊ីនទ្រី ទទួល​បានកិច្ច​សន្យា​រយៈ​ពេល​៥០​ឆ្នាំ​ ដែល​ផ្ដល់​សិទ្ធិផ្តាច់​មុខ​ក្នុង​ការ​សម្អាត​ក្នុង​​រាជធានីភ្នំពេញ​ ក៏ប៉ុន្តែ​ចាប់​តាំង​ពី​នោះ​មក​​ ក្រុម​ហ៊ុន​នេះ​ត្រូវ​បាន​រិះគន់​ខ្លាំង​ៗ​ថា មិន​មានការទទួល​ខុស​ត្រូវ​ បើទោះ​ជា​មាន​ការ​ព្រមានជា​ផ្លូវ​ការផ្សេងៗ​ និង​សូម្បីតែ​គម្រោង​ដំឡើង​ផ្កាយរណប​សាកលថ្មីមួយ និង​គម្រោង​ចង្អុលផែនទី​តាមប្រព័ន្ធឌីជីថល ដើម្បីជួយក្រុមហ៊ុន​នេះដៅ​ចំណុច​ចោល​សំរាមក៏ដោយ។

លោក អៀង​ អូននី អភិបាល​រង​រាជធានីភ្នំពេញ ត្រូវ​បាន​ដក​ស្រង់​សម្ដី​នៅ​លើ​គេហ​ទំព័រ​របស់​សាលា​រាជធានី​កាលពីម្សិលមិញថា “ក្រុម​ហ៊ុន​ស៊ីនទ្រី ទំនង​ជា​ខ្វះ​សមត្ថភាព​ក្នុង​ការ​ប្រមូល​និង​ការ​គ្រប់​គ្រង​សំរាម​ឲ្យមាន​ប្រសិទ្ធភាព​ និង​ទាន់​ពេល​វេលា​។ ដូច្នេះ ដើម្បី​ដោះ​ស្រាយ​បញ្ហា​សំរាម​​ សាលា​រាជធានី​ភ្នំពេញចង់​បាន​ក្រុម​ហ៊ុនពីរ​សហ​ការ​គ្នា​ដើម្បី​ធ្វើ​ឲ្យ​ការ​ប្រមូល​ និង​គ្រប់​គ្រង​​បញ្ហា​សំរាម​ក្នុង​រាជធានី​​ប្រសើរ​ឡើង​”។

លោក អូននី បានលើកឡើងក្នុង​សារ​នេះ​ថា សាលារាជធានីកំពុង​ស្វែង​រកក្រុម​ហ៊ុន​​ដែល​មាន​បទ​ពិសោធន៍​ក្នុង​ការ​គ្រប់​គ្រង​សំរាម​​ ជាពិសេស​​ក្រុម​ហ៊ុន​ដែល​មានជំនាញ​ខាង​​បែង​ចែក​និង​កែច្នៃសំរាម ​មុនពេល​សំរាម​ត្រូវ​បាន​ចោល​នៅ​ទីចាក់​សំរាម ​។ លោកបាន​មាន​ប្រសាសន៍ថា ទីចោល​សំរាម​ក្នុង​ខណ្ឌដង្កោ​អាច​ពេញ​នៅ​ឆ្នាំ​ក្រោយ ហើយទី​ចាក់​សំរាម​ថ្មី​មួយ​នឹង​ត្រូវ​បង្កើតឡើង​​។

គេហទំព័រ​របស់​សាលា​រាជធានី​បាន​រាយការណ៍ថា ក្រុម​មន្ត្រី​បាន​ជួប​ជាមួយ​តំណាង​របស់​ក្រុម​ហ៊ុន​ជប៉ុនមួយ​ឈ្មោះ KouaCorporation​ រួច​ហើយ​ និង​បាន​ដក​ស្រង់​សម្ដី​របស់​នាយក​ក្រុម​ហ៊ុន​ឈ្មោះ យូស៊ូកិ អូគំ (YusukeOkum) ដោយ​លើក​ឡើង​ថា ក្រុម​ហ៊ុន​នេះ​បាន​ធ្វើ​ការ​ជាមួយ​ទីភ្នាក់​ងារ​សហប្រតិបត្តិការ​អន្តរជាតិ​ជប៉ុន​ហៅកាត់​ថា JICA នៅ​ក្នុង​ប្រទេស​​កម្ពុជា​ចាប់​ពីឆ្នាំ​២០០៣​មក​។

គ្មាន​កំណត់ត្រា​​​អំពី​​ឈ្មោះក្រុម​ហ៊ុននេះ​តាមអុីនធើណិត​​ទេ ប៉ុន្តែ​ក្រុមហ៊ុន​គ្រប​់​គ្រង​សំរាម​ជប៉ុន​មួយ​ឈ្មោះ Kao​ Group បាន​សហការ​​ជាមួយ​នឹង​ JICA។ យោង​តាម​គេហទំព័រ​របស់​ក្រុម​ហ៊ុន​នេះ​ បាន​ឲ្យ​ដឹង​ថា ខ្លួន​មាន​ជំនាញ​ខាង​កែច្នៃ​​សំរាម និង​ប្រើ​ប្រាស់​ឡើង​វិញ​​ដើម្បី​កាត់​បន្ថយ​ចំនួន​ទីចាក់​សំរាម​ចុង​ក្រោយ ថយ​ចុះ​មក​ជិត​ដល់​ចំណុច​សូន្យ​តាម​​ដែល​​អាច​ធ្វើទៅបាន​។

កាលពី​ម្សិលមិញ លោកស្រី សេង សូឡាឌី មន្ត្រីកម្មវិធី​ផ្នែក​ទំនាក់ទំនង​សាធារណៈនិង​​កិច្ច​ការ​បណ្ដុះ​បណ្ដាល​​របស់ JICA បាន​បដិសេធ​មិនធ្វើ​អត្ថាធិប្បាយ​​អំពីឈ្មោះ​ក្រុម​ហ៊ុន​នេះ​ និង​ថា តើ​អង្គការ​របស់​លោកស្រី​ពាក់ព័ន្ធ​ក្នុង​ការ​ចរចា​ដែរ​ឬអត់​នោះទេ​។

លោក ឡុង ឌីម៉ង់ អ្នក​នាំពាក្យ​សាលា​រាជធានី​ភ្នំពេញ បានមាន​ប្រសាសន៍​កាលពី​ម្សិលមិញ​ដែរ​ថា ព័ត៌មាន​​អំពី​ការ​ប្រមូល​សំរាម​ដែល​បង្ហោះ​នៅ​លើ​វិបសាយ​សាលា​រាជធានី​ គឺ​មាន​​កំហុស​ឆ្គង​។ អ្នក​នាំពាក្យ​រូប​នេះ​បាន​ឲ្យ​ដឹង​ថា ក្រុម​ហ៊ុន​ស៊ីនទ្រី បាន​ទទួល​សិទ្ធិ​ផ្ដាច់​មុខ​ក្នុង​ការ​ប្រមូល​សំរាម​ក្នុង​រាជធានី​។

លោក​បាន​បន្ថែម​ថា “តាម​ពិត​គឺ​ថា សាលា​រាជធានី​ភ្នំពេញ​កំពុង​តែ​ស្វែង​រក​ក្រុម​ហ៊ុន​ឯកជន​ដែល​ចាប់​អារម្មណ៍​ធ្វើការ​ជាមួយ​យើង​ក្នុង​ការ​គ្រប់​គ្រង​សំរាម​នៅ​ឯ​ទី​ចាក់​​សំរាម​។ មាន​ន័យ​ថា យើង​ត្រូវ​ការ​ដៃគូ​មួយ​សម្រាប់​កម្មវិធី​កែ​ច្នៃ​សំរាម​ មិនមែន​​សហការ​ជាមួយ​ក្រុម​ហ៊ុន​ស៊ីនទ្រី ក្នុង​ការ​ប្រមូល​សំរាម​ឡើយ​”។ លោក​បាន​មាន​ប្រសាសន៍ថា ក្រុម​ហ៊ុន​មួយ​ចំនួន​ដែល​ចាប់​អារម្មណ៍​ក្នុង​ការដាក់​ពាក្យ​សម្រាប់​គម្រោង​កែច្នៃ​សំរាម​មានដូច​ជា​​មក​ពី​ប្រទេស​បារាំង ម៉ាឡេស៊ី វៀត​ណាម​ និង​ជប៉ុន។

លោក ឌីម៉ង់ បាន​​បន្ថែ​ម​ថា ក្រុម​ហ៊ុន​ស៊ីនទ្រី នឹង​​នៅ​តែ​រង​ការ​ដាក់​សម្ពាធ​នៅឡើយ​​ដើម្បី​ធ្វើ​ឲ្យ​សេវា​របស់​ខ្លួន​ប្រសើរ​ឡើង​ ជាពិសេស​បង្កើន​ចំនួន​រថយន្ត​ដែល​មិនគ្រប់​គ្រាន់​សម្រាប់​ឆ្លើយ​តប​ទៅនឹង​ចំនួន​ប្រជា​ពល​រដ្ឋ​ក្នុង​រាជ​ធានីភ្នំពេញ​​នៅពេល​នេះ​៕ ប៊ុននី​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស