កាលពីម្សិលមិញ មានការពិភាក្សាអំពីការរៀបចំគម្រោងតម្កល់ព្រះអដ្ឋិធាតុនៃព្រះបរមរតនកោដ្ឋសម្តេចឪ នរោត្តម សីហនុ នៅក្នុងបរិវេណប្រាសាទព្រះកែវមរកត ក្នុងព្រះបរមរាជវាំង ដែលខុសទំនៀមទម្លាប់បុរាណ ដោយសារតែព្រះបរមអដិ្ឋធាតុនៃព្រះមហាក្សត្រមុនៗត្រូវបានតម្កល់ក្នុងព្រះចេតិយមួយលើកំពូលភ្នំឧដុង្គ។
មន្ត្រីព្រះបរមរាជវាំង និងមន្ត្រីរដ្ឋាភិបាលបានជួបប្រជុំនៅឯសាលសន្និសីទចតុមុខក្នុងរាជធានីភ្នំពេញដើម្បីពិភាក្សាអំពីការដង្ហែព្រះបរមអដ្ឋិធាតុសម្តេចឪ ដែលបានចូលទិវង្គតក្នុងក្រុងប៉េកាំង នាខែតុលា ឆ្នាំ២០១២ និងដែលត្រូវបានថ្វាយព្រះភ្លើងក្នុងរាជធានីភ្នំពេញនាខែកុម្ភៈ ឆ្នាំ២០១៣។
ក្រោយពីកិច្ចប្រជុំដែលមានការចូលរួមពីសំណាក់ឧបនាយករដ្ឋមន្ត្រី សុខ អាន ឧបនាយករដ្ឋមន្ត្រី ម៉ែន សំអន និងឧបនាយករដ្ឋមន្ត្រី យឹម ឆៃលី លោក គង់ សំអុល រដ្ឋមន្ត្រីក្រសួងព្រះបរមរាជវាំងបានមានប្រសាសន៍ថា “ពិធីដង្ហែព្រះបរមអដ្ឋិធាតុនៃព្រះបរមរតនកោដ្ឋទៅតម្កល់ក្នុងព្រះចេតិយនៃបរិវេណប្រាសាទព្រះកែវមរកត នឹងធ្វើឡើងរយៈពេលបីថ្ងៃ គឺថ្ងៃទី១០ ទី១១ និងទី១២ ខែកក្កដា។ [សម្តេចឪ] បានមានព្រះរាជបន្ទូលថា បន្ទាប់ពីព្រះបរមអដ្ឋិធាតុរបស់ព្រះអង្គត្រូវបានតម្កល់ក្នុងព្រះបរមរាជវាំង ព្រះអង្គបានស្នើឲ្យពួកយើងដង្ហែព្រះបរមអដ្ឋិធាតុរបស់ព្រះអង្គទៅកម្កល់ក្នុងព្រះចេតិយមួយក្នុងបរិវេណប្រាសាទព្រះកែវមរកត”។
នៅថ្ងៃទី១នៃព្រះរាជពិធីរយៈពេលបីថ្ងៃនេះ ព្រះសង្ឃនឹងនិមន្តប្រទានធម៌ប្រោះព្រំនិងទទួលចង្ហាន់បិណ្ឌបាត។ នៅថ្ងៃទី២ ព្រះអដ្ឋិធាតុនឹងត្រូវដង្ហែតាមបណ្តោយមហាវិថីព្រះនរោត្តម មហាវិថី ព្រះសីហនុ និងមហាវិថីសុធារស។ នៅថ្ងៃទី៣ គឺជាថ្ងៃតម្កល់ព្រះបរមអដ្ឋិធាតុ នេះបើយោងតាមប្រសាសន៍របស់លោក គង់ សំអុល ។
លោក គង់ សំអុល បានមានប្រសាសន៍ទៀតថា សម្តេចឪ នរោត្តម សីហនុ បានប្តេជ្ញាព្រះទ័យដោយរំឭកដាស់តឿនលោក “ពីរបីដង” ថា ត្រូវយកព្រះអដ្ឋិធាតុព្រះអង្គទៅតម្កល់ក្នុងព្រះចេតិយក្នុងបរិវេណប្រាសាទព្រះកែវមរកត ជាមួយព្រះអដ្ឋិធាតុនៃព្រះបុត្រី គន្ធបុប្ផា ដែលបានចូលទិវង្គតដោយសារមហារីកឈាមក្នុងព្រះជន្ម៤ព្រះវស្សា ក្នុងឆ្នាំ១៩៥២។ លោកបានមានប្រសាសន៍ទៀតថា “ព្រះបរមរតនកោដ្ឋបានកសាងព្រះចេតិយនេះកាលពីប្រហែល៥០ឆ្នាំមុន ហើយព្រះចេតិយនេះមានចំណាស់ណាស់ទៅហើយ ដូច្នេះយើងកំពុងតែជួសជុល ហើយការងារជួសជុលនឹងចប់រួចរាល់ក្នុងរយៈពេលប្រហែលមួយខែ”។
តាមទំនៀមទម្លាប់បុរាណ ព្រះបរមអដ្ឋិធាតុនៃព្រះមហាក្សត្រត្រូវបានបែងចែកជាចំណែក គឺមួយចំណែកតម្កល់នៅលើកំពូលភ្នំឧដុង្គ និងមួយចំណែកទៀតតម្កល់ក្នុងព្រះបរមរាជវាំង ព្រមទាំងនៅក្នុងប្រាសាទព្រះកែវមរកតផងដែរ។ ប៉ុន្តែ កាលពីឆ្នាំមុនព្រះសារីរិកធាតុនៃព្រះពុទ្ធជាម្ចាស់ត្រូវបានចោរលួចពីភ្នំឧដុង្គរួមជាមួយនឹងព្រះអដិ្ឋធាតុនៃព្រះមហាក្សត្រមុនៗផងដែរ។
កាលពីម្សិលមិញ លោក គង់ សំអុល ក៏បានមានប្រសាសន៍ដែរថា លោកសង្ឃឹមថា អាជ្ញាធររាជធានីភ្នំពេញនឹងរារាំងកុំឲ្យមានអ្នករំខានពិធីនេះ។ លោកមានប្រសាសន៍ថា “អ្នកដែលនឹងរំខានដល់ពិធីនេះមិនមែនមានត្រឹមតែតំណាងរាស្ត្រទាំង៥៥រូបនៃគណបក្សប្រឆាំងប៉ុណ្ណោះទេ ក៏នឹងមានព្រះសង្ឃឯករាជ្យ និងប្រជាពលរដ្ឋដែលមានវិវាទដីធ្លីផងដែរ ដូច្នេះយើងចង់ឲ្យអាជ្ញាធររាជធានីភ្នំពេញមេត្តាគិតអំពីបញ្ហានេះ”។
លោក សុខ អាន បានគូសបញ្ជាក់ថា តំណាងរាស្ត្រជាប់ឆ្នោតទាំង៥៥រូបរបស់គណបក្សសង្គ្រោះជាតិបានធ្វើព្រងើយចំពោះការអញ្ជើញឲ្យចូលរួមក្នុងពិធីសម្ពោធព្រះបរមរូបសម្តេចឪក្នុងរាជធានីភ្នំពេញកាលពីឆ្នាំមុន។
ជាក់ស្តែងនៅក្នុងករណីនោះ អាជ្ញាធរបានតម្រូវឲ្យតំណាងរាស្ត្រជាប់ឆ្នោតទាំង៥៥រូបរបស់គណបក្សសង្គ្រោះជាតិស្លៀកសម្លៀកបំពាក់តំណាងរាស្ត្រ ហើយដើម្បីទទួលបានសម្លៀកបំពាក់តំណាងរាស្ត្រ លុះត្រាតែពួកគាត់បញ្ចប់ការធ្វើពហិការមិនចូលសភារបស់ខ្លួននៅពេលនោះ។
លោក សុខ អាន បានមានប្រសាសន៍ បន្ទាប់ពីកិច្ចប្រជុំកាលពីម្សិលមិញនេះថា “តាមបទពិសោធរបស់យើង យើងគួរតែអញ្ជើញពួកគាត់ [ ឲ្យចូលរួមក្នុងពិធីនាខែកក្កដានេះ] ប៉ុន្តែយើងស្នើសុំឲ្យពួកគាត់ មេត្តាកុំបង្កចលាចលដូចនេះម្តងទៀត”។
លោក ឃួង ស្រេង អភិបាលរងរាជធានីភ្នំពេញបានមានប្រសាសន៍ថា អ្នកដែលនឹងត្រូវអញ្ជើញចូលរួមក្នុងពិធីនេះមានប្រហែល៣.០០០នាក់ ហើយបានជំរុញឲ្យអ្នកដែលមានគម្រោងចូលរួម ទុករឿងនយោបាយមួយឡែក។ លោកមានប្រសាសន៍ទៀតថា “សូមគណបក្សទាំងអស់ មេត្តារក្សាភាពស្ងៀមស្ងាត់ដើម្បីព្រះរាជពិធីនេះ”៕សុខុម