26 C
Phnom Penh

មន្ត្រី​ម្នាក់​បដិ​សេធ​ពាក្យ​ចចាម​អា​រ៉ាម​ថា វិទ្យា​ស្ថាន​ពុទ្ធ​សាសន​បណ្ឌិត្យ​លក់ឲ្យ​កាស៊ីណូ​ណាហ្គាវើល

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ មន្ត្រីម្នាក់​​​នៅ​​​ក្រសួង​​​ធម្មការ​​​និង​​​សាសនា​​​ ​​​បាន​​​ធ្វើ​​​សន្និសីទ​​​កាសែត​​​​​បដិសេធ​​​​ពាក្យ​​​ចចាមអារ៉ាម​​​ដែល​​​ថា រដ្ឋាភិបាល​​​បាន​​​លក់​​​ឬ​​​ដោះដូរ​​​វិទ្យា​​​ស្ថាន​​​ពុទ្ធសា​សន​បណ្ឌិត្យ​​​នៅក្នុង​​​រាជធានីភ្នំពេញ​​​ទៅ​​​ឲ្យ​​​ក្រុម​​​ហ៊ុន​​​ឯកជន​​​។

មាន​​​ប្រសាសន៍​​​អំឡុង​​​សន្និសីទ​​​កាសែត​​​នៅទីស្តីការ​​​​ក្រសួង​​​​​​​ លោក សេង សុមុនី អនុ​​​រដ្ឋ​លេខាធិ​​​ការ​​​បាន​​​បដិសេធ​​​ថា ដីដែល​​​ស្ថិត​​​ក្នុង​​​សង្កាត់​​​ទន្លេបាសាក់​​​ ខណ្ឌចំការ​​​មន​​​នេះ​​​គ្មានគម្រោង​​​ធ្វើជា​​​កន្លែង​​​ចត​​​យាន​​​យន្ត​​​សម្រាប់​​​កាស៊ីណូណាហ្គាវើលទេ​​​។​ លោក​​​បានមាន​​​ប្រសាសន៍​​​ថា “សម្រាប់​​​ដី​​​នេះ​​​ យើង​​​មិន​​​មានការ​​​​ជួល​​​ឬដោះដូរ​​​ទេ”។ បច្ចុប្បន្ន​​​នេះ​​​ កាស៊ីណូ​ណា​ហ្គាវើល​​​កំពុង​​​ស្ថាបនា​​​ផ្លូវ​​​ក្រោម​​​ដី​​​ពីក្រោម​​​វិទ្យាស្ថាន​​​ពុទ្ធសាសន​បណ្ឌិត្យ​​​​​​ដើម្បី​​​ភ្ជាប់​​​សណ្ឋាគារ​​​និង​​​កាស៊ីណូ​​​បច្ចុប្បន្ន​របស់​​​ខ្លួន​​​ទៅ​​​កន្លែង​​​កម្សាន្ត​​​​ថ្មី​​​នៅ​​​ក្បែរ​​​នោះ ដែលនឹង​​​​សាង​​​សង់​​​រួច​​​រាល់​​​នៅ​​​ចុង​​​ឆ្នាំ​​​២០១៥​​​។

ខ្លោ​ង​​​ទ្វា​​​រ​មុខ​​​របស់​​​វិទ្យាស្ថានពុទ្ធសាសនបណ្ឌិត្យ​​​​​កាលពី​​​ពេល​​​ថ្មីៗ​​​នេះ​​​ត្រូវ​​​បាន​​​វាយ​​​កម្ទេច​​​ ដើម្បីសម្រួលដល់ដំណើរ​​​ការ​​​ស្ថាបនា​​​ផ្លូវ​​​ក្រោម​​​ដីនេះ​​​ ប៉ុន្តែ​​​ក្រោយ​​​មក​​​ក្រុម​​​ហ៊ុន​​​បាន​​​សន្យា​​​ថា នឹង​​​​​​សាង​​​សង់​​​ឡើង​​​វិញ។ របង​​​ការដ្ឋាន​​​ក៏បាន​​​សង់​​​នៅខាង​​​លើ​​​ដី​​​​ផងដែរ​​ ដោយ​​​ចូ​​​ល​​​ដី​​​​​​វិទ្យាស្ថាន​​​ពុទ្ធសាសន​បណ្ឌិត្យ​​​ពាក់​​​កណ្ដាល ដែល​​​មជ្ឈដ្ឋាន​​​មួយ​​​ចំនួន​​​លើក​​​ឡើង​​​ថា ប្រហែល​​​ធ្វើជា​​​​​កន្លែង​​​ចត​​​យាន​​​យន្ត​​​។

ប៉ុន្តែ​​​លោក សេង សុមុនី បាន​​​លើក​​​ឡើង​​​នៅ​​​សន្និសីទ​​​កាសែត​​​កាលពីម្សិលមិញថា ​​​ការ​​​សាងសង់​​​នេះ​​​មិន​​​មែន​​​សម្រាប់​​​កន្លែង​ចត​​​យាន​​​យន្ត​​​របស់​​​កាស៊ីណូណាហ្គាវើល​​​ទេ ប៉ុន្តែ​​​​​សម្រាប់​​​បណ្ដាញ​​​អគ្គិសនី​​​ដើម្បីផ្គត់​​​ផ្គង់​​​ថាមពល​​​ទៅ​​​កោះ​​​ពេជ្រ​​​នៅ​​​ក្បែរ​​​នោះទេ​​​។

លោក សេង សុមុនី បានមាន​​​ប្រសាសន៍​​​ថា “យើង​​​មាន​​​លិខិត​​​អនុញ្ញាត​​​ឲ្យ​​​រៀបចំ​​​​​​បណ្ដាញ​​​អគ្គិសនី​​​”​​​ ដែលនៅជាប់​​​នឹង​​​វិទ្យាស្ថាន​​​ពុទ្ធសាសនបណ្ឌិត្យនេះ។ យើង​​​ត្រូវ​​​ដាក់​​បណ្ដាញ​​​អគ្គិសនី​​​ដើម្បី​​​តភ្ជាប់ទៅ​​​កោះពេជ្រ​​​ ជាក្រុង​​​មួយ​​​ដែលកំពុង​​​អភិវឌ្ឍ និង​​​ប្រើ​​​ប្រាស់​​​​អគ្គិសនី​​​ច្រើន​​​”។

ព្រះតេជគុណ ប៊ុត​​​ ប៊ុនទិញ ដែល​​​ជា​​​ប្រធាន​​​បណ្ដាញព្រះ​​​សង្ឃ​​​ឯករាជ្យ​​​ ដើម្បី​​​យុត្តិធម៌​​​សង្គម បាន​​​មាន​​​សង្ឃដីកា​​​តាម​​​ទូរស័ព្ទថា ព្រះអង្គ​​​មិន​​​ជឿ​​​ការ​​​បក​​​ស្រាយ​​​របស់​​​មន្ត្រី​​​ក្រសួង​​​ធម្មការ​​​រូប​​​នេះ​​​ដែល​​​ថា មិនមាន​​​ការ​​​ដោះដូរដី​​​នោះទេ ហើយ​​​ព្រះ​​​អង្គ​​​បាន​​​មាន​​​សង្ឃដីកា​​​ទៀត​​​ថា ខ្លោង​​​ទ្វា​​រវិទ្យាស្ថានពុទ្ធសាសន​​​បណ្ឌិត្យ​​​ត្រូវ​​​បានរងការ​​​​ខូច​​​ខាត​​​ដោយ​​​ការ​​​ស្ថាបនា​​​នេះ។

ព្រះអង្គ​​​បាន​​​មាន​​​សង្ឃដីកា​​​ថា “អាត្មា​​​នឹង​​​ដឹក​​​នាំ​​​ព្រះសង្ឃ​​​ប្រហែល​​​១.០០០​​​អង្គ​​​តវ៉ា​​​នៅ​​​ក្រសួង​​​នេះ​​​នៅ​​​ថ្ងៃសុក្រ ដើម្បី​​​អំពាវ​​​នាវ​​​ឲ្យ​​​បញ្ឈប់​​​ការ​​​ស្ថាបនា​​​នេះ។ យើង​​​បាន​​​ទទួ​​ល​​​ព័ត៌​មាន​​​ថា វិទ្យាស្ថាន​​​ពុទ្ធសាសនបណ្ឌិត្យ​​​ នឹង​​ដោះដូរ​​​ដីជាមួយ​​​ក្រុម​​​ហ៊ុនមួយ​​​”។

នៅ​​​ឯសន្និសីទ​​​កាសែត​​​ លោក សេង សុមុនី បាន​​​បដិសេធ​​​ការ​​​រិះគន់​​​​​របស់​​​ព្រះតេជគុណ​​​ប៊ុត ប៊ុនទិញ ហើយ​​​លោក​​​បាន​​​មាន​​​ប្រសាសន៍​​​ថា រាល់​​​ការ​​​ខូច​​​ខាតណាមួយដែល​​​បណ្ដាល​​​មក​​​ពី​​​ការ​​​ស្ថាបនា​​​ផ្លូវ​​​ក្រោម​​​ដី​​​របស់​​​កាស៊ីណូណាហ្គាវើល ក្រុម​​​ហ៊ុននេះ​​​ជា​​​អ្នក​​​​ជួស​​​ជុល​​​ឲ្យ​​​វិញ​​​។ លោក​​​ សេង សុមុនី បានមាន​​​ប្រសាសន៍​​​ថា “ខ្ញុំមិន​​​ចោទ​​​ព្រះអង្គទេ ប៉ុន្តែ​​​ជា​​​ធម្មតា​​​ព្រះ​​​អង្គគឺ​​​ជា​​​មនុស្ស​​​ម្នាក់​​​ដែល​​​មិន​​​ដឹង​​​ថា​​​មាន​​​អ្វី​​​កើត​​​ឡើង​​​ពិ​​​ត​​​ប្រាកដ​​​ទេ​​ ហើយ​​​ព្រះអង្គ​​​បក​​​ស្រាយ​​​​​​តែតាម​អារម្មណ៍​​​ផ្ទាល់​​របស់​​​ព្រះ​​​អង្គ​​​ ដោយ​​​មិន​​​មាន​​​ឯកសារ​​​ណាមួយ​​​ក្នុង​​​ដៃឡើយ​​​”៕ សារុន​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស