កាលពីយប់មិញ គណៈកម្មាធិការជាតិរៀបចំការបោះឆ្នោតហៅកាត់ គ.ជ.ប. បានចេញផ្សាយលទ្ធផលផ្លូវការនៃការបោះឆ្នោតក្រុមប្រឹក្សារាជធានី ខេត្ត-ក្រុង ស្រុក-ខណ្ឌ ដោយគណបក្សប្រជាជនកម្ពុជាគ្រប់គ្រងអំណាចទទួលបានអាសនៈចំនួន២.៥៤០ ឬ៧៦,៤ភាគរយ នៃចំនួន៣.៣២៤អាសនៈ នៅទូទាំងប្រទេស។
តួលេខនេះស្ទើរតែដូចគ្នាទាំងស្រុងទៅនឹងតួលេខចេញដោយគណបក្សប្រជាជនកម្ពុជា នៅថ្ងៃបន្ទាប់ពីការបោះឆ្នោត ដែលបង្ហាញថា គណបក្សប្រជាជនកម្ពុជាទទួលបានចំនួន២.៥៤៣អាសនៈ។ ក្នុងចំណោមអាសនៈសរុបចំនួន២.២៣៤បានទៅក្រុមប្រឹក្សាស្រុក ខណ្ឌ និងចំនួន៣០៦អាសនៈបានទៅក្រុមប្រឹក្សាខេត្ត ក្រុង និងរាជធានី។
យោងតាមតួលេខនេះ គណបក្សប្រជាជនកម្ពុជាទទួលបានសំឡេងភាគច្រេើនគ្រប់កន្លែងទាំងអស់លើកលែងតែក្រុមប្រឹក្សាពីរនៃក្រុមប្រឹក្សាស្រុក ខណ្ឌចំនួន៣.០១៨នៅទូទាំងប្រទេស ហើយក៏ឈ្នះដែរនៅក្នុងក្រុមប្រឹក្សា២៤រាជធានីខេត្ត។ សំឡេងភាគច្រើននេះនឹងធ្វើឲ្យគណបក្សគ្រប់គ្រងអំណាចអាចគ្រប់គ្រងថវិកាចែកចាយឲ្យក្រុមប្រឹក្សានានា ព្រមទាំងតំណែងប្រធានក្រុមប្រឹក្សាផង។
គណបក្សសង្គ្រោះជាតិទទួលបាន៧៦៥អាសនៈនៅទូទាំងក្រុមប្រឹក្សាផ្សេងៗ ដោយទទួលបានតួនាទីក្រុមប្រឹក្សាស្រុក ខណ្ឌ ចំនួន៦៧៩អាសនៈ និងតំណែងក្រុមប្រឹក្សាខេត្ត ក្រុង និងរាជធានីចំនួន៨៦អាសនៈ។ គណបក្សនេះទទួលបានសំឡេងភាគច្រើននៅតាមក្រុមប្រឹក្សាស្រុក ខណ្ឌ នីមួយៗនៅក្នុងខេត្តព្រៃវែង និងខេត្តត្បូងឃ្មុំ។
តួលេខនៃតំណែងក្រុមប្រឹក្សា ស្រុក ខណ្ឌ ចំនួន៦៧៩អាសនៈ គឺខ្ពស់ជាងពីរដងបើធៀបនឹងចំនួន៦៧៧អាសនៈ ដែលលោក សម រង្ស៊ី មេដឹកនាំគណបក្សប្រឆាំងបានអះអាងថា ទទួលបានកាលពីល្ងាចថ្ងៃបោះឆ្នោត ប៉ុន្តែតិចជាងចំនួន៦៨៣អាសនៈ ដែលលទ្ធផលបឋមកាលពីថ្ងៃទី១៩ ខែឧសភា របស់គណបក្សគ្រប់គ្រងអំណាចបានបង្ហាញថា គណបក្សសង្គ្រោះជាតិទទួលបាន។
គណបក្សផ្សេងទៀតដែលទទួលបានអាសនៈ គឺគណបក្សហ៊្វុនស៊ីនបុិច និងគណបក្សសម្ព័ន្ធដើម្បីប្រជាធិបតេយ្យ (LDP) ។ គណបក្ស LDP ទទួលបានអាសនៈក្រុមប្រឹក្សាស្រុកតែមួយគត់នៅក្នុងខេត្តសៀមរាប។ គណបក្សរាជានិយមហ៊្វុនស៊ីនបុិច ទទួលបានអាសនៈក្រុមប្រឹក្សាស្រុកចំនួន១៧អាសនៈនៅទូទាំងខេត្តចំនួនប្រាំពីរ និងមួយអាសនៈក្នុងក្រុមប្រឹក្សាខេត្តបន្ទាយមានជ័យ។
ការបោះឆ្នោតក្រុមប្រឹក្សាកាលពីថ្ងៃទី១៨ ខែឧសភា គឺជាការបោះឆ្នោតប្រយោល ជាមួយនឹងក្រុមប្រឹក្សាឃុំ សង្កាត់ ដែលជាប់ឆ្នោតដោយសំឡេងឆ្នោតប្រជាជនកាលពីក្នុងខែមិថុនាឆ្នាំ២០១២ ជាការបោះឆ្នោតជ្រើសរើសក្រុមប្រឹក្សាសម្រាប់ក្រុមប្រឹក្សាខេត្តស្រុក ខណ្ឌ និងខេត្តរបស់ខ្លួន។
សំឡេងឆ្នោតលើសលប់របស់គណបក្សប្រជាជនកម្ពុជានៅក្នុងការបោះឆ្នោតក្រុមប្រឹក្សាឃុំ សង្កាត់ទាំងនោះ ដែលបានកើតឡើងរយៈពេលមួយខែ មុនការបង្កើតគណបក្សសង្គ្រោះជាតិ ត្រូវបានឆ្លុះបញ្ចាំងក្នុងជ័យជម្នះយ៉ាងច្រើននៃការបោះឆ្នោតកាលពីថ្ងៃទី១៨ ខែឧសភា៕ ប៊ុននី