កាលពីម្សិលមិញ លោក ហោ ណាំហុង រដ្ឋមន្ត្រីក្រសួងការបរទេសបានបញ្ជាក់ឡើងវិញថា រដ្ឋាភិបាលនឹងទទួលយកតែជនភៀសខ្លួនពីប្រទេសអូស្ត្រាលី ដែលស្ម័គ្រចិត្តមកតាំងទីលំនៅក្នុងប្រទេសកម្ពុជាប៉ុណ្ណោះ ហើយបានមានប្រសាសន៍ថា កំពុងធ្វើការសិក្សាដើម្បីរកកន្លែងតាំងទីលំនៅសម្រាប់ពួកគេនៅក្នុងប្រទេសរបស់យើងនៅឡើយ។
មានប្រសាសន៍នៅពិធីមួយនៅក្រសួងការបរទេស លោក ហោ ណាំហុង បានបញ្ជាក់ថា ការពិភាក្សាជាមួយរដ្ឋាភិបាលអូស្ដ្រាលីគឺផ្ដោតជាពិសេសទៅលើអ្នកស្វែងរកសិទ្ធិជ្រកកោន ដែលកំពុងត្រូវឃាត់ខ្លួននៅមណ្ឌលឃុំខ្លួន ដែលមានកេរ្តិ៍ឈ្មោះអសោចមួយនៅប្រទេសណូរូ ជាប្រទេសដែនកោះនៅមហាសមុទ្រប៉ាស៊ីហ្វិកខាងត្បូង។
លោក ហោ ណាំហុង បានមានប្រសាសន៍នៅក្រៅពិធីនោះថា “ការបញ្ជូនជនភៀសខ្លួនលើកោះប្រទេសណូរូ ពីប្រទេសអូស្ត្រាលី គឺជាគម្រោងមួយដែលស្នើឡើងដោយប្រទេសអូស្ត្រាលី។ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានទទួលយកសំណើនោះដើម្បីពិនិត្យមើល ហើយយើងកំពុងពិនិត្យមើលហើយ”។
លោក ហោ ណាំហុង បានមានប្រសាសន៍ថា “យើងបានបង្កើតក្រុមការងារដើម្បីពិនិត្យមើលបញ្ហានេះសម្រាប់យកទៅពិភាក្សាជាមួយភាគីអូស្ត្រាលី ពីព្រោះបើទោះណាជាយើងទទួលយកក៏ដោយ គឺតែក្នុងករណីមានការព្រមព្រៀងពីជនភៀសខ្លួន ដោយគ្មានការបង្ខិតបង្ខំពីសំណាក់រដ្ឋាភិបាលអូស្ត្រាលីឲ្យមកនោះឡើយ”។ លោកបានបញ្ជាក់ឡើងវិញថា “ប្រទេសកម្ពុជាមិនចេះតែទទួលយកសំណើនេះទេ គឺទាល់តែជនភៀសខ្លួនយល់ព្រមមកប្រទេសកម្ពុជាដែរ។ នេះជាចំណុចសំខាន់បំផុត”។
លោក ហោ ណាំហុង ក៏បានមានប្រសាសន៍ផងដែរថា រដ្ឋាភិបាលមិនទាន់បានពិចារណារកទីកន្លែងសម្រាប់ជនភៀសខ្លួនទាំងនេះដែលត្រូវមកតាំងទីលំនៅក្នុងប្រទេសកម្ពុជានៅឡើយទេ ប្រសិនបើកិច្ចព្រមព្រៀងត្រូវបានសម្រេចនោះ។ រដ្ឋមន្ត្រីការបរទេសរូបនេះបានប្រាប់ក្រុមអ្នកយកព័ត៌មានថា “ទីកន្លែងគឺជាបញ្ហាបច្ចេកទេស។ យើងនឹងពិភាក្សានៅពេលក្រោយ”។
ក្រុមមន្ត្រីក្រសួងការបរទេសបានលើកឡើងកាលពីពេលថ្មីៗនេះថា កិច្ចព្រមព្រៀងជាមួយរដ្ឋាភិបាលអូស្ត្រាលីក្នុងការតាំងទីលំនៅជនភៀសខ្លួន អាចធ្វើឡើងនៅពេលឆាប់ៗនេះ។
យោងតាមតួលេខដែលត្រូវបានចេញផ្សាយទៀងទាត់ដោយរដ្ឋាភិបាលអូស្ត្រាលីបានឲ្យដឹងថា មានមនុស្ស១.១៦២នាក់ កំពុងត្រូវឃាត់ខ្លួននៅមណ្ឌលឃុំខ្លួនជនភៀសខ្លួនក្នុងប្រទេសណូរូ គិតមកដល់ថ្ងៃសុក្រសប្ដាហ៍មុន។
សេចក្ដីរាយការណ៍ព័ត៌មានដែលមិនបញ្ជាក់ប្រភពបានអះអាងថា កិច្ចព្រមព្រៀងជិតសម្រេចជាមួយរដ្ឋាភិបាលអូស្ត្រាលីនេះ ប្រទេសកម្ពុជានឹងទទួលយកជនភៀសខ្លួន១០០នាក់ ដែលព្យាយាមទៅប្រទេសអូស្ត្រាលី ជាថ្នូរនឹងទឹកប្រាក់៤០លានដុល្លារ៕សារុន