30 C
Phnom Penh

ផ្ទុះកូដ​​​កម្ម​​​នៅ​​​​​​រោងចក្រ​​​ Ocean Garment ដោយសារ​​​រោងចក្រ​​​នេះ​​​ផ្អាក​​​ប្រតិបត្តិការ​​​មួយ​​​ខែ​​​

ដោយ ឌឹ ខេមបូឌា ដេលី

បទវិភាគ

តំណាង​​​សហជីព​​​ម្នាក់​​​និយាយ​​​ថា កម្មករ​​​ប្រហែល​​​១.០០​​​០​​​នាក់​​​បាន​​​ធ្វើការ​​​តវ៉ា​​​នៅ​​​ខាង​​​ក្រៅ​​​រោងចក្រ​​​កាត់​​​ដេរ​​​ Ocean Garment​​​ ក្នុង​​​ខណ្ឌ​​​ពោធិ៍​​​សែន​​​ជ័យ រាជធានី​​​ភ្នំពេញ​​​ កាល​​​ពី​​​ម្សិលមិញ​​​ ដើម្បី​​​ទាមទារ​​​សំណង​​​សម្រាប់​​​ការ​​​ព្យួរ​​​ការ​​​ងារ​​​ ខណៈដែល​​​រោងចក្រ​​​នេះ​​​ផ្អាក​​​ប្រតិ​​​បត្តិ​​​ការរបស់​​​ខ្លួន​​​​​​រយៈពេល​​​មួយ​​​ខែ​​​ ដោយសារ​​​តែ​​​តម្រូវ​​​ការ​​​ពី​​​ក្រុម​​​ហ៊ុន​​​​​​បញ្ជាទិញ​​​ធ្លាក់​​​ចុះ​​​។

កម្មករ​​​បាន​​​ធ្វើការ​​​តវ៉ា​​​ចាប់​​​តាំងពី​​​ថ្ងៃ​​​សៅរ៍មកម្លេ៉ះ បន្ទាប់ពី​​​រោងចក្រ​​​នេះ​​​បា​​​​​​ន​​​ប្រកាស​​​ថា ខ្លួន​​​នឹង​​​ផ្អាក​​​ផលិត​​​កម្ម​​​ចាប់ពី​​​ថ្ងៃច័ន្ទ រហូត​​​ដល់​​​ថ្ងៃទី២៦ ខែមិថុនា។

លោក ហួន វណ្ណា អាយុ​​​៣២​​​ឆ្នាំ​​​ ជា​​​តំណាង​​​សម្ព័ន្ធ​​​សហជីពចលនា​​​កម្មករ​​​​​​ដែល​​​បាន​​​បម្រើ​​​ការ​​​ងារ​​​នៅ​​​រោងចក្រ​​​ OceanGarment បាន​​​លើក​​​ឡើង​​​ថា កម្មករ​​​បាន​​​ច្រាន​​​ចោល​​​ការ​​​សន្យា​​​របស់​​​រោងចក្រ​​​នេះ​​​ដែល​​​ផ្ដល់​​​ឲ្យ​​​កម្មករ​​​ក្នុង​​​ម្នាក់​​​ៗ​​​​​​១៥​​​ដុល្លារ​​​ក្នុង​​​មួយ​​​ខែ ខណៈរោងចក្រ​​​បិទទ្វារ ហើយ​​​កំពុង​​​ទាមទារ​​​៥០​​​ភាគរយ​​​នៃ​​​អត្រា​​​ប្រាក់​​​ខែ​​​ធម្មតារបស់​​​ខ្លួន​​​។ លោក​​​និយាយ​​​ថា “រោងចក្រ​​​បាន​​​យល់​​​ព្រម​​​ឲ្យ​​​យើង​​​តែ​​​១៥​​​ដុល្លារ​​​ប៉ុណ្ណោះ​​​ក្នុង​​​មួយ​​​ខែ​​​អំឡុង​​​ពេល​​​ព្យួរ​​​ការងារ​​​ ប៉ុន្តែ​​​យើង​​​ទាមទារ​​​ឲ្យ​​​រោងចក្រ​​​គិត​​​ឲ្យពួកយើង​​​​​​៥០​​​ភាគរយ​​​នៃ​​​អត្រា​​​ប្រាក់​​​ខែ​​​របស់​​​យើង​​​ ពីព្រោះ​​​ប្រាក់​​​ប៉ុណ្ណឹង​​​យើង​​​មិន​​​អាច​​​រស់​​​បានទេ”។

លោក ហួន វណ្ណា​​​ បាន​​​និយាយ​​​ថា ដោយសារ​​​តែ​​​មាន​​​ការ​​​បញ្ជាទិញតិចតួច​​​​​​ពីក្រុម​​​ហ៊ុន​​​សម្លៀក​​​​​​បំពាក់​​​ធំៗ​​​ ដូច​​​ជា​​​ក្រុម​​​ហ៊ុន​​​ Gap ជាដើម​​​ បាន​​​បង្ខំ​​​ឲ្យ​​​រោងចក្រ​​​នេះ​​​ផ្អាក​​​ផលិត​​​កម្ម​​​។លោក​​​បាន​​​បន្ត​​​ថា “រោងចក្រ​​​បាន​​​និយាយ​​​ថា ពួកគេ​​​មិនទទួល​​​បាន​​​ការ​​​បញ្ជាទិញ​​​ពីអ្នក​​​ទិញ​​​មួយ​​​ចំនួន​​​ ដូច​​​ជា​​​ក្រុម​​​ហ៊ុន​​​ Gap ទេ​​​ ​​​ចាប់​​​តាំងពី​​​ខែ​​​កុម្ភៈមក។ ដូច្នេះ​​​ហើយ​​​បាន​​​ជា​​​ពួកគេ​​​សម្រេច​​​ចិត្ត​​​ផ្អាក​​​ [ប្រតិបត្តិការ​​​] រយៈពេល​​​មួយខែ។ ប្រសិន​​​បើ​​​រោងចក្រ​​​បិទ​​​ទ្វា​​​រ​​​ ពួកគេ​​​ត្រូវ​​​តែ​​​ផ្ដល់​​​សំណង​​​ដល់ពួក​​​យើង​​​ស្រប​​​តាម​​​ច្បាប់​​​ការ​​​ងារ​​​ មុនពេល​​​ពួកគេ​​​បិទ​​​រោងចក្រ​​​របស់​​​ខ្លួន​​​”។

ការ​​​បិទទ្វា​​​ររបស់​​​រោងចក្រ​​​  Ocean Garment កើត​​​មាន​​​ឡើង ​​​ខណៈ​​​ដែល​​​សមាគម​​​រោង​​​ចក្រ​​​កាត់ដេរ​​​នៅ​​​កម្ពុជា​​​​​​ ហៅកាត់​​​ថា GMAC បាន​​​ព្រមាន​​​នៅ​​​សប្ដាហ៍​​​នេះ​​​ថា ក្រុម​​​ហ៊ុន​​​សម្លៀក​​​បំពាក់​​​ធំៗ​​​កំពុង​​​កាត់​​​បន្ថយ​​​ការ​​​បញ្ជាទិញ​​​ ដោយសារ​​​តែ​​​ស្ថាន​​​ភាព​​​ចលាចល​​​របស់​​​កម្មករ​​​ក្នុង​​​វិស័យ​​​កាត់​​​ដេរ​​​។ ក្រុម​​​ហ៊ុន​​​សម្លៀក​​​បំពាក់​​​ធំៗ និង​​​សហជីព​​​អន្តរ​​​ជាតិ​​​មួយ​​​ចំនួន​​​ដែល​​​ធ្វើ​​​ដំណើរ​​​មក​​​កាន់​​​រាជធានី​​​ភ្នំពេញ​​​នៅ​​​សប្ដាហ៍​​​នេះ​​​ ដើម្បីជួប​​​​​​ពិភាក្សា​​​ជាមួយរដ្ឋាភិបាល​​​បាន​​​លើក​​​ឡើង​​​ថា ឧស្សាហកម្ម​​​កាត់​​​ដេរ​​​នឹង​​​ជួប​​​ការ​​​លំបាក​​​​​​ ប្រសិន​​​បើ​​​កូដ​​​កម្មទាមទារ​​​ដំឡើង​​​ប្រាក់​​​ខែ​​​ និង​​​អំពើហិង្សា​​​លើ​​​កម្មករ​​​នៅតែ​​​បន្ត​​​ ហើយតាម​​​សេចក្ដី​​​រាយ​​​ការណ៍​​​ថា ​​​ក្រុម​​​ហ៊ុន​​​សម្លៀក​​​បំពាក់​​​ខ្នាត​​​អន្តរជាតិ​​​មួយ​​​បាន​​​កាត់​​​បន្ថយ​​​ការ​​​បញ្ជា​​​ទិញ​​​របស់​​​ខ្លួន​​​ចំនួន​​​៥០​​​ភាគរយរួច​​​ទៅ​​​ហើយ​​​។ ចំណែក​​​ឯ​​​រោងចក្រ​​​  Ocean Garment បាន​​​បដិសេធ​​​មិន​​​ឆ្លើយ​​​បំភ្លឺ​​​ទេពាក់​​​ព័ន្ធ​​​នឹង​​​បញ្ហា​​​នេះ។

នៅ​​​ក្នុង​​​ករណី​​​ដោយ​​​ឡែក​​​មួយទៀត​​​ ​​​កម្មករ​​​ប្រហែល​​​៨០០​​​នាក់​​​បាន​​​ធ្វើ​​​កូដ​​​កម្ម​​​កាលពី​​​ថ្ងៃ​​​អង្គារ នៅ​​​រោងចក្រ​​​អេឡិច​​​ត្រូនិក Long Bright របស់​​​តៃវ៉ាន់​​​ ​​​ក្នុង​​​តំបន់​​​សេដ្ឋកិច្ចពិសេស​​​ម៉ាន​​​ហាតាន ក្នុង​​​ខេត្ត​​​ស្វាយ​​​រៀង​​​ ដើម្បីទាមទារ​​​​​​ឲ្យ​​​រោងចក្រ​​​នេះ​​​ទទួល​​​យក​​​តំណាង​​​សហជីព​​​ប្រាំ​​​នាក់​​​ដែល​​​ត្រូវ​​​បាន​​​បណ្ដេញ​​​ចេញ​​​ ឲ្យ​​​ចូលធ្វើការ​​​វិញ​​​ នេះ​​​បើ​​​តាម​​​​​​ការ​​​លើក​​​ឡើង​​​របស់​​​តំណាង​​​សហជីព​​​ម្នាក់​​​ និង​​​នគរបាល​​​។

លោក ហ៊ុន សាវ័ន្ត អធិការ​​​រង​​​ក្រុង​​​បាវិត បានមាន​​​ប្រសាសន៍​​​ថា “មាន​​​កម្មករ​​​៨០០​​​នាក់​​​ដែល​​​បាន​​​ដើរ​​​ចេញពីរោងចក្រ​​​របស់ខ្លួន​​​ដើម្បី​​​ទាមទារ​​​ឲ្យ​​​រោងចក្រ​​​ទទួ​​​ល​​​យក​​​តំណាង​​​ប្រាំ​​​នាក់​​​របស់​​​ខ្លួន​​​ចូលធ្វើការ​​​វិញ ដោយ​​​កិច្ច​​​សន្យាការ​​​ងារ​​​របស់​​​ពួកគេ​​​បាន​​​ផុត​​​សុពល​​​ភាព​​​កាលពី​​​ឆ្នាំមុន​​​”។

លោក មាស សុខណា តំណាង​​​សម្ព័ន្ធ​​​សហជីព​​​ចលនាកម្មករ​​​ប្រចាំ​​​រោងចក្រ​​​ Long Bright ​​​បាន​​​លើក​​​ឡើង​​​ថា កម្មករ​​​ខឹង​​​យ៉ាង​​​ខ្លាំង​​​ចំពោះ​​​ការ​​​បណ្ដេញ​​​កម្មករ​​​ចេញជាបន្តបន្ទាប់​​​ដោយ​​​គ្មាន​​​ហេតុផល​​​បូក​​​រួម​​​ជាមួយ​​​នឹង​​​ការ​​​បណ្ដេញ​​​​តំណាង​​​សហជីព​​​កាលពី​​​ខែ​​​សីហា​​​ផង​​​។ តំណាង​​​រូប​​​េនះ​​​បាន​​​បន្ត​​​ថា “រោងចក្រ​​​បាន​​​បណ្ដេញ​​​កម្មករ​​​យ៉ាង​​​ច្រើន​​​​​​ បន្ទាប់​​​ពីពួកគេ​​​បណ្ដេញ​​​តំណាង​​​របស់​​​យើង​​​ ចំណែក​​​ឯតំណាង​​​ថ្មីៗ​​​មិន​​​ខ្វល់ពីពួកយើង​​​ទេ”។  រោងចក្រ​​​ Long Bright មិន​​​អាច​​​ទាក់​​​ទង​​​សុំកា​​​រ​​​បំភ្លឺ​​​បានទេ ពាក់​​​ព័ន្ធ​​​នឹង​​​រឿង​​​នេះ៕ សុខុម​​​​​​​​​​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស