យោងតាមសេចក្ដីប្រកាសមួយចុះហត្ថលេខាដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានឲ្យដឹងថា លោក កឹម គុណវឌ្ឍន៍ បានចូលបម្រើការងារវិញជាអគ្គនាយកនៃទូរទស្សន៍ជាតិកម្ពុជា (ទទក) របស់រដ្ឋកាលពីម្សិលមិញ រយៈពេលមិនដល់ពីរសប្ដាហ៍ផង បន្ទាប់ពីការលាលែងពីតំណែង ដែលត្រូវបានផ្សព្វផ្សាយជាសាធារណៈ ដោយសារមិនបានផ្សាយបន្តផ្ទាល់នូវព្រះរាជពិធីបុណ្យច្រត់ព្រះនង្គ័លប្រចាំឆ្នាំ។
លោក ប៉ាង ណាត អគ្គនាយកស្ដីទីបានបដិសេធកាលពីថ្ងៃច័ន្ទថា អតីតប្រធានរបស់លោកមិនបានវិលត្រឡប់មកគ្រប់គ្រងស្ថានីយទូរទស្សន៍នេះវិញទេ និងបានមានប្រសាសន៍ថា លោកបានវិលត្រឡប់មកធ្វើការក្នុងតួនាទីផ្សេង។ ក៏ប៉ុន្តែសេចក្ដីប្រកាសចេញដោយក្រសួងព័ត៌មានកាលពីម្សិលមិញមានខ្លឹមសារថា ការលាលែងរបស់លោក គុណវឌ្ឍន៍ ត្រូវបានច្រានចោល ហើយថា លោកនឹងវិលត្រឡប់មកកាន់តួនាទីរបស់លោកវិញ។
លោក កាញារីទ្ធ បានលើកឡើងក្នុងសេចក្ដីប្រកាសថា “បន្ទាប់ពីទទួលលិខិតសុំលាលែងពីតួនាទីរបស់លោក គុណវឌ្ឍន៍ កាលពី ថ្ងៃទី១៧ ខែឧសភា ខ្ញុំបានអញ្ជើញក្រុមមន្ត្រីជាន់ខ្ពស់ទាំងអស់នៅក្នុងក្រសួងនេះឲ្យចូលរួមកិច្ចប្រជុំមួយ ហើយម្នាក់ៗបានច្រានចោលដាច់ខាតចំពោះការលាលែងពីតួនាទីរបស់លោកជាអគ្គនាយកនៃទូរទស្សន៍ទទក។
កាលពីម្សិលមិញ លោក គុណវឌ្ឍន៍ បានមានប្រសាសន៍ថា លោករីករាយដែលថ្នាក់ដឹកនាំរបស់លោកបានច្រានចោលសេចក្ដីសម្រេចលាលែងពីតួនាទីរបស់លោក។ លោកបានមានប្រសាសន៍ថា “លោក ខៀវ កាញារីទ្ធ បានសម្រេចថា ខ្ញុំគួរតែបន្តការងារ ដើម្បីបម្រើទស្សនិកជននិងស្ថានីយទូរទស្សន៍ជាតិកម្ពុជារបស់យើង”។
លោកបានបន្តថា “ថ្ងៃនេះ ខ្ញុំសូមថ្លែងអំណរគុណចំពោះថ្នាក់ដឹកនាំរបស់យើងនៅក្រសួងព័ត៌មានចំពោះការលើកទឹកចិត្តរបស់ពួកគាត់ និងសូមថ្លែងអំណរគុណចំពោះឯកឧត្តមរដ្ឋមន្ត្រី និងសហសេវិកទូរទស្សន៍ទទករបស់យើង ដែលបានគាំទ្រការវិលត្រឡប់របស់ខ្ញុំមកកាន់ស្ថានីយទូរទស្សន៍នេះ ដើម្បីធ្វើការក្នុងតួនាទីដដែល”៕ប៊ុននី