26 C
Phnom Penh

ក្មេង​​​ប្រុស​​​រើស​​​អេត​​​ចាយ​ប្រ​ឈម​​​មុខ​​​​ជាប់​​​ពន្ធនាគារ​​​រយៈពេល​​​១១​​​ឆ្នាំ​​​

ដោយ ឌឹ ខេមបូឌា ដេលី

បទវិភាគ

នៅ​​​ពេល​​​កម្មករ​​​កាត់​​​ដេរ​​​រាប់​​​រយ​​​នាក់​​​មកពី​​​រោង​ចក្រ​​​ SL គប់​​​ដុំ​ថ្ម​​​ទៅ​​​លើ​​​នគរ​​​បាល​​​អំឡុង​​​បាតុ​កម្ម​​​មួយ​​​ជិត​​​ វត្ត​​​ស្ទឹង​​​មាន​ជ័យ កាល​ពី​ខែ​វិច្ឆិកា ក្មេង​​​ប្រុស​​​រើស​​​អេត​​​ចាយ​​​ ម្នាក់​​​ឈ្មោះ ម៉ែន  សុខ​​​សម្បត្តិ អាយុ​​​១៤​​​ឆ្នាំ​​​ក៏បាន​​​ចូល​រួម​​​ជា​មួយ​​​ក្រុម​​​ បាតុករ​​​ដែរ​​​។

ម៉ែន​ សុខ​​​សម្បត្តិ អាយុ​​​១៤​​​ឆ្នាំ​កំពុង​អង្គុយ​ខាង​ក្រៅ​ផ្ទះ​របស់​ខ្លួន​ក្នុង​សង្កាត់​ស្ទឹង​មាន​ជ័យ​​រាជ​ធានី​ភ្នំ​ពេញ​កាល​ពី​ម្សិល​មិញ​។​ ស៊ីវ​ ​ចាន់​ណា
ម៉ែន​ សុខ​​​សម្បត្តិ អាយុ​​​១៤​​​ឆ្នាំ​កំពុង​អង្គុយ​ខាង​ក្រៅ​ផ្ទះ​របស់​ខ្លួន​ក្នុង​សង្កាត់​ស្ទឹង​មាន​ជ័យ​​រាជ​ធានី​ភ្នំ​ពេញ​កាល​ពី​ម្សិល​មិញ​។​ ស៊ីវ​ ​ចាន់​ណា

កាលពី​​​ម្សិលមិញ​​​ ខណៈ​​​ពេល​​​អង្គុយ​​​នៅ​​​ខាង​​​មុខ​​​ផ្ទះ​​​តូច​​​របស់​​​ខ្លួន​​​ក្នុង​​​សង្កាត់​​​ស្ទឹង​​​មាន​​​ជ័យ រាជធានីភ្នំពេញ ក្មេង​​​ប្រុស​​​នេះ​​​បាន​​​និយាយអំពី​​​ហេតុការណ៍​​​នោះ​​​ថា “​​​ពេល​​​ខ្ញុំ​​​ឃើញ​​​គេ​​​គប់​​​ដុំថ្ម​​​ដាក់​​​ឡាន​​​ [នគរ​​​បាល​​​] ខ្ញុំក៏​​​គប់​​​បី​​​ដុំ​ដែរ​​​ទៅ​​​ ហើយ​​​បន្ទាប់​​​មក​​​បាន​​​ត្រឡប់​​​ចូលទៅ​​​ក្នុង​​​វត្ត​​​វិញ” ។

កា​​​រ​​​ប៉ះទង្គិច​​​​​​រវាង​​​បាតុករ​​​ និង​​​នគរ​​​បាល​​​ ដែល​​​បា​​​ន​​​រារាំង​​​កម្មករ​​​មិន​​​ឲ្យ​​​ហែក្បួន​​​ទៅ​​​កាន់​​​ភូមិគ្រឹះ​​​របស់​​​លោក​​​នាយក​​​រដ្ឋមន្ត្រី ហ៊ុន សែន នោះ បាន​​​ធ្វើ​​​ឲ្យ​​​ស្ត្រីម្នាក់​​​បាត់​​​បង់ជីវិត​​​ដោយ​​​សារ​​​គ្រាប់​​​កំាភ្លើង​​​របស់​​​នគរ​​​បាល និង​​​មនុស្ស​​​យ៉ាង​​​ហោច​​​ណាស់​​​ប្រាំបួន​​​នាក់​​​​​​រងរបួស​​​ ព្រម​​​ទាំង​​​៣៩​​​នាក់​​​ទៀត​​​ត្រូវ​​​ចាប់​​​ខ្លួន​​​។

ប៉ុន្តែ​​​មាន​​​តែ​​​ពីរ​​​នាក់​​​ប៉ុណ្ណោះ​​​ក្នុង​​​ចំណោម​​​អ្នក​​​​​​ត្រូវ​​​ចាប់​​​ខ្លួន​​​ ដែលទីបំផុត​​​ត្រូវ​​​បាន​​​តុលាការ​​​ចោទ​​​ប្រកាន់​​​ រួមទាំង​​​ក្មេង​​​ប្រុស​​​  ម៉ែន សុខសម្បត្តិ​​​ ដែល​​​កំពុង​​​ប្រឈម​​​ការ​​​ជាប់​​​ពន្ធនាគារ​​​រយៈពេល​​​១១​​​ឆ្នាំ​​​ផង​​​ដែរ ប្រសិន​​​បើ​​​តុលាការ​​​សម្រេច​​​ឲ្យ​​​ក្មេង​​​ប្រុស​​​នេះ​​​ជាប់​​​​​​ពិរុទ្ធ​​​ភាព​​​ពីបទ​​​ប្រើ​​​អំពើ​​​ហិង្សា​​​ដោយ​​​ចេតនាមាន​​​ស្ថាន​​​ទម្ងន់​​​ទោស បទ​​​បំផ្លិ​​ច​​​បំផ្លាញ​​​ទ្រព្យ​​​សម្បត្តិសាធារណៈ​​​ និង​​​បទ​​​​​​ប្រមាថ​​​មន្ត្រី​​​រាជការ​​​ដោយសារ​​​ទង្វើ​​​របស់​​​ខ្លួន​​​​​​ក្នុង​​​ហេតុការណ៍​​​ប៉ះ​​​ទង្គិច​​​គ្នា​​​នោះ។ សាលា​​​ដំបូង​​​រាជធានីភ្នំពេញ​​​នឹង​​​ប្រកាស​​​សាល​​​ក្រម​​​​​​នៅថ្ងៃ​​​សុក្រ។

អំឡុង​​​សវនាការ​​​ជំនុំជម្រះ​​​ ភ័ស្តុតាង​​​តែមួយគត់​​​សម្រាប់​​​ដាក់បន្ទុក​​​លើ​​​ក្មេង​​​ប្រុស​​​ ម៉ែន​​​សុខ​​​សម្បត្តិ ដែល​​​មាន​​​ជំងឺ​​​ខ្សោយ​​​បញ្ញា​​​ស្មារតី និង​​​ជំងឺ​​​ស្កន់​​​ គឺ​​​វីដេអូ​​​មួយ​​​ដែ​​​ល​​​បង្ហាញពី​​​សកម្មភាព​​​ក្មេង​​​ប្រុស​​​នេះ​​​រើស​​​ដែក​​​អេត​​​ចាយ​​​ពី​​​សំណល់​​​ម៉ូតូ​​​មួយ​​​គ្រឿង​​​ដែល​​​ត្រូវ​​​ភ្លើង​​​ឆេះ​​​ខ្ទេច​​​។

ក្មេង​​​ប្រុស​​​ ម៉ែន សុខ​​​សម្បត្តិ ដែលពេល​​​នេះ​​​មាន​​​អាយ​​​ុ​​​១៥​​​ឆ្នាំ និង​​​ដែល​​​បាន​​​រើស​​​អេត​​​ចាយ និង​​​សំរាមយក​​​ទៅ​​​​​​លក់​​​ចាប់តាំងពី​​​អាយុ​​​៥​​​ឆ្នាំ​​​មក​​​នោះ និយាយ​​​ថា ” ខ្ញុំ​​​មិនបាន​​​ដុត​​​ម៉ូតូ​​​នោះទេ ខ្ញុំ​​​គ្រាន់​​​តែ​​​ទៅ​​​រើស​​​សំណល់​​​អេតចាយ​​​ពី​​​ម៉ូតូនោះ​​​​​​ប៉ុណ្ណោះ”។

បន្ទាប់​​​មក​​​ក្មេង​​​ប្រុស​​​នេះ​​​បាន​​​ដើរ​​​ចេញពី​​​កន្លែង​​​កើត​​​ហេតុ​​​ មុ​​​ន​​​ពេល​​​ត្រឡប់​​​ទៅ​​​វត្ត​​​ស្ទឹង​​​មាន​​​ជ័យ​​​វិញ​​​​​ក្នុង​​​ថ្ងៃ​​​ដដែល​​​ ហើយ​​​ខ្លួន​​​ត្រូវ​​​បាន​​​នគ​​​រ​​​បាល​​​វាយ​​​ដំ​​​ និង​​​ចាប់​​​អូសចេញ​​​ពីទីនោះ​​​។ ក្មេង​​​ប្រុស​​​នេះ​​​និយាយ​​​ថា “ពួកគេ​​​ប្រើ​​​ដំបង​​​ឆក់​​​វ៉ៃ​​​ខ្ញុំ ប៉ុន្តែ​​​​​​មិន​​​បាន​​​ឆក់​​​ខ្ញុំទេ គ្រាន់​​​តែ​​​វ៉ៃ​​​ខ្ញុំប៉ុណ្ណោះ។ ពួកគេ​​​បានទាត់​​​ខ្ញុំ​​​ជា​​​ច្រើន​​​ជើង​​​ នៅពេល​​​ចាប់​​​ខ្លួន​​​ខ្ញុំ​​​។ ខ្ញុំភ័យ​​​ខ្លាច​​​ និង​​​ស្រឡាំង​​​កាំង​​​យ៉ាង​​​ខ្លាំង​​​ នៅពេល​​​គេ​​​ចាប់​​​ខ្លួន​​​ខ្ញុំ។ នៅ​​​ខណ្ឌ​​ ​គេក៏បាន​​​វ៉ៃ​​​ខ្ញុំ​​​ ដាល់​​​និង​​​ទះមុខ​​​ខ្ញុំ​​​បួន​​​ប្រាំ​​​កំផ្លៀងដែរ​​​”។

ក្មេង​​​ប្រុស​​​ ម៉ែន សុខសម្បត្តិ ដែល​​​រក​​​ចំណូល​​​បាន​​​ប្រហែល​​​៥.០០០​​​រៀល​​​ក្នុង​​​មួយ​​​ថ្ងៃ​​​​​​ពី​​​ការ​​​​​​ដើរ​​​រើស​​​សំរាម​​​ ត្រូវបាន​​​ដោះ​​​លែង​​​ឲ្យ​​​នៅក្រៅ​​​ឃុំ​​​កាលពី​​​ថ្ងៃទី​​​១០ ខែ​​​មករា បន្ទាប់ពី​​​អនុវត្ត​​​ទោស​​​បានជិត​​​ពីរ​​​ខែ​​​នៅ​​​ពន្ធនាគារ​​​ព្រៃស​​​។

អង្គុយ​​​ក្បែរ​​​​​​កូន​​​ប្រុស​​​របស់​​​ខ្លួន​​​កាលពី​​​ម្សិលមិញ អ្នក​​​ស្រី អួន ពៅ ជា​​​ស្ត្រីេមម៉ាយ​​​​​​ និ​​​ង​​​ត្រូវ​​​​​​ជា​​​ម្ដាយ​​​របស់​​​ក្មេង​​​ប្រុស ម៉ែន សុខសម្បត្តិ ដែល​​​មាន​​​របរ​​​ជា​​​អ្នក​​​លាង​​​ចាន​​​​​​ឲ្យ​​​គេ​​​ដើម្បី​​​ចិញ្ចឹម​​​គ្រួសារ​​​  បាន​​​រៀបរាប់​​​ពី​​​កុមារ​​​ភាព​​​​​​ដ៏​​​​​​លំបាករបស់កូន​​​ប្រុស​​​គាត់​​​​​​។ អ្នក​​​ស្រី​​​និយាយ​​​ថា ” វា​​​កម្រ​​​មាន​​​មិត្ត​​​ភក្ដិ​​​ណាស់ វា​​​តែង​​​តែ​​​ដើរ​​​​​​ម្នាក់​​​ឯង​​​ វា​​​ខុស​​​ពី​​​ក្មេង​​​ដទៃ​​​ វា​​​មិន​​​សូវ​​​ជា​​​មាន​​​សុខ​​​ភាព​​​ល្អ​​​ប៉ុន្មាន​​​ទេ វា​​​ធ្វើ​​​អី្វ​​​​​​ចម្លែកៗ​​​​​​ជាញឹក​​​ញាប់​​​”។

ក្រុម​​​គ្រួសារ​​តែង​​​តែ​​​ដាស់​​​តឿន​​​ក្មេង​​​ប្រុស​​​ ម៉ែន សុខសម្បត្តិ ​ឲ្យ​​​ចៀស​​​ឆ្ងាយ​​​ពី​​​កន្លែង​​​បាតុកម្ម​​​ ប៉ុន្តែ​​​អ្នកស្រី អួន ពៅ និយាយ​​​ថា ការ​​​ចង់​​​ដឹង​​​ចង់​​​ឃើញ​​​របស់​​​កូន​​​ប្រុស​​​គាត់​​​បាន​​​បណ្ដាល​​​ឲ្យ​​​ក្មេង​​​នេះ​​​ជាប់​​​ពាក់​​​ព័ន្ធ​​​នៅ​​​ក្នុង​​​ហេតុការណ៍​​​​​​ប៉ះទង្គិច​​​គ្នា​​​កាលពីខែ​​​វិច្ឆិកា។

អ្នកស្រី​​​និយាយ​​​ថា “យើង​​​បាន​​​ព្យាយាម​​​ប្រាប់វា​​​កុំឲ្យ​​​ទៅ​​​ នៅពេល​​​យើង​​​ឮថាមាន​​​ការ​​​បង្ក្រាប។ យើង​​​បាន​​​ប្រាប់វា​​​ថា នៅពេល​​​វា​​​រើស​​​សំរាម​​​ ‘ កុំទៅ​​​កន្លែង​​​​​ណា​​​ផ្ដេស​​​ផ្ដាស​​​ ព្រោះ​​​មាន​​​ការ​​​វ៉ៃ​​​គ្នា​​​នៅ​​​ចំណុច​​​ស្ពាន​​​’ ប៉ុន្តែ​​​វា​​​ក៏បាន​​​បាត់​​​ខ្លួន​​​នៅពេល​​​នោះ”។

ក្រោយ​​​​​​មក ​​​ពេល​​​បើកទូរទស្សន៍​​​មើល​​​នៅយប់​​​នោះ គាត់​​​ក៏ឃើញ​​​កូន​​​ប្រុស​​​របស់​​​គាត់​​​ត្រូវ​​​សមត្ថកិច្ច​​​ចាប់​​​ខ្លួន​​​។  យោងតាម​​​ក្មេង​​​ប្រុស​​​ ម៉ែន សុខ​​​សម្បត្តិ បាន​​​ឲ្យ​​​ដឹង​​​ថា ខ្លួន​​​បានជាប់ឃុំ​​​ពីរ​​​ថ្ងៃ​​​នៅអធិការ​​​ដ្ឋាននគ​​​រ​​​បាល​​​ខណ្ឌ មុន​​​ពេល​​​ត្រូវ​​​បញ្ជូន​​​ខ្លួន​​​ទៅពន្ធនាគារ​​​ព្រៃស ហើយ​​​នៅទីនោះ​​​ក្មេង​​​ប្រុស​​​នេះ​​​ត្រូវ​​​បាន​​​ឃុំខ្លួន​​​នៅ​​​ក្នុង​​​បន្ទប់មួយ​​​ជាមួយ​​​បុរស​​​ប្រហែល​​​៣០​​​នាក់​​​ផ្សេង​​​ទៀត​​​។ ក្រៅពី​​​ត្រូវ​​​គេ​​​ដាល់​​​មុខ​​​អំឡុង​​​ពេល​​​មាន​​​ជម្លោះ​​​មួយ​​​នៅពន្ធនាគារ​​​ ក្មេង​​​ប្រុស​​​ ម៉ែន សុខ​​​សម្បត្តិ​​​និយាយ​​​ថា ឆ្មាំ​​​ពន្ធនាគារ​​​ល្អ​​​ចំពោះគេ​​​ណាស់​​​ និង​​​ថែម​​​ទាំង​​​អនុញ្ញាត​​​ឲ្យ​​​គេ​​​លេង​​​បាល់ទាត់​​​ទៀត​​​ផង។

ប៉ុន្តែ​​​នៅ​​​ពេល​​​ម្ដាយ​​​របស់​​​ខ្លួនទៅ​​​សួរសុខ​​​ទុក្ខ​​​ ក្មេង​​​ប្រុស​​​នេះ​​​ហាក់​​​ដូច​​​ជា​​​មិន​​​សប្បាយ​​​ចិត្ត​​​​​​​​ទេ។ អ្នកស្រី អួន ពៅ និយាយ​​​ថា “វា​​​ឈឺ​​​ចុក​​​ចាប់​​​ដើម​​​ទ្រូង​​​រហូត​​​ បន្ទាប់ពីការ​​​ចាប់​​​ខ្លួន។ រាល់​​​ពេល​​​ដែល​​​ខ្ញុំទៅមើល​​​វា វា​​​យំហើយ​​​និយាយ​​​ថា ខ្ញុំនឹក​​​ម៉ែ“។

ក្រោយ​​​ការ​​​ចាប់ខ្លួន​​​ក្មេង​​​ប្រុស​​​នេះ បណ្ដា​​​អង្គការ​​​សិទ្ធិមនុស្ស​​​និយាយ​​​ថា ក្មេង​​​ប្រុស​​​​​​ ម៉ែន សុខសម្បត្តិ​​​ រួមជាមួយ​​​នឹង​​​យុវជន​​​ឈ្មោះ​​​ វណ្ណី វ៉ាន់ណន អាយុ​​​១៧​​​ឆ្នាំ ដែល​​​ជា​​​ចុង​​​ចោទ​​​ម្នាក់​​​ទៀត​​​នៅ​​​ក្នុង​​​សំណុំរឿង​​​េនះ​​​ ត្រូវ​​​បាន​​​បដិសេធ​​​មិន​​​ឲ្យ​​​ទទួល​​​បាន​​​ការ​​​គាំពារ​​​តាម​​​ផ្លូវ​​​ច្បាប់​​​ដែល​​​សម​​​ស្រប​​​សម្រាប់​​​កុមារ​​​ដែល​​​ស្រប​​​តាម​​​ច្បាប់​​​អន្តរជាតិ​​​ឡើយ​​​។

លោកស្រី ណាលី ពីឡូក​​​ នាយក​​​អង្គការ​​​សិទ្ធិមនុស្ស​​​លីកាដូ បាន​​​មាន​​​ប្រសាសន៍​​​កាលពី​​​​​​ម្សិលមិញ​​​ថា តុលាការ​​​គួរ​​​តែ​​​ដក​​​បទ​​​ចោទ​​​ប្រកាន់​​​លើ​​​ក្មេង​​​ប្រុស​​​ ម៉ែន សុខសម្បត្តិ។ លោកស្រី​​​មាន​​​ប្រសាសន៍​​​ទៀត​​​ថា “បើ​​​គិត​​​ពី​​​អាយុ​​​ និង​​​​​​កម្រិត​​​សមត្ថភាពផ្នែក​បញ្ញា​​​ស្មារតី​​​​​​ តុលាការ​​​គួរតែ​​​ដក​​​ការ​​​ចោទ​​​ប្រកាន់​​​លើ​​​ជន​​​សង្ស័យ​​​​​​វ័យ​​​ក្មេង​​​នេះ ពីព្រោះ​​​វា​​​បង្ហាញ​​​ច្បាស់ណាស់​​​ថា​​​ក្មេង​​​នេះ​​​មិន​​​បាន​​​យល់ដឹង​​​ពី​​​ស្ថានភាព​​​ ឬទង្វើ​​​របស​​​់​​​ខ្លួន​​​ទេ​​​​​​ អំឡុង​​​​​​ហេតុការណ៍​​​នោះ”។

ទន្ទឹម​​​នឹង​​​ការ​​​ប្រឈម​​​បទ​​​ចោទ​​​ប្រកាន់​​​ព្រហ្មទណ្ឌ​​​ នគរ​​​បាល​​​រាជធានី និង​​​មន្ត្រី​​​អង្គភាព​​​ពន្លត់អគ្គិភ័យ​​​ចំនួន​​​១៤​​​នាក់​​​ក៏កំពុង​​​ប្ដឹង​​​ក្មេង​​​ប្រុស​​​ទាំង​​​ពីរ​​​នាក់​​​េនះដែរ​​​ ដោយ​​​ទាម​​​ទា​​​រ​​​សំណង​​​ពីពួកគេ​​​ក្នុង​​​ម្នាក់ៗ​​​​​​រហូត​​​ដល់​​​ទៅ​​​៥ម៉ឺន​​​ដុល្លារ​​​ចំពោះ​​​ការរ​​​ង​​​របួស​​​របស់ពួកគេ​​​កាលពី​​​ថ្ងៃទី​​​១២ ខែ​​​វិច្ឆិកា។

អ្នកស្រី អួន ពៅ និយាយ​​​ថា “អាជ្ញាធរ​​​ព្យាយាម​​​ទាមទារ​​​សំណង​​​ ប៉ុន្តែ​​​យើង​​​រ​​​ក​​​ប្រាក់​​​បាន​​​ត្រឹម​​​តែ​​​ចិញ្ចឹម​​​ខ្លួនឯង​​​ប៉ុណ្ណោះ តើពួកយើង​​​បាន​​​ប្រាក់​​​ពី​​​ណា​​​បង់​​​សំណង​​​ទៅ​​​?”។

ក្មេង​​​ប្រុស​​​ ម៉ែន សុខ​​​សម្បត្តិ និយាយ​​​ថា ប្រសិន​​​បើ​​​ខ្លួន​​​ជាប់​​​ពន្ធនាគារ​​​ម្ដង​​​ទៀត​​​ ខ្លួន​​​នឹង​​​នឹក​​​ដល់​​​រឿង​​​ធម្មតា​​​​មួយ​​​ចំនួន​​​នៅ​​​ក្នុង​​​ជីវិត​​​រស់​​​នៅ​​​ប្រចាំ​​​ថ្ងៃ​​​។ ក្មេង​​​នេះ​​​​​​និយាយ​​​ថា “ខ្ញុំនៅផ្ទះ​​​ពិត​​​ជា​​​សប្បាយ​​​ចិត្ត​​​ណាស់ ពីព្រោះខ្ញុំអាច​​​មើល​​​ទូរទស្សន៍​​​បា​​​ន​​​ លេង​​​ហ្គេមបាន​​​ និង​​​ធ្វើ​​​អ្វី​​​ៗ​​បាន​​​តាម​​​​ដែល​​​ខ្ញុំចង់​​​។ ខ្ញុំ​​​អាច​​​ដើរ​​​លេង​​​បានពេញ​​​មួយ​​​ថ្ងៃ”។ ក្មេង​​​ប្រុស​​នេះ​​​និយាយ​​​ទៀត​​​ថា នៅ​​​ថ្ងៃណាមួយ​​​ខ្លួន​​​សង្ឃឹម​​​ថា នឹង​​​ចាប់​​​អាជីព​​​​​ជា​​​ជាង​​​​ជួស​​​ជុល​​​ម៉ូតូ​​​ដើម្បី​​​ចិញ្ចឹមជីវិត​​​។

ចំណែក​​​ឯ​​​អ្នកស្រី អួន ពៅ បាន​​​និយាយ​​​ទាំង​​​ទឹក​​​ភ្នែក​​​រលីង​​​រលោង​​​ថា ​​​អ្នកស្រី​​​មាន​​​សង្ឃឹម​​​តិច​​​​​​ណាស់​​​ចំពោះ​​​កូន​​​ប្រុស​​​របស់​​​គាត់​​​ ប្រសិន​​​បើ​​​ពួកគាត់​​​បែក​​​គ្នា​​​។ គាត់​​​និយាយ​​​ថា ” បើ​​​គ្មាន​​​ខ្ញុំទេ​​​នោះ​​​ ​​​ជីវិត​​​របស់​​​វា​​​នឹងជួប​​​ការ​​​លំបាក​​​ខ្លាំង​​​”៕ សុខុម​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស