រហូតមកទល់ពេលនេះ រយៈពេលជិតមួយសប្ដាហ៍មកហើយដែលកម្លាំងនគរបាលរាជធានីភ្នំពេញមិនទាន់ស៊ើបអង្កេតការបុកហើយរត់បណ្ដាលឲ្យមនុស្សស្លាប់កាលពីយប់ថ្ងៃសុក្រ នៅពេលដែលរថយន្តរ៉ង់រូវើបានបុកម៉ូតូមួយគ្រឿងនៅជិតក្រសួងពាណិជ្ជកម្មបណ្ដាលឲ្យបុរសពីរនាក់ស្លាប់ និងម្នាក់ទៀតរបួសធ្ងន់នៅឡើយទេ។
ប៉ុន្តែនគរបាលមូលដ្ឋានមិនបានធ្វើការសើុបសួរ សូម្បីការសើុបសួរបឋមអំពីអ្វីដែលបានកើតឡើងនៅយប់នោះទេ ដែលនៅពេលនោះបុរសពីរនាក់បានបាត់បង់ជីវិត ហើយរថយន្តទំនើបនោះបានបើកចេញយ៉ាងលឿនពីកំណាត់មហាវិថីសហព័ន្ធរុស្ស៊ី ដែលសម្បូរដោយធនាគារ ស្ថានីយប្រេងឥន្ធនៈ និងហាងលក់រថយន្ត។
ថាង រដ្ឋា អាយុ២៣ឆ្នាំបានស្លាប់នៅកន្លែងកើតហេតុ ចំណែក ខ្នាត សាត អាយុ២១ឆ្នាំបានស្លាប់នៅមន្ទីរពេទ្យកាល់ម៉ែតនៅពេលបន្តិចក្រោយមក។ ឡុង ស្រូយ អាយុ១៨ឆ្នាំរងរបួសធ្ងន់។
លោក អ៊ុច ចំណាន ជាឪពុកមារបស់ ឡុង ស្រូយ បាននិយាយថា “ក្មួយប្រុសរបស់ខ្ញុំរងរបួសធ្ងន់ និងបាក់ជើង។ នគរបាលនៅមិនទាន់បានមកសួរនាំខ្ញុំនៅមន្ទីរពេទ្យមិត្តភាពខ្មែរ-សូវៀតដដែល”។
លោក ពាង មឿង បានប្រចាំការក្នុងនាមជាសន្តិសុខម្នាក់កាលពីយប់ថ្ងៃសុក្រនៅស្ថានីយប្រេងឥន្ធនៈតូតាល់ក្បែរនោះ ហើយបានឃើញការបុកមនុស្សស្លាប់នេះកើតឡើងចម្ងាយតែប៉ុន្មានមែ៉ត្រប៉ុណ្ណោះ។ លោកបាននិយាយថា “ខ្ញុំបានឃើញរថយន្តរ៉ង់រ៉ូវើនោះពណ៌ខ្មៅ ប៉ុន្តែនគរបាលមិនបានសួរនាំខ្ញុំអំពីអ្វីដែលបានកើតឡើងទេ”។
លោក ម៉ន ម៉េត អ្នកគ្រប់គ្រងនៅស្ថានីយប្រេងឥន្ធនៈតូតាល់នោះបាននិយាយថា នគរបាលមិនបានទាក់ទងលោកដើម្បីសុំពិនិត្យមើលរូបភាពពីកាមេរ៉ាសុវត្ថិភាពអំឡុងពេលកើតមានគ្រោះថ្នាក់ចរាចរណ៍ទេ។ លោកបាននិយាយថា “គ្មាននគរបាលណាមកសួរនាំទេ។ គ្មានបុគ្គលិករបស់យើងណាម្នាក់ត្រូវបានសួរនាំឡើយ”។
នៅហាងលក់រថយន្តនីសាន់ក្បែរនោះដែរ លោក គឹម ចាន់ឆាយា តំណាងផ្នែកលក់ក៏បាននិយាយផងដែរថា អាជ្ញាធរមិនបានសុំពិនិត្យមើលកាមេរ៉ាសុវត្ថិភាពរបស់ខ្លួនឡើយ ។ លោកបាននិយាយថា “គ្រោះថ្នាក់ចរាចរណ៍កើតឡើងនៅទីនោះគ្រប់ពេលវេលា”។ លោកបានពន្យល់ថា អ្នកបើកបរយានយន្តដែលបត់ខុសច្បាប់ត្រង់ផ្លូវប្រសព្វក្បែរនោះ តាមធម្មតាត្រូវតែទទួលខុសត្រូវ។ នគរបាលមិនដែលមកសាកសួរយើងទេ”។
លោក ស៊ុន សុវណ្ណ នាយនគរបាលចរាចរខណ្ឌសែនសុខ បានមានប្រសាសន៍ថា មន្ត្រីរបស់់លោកបាននិយាយជាមួយសាក្សីនៅកន្លែងកើតហេតុហើយ ប៉ុន្តែរវល់ពេកមិនបានបន្តការស៊ើបអង្កេតនោះ។ លោកបានមានប្រសាសន៍ថា “យើងមិនមានពេលច្រើនដើម្បីធ្វើការលើរឿងនេះទេ ពីព្រោះយើងបានចាត់ចែងឲ្យមន្ត្រីរបស់យើងការពារទីលានប្រជាធិបតេយ្យ”។
លោក សុវណ្ណ បានមានប្រសាសន៍ថា លោកកំពុងធ្វើការស៊ើបអង្កេតហើយ ប៉ុន្តែថា លោករង់ចាំសាក្សីមកផ្ដល់ភ័ស្តុតាងដល់នគរបាល។ លោកបានបន្ថែមថា “យើងមិនបានយករូបភាពវីដេអូមកពិនិត្យទេ ពីព្រោះក្នុងពេលកន្លងមក វាមិនសូវមានប្រយោជន៍។ ប្រសិនបើនរណាម្នាក់ប្រាប់យើងឲ្យបានច្បាស់លាស់អំពីរថយន្តនោះ ខ្ញុំនឹងតាមដានរថយន្តនោះ”៕ សារុន