30 C
Phnom Penh

លោក អុី ឈាន នឹង​លាលែងពីតួនាទី​ជា​អភិបាល​ខេត្ត​ប៉ៃលិន

ដោយ ឌឹ ខេមបូឌា ដេលី

បទវិភាគ

ប្រធាន​​​ខុទ្ទកាល័យ​​​លោក អុី ឈាន បា​​​ន​​​និយាយ​​​កាលពីម្សិលមិញ​​​ថា លោក អុី ឈាន​​​ដែល​​​បាន​​​បម្រើការ​​​ជា​​​អភិបាល​​​ខេត្ត​​​ប៉ៃលិន​​​ចាប់​​​តាំងពី​​​លោក អៀង សារី អតីត​​​រដ្ឋមន្ត្រីក្រសួង​​​​ការ​​​បរទេស​​​ខ្មែរ​​​ក្រហម​​​បាន​​​ដឹក​​​នាំ​​​កម្លាំង​​​ឧទ្ទាម​​​របស់​​​លោក​​​នៅ​​​ក្នុង​​​តំបន់​​​នេះ ផ្ដាច់​​​​ខ្លួន​​​មក​​​ចូល​​​រួម​​​ជាមួយ​​​រដ្ឋាភិបាល​​​កាលពី​​​ឆ្នាំ​​​១៩៩៦​​​នោះ នឹង​​​លាលែង​​​ពីតួនាទី​​​របស់​​​លោក​​​​​​នៅថ្ងៃ​​​សៅរ៍។

យោងតាម​​​លោក សៅ សារ៉ាត់ ប្រធាន​​​ខុទ្ទកាល័យ​​​លោក​​​ អុី ឈាន បាន​​​ឲ្យ​​​ដឹង​​​ថា លោក កើត សុធា ជា​អភិបាល​រង​នឹង​កាន់តួនាទីនេះ​​​​​ជំនួសលោក អីុ ឈាន ​​នៅ​​​ពិធី​​​មួយ​​​ដែល​​​ចូល​​​រួម​​​ជា​​​អធិបតី​​​ដោយ​​​លោក ស ខេង រដ្ឋមន្ត្រី​​​ក្រសួង​​​មហាផ្ទៃ។

លោក សារ៉ាត់ បាន​​​មាន​​​ប្រសាសន៍​​​ថា “យើង​​​​​​ទើប​​​តែ​​​ទទួល​​​បាន​​​លិខិត​​​ផ្លូវ​​​ការ​​​ពី​​​ក្រសួង​​​មហា​ផ្ទៃ​​​អំពី​​​ការ​​​ជំនួស​​តួនាទីលោក អុី ឈាន អភិបាល​​​ខេត្ត​​​ប៉ៃលិននេះ”។ លោក​​​បាន​​​បន្ថែម​​​ថា ​​​មិន​​​ទាន់​​​ទទួល​​​បានព្រះ​​​រាជក្រឹត្យ​​​សម្រាប់​​​ការ​​​ផ្លាស់​​​ប្ដូរ​​​តួនាទី​​​នេះនៅឡើយទេ។

លោក កើត​ សុធា បាន​​​បម្រើការ​​​ជា​​​អភិបាល​​​រង​​​ចាប់​​​តាំង​​​ពី​​​លោក​​​ អីុ ឈាន ត្រូវ​​​បាន​​​តែង​​​តាំង​​​​ជា​​​អភិបាល​​​ខេត្ត​​​ បន្ទាប់ពី​​ការ​​​ផ្ដាច់​​​ខ្លួន​​​កាលពី​​​ខែ​​​កញ្ញា ឆ្នាំ​​​១៩៩​​៦។

លោក អុី ឈាន អាយុ​​​៦៣​​​ឆ្នាំ​​​ ដែល​ធ្លាប់​​​​​បានធ្វើ​​​​​​ជា​​​ប្រធាន​​​កង​​​សន្តិសុខ​​​របស់ ប៉ុល​ពត ត្រូវ​​​បាន​​​តែង​​​តាំង​​​ជា​​​អភិបាល​​​ខេត្ត​​​ដ៏តូច​​​នៅ​​​តាម​​​ព្រំដែន​​​ថៃ នៅ​ពេល​​​​​ខេត្ត​​​នេះ​​​ត្រូវ​​​បាន​​​បំបែក​​​ចេញពី​​​ខេត្ត​​​បាត់ដំបង ជាផ្នែក​​​មួយ​​​នៃ​​​កិច្ច​​​ព្រម​​​ព្រៀង​​​ដែល​​​នាំ​​​ឲ្យ​​​ លោក​ អៀង សារី ​​​ដឹក​​​នាំ​​​កង​​​ទ័ពជិត​​​៥.០០០​​​នាក់​​​មក​​​ចូលរួម​​​ជាមួយ​​​រដ្ឋាភិបាល​​​ក្រុង​​​ភ្នំពេញ។

វាជាការ​​​ផ្ដាច់​​​ខ្លួន​​​ដ៏ធំ​​​លើក​​​ដំបូង​​​នៃ​​​កង​​​ទ័ព​​​ខ្មែរ​​​ក្រហម​​​ចាប់​​​តាំង​​​ពីការ​​​បោះ​​​ឆ្នោត​​​ដែល​​​រៀបចំ​​​ដោយ​​​អង្គការ​​​សហ​​​ប្រជាជាតិ​​​ឆ្នាំ​​​១៩៩៣​​​ ដែល​​​ក្រុម​​​ឧទ្ទាម​​​បាន​​​ធ្វើ​​​ពហិការ​​​ ហើយ​​​ត្រូវ​​​បាន​​​បាត់​​​សិទ្ធិ​​​ក្នុង​​​ការ​​​រកស៊ី​​​ត្បូង​​​ដ៏កាក់កបនៅ​​​ប៉ៃលិន​​​ ដែលបាន​​​ផ្គត់​​​ផ្គង់​​​កម្លាំង​តស៊ូ​ប្រដាប់​​​អាវុធ​​​របស់​​​ខ្លួន​​​ប្រឆាំង​​​​​រដ្ឋាភិបាល​​​អស់រយៈពេល​​ជា​​​ច្រើន​​​ឆ្នាំ​​​។

លោក គង់ ដួង ប្រធាន​​​មន្ទីរ​​​ព័ត៌មាន​​​ខេត្ត​​​ប៉ៃលិន​​​បាន​​​មាន​​​ប្រសាសន៍​​​ថា លោក អៀង វុធ កូន​​​ប្រុស​​​របស់​​​លោក អៀង សារី ដែល​​​បាន​​​បម្រើ​​​ការ​​​ជា​​​អភិបាល​​​រង​មួយរូប​​​ដែរ​​​​ចាប់​​​តាំង​​​ពីការ​​​ផ្ដាច់​​​ខ្លួន​​​មកនោះ​​​ នឹង​​​បន្ត​​​កាន់​​​តួនាទី​​​នេះ​​​ដដែល។ លោក គង់ ដួង បាន​​​មាន​​​ប្រសាសន៍​​​ថា លោក​ អុី ឈាន​ លាលែង​ពីតួនាទីនេះ​​​ដោយ​​​សារ​​​អាយុ​​​ចូល​​​និវត្តន៍ ហើយ​​​នឹង​​​ត្រូវ​​​តែង​​​តំាង​​​ជា​​​ប្រធាន​​​ក្រុម​​​ប្រឹក្សា​​​ខេត្ត​​​ប៉ៃលិន។ លោក​​​បាន​​​មាន​​​ប្រសាសន៍​​​ថា “លោក អុី​ ឈាន បាន​​​បម្រើការ​ជា​​​អភិបាល​​​ខេត្ត​​​ប៉ៃលិន​​​រយៈ​​​ពេល​​​១៨​​​ឆ្នាំ​​​មក​​​ហើយ ហើយ​​​អតីត​​​ប្រជាជន​​​​​​ខ្មែរ​​​ក្រហម​​​របស់​​​យើង​​​មាន​​​អារម្មណ៍​​​សោក​​​ស្ដាយ​​​អំពី​​​រឿង​​​នេះ​​​នៅ​​​ពេល​​​ដែលពួកគេ​​​ទទួល​​​បាន​​​ព័ត៌មាន​​​ថា លោក អុី ឈាន នឹង​ត្រូវ​​​ផ្លាស់​​​ចេញពី​​​តំណែង​​​ក្នុង​​​រយៈ​​​ពេល​​​ប៉ុន្មាន​​​ថ្ងៃ​​​ខាង​​​មុខ​​​នេះ​​​៕ សារុន​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស