ក្រុមអ្នកតំណាងឲ្យប្រជាជនប្រហែល២៥០គ្រួសារដែលជាប់ពាក់ព័ន្ធនឹងវិវាទដីធ្លីដ៏អូសបន្លាយពេលជាមួយក្រុមហ៊ុនកសិពាណិជ្ជកម្មក្នុងខេត្តកំពង់ស្ពឺ បានដាក់ពាក្យបណ្ដឹងទៅអង្គការសិទ្ធិមនុស្សអាដហុក និងបាននិយាយថា ពួកគាត់នឹងព្យាយាមយកដីដែលក្រុមហ៊ុនបានប្លន់ពីពួកគាត់មកវិញ។
អ្នកភូមិប្រហែល៦០នាក់បានធ្វើដំណើរមករាជធានីភ្នំពេញកាលពីម្សិលមិញ ដើម្បីឲ្យគេដឹងករណីដីធ្លីរបស់ខ្លួនជាសាធារណៈតាមរយៈប្រព័ន្ធផ្សព្វផ្សាយ ហើយបានធ្វើសន្និសីទកាសែតនៅការិយាល័យកណ្ដាលរបស់អង្គការអាដហុក។
អ្នកស្រី សោម គង់ ជាអ្នកភូមិម្នាក់បាននិយាយថា អ្នកភូមិជាច្រើនគ្រួសារបាននិងកំពុងធ្វើស្រែចម្ការនៅលើដីដែលមានវិវាទទំហំ៩៥០ហិកតានេះតាំងពីទសវត្សរ៍ឆ្នាំ១៩៨០មក ហើយបានដាក់ពាក្យបណ្ដឹងជាច្រើនទៅអាជ្ញាធររដ្ឋាភិបាលគ្រប់លំដាប់ថ្នាក់ តែគ្មានប្រយោជន៍ឡើយ បន្ទាប់ពីក្រុមហ៊ុន Master International Corporation Group បានមកកាន់កាប់ដីនេះក្នុងឆ្នាំ២០០៦។
អ្នកស្រីបាននិយាយថា ក្រុមអ្នកភូមិបានប៉ះទង្គិចជាមួយកម្លាំងសន្តិសុខជុំវិញវិវាទដីធ្លីនេះកាលពីពេលមុន ហើយត្រូវបានគំរាមឲ្យចាកចេញវិញ។ ដោយគ្មានការរួញរា អ្នកស្រី សោម គង់ បាននិយាយថា ឥឡូវនេះក្រុមអ្នកភូមិនឹងព្យាយាមមកធ្វើស្រែចម្ការលើដីនេះជាថ្មីម្ដងទៀត។
អ្នកស្រីបាននិយាយថា “ចាប់ពីពេលនេះទៅ អ្នកភូមិរបស់យើងនឹងត្រឡប់មកធ្វើស្រែចម្ការលើដីនេះវិញ បើទោះណាជាយើងប្រថុយគ្រោះថ្នាក់ដល់អាយុជីវិត ហើយកម្លាំងប្រដាប់អាវុធធ្វើការបង្ក្រាបពួកយើងក៏ដោយ។ ប្រជាជនរបស់យើងត្រូវតែធ្វើជាម្ចាស់ដីមិនមែនធ្វើជាកម្មកររបស់ក្រុមហ៊ុនឯកជនលើដីដែលយើងបានធ្វើស្រែចម្ការស្របច្បាប់តំាងពីទសវត្សរ៍ឆ្នាំ១៩៨០នោះឡើយ”។
ក្រុមអ្នកភូមិក៏បានអះអាងផងដែរថា លោក អ៊ុំ វណ្ណា ប្រធានកម្មវិធីផ្ដល់ប័ណ្ណកម្មសិទ្ធិដីធ្លីដែលគ្រប់គ្រងដោយរដ្ឋាភិបាល បានសន្យាផ្ដល់ប័ណ្ណកម្មសិទ្ធិដីដល់ក្រុមអ្នកភូមិប្រសិនបើពួកគាត់បោះឆ្នោតឲ្យគណបក្សប្រជាជនកម្ពុជានៅក្នុងការបោះឆ្នោតជាតិកាលពីឆ្នាំមុន។ ពួកគាត់បាននិយាយថា ពួកគាត់បានបោះឆ្នោតឲ្យគណបក្សប្រជាជនកម្ពុជាហើយ ប៉ុន្តែពួកគាត់មិនទទួលបានអ្វីជាថ្នូរឡើយ។ គេមិនអាចទាក់ទងលោក វណ្ណា និងក្រុមមន្ត្រីនៅក្រសួងរៀបចំដែនដីដើម្បីសុំការអត្ថាធិប្បាយបានទេ។
លោក គង់ សឿន មេឃុំតាំងសំរោង បានបញ្ជាក់ថា អ្នកភូមិបាននិងកំពុងធ្វើស្រែចម្ការលើដីនេះច្រើនឆ្នាំមកហើយ ប៉ុន្តែលោកបាននិយាយថា វិវាទដីធ្លីនេះមិនស្ថិតក្រោមសមត្ថកិច្ចរបស់លោកទេ។
លោកបានមានប្រសាសន៍ថា “ក្រុមអ្នកភូមិបានធ្វើស្រែចម្ការលើដីនេះច្រើនឆ្នាំមកហើយ ប៉ុន្តែក្រុមហ៊ុនអះអាងថា ក្រុមហ៊ុនមានប័ណ្ណកម្មសិទ្ធិបញ្ជាក់ភាពជាម្ចាស់លើដីនេះ”។ លោកបានបន្ថែមថា “ករណីនេះធ្ងន់ធ្ងរណាស់ ហើយវាហួសពីសមត្ថកិច្ចរបស់ខ្ញុំ។ មានតែរដ្ឋាភិបាលប៉ុណ្ណោះដែលអាចរកដំណោះស្រាយបាន”។ អង្គការអាដហុកបានលើកឡើងថា ខ្លួននឹងស៊ើបអង្កេតករណីនេះ៕ សារុន