មុនការប្រារព្ធទិវាកុមារអន្តរជាតិ ដែលធ្វើឡើងនៅថ្ងៃអាទិត្យ អង្គការសិទ្ធិមនុស្សលីកាដូ កាលពីថ្ងៃសុក្របានរំលេចបញ្ហាអ្នកទោសអនីតិជននិងកុមារដែលជាប់ពន្ធនាគារជាមួយម្តាយរបស់ខ្លួននៅទូទាំងប្រទេស។
នៅក្នុងសេចក្តីប្រកាសមួយ អង្គការសិទ្ធិមនុស្សនេះបានកត់សម្គាល់ថា អនីតិជនចំនួន២៨០នាក់ ជាប់ក្នុងពន្ធនាគារ១៨កន្លែង ដែលខ្លួនពិនិត្យតាមដាននៅទូទាំងប្រទេស និងរកឃើញថា មានការ “ធ្លាក់ចុះជាង៥០ភាគរយនៃចំនួនអ្នកទោសអនីតិជន ចាប់តាំងពីឆ្នាំ២០០១មក”។
អង្គការលីកាដូបានលើកឡើងថា “បន្ថែមពីលើនោះ មានស្ត្រីមានគ័ភ៌ចំនួន១៣នាក់ និងកុមារចំនួន៤០នាក់ ដែលរស់នៅជាមួយម្តាយរបស់ខ្លួនដែលជាប់ពន្ធនាគារ។”
ប៉ុន្តែ បើទោះជាមានការធ្លាក់ចុះនៃចំនួនអ្នកទោសជាអនីតិជនក៏ដោយ ក៏អង្គការលីកាដូបានឲ្យដឹងថា ខ្លួននៅតែបារម្ភអំពីស្ថានភាពលំបាករបស់ពួកគេ និងបានលើកឡើងថា ច្បាប់ដែលត្រូវបានអនុម័តនាពេលថ្មីៗនេះស្តីពីកុមារ ចាំបាច់ត្រូវតែអនុវត្តកាន់តែឆាប់កាន់តែប្រសើរ។
អង្គការលីកាដូបានឲ្យដឹងថា “សក្ខីកម្មដែលត្រូវបានទទួលដោយអង្គការលីកាដូ បង្ហាញនូវភាពបន្ទាន់នៃការអនុវត្តបញ្ញត្តិនៃច្បាប់ថ្មីនេះដោយមិនពន្យារពេល។ បច្ចុប្បន្ន អនីតិជនដែលជាប់ក្នុងមន្ទីរឃុំឃាំង ស្ថិតក្នុងស្ថានភាពរងការបំពានដូចក្មេងជំទង់ និងត្រូវបានប្រព្រឹត្តលើដូចគ្នាដែរ ទៅតាមស្ថានភាពហិរញ្ញវត្ថុរបស់ពួកគេ ជាងអាយុរបស់ពួកគេ”។
អង្គការនេះបានលើកឡើងថា ចំណែកវត្តមានរបស់កុមារ ឬទារកនៅក្នុងពន្ធនាគារវិញ “ការវាយតម្លៃលម្អិតមិនដែលបានធ្វើឡើងទេនៅក្នុងប្រទេសកម្ពុជា និងផ្លូវជីវិតនៅក្នុងពន្ធនាគារសម្រាប់កុមារ កម្រត្រូវគេពិចារណាណាស់”។
លោក គុយ ប៊ុនសន អគ្គនាយក អគ្គនាយកដ្ឋានពន្ធនាគារ នៃក្រសួងមហាផ្ទៃ បានលើកឡើងថា ចំនួនកុមាររស់នៅជាមួយម្តាយក្នុងពន្ធនាគារបានធ្លាក់ចុះ ប៉ុន្តែ”តួលេខនេះគឺជាអ្វីដែលអាជ្ញាធរមិនចង់ឃើញ”។ លោកបានមានប្រសាសន៍ថា “មានកុមារតែ១២នាក់ប៉ុណ្ណោះដែលមានអាយុក្រោម៦ឆ្នាំរស់នៅក្នុងពន្ធនាគារជាមួយម្តាយរបស់ពួកគេ”៕ ប៊ុននី