អ្នកជំនួញជនជាតិជប៉ុនដែលរងការចោទប្រកាន់ជាសាធារណៈក្នុងសប្តាហ៍នេះ ថាបានបោកប្រាស់យកប្រាក់ជាច្រើនលានដុល្លារពីជនរួមជាតិរបស់ខ្លួនជិត១០០នាក់ ក្នុងគម្រោងអចលនទ្រព្យនៅប្រទេសកម្ពុជានោះ កាលពីម្សិលមិញ បានប្រកាសដាក់ចេញនូវគម្រោងបច្ចេកវិទ្យាថ្មីមួយ នៅខេត្តបន្ទាយមានជ័យ។
លោក អុីគូអូ កុនណូ (Ikuo Konno) ដែលបាននិយាយថា លោកជាទីប្រឹក្សាលោកឧបនាយករដ្ឋមន្ត្រី កែ គឹមយ៉ាន នោះ បានប្រកាសនៅក្នុងសន្និសីទសារព័ត៌មានកាលពីម្សិលមិញថា គម្រោងវិនិយោគរួមរវាងក្រុមហ៊ុន តៃតិច សូលូសិន (Taitech Solutions) ដែលមានមូលដ្ឋាននៅទីក្រុងតូក្យូ និងក្រុមហ៊ុន អេអេភី អុីនធើណេសិនណល ខេមបូឌា (AAP International Cambodia) របស់លោក នឹងចាប់ផ្តើមផលិតអេក្រង់ទូរស័ព្ទដៃនៅឆ្នាំក្រោយ។
លោក កុណូ បានមានប្រសាសន៍ថា “យើងកំពុងរៀបចំផែនការបោះទុនវិនិយោគចំនួន៤លានដុល្លារ ដើម្បីសាងសង់រោងចក្រមួយនៅខេត្តបន្ទាយមានជ័យ នៃប្រទេសកម្ពុជា ដើម្បីផលិតអេក្រង់ទូរស័ព្ទដៃ ពីព្រោះខ្ញុំគិតថា ថ្លៃដើមពលកម្មនៅប្រទេសនេះមានកម្រិតទាប បើធៀបនឹងប្រទេសដទៃទៀត ដូចជា ប្រទេសចិន និងប្រទេសវៀតណាមជាដើម”។
ក្នុងសន្និសីទសារព័ត៌មានប្រារព្ធនៅអគារការិយាល័យ ភ្នំពេញថៅវើ (Phnom Penh Tower) លោក កុនណូ ដែលមានឈ្មោះមួយទៀតថា កុណូ កក្កដា (Konno Kakada) ផងដែរនោះ បានឲ្យដឹងថា ក្រុមហ៊ុន អេអេភី ដែលមានលោកជាប្រធាននាយកប្រតិបត្តិ នឹងបោះទុន៥១ភាគរយនៃចំនួនដើមទុនសរុប ចំណែកឯសល់ប៉ុន្មានទៀតគឺជាចំណែកទុនរបស់ក្រុមហ៊ុន តៃតិច សូលូសិន។
លោកបានឲ្យដឹងបន្ថែមទៀតថា គម្រោងវិនិយោគរួមគ្នានេះនឹងបង្កើតរោងចក្រថ្មីរបស់ខ្លួនមួយនៅលើដីទំហំពីរហិកតា ក្នុងខេត្តបន្ទាយមានជ័យ ដោយសារតែថ្លៃដើមកម្លាំងពលកម្មនៅក្នុងប្រទេសកម្ពុជាមានកម្រិតទាប ហើយប្រទេសផ្សេងៗទៀតនៅក្នុងតំបន់កំពុងស្ថិតក្នុងស្ថានភាពចលាចល។
លោកបានមានប្រសាសន៍ថា “យើងចាប់អារម្មណ៍បោះទុននៅក្នុងប្រទេសកម្ពុជា ក៏ដោយសារតែប្រទេសថៃកំពុងប្រឈមនឹងភាពចលាចលនយោបាយ ហើយប្រទេសវៀតណាម និងប្រទេសចិនកំពុងស្ថិតក្នុងស្ថានភាពតានតឹង”។
លោក កក្កដា បានឲ្យដឹងបន្ថែមទៀតថា ក្រុមហ៊ុនដែលនឹងត្រូវបានបង្កើតថ្មីឆាប់ៗនាពេលខាងមុខនេះនឹងផ្តល់ប្រាក់ឈ្នួលប្រចាំខែចំនួន១៦០ដុល្លារ និងគ្រោងជ្រើសរើសបុគ្គលិកកម្មករប្រហែល២០០នាក់ នៅពេលប្រតិបត្តិការរោងចក្រចាប់ផ្តើមនៅដំណាច់ឆ្នាំ២០១៥។
កាលពីថ្ងៃព្រហស្បតិ៍ មេធាវីមួយក្រុមមកពីប្រទេសជប៉ុនបានធ្វើសន្និសីទសារព័ត៌មានមួយ ដើម្បីអំពាវនាវឲ្យមានការចាប់ខ្លួនលោក កក្កដា ដោយបានអះអាងថា ប្រតិបត្តិការសើុបអង្កេតនៅប្រទេសជប៉ុនរកឃើញថា លោកគឺជាមេក្រុមទុច្ចរិតដែលបានបោកប្រាស់ជនរួមជាតិរបស់លោកចំនួន៩៩នាក់ ដែលភាគច្រើនមានវ័យចំណាស់ ដោយបានលក់អចលនទ្រព្យដែលមិនមានជាក់ស្តែង។ ដើមបណ្តឹងអះអាងថា ខ្លួនខាតបង់ប្រាក់អស់ចំនួន២០,១លានដុល្លារ។
ជាការឆ្លើយតបវិញ លោក កក្កដា ដែលសព្វថ្ងៃរស់នៅក្នុងប្រទេសកម្ពុជា បានដាក់ពាក្យបប្តឹងមេធាវីមួយក្រុមនោះពីបទបរិហារកេរ្តិ៍ ដោយអះអាងថា ដីនិងអាប់ផាតឺមិន ទាំងនោះពិតជាមានមែន។
ក្នុងពេលនោះដែរ លោក កក្កដា បានអះអាងថា លោកមិនអាចជាប់ទោសពីបទឧក្រិដ្ឋទាំងនេះទេ ពីព្រោះលោកមានតំណែងផ្លូវការជាច្រើននៅក្នុងជួររដ្ឋាភិបាល ដូចជា តំណែងជាទីប្រឹក្សាអាជ្ញាធរជាតិប្រយុទ្ធប្រឆាំងគ្រឿងញៀន និងតំណែងជាទីប្រឹក្សាបច្ចេកទេសបណ្ឌិត្យសភានគរបាលកម្ពុជាជាដើម។
ទោះបីជាបច្ចុប្បន្នស្ថិតក្នុងសមរភូមិច្បាប់ក៏ដោយ នៅក្នុងសន្និសីទសារព័ត៌មានកាលពីម្សិលមិញ លោក កក្កដា លើកឡើងថា លោកច្បាស់ក្នុងចិត្តណាស់ថា គម្រោងវិនិយោគថ្មីនេះនឹងដំណើរការទៅមុខ។ លោកបានមានប្រសាសន៍ថា “យើងគ្មានការព្រួយបារម្ភអំពីគម្រោងនេះទេ ពីព្រោះយើងប្តេជ្ញាចិត្តខ្ពស់ណាស់ចំពោះការអនុវត្តគម្រោងនេះឲ្យទទួលបានជោគជ័យ”។
ទោះជាយ៉ាងណាក៏ដោយ លោក អ៊ុង អឿន អភិបាលខេត្តបន្ទាយមានជ័យ បានលើកឡើងថា លោកមិនបានដឹងអំពីគម្រោងរបស់ក្រុមហ៊ុនទាំងពីរនេះ នៅក្នុងខេត្តនេះទេ។ លោកបានមានប្រសាសន៍ថា “ខ្ញុំមិនដឹងអំពីគម្រោងនេះទេ”៕ ប៊ុននី