27 C
Phnom Penh

កង​ទ័ព​កម្ពុជា​តវ៉ា​ចំ​ពោះ​​​ការ​ដែល​កង​ទ័ព​ថៃ​រាយ​​​លួស​បន្លា​ថ្មីនៅជិត​ប្រាសាទ​ព្រះ​វិហារ​

ដោយ ឌឹ ខេមបូឌា ដេលី

បទវិភាគ

ប្រទេស​​​កម្ពុជា​​​បាន​​​ចោទ​​កងទ័ព​​​ថៃ​​​ថា បាន​​​រាយ​​​​​​លួស​​​បន្លា​​​ថ្មី​​​នៅ​​​លើ​​​ដី​​​ជិត​​​ប្រាសាទ​​​ព្រះវិហារ​​​ ដែលភាគី​​​ទាំង​​​ពី​​​រ​​​ទាម​​​ទារ​​​សិទ្ធិកាន់​​​កាប់​​​រៀងៗ​​​ខ្លួន​​​ ហើយ​​​បាន​​​ស្នើ​​​ឲ្យ​​​ប្រទេស​​​ថៃ​​​យក​​​វាចេញ​​​។

ឧត្តម​​​សេនីយ៍ ស្រី ឌឹក ​​​មេបញ្ជាការ​​​កង​​​ពល​​​ធំអន្តរាគមន៍​​​លេខ៣ នៃ​​​កង​​​យោធ​​​ពល​​​ខេមរ​ភូមិន្ទ​​​ ដែល​​​​​​ឈរ​​​ជើង​​​នៅ​​​តំបន់​​​ប្រាសាទ​​​​ព្រះវិហារ​​​បាន​​​មាន​​​ប្រសាសន៍​​​ថា  កាលពីថ្ងៃពុធ ​​​ថៃ​​​បាន​​រាយ​​​លួស​​​បន្លា​​​ប្រវែង​​​១៣០​​​ម៉ែត្រ​​​នៅ​​​លើ​​​ដី​​​​​មានវិវាទ​​ ​ជា​​​កន្លែង​​​ដែល​​​ទាហាន​​​ថៃ​​​ និង​​​ទាហាន​​​ខ្មែរ​​​បាន​​​ប៉ះទង្គិច​​​គ្នា​​​ដោយ​​​អាវុធជាច្រើន​​​លើក​​​ក្នុង​​​រយៈពេល​​​ប៉ុន្មាន​​​ឆ្នាំ​​​ថ្មីៗ​​​នេះ។

ឧត្តម​​​សេនីយ៍ ស្រី ឌឹក បាន​​​មាន​​​ប្រសាសន៍​​​ថា “យើង​​​បាន​​​ផ្ញើ​​​លិខិត​​​ទាម​​​ទារ​​​ឲ្យ​​​ថៃ​​រុះ​​​រើ​​​​​លួស​​​បន្លា​​​នោះវិញកាលពីថ្ងៃ​​​ទី​​​២៩ ខែ​​​ឧសភា មួយ​​​ថ្ងៃ​​​បន្ទាប់ពី​​​ពួកគេ​​​បាន​​រាយ​​​ ប៉ុន្តែ​​​កង​ទ័ព​ថៃ​​​បាន​​​ឆ្លើយ​​​តប​​​មក​​​យើង​​​ឲ្យ​​​រង់ចាំ​​ទម្រាំមេបញ្ជាការ​​​របស់​​​ពួកគេ​​​ត្រឡប់​​​មកវិញ”។

លោក​​​ឧត្តម​​​សេនីយ៍​​​មិនធ្វើសេចក្តី​​​សន្និ​​​ដ្ឋាន​​​អំពី​​​ហេតុផលនៃ​​​ការ​​​បង្ក​​​រឿង ដែល​​​លោក​​​បាន​​​មាន​​​ប្រសាសន៍​​​ថា ជា​​ហេតុ​​​ការណ៍ថ្មី​​​ចាប់​​​​​​តាំង​​​ពី​​​​​​មាន​​​ការ​​​ប្រយុទ្ធ​​​គ្នា​​យូរៗ​​​ម្ដង​​​នៅតាម​​​ខ្សែ​​​បន្ទាត់ព្រំដែន​​​ ដែល​​​មានវិវាទ​​​នៅ​​​ជិត​​​​​ប្រាសាទ​​​ព្រះវិហារ ​​​ដែល​​​បាន​​​ផ្ទុះ​​​ឡើង​​​ជាលើក​​​ដំបូង​​​កាលពី​​​ឆ្នាំ​​​២០០៨​​​នោះទេ​​​។

ប៉ុន្តែ​​​បញ្ហា​​​នេះ​​​បាន​​​កើត​​​ឡើង​​​ប៉ុន្មាន​​​ថ្ងៃ​​​ប៉ុណ្ណោះ បន្ទាប់ពីកង​ទ័ព​​​ថៃ​​​បាន​​​ប្រើ​​​ច្បាប់​​​អាជ្ញា​​​សឹក​​​នៅ​​​ក្នុង​​​ប្រទេ​​សរបស់ខ្លួន និង​​​បាន​​​ទម្លាក់​​​រដ្ឋាភិបាល​​​ ហើយ​​​បន្ទាប់​​​មក​​បាន​​​បង្កើន​​​សន្តិសុខ​​​តាម​​​ព្រំដែន​​​ ព្រម​​​ទាំង​​​​​​បិទ​​​ច្រក​​​របៀង​​​ក្រៅ​​​ផ្លូវ​​​ការ​​​ភាគ​​​ច្រើនបំផុត​​​​​​។

ឧត្តម​​​សេនីយ៍​​​ ស្រី ឌឹក មិន​​​បញ្ជាក់​​​ឲ្យ​​​​​​បាន​​​ច្បាស់​​​លាស់​​​ថា តើ​​​លួស​​​បន្លា​​​ថ្មីនេះ​​​ដាក់រាយ​​​​​​នៅ​​​កន្លែង​​​ណាឡើយ​​​ ប៉ុន្តែ​​​លោក​​​បាន​​​មាន​​​ប្រសាសន៍​​​ថា វា​​​បំពាន​​សេចក្ដី​​​សម្រេច​​​របស់​​​តុលាការ​​​យុត្តិធម៌អន្តរជាតិ​​​កាលពីខែ​​​វិច្ឆិកា ដែល​​​បាន​​​បញ្ជាក់​​​ពី​​​ការ​​​អះអាង​​​សិទ្ធិ​​​កាន់​​​កាប់​​​របស់​​​ប្រទេស​​​កម្ពុជា​​ចំពោះ​​​តំបន់​​​ទាំង​​​មូល​​​នៅ​​​ជិត​​​ប្រាសាទ​​​ព្រះវិហារ​​​ ហើយ​​​បាន​​​បញ្ជា​​​ឲ្យ​​​ថៃ​​​ដក​​​កង​​​ទ័ព​​​របស់​​​ខ្លួន​​​ចេញទាំង​​​អស់​​​។

គ្មានប្រទេស​​​ណា​​​និយាយ​​​ថា មាន​កងទ័ពថៃប៉ុន្មាននាក់នៅក្នុង​​​​តំបន់​​​នេះទេ ប៉ុន្តែ​​​កម្ពុជា​​​បាន​​​យល់​​​ព្រម​​​នៅ​​​ពេល​​​នោះ​​​ថា នឹង​​​មិន​​​លើក​​​ឡើង​​អំពី​​​បញ្ហា​​​នេះ​​​រហូត​​​ដល​​​់​​​ភាព​​​តាន​​​តឹង​​​នយោបាយ​​​នៅ​​​ក្នុង​​​ប្រទេស​​​ថៃ​​​ត្រូ​​​វ​​​បាន​​​ដោះស្រាយ​​​រួច​​​រាល់​​​។

នៅពេល​​​ចេញ​​​សេចក្ដី​​​សម្រេចនោះ​​​ លោកស្រី យីងឡាក់ ស៊ីណាវ៉ាត្រា នាយក​​​រដ្ឋមន្ត្រីថៃ​​​​​​ស្ថិត​​​ក្រោម​សម្ពាធ​​​យ៉ាង​​​ខ្លាំង​​​រួច​​​ទៅ​​​ហើយ​​​ឲ្យ​​​លាលែង​​​ពីតំណែង​​​ពី​​​សំណាក់​​​ក្រុម​​​អ្នក​​​តវ៉ា​​​ប្រឆាំង​​​រដ្ឋាភិបាល​​​នៅ​​​ក្នុង​​​ទីក្រុង​​​បាង​​​កក។ ស្ថានភាព​​​ក្នុង​​​ប្រទេស​​​ថៃ​​​កាន់​​​តែ​​​ធ្ងន់ធ្ងរ​​​ទៅៗចាប់​​​តាំង​​​ពីពេល​​​នោះ​មក ដោយ​​​កង​​​ទ័ព​​​បាន​​ត្រួត​​​ត្រា​​​ប្រទេស​​​នេះទាំង​​​ស្រុង​​​កាលពី​​​ចុង​​​ខែ​​​មុន។

វរសេនីយ៍ឯក​​​ វីរ៉ាឈុន សុគន្ថាត​​​ប៉ាទីប៉ាក់ (Werachon Sukondhadhpatipak) អ្នក​​​នាំ ពាក្យ​​​កង​​​ទ័ព​​​ថៃ​​​បាន​​​និយាយ​​​ថា លោក​​​មិន​​​ដឹង​​​អំពីស្ថានការ​ណ៍​​​វិវឌ្ឍ​​​នៅនៅ​​​តាម​​​ព្រំដែន​​​ទេ ពីព្រោះ​​​លោក​​​កំពុងតាមដានស្ថាន​​​ការណ៍​​​ក្នុង​​​ទីក្រុង​​​បាង​​​កក។ លោក ផាកឌី ទូឆៃយុទ្ធ (Pakdi Touchayoot) ឯកអគ្គរាជទូត​​​ថៃ​​​ប្រចាំ​​​ប្រទេស​​​កម្ពុជា​​​មិន​​​អាច​​​ទាក់​​​ទង​​​សុំអត្ថាធិប្បាយ​​​បានទេ។

លោក កុយ គួង អ្នក​​​នាំពាក្យ​​​ក្រសួង​​​ការ​​​បរទេស​​​កម្ពុជា​​​បាន​​​អះអាង​​​ថា ​​​ការ​​​រាយលួស​​​បន្លា​​​នេះ​​​មិន​​​ត្រឹម​​​តែ​​បំពាន​​​សេចក្ដី​​​សម្រេច​​​របស់​​​តុលាការ​​​យុត្តិធម៌​​​អន្តរជាតិ​​​ប៉ុណ្ណោះទេ ប៉ុន្តែ​​​ថែម​​​ទាំង​​​បំពាន​​​អនុស្សរណៈ​​​នៃការ​​​យោគយល់គ្នា​​​​​​ ដែលថៃ​​​និង​​​កម្ពុជា​​​បាន​​​ចុះហត្ថលេខា​​​កាលពីឆ្នាំ​​​២០០០​​​ ដោយ​​​ព្រម​​​ព្រៀង​​​គ្នា​​​ថា គ្មាន​​​ភាគីណាមួយ​​​អាច​​​សាង​​​សង់​​​អ្វីមួយ​​​នៅ​​​លើ​​​ដីដែលមាន​​​វិវាទ​​​នេះ​​​បានឡើយ។

លោក​​​បានមាន​​​ប្រសាសន៍អំពីការ​​​រាយ​​​លួស​​​បន្លា​​​​​​ថ្មីនោះ​​​ថា “វាស្ថិត​​​​​​នៅ​​​មុខ​​​ប្រាសាទ​​​តែម្ដង។ កង​​​ទ័ព​​​កម្ពុជា​​​បាន​​​ផ្ញើលិខិត​​​ទៅភាគីថៃ ពីព្រោះ​​​ការរាយ​​​លួស​​​បន្លា​​​​​​នេះ​​​បំពាន​​​អនុស្ស រណៈនៃការ​​​យោគយល់​​​គ្នា​​​នៅ​​​ឆ្នាំ២០០០ ដែល​​​លើក​​​ឡើង​​​ថា តំបន់នេះ​​​ត្រូវ​​​តែ​​​ស្ថិត​ក្នុង​ស្ថាន​​​ភាព​​​ដដែល​​​ ​មាន​​​ន័យ​​​ថា មិន​​​មាន​​​ការ​​​អភិវឌ្ឍ​​​ណាមួយ​​​នៅ​​​ក្នុង​​​តំបន់​​​នោះឡើយ​​​”។ លោក​​​បាន​​​បញ្ជាក់​​​ថា កម្ពុជា​​​កំពុង​​​រង់ចាំ​​​ការ​​​ពន្យល់​​​ពីភាគីថៃ៕ សារុន​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស