28 C
Phnom Penh

ក្រុមអ្នកភូមិ​ត្រឡប់មក​កាន់ខេត្តក្រចេះ​វិញបន្ទាប់ពី​ទទួលបាន​ដីសម្បទាន​សង្គមកិច្ច​

ដោយ ឌឹ ខេមបូឌា ដេលី

បទវិភាគ

អ្នកភូមិ​២០៤នាក់ដែលត្រូវបាន​បណ្តេញ​ចេញពីដីរបស់ខ្លួន​ដើម្បី​បើក​ផ្លូវ​ឲ្យ​ក្រុមហ៊ុន​ចម្ការ​កៅស៊ូវៀតណាមនោះ បាន​ត្រឡប់មក​ស្រុក​ស្នួល ខេត្ត​ក្រចេះវិញ​កាលពី​ម្សិលមិញ​បន្ទាប់​ពី​ទទួល​បាន​ដីសម្បទាន​សង្គមកិច្ច​នៅក្នុង​ស្រុកតែមួយ​ដែលពួកគា​ត់​​ត្រូវ​បាន​បណ្តេញ​ចេញនោះ។

លោក ខាន់ ចំណា​ន អភិបាល​រង​ខេត្ត​​បាន​មាន​ប្រសាសន៍ថា ឥឡូវនេះ​ការិយាល័យ​របស់​លោក​កំពុង​រៀប​ចំ​ដីសម្បទាន​សង្គមកិច្ច​។ លោក​បាន​មាន​ប្រសាសន៍ថា “​យើង​​អនុញ្ញាត​ឲ្យ​អ្នកភូមិ​ជាច្រើន​គ្រួសារ​រស់នៅ​លើដី​​​ចម្ការ​​​នេះ ហើយ​ឥឡូវនេះ យើង​កំពុង​ជីក​ព្រំប្រទល់ដី​ទំហំ​៧៥០ហិកតា ហើយ​កំពុង​ជីកកកាយដីនេះ។ យើង​ក៏បាន​រកដីមួយកន្លែង​សម្រាប់​សាង​សង់​សាលារៀន​ មណ្ឌលសុខភាពនិង​វត្ត​អារាមសម្រាប់គ្រួសារ​ទាំងនេះផង​​​ដែរ​​​ពេល​​​ដែល​​​​ភូមិ​នេះ​នឹង​ក្លាយ​ជា​ភូមិមួយ​នៅពេល​អនាគត”។

លោក ចំណាន បាន​បន្ថែមថា ក្រុម​អ្នកភូមិ​នឹង​ត្រូវ​​អនុញ្ញាត​ឲ្យ​រើស​ដី​តាម​រយៈ​ការ​ចាប់​ឆ្នោត​ ប៉ុន្តែ​លោក​បាន​មាន​ប្រសាសន៍ថា អ្នកភូមិ​នឹង​មិន​​អាច​ពង្រីក​ដីនេះបាន​ឡើយ។ លោក​បាន​មាន​ប្រសាសន៍ថា “​យើង​បាន​អនុញ្ញាត​ឲ្យ​គ្រួសារ​ទាំង​នេះ​ត្រឡប់មក​​​កាន់ដី​នេះ​វិញ ដោយសារ​​ពួកគាត់​​បាន​សន្យា​ថា នឹង​មិន​កាប់​ឆ្ការ​ព្រៃ​របស់រដ្ឋ ពង្រីក និង​​​រាន​​​ដី​​​ទៀត​ឡើយ”។

អ្នកភូមិ​ដែល​ត្រូវ​បាន​បណ្តេញចេញពី​ឃុំឃ្សឹម ស្រុក​ស្នួល​កាលពី​ថ្ងៃទី​២ ខែឧសភា ដោយ​ក្រុមហ៊ុន​ប៊ិញភួក ២ (Binh Phuoc 2) របស់វៀតណាមនោះ ​បាន​មកស្នាក់នៅ​វត្ត​សាមគ្គី​រង្សី ក្នុង​រាជធានីភ្នំពេញ​ចាប់តាំងពីថ្ងៃទី​៥ ខែ​ឧសភាមក ហើយ​បាន​ធ្វើ​ការ​តវ៉ា​ជាច្រើន​លើក​រួមមាន​ការ​តវ៉ាមួយ​ដែល​ពួកគាត់​​ត្រូវ​បាន​រារាំង​មិនឲ្យ​​​​ដាក់ញត្តិទៅ​កាក​បាទ​ក្រហម​កម្ពុជាជាដើម។

លោក កៅ ម៉ាលីឡែន ប្រធាន​មន្ទីររៀបចំដែនដីខេត្ត​បាន​មាន​ប្រសាសន៍ថា បុគ្គលិក​របស់​លោក​បាន​ចាប់ផ្តើម​ស្រង់ព័ត៌មាន​​ ថាតើនរណា​​​ខ្លះ​​​មាន​សិទ្ធិសង់​លំនៅដ្ឋាន​លើដី​សម្ប​ទាន​សង្គមកិច្ច​។ លោក​បាន​មាន​ប្រសាសន៍កាលពី​ម្សិលមិញថា “​យើង​នឹង​ដាក់សំណើទៅ​អភិបាល​ខេត្ត​នៅថ្ងៃស្អែក ហើយ​យើង​នឹង​ជួប​ជាមួយ​អ្នក​ភូមិ​ដើម្បី​ជម្រាបពួកគាត​់​ក្នុង​រយៈពេល​ពីរបី​ថ្ងៃ​ក្រោយ​នេះ”។

លោក​បាន​បន្ថែមថា “​ខ្ញុំរំពឹង​ថា ការ​ងារនេះ​នឹង​បញ្ចប់​ក្នុងរយៈពេល​មួយ​សប្តាហ៍ ហើយ​ប្រសិន​បើ​គ្រួសារ​ទាំងនេះយល់ព្រម​តាម​សំណើរបស់យើង​ បន្ទាប់មក​យើង​នឹង​ចាប់​ផ្តើម​វាស់​​វែង​ដី​សម្រាប់​ពួកគាត់​តែម្តង”។ អ្នក​ភូមិ​ភាគច្រើន​មាន​ប្រភពនៅ​​​ខេត្ត​កំពង់​ចាម ហើយ​បាន​ផ្លាស់មក​រស់នៅ​លើដី​ក្នុង​ខេត្ត​ក្រចេះនេះតាំងពី​ឆ្នាំ​២០០៨។

លោក លឹម ចាន់ឌី អាយុ​៥៦ឆ្នាំដែល​មកពី​ខេត្ត​កំពង់​ចាម​មុនពេលផ្លាស់មក​នៅ​ក្នុង​ឃុំឃ្សឹមកាលពី​ឆ្នាំ​២០១០ បាន​កាន់កាប់​ដី​ទំហំ​៥ហិកតាមុនពេល​ត្រូវ​បាន​បណ្តេញចេញ​ដើម្បី​បើក​ផ្លូវ​សម្រាប់​ក្រុមហ៊ុន​ចម្ការ​កៅស៊ូនេះ​ បាន​និង​កំពុង​រង់ចាំ​ដីទំហំ​៧៥០​ហិក​តា​​​ជាមួយ​អ្នកភូមិ​១០០គ្រួសារ​ទៀត​ចាប់តាំងពី​ថ្ងៃសៅរ៍មក​​​។ លោក​បាន​​និយាយថា “យើង​មិន​ទាន់ដឹង​ថា​តើអាជ្ញាធរ​បាន​ចាប់ផ្តើម​ស្រង់​ព័ត៌មាន​សម្រាប់​ក្រុម​អ្នក​ភូមិឬនៅទេ ប៉ុន្តែ​ពួកគេ​បាន​សុំឲ្យ​ប្រជា​ជន​ទាំង​អស់​រង់ចាំនៅ​ទីនេះ ខណៈ​ដែល​អាជ្ញាធរ​វាស់វែង​ដីសម្រាប់ពួកយើង”៕សារុន

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស