29 C
Phnom Penh

សាលា​រាជ​ធានី​​​ហាម​​​សហ​​​គមន៍ខ្មែរ​​​កម្ពុជាក្រោម​មិន​ឲ្យ​​​រៀបចំ​វេទិកា​​​សាធារណៈ

ដោយ ឌឹ ខេមបូឌា ដេលី

បទវិភាគ

កាល​​​ពីម្សិលមិញ សាលា​​​រាជធានី​​​ភ្នំពេញ បាន​​ហាមប្រាម​​​វត្ត​​​សាមគ្គី​រង្សី មិន​​​ឲ្យ​​​រៀប​​​ចំវេទិកា​​​សាធារណៈ​​​នៅ​​​ថ្ងៃ​​​ពុធ ដើម្បី​​​រំឭក​​​ដល់​​​ខួប​​​លើក​​​ទី​​​៦៥​​​នៃ​​​ការ​​​ប្រគល់​​​កម្ពុជា​​​ក្រោម​​​ទៅ​​​ឲ្យ​​​ប្រទេស​​​វៀតណាម​​​។

សហគមន៍​​​ខ្មែរ​​​កម្ពុជា​​​ក្រោម​​​ ដែល​​​តស៊ូមតិ​​​សម្រាប់​​​ជន​​​ជាតិ​​​ភាគតិច​​​ពីអ្វីដែល​​​ឥឡូវ​​​នេះ​​គឺ​​​​ប្រទេស​​​វៀត​​​ណាម​​​ភាគ​​​ខាង​​​ត្បូង​​​នោះ មាន​​​គម្រោង​​​​ឲ្យ​​​ក្រុម​​​អ្នក​​​ជំនាញ​​​ផ្នែក​​​ច្បាប់ និង​​​អង្គការ​​​សិទ្ធិ​មនុស្ស​​ថ្លែង​​​នៅ​​​វេទិកា​​​នោះ។ ប៉ុន្តែ​​​សាលា​​​រាជធានី​​​បាន​​​ហាម​​​ប្រាម​​​ ដោយ​​​លើក​​​ឡើង​​ថា ខ្លាច​​​មាន​​​ការ​​​ញុះញង់​​​រើសអើង​ជាតិ​​​សាសន៍​​​។

លោក ឡុង ឌីម៉ង់ អ្នក​​​នាំ​​​ពាក្យ​​​សាលា​​​រាជធានី​​​បាន​​​មាន​​​ប្រសាសន៍​​​បន្ទាប់ពី​​​ជួប​​​ជាមួយ​​​លោក ថាច់ សេដ្ឋា ប្រធាន​​​សហគមន៍​​​ខ្មែរ​​​កម្ពុជា​​​ក្រោម​​​ថា ” បញ្ហា​​​ខ្មែរ​​​កម្ពុជា​​​ក្រោម​​​គឺ​​​ជា​​​បញ្ហា​​​រសើប​​​បំផុត​​​។ ប្រសិន​​​បើ​​​យើង​​​មិន​​​អាច​គ្រប់​​​គ្រង​​​ប្រធាន​​​បទ​​​នៃ​​​ការ​​​ពិភាក្សា​​​បាន​​​ទេ​​​នោះ វេទិកា​​​នេះ​​​នឹង​​​ត្រូវ​​​គេ​​​​​​​ប្រើ​​​ប្រាស់​​​ដើម្បី​​​ញុះញង់​​​ឲ្យ​​​មាន​​​ការ​​​ស្អប់​​​ខ្ពើម​​​ប្រទេស​​​ជិត​​​ខាង ឬ​​​រើស​​​អើង​​​ជាតិ​​​សាសន៍។ ហេតុ​​​ដូច្នោះ​​​ហើយ យើង​​​មិន​​​អាច​​​អនុញ្ញាត​​​ឲ្យ​​​រៀប​​​ចំ​​​វេទិកា​​​នេះ​​​បាន​​​ទេ”។

ពិធី​​​សាសនា​​​មួយ​​​នឹង​​​នៅ​​​តែ​​​ធ្វើ​​​ឡើង​​​នៅ​​​វត្ត​​​សាមគ្គី​​​រង្សី ដែល​​​មាន​​​ព្រះ​​​សង្ឃ​​​ប្រហែល​​​៦០ភាគរយ​​​ជា​​​ព្រះ​​​សង្ឃ​​​ខ្មែរ​​​ក្រោម​​​ ប៉ុន្តែ​​​សាលា​​​រាជធានី​​​បាន​​​កំណត់​​​ចំនួន​​​អ្នក​​​ចូលរួម​​​តែ​​​១.០០០​​​នាក់​​​ប៉ុណ្ណោះ ហើយ​​​បាន​​​ព្រមាន​​​ថា ពិធី​​​នេះ​​​ត្រូវ​​​ធ្វើ​​​នៅ​​​ក្្នុង​​​បរិវេណ​​​វត្ត​​​ ហើយ​​​មិន​​​ឲ្យ​​​វិវឌ្ឍ​​​ទៅជា​​​បាតុកម្ម​​​​​​ឡើយ​​​។

លោក ឡុង ឌីម៉ង់ បាន​​​មាន​​​ប្រសាសន៍​​​ថា សាលា​​​រាជធានី​​​ក៏​​​បាន​​​ផ្ញើលិខិត​​​មួយ​​​ច្បាប់​​​ទៅ​​​ក្រសួង​​​មហាផ្ទៃ​​​សុំ​​​ការ​​​គាំទ្រ​​​ចំពោះ​​​ការ​​​ហាម​​​ឃាត​់​​​នេះ​​​ផង​​​ដែរ​​​។

ខ្មែរ​​​ក្រោម​​​នៅ​​​​​​ប្រទេស​​​វៀតណាម​​​ប្រឈម​​​នឹង​​​ការ​​​ធ្វើទុក្ខ​​​បុក​​​ម្នេញ និង​​​ការ​​​គាប​​​សង្កត់​​​​​​ចំណែក​​​អ្នក​​​ដែល​​​ត្រឡប​​​់​​​មក​​​​​ប្រទេស​​​កម្ពុជា​​​វិញ ជារឿយៗ​​​ក៏ត្រូវ​​​គេ​​​ចាត់​​​ទុក​​​ថា ជា​​​អ្នក​​​ក្រៅ​ផង​​​ដែរ​​​។

ក្នុង​​​ពេល​​​កន្លង​​​មក​​​ វត្ត​​​សាមគ្គីរង្សីតែងតែ​​​ត្រូវ​​​​​​ប្រើ​​​ប្រាស់​​​ដោយ​​​សំឡេង​​​​​​ប្រឆាំង​​​រដ្ឋាភិ​​​បាល​​​ ជាពិសេស​​​ខ្មែរ​​​ក្រោម​​ ជា​​កន្លែង​​នៃ​​​ការ​​​ជួប​​​ជុំគ្នា និង​​​ជា​​​កន្លែង​​​សុវត្ថិភាព ប៉ុន្តែ​​​លោក សេដ្ឋា បាន​​​មាន​​​ប្រសាសន៍​​​កាល​​​ពីម្សិល​​​មិញ​​​ថា បញ្ហា​​​ដែល​​​លើក​​​ឡើង​​​នៅ​​​វេទិកា​​​សាធារណៈ​​​នេះ​​​ ជា​​​បញ្ហា​​​ស្រប​​​ច្បាប់​​​សម្រាប់​​​ការ​​​ពិភាក្សា​​​។

លោក សេដ្ឋា ដែល​​​ក៏​​​ជា​​​សមាជិក​​​​​​​​ម្នាក់​​​នៃ​​​គណៈកម្មាធិការ​​​អចិន្ត្រៃ​​យ៍​​​គណបក្ស​​​សង្គ្រោះជាតិ​ដែរ​នោះ​​​បាន​​​មាន​​​ប្រសាសន៍​​​ថា ” យើង​​​បាន​​​អញ្ជើញ​​​លោក​​​ សុក សំអឿន  មក​​​ជជែក​​​​​​អំពី​​​រឿង​​​ច្បាប់ និង​​​​​​លោកស្រី ពុង ឈីវ​​​កេក ថ្លែង​​​​​​អំពី​​​សិទ្ធិ​​​ខ្មែរ​​​ក្រោ​​​ម​​​។

លោក សុក សំអឿន ជា​​​មេធាវី​​​ម្នាក់ និង​​​ជានាយកប្រតិបត្តិក្រុម​​​អ្នក​​​ច្បាប់​​​ការ​​​ពារ​​​សិទ្ធិ​​​កម្ពុជា​​​ បាន​​​មាន​​​ប្រសាសន៍​​​ថា លោក​​​មាន​​​គម្រោង​​​ធ្វើ​​​ការ​​​ថ្លែង​​​អំពី​​​សិទ្ធិ​​​ខ្មែរ​​​ក្រោម​​​​​​​​​នៅ​​​កម្ពុជា​​​តាម​​​ច្បាប់​​​រដ្ឋធម្មនុញ្ញ និ​​​ង​​​ច្បាប់​​​នានា​​​ក្នុង​​​ប្រទេស​​​កម្ពុជា​​​៕ សារុន​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស