30 C
Phnom Penh

បុរស​​​ជន​​ជាតិ​​​វៀត​​​ណាម​​​ពីរ​​​នាក់​​​ត្រូវ​​​បាន​​​ចោទ​​​ប្រកាន់​​​ពី​​​បទ​​​លក់​​​សាប៊ូ​​​ដុ​​​សខ្លួន​​​ក្លែង​​​ក្លាយ​​​

ដោយ ឌឹ ខេមបូឌា ដេលី

បទវិភាគ

បុរស​​​ជន​​​ជាតិ​​​វៀត​​​ណាម​​​ពីរ​​​នាក់​​​បាន​​បង្ហាញ​​​មុខ​​​នៅក្នុង​​​សាលា​​​ដំបូង​​​ខេត្ត​​​កំពង់​​​ឆ្នាំ​​​ងកាល​​​ពី​​​ម្សិល​​​មិញ​​​ ពី​​​បទ​​​លក់​​​សាប៊ូ​​​ដប​​​ដុស​​​ខ្លួន​​​ក្លែង​​​ក្លាយ​​​ជាច្រើន​​​ដប​​​។

នគរបាល​បានឲ្យដឹងថា ឈ្មោះ ង្វៀន យ៉ាង​​​ញិក​​​ (Nguyen Yang Nhik)អាយុ​​​២៤​​​ឆ្នាំ និង​​​ឈ្មោះ ឡាំ ថៃ​​​ជូ (Lam Thai Chou) អាយុ​​​៣៦​​​ឆ្នាំ​​​ត្រូវ​​​បាន​​​ចាប់ខ្លួន​​​ជា​​​មួយ​​​នឹង​​​សាប៊ូ​​​ដុស​​​ខ្លួន​​​ក្លែង​​​ក្លាយ​ចំនួន​៣១កេសនៅផ្សារ​ស្រុក​កំពង់ត្រឡាច​កាលពីថ្ងៃ​សៅរ៍ បន្ទាប់​​ពីមានពាក្យ​បណ្តឹង​មួយទទួលបាន​​​ពីក្រុម​ហ៊ុន​ ដែល​ផលិត​​​ផល​​​របស់​​​ខ្លួន​ ត្រូវ​​​បាន​​បុរស​​ទាំងនេះ​កំពុងតែ​ផលិត​ក្លែងក្លាយ។

លោក ជុន តារា នាយការិយាល័យ​​​ប្រឆាំង​​​បទល្មើសសេដ្ឋកិច្ច​​ខេត្ត​​បានមាន​ប្រសាសន៍ថា “យើង​រឹប​អូស​បាន​​សាប៊ូ​ដុសខ្លួនម៉ាក Feiraចំនួន២០កេសនិងម៉ាក Siutouch ចំនួន​១១កេស​ពីអ្នកលក់​​ជនជាតិ​វៀតណាម​​​ពីរនាក់​ ដែល​ជា​ឈ្មួញកណ្តាល​”។

លោកបានមានប្រសាសន៍ថា “សាប៊ូដុសខ្លួនម៉ាក Feira ក្លែងក្លាយ​ ថ្លៃ​១០.០០០​រៀល​ក្នុងមួយដប​នៅ​ទីផ្សារ ប៉ុន្តែ​អាសុទ្ធ​​របស់វាថ្លៃ​១៥.០០០រៀល​ក្នុងមួយដប​”។

អ្នក​​​ទាំង​​​ពីរ​ត្រូវ​​​បាន​សង្ស័យ​​​ថា​​ជា​ឈ្មួញ​​​កណ្តាល​ដែល​​​ទិញ​ផលិត​​​ផលនេះ​​ពី​អ្នក​លក់​ដុំ​ម្នាក់​​នៅ​​​ក្នុង​​​ប្រទេស​វៀតណាម​ ហើយ​​​ចែកចាយ​តាម​​ទីផ្សារ​។

លោក យូ សុខ ម្ចាស់​ក្រុម​ហ៊ុន​ Pich Beauty Company ​​ដែល​​​ផលិត​​សាប៊ូ​ដុស​​​ខ្លួន​ម៉ាក Feira ​បាន​ដាក់​​​ពាក្យ​​​ប្តឹង​​​ថា មាន​​​អ្នក​​​ក្លែងក្លាយ​​​ផលិត​​​ផល​​​របស់​​​ខ្លួន​​​​ បន្ទាប់​ពី​កត់​​​សម្គាល់​​​ឃើញ​​​ថា ការ​​​លក់​​​ផលិត​​​ផល​​​នេះ​​​មាន​​​ការ​ធ្លាក់​​​ចុះ​​​ខ្លាំង​​​ក្នុង​ប៉ុន្មាន​ឆ្នាំនេះ​។

លោក​​​បាន​មានប្រសាសន៍​កាល​ពីម្សិល​​​មិញថា “​មាន​​​ជាង​​២០ករណី​​ដែល​​​មាន​​​​​មនុស្ស​​​​លក់​ផលិត​​​ផល​​​ក្លែងក្លាយ​​​​​របស់​​​យើង​​​នៅ​​​ក្នុង​​​រាជធានី​ភ្នំពេញ​​​និងស្ទើរតែគ្រប់ខេត្ត​​​ទាំងអស់​”។

លោក យូ សុខ ​បានមានប្រសាសន៍បន្ថែមថា ការលក់​ផលិតផល​បាន​​ធ្លាក់​ចុះ​រវាង​៣០ទៅ​៥០ភាគរយ​ ចាប់​​តាំងពីឆ្នាំ​២០១០មក ​ហើយ​​​ដំបូង​​​លោកបាន​ប្តឹង​​​ទៅ​​នគរបាល​​​អំពី​ការ​​​ក្លែង​​​ក្លាយ​​​ផលិត​​​ផល​​​របស់​​​លោក​​​គួរ​ឲ្យ​​សង្ស័យ​​ក្នុង​​​ឆ្នាំ​២០០៨។ លោក​​​បាន​​​មានប្រសាសន៍ថា ដំបូង​លោក​​បាន​​​ឃើញ​ម៉ាក​ផលិតផល​ក្លែងក្លាយ​លក់​នៅ​​​ផ្សារ​ក្នុង​ឆ្នាំ​២០០៤។

ដោយសារ​តម្លៃ​ថោកជាង លោក សុខ ក៏​​​ជឿ​​​ជាក់​​​ដែរ​​​ថា អតិ​​​ថិជន​​​លែង​ជឿ​​ជាក់​លើ​ផលិត​ផល​របស់​លោក​ ដោយសារ​គុណ​​​ភាពអន់​​​​​របស់​ផលិតផល​ក្លែងក្លាយ​​នៅលើទីផ្សារ។

លោក​​​បាន​មានប្រសាសន៍ថា “អតិថិជន​​​នឹង​​​លែង​​​ទុកចិត្ត​លើ​ផលិត​ផល​​​របស់​ខ្ញុំ​ ហើយ​ផលិត​ផល​​​ក្លែងក្លាយ​នឹង​​​ប៉ះ​​​ពាល់​ដល់​​សុខភាព​​​របស់​អតិថិជន​ ធ្វើ​​​ឲ្យ​​​កើត​មហារីក​ស្បែក​​និង​មហា​រីកសួត​”។

ការ​ចាប់​​​ខ្លួននេះ​​​បាន​​​ធ្វើឡើង​​បន្ទាប់​ពីការ​​ឆ្មក់​ចូល​ចាប់​​ក្នុងហាង​២.៥០០រៀល​​​មួយ​​​កន្លែង​​​​ក្នុង​រាជធានី​ភ្នំពេញ​​កាល​ពីម្សិលមិញ​ នៅ​​​ពេល​នគរបាល​រឹប​​​អូស​​​បាន​ផលិតផល​​​​សម្អាង​​​​ក្លែងក្លាយ​ និង​ សាប៊ូដុស​​​ខ្លួន​​រាប់​រយ​​​ដប​ក្នុង​​​​​ឡាំង​​​ដែល​​​មាន​​​យីហោ​​​​ Leivy ​ដែល​​ជា​​​របស់​ហាង​ Pich Beauty របស់​​​លោក សុខ ដែរ៕ប៊ុុននី​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស