ខេត្តត្បូងឃ្មុំជាខេត្តថ្មីដែលបានបំបែកចេញពីខេត្តកំពង់ចាម ត្រូវបានធ្វើពិធីប្រកាសស្តីពីការបង្កើតនិងដាក់ឲ្យដំណើរការកាលពីម្សិលមិញ ក្រោមអធិបតីភាពលោក ស ខេង រដ្ឋមន្ត្រីក្រសួងមហាផ្ទៃ។
ពិធីនេះត្រូវបានប្រារព្ធធ្វើនៅក្រុងសួងនៃខេត្តថ្មីនេះ ហើយក៏បានប្រកាសតែងតាំងសមាជិកជាន់ខ្ពស់ចំនួន៣០រូបឲ្យកាន់តួនាទីថ្មីក្នុងខេត្តនេះ រួមមានស្នងការនគរបាល មេបញ្ជាការកងរាជអាវុធហត្ថ និងសមាជិកជាច្រើនរូបទៀត។
កាលពីខែមករា លោក ប្រាជ្ញ ចន្ទ ដែលពេលនោះជាអភិបាលខេត្តបាត់ដំបង ត្រូវបានតែងតាំងជាអភិបាលខេត្តនេះ។
លោក ម៉ៅ ពៅ ស្នងការនគរបាលខេត្តថ្មីនេះបានមានប្រសាសន៍តាមទូរស័ព្ទបន្ទាប់ពីពិធីកាលពីម្សិលមិញថា “ឯកឧត្តម ស ខេង បានណែនាំមន្ត្រីរបស់យើងដែលមកបម្រើការនៅខេត្តត្បូងឃ្មុំថ្មីនេះការពារផលប្រយោជន៍សាធារណៈ និងធានាសុវត្ថិភាពជូនប្រជាពលរដ្ឋដែលផ្ទេរមកពីខេត្តកំពង់ចាម”។
ក្នុងចំណោមអ្នកដែលមានវត្តមានចូលរួមក្នុងពិធីនោះ មានមន្ត្រីជាន់ខ្ពស់មួយចំនួន រួមមានលោកឧបនាយករដ្ឋមន្ត្រី កែ គឹមយ៉ាន លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទនិងឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស។
ខេត្តដែលស្ថិតនៅប៉ែកខាងកើតខេត្តកំពង់ចាមនេះ ត្រូវបានអនុម័តយល់ព្រមបង្កើតកាលពីខែធ្នូ។ ខេត្តនេះមានប្រាំមួយស្រុក និងក្រុងមួយស្ថិតនៅខាងកើតទន្លេមេគង្គ ហើយស្រុកចំនួនប្រាំគឺជាស្រុកដែលកាត់ចេញពីស្រុកទាំង១៨ក្នុងខេត្តកំពង់ចាម ដែលគណបក្សប្រជាជនកម្ពុជាឈ្នះសំឡេងឆ្នោតភាគច្រើននៅការបោះឆ្នោតជាតិកាលពីឆ្នាំមុន។ ស្រុកនៅសេសសល់១២ទៀតក្នុងខេត្តកំពង់ចាម គឺគណបក្សសង្គ្រោះជាតិជាអ្នកឈ្នះ។
ការប្រកាសបង្កើតខេត្តនេះស្ថិតក្នុងមន្ទិលសង្ស័យពីក្រុមអ្នកឃ្លាំមើលការបោះឆ្នោតនិងគណបក្សសង្គ្រោះជាតិ ដែលលើកឡើងថា ការបំបែកចេញនេះគឺដើម្បីផលប្រយោជន៍គណបក្សប្រជាជនកម្ពុជា។ ប្រសិនបើលទ្ធផលការបោះឆ្នោតកាលពីឆ្នាំមុន ត្រូវរាប់បញ្ចូលទាំងខេត្តថ្មីនេះ គណបក្សប្រជាជនកម្ពុជាប្រហែលជាទទួលបានសំឡេងឆ្នោត៥១,៧៥ភាគរយ ហើយគណបក្សសង្គ្រោះជាតិទទួលបាន៤២,១០ភាគរយ។
ការចោទប្រកាន់នេះត្រូវបានបដិសេធយ៉ាងដាច់អហង្ការពីមន្ត្រីគណបក្សប្រជាជនកម្ពុជាដែលបានលើកឡើងថា គោលបំណងនៃការបង្កើតខេត្តនេះគឺដើម្បីបំបែកខេត្តដែលមានប្រជាជនច្រើននេះដើម្បីធ្វើឲ្យសេវាសាធារណៈប្រសើរឡើងតែប៉ុណ្ណោះ៕ សារុន