27 C
Phnom Penh

ប្រទេស​កូរ៉េខាងត្បូង​បដិសេធ​ការស្នើឲ្យ​រដ្ឋាភិបាល​បញ្ឈប់​​កូដកម្ម

ដោយ ឌឹ ខេមបូឌា ដេលី

បទវិភាគ

កាល​​ពីម្សិលមិញ ​លោក គីម ហាន ស៊ូ (Kim Han-soo)ឯកអគ្គរដ្ឋ​ទូត​កូរ៉េ​ខាង​ត្បូង​ប្រចាំ​ប្រទេស​កម្ពុជា បាន​បដិសេធ​​ថាមិនបាន​​សុំឲ្យ​​ក្រសួងការ​ងារ​​និងបណ្តុះបណ្តាលវិជ្ជាជីវៈ​បញ្ឈប់​​កូដ​​កម្ម​​​មួយ​នៅឯ​រោង​ចក្រ​កាត់​ដេរ​ ​ជា​​របស់​​​ជនជាតិ​កូរ៉េ​​ខាង​ត្បូង​​​កាលពីសប្ដាហ៍​មុន​​ទេ ក៏​ប៉ុន្តែ​​​បាន​លើកឡើងថា​ ជម្លោះ​​នេះបានធ្វើ​ឲ្យ​​ការវិនិយោគ​​មាន​ទឹកប្រាក់​​៤០​លាន​​​ដុល្លារ​​​​ពី​ក្រុម​​ហ៊ុន​​ធំ ត្រូវ​ផ្អាក​។

កាលពីថ្ងៃអាទិត្យ​ លោក ហេង សួ ​​អ្នកនាំពាក្យរបស់ក្រសួង​ការងារ​​បានមាន​ប្រសាសន៍​ថា ឯក​អគ្គ​រដ្ឋទូត​រូបនេះ​​បាន​ជួប​ជាមួយលោក អុិត សំហេង ​រដ្ឋមន្ត្រី​ក្រសួង​ការងារ​និង​បណ្តុះបណ្តាលវិជ្ជាជីវៈ​កាលពីថ្ងៃ​​ពុធសប្តាហ៍មុន ដោយស្នើឲ្យ​រដ្ឋាភិបាល​ “ធ្វើអន្តរាគមន៍​” ក្នុង​កូដកម្ម​មួយនៅឯ​រោងចក្រ​កាត់​ដេរ Cambo Handsome ក្នុងរាជ​ធានី​ភ្នំពេញ។ លោក ហេង សួ ​បានមានប្រសាសន៍ថា “​ពួកគេ​​​ចង់​ឲ្យក្រសួង​​​អនុវត្តតាម​​ច្បាប់​…​ដើម្បី​​បញ្ជា​ពួកគេ[និយោជិតរោងចក្រ] ឲ្យ​វិលត្រឡប់ទៅធ្វើការ​វិញ​”។

ក៏ប៉ុន្តែ​ កាល​​ពីម្សិលមិញ លោកឯកអគ្គរដ្ឋទូត គីម ​បាន​បញ្ជាក់ថា ​លោក​មិនបាន​ស្នើឲ្យ​ក្រសួងនេះ​​បញ្ឈប់​កូដ​កម្មទេ គ្រាន់តែ​​បាន​ស្នើឲ្យ​ជូន​​ដំណឹង​ប្រាប់​​កូដករ​​​ថា ​ការទាមទារ​​​​​ប្រាក់​​អតីតភាព​របស់​ពួកគាត់ គឺ​រំលោភ​ច្បាប់​​ការ​​ងារ​ ពីព្រោះ​​​ពួកគាត់​មិនមាន​កិច្ច​សន្យាកំណត់​ពេល​។

លោក គីម បានមានប្រសាសន៍ថា “ខ្ញុំបាន​និយាយថា ​ជម្លោះការងារ​ត្រូវតែ​​ដោះស្រាយ​តាម​រយៈការ​ចរចា​ ​អនុលោម​តាម​​នីតិវិធី​ច្បាប់​”។ លោកបាន​មានប្រសាសន៍ថា ប៉ុន្តែ​ដោយសារ​កូដករ​​បានស្នើសុំអ្វី​ដែល​​រោងចក្រមិនអាច​ផ្តល់​ឲ្យពួកគាត់​ដោយ​ស្រប​ច្បាប់​បាននោះ​ ​រោងចក្រ​និងស្ថាន​ទូត​​គិតថា ​រដ្ឋាភិបាល​ត្រូវតែ​ធ្វើ​អន្ត​រាគមន៍​។ លោក គីម ​បាន​ឲ្យដឹងទៀតថា “​​វាស្ថិត​នៅក្រៅ​​ច្បាប់ការងារ ដូច្នេះ​វា​មិន​អាច​ដោះ​ស្រាយ​ដោយ​និយោ ជកបាន ឡើយ នោះហើយជាមូលហេតុដែល​ខ្ញុំ​បាន​ស្នើឲ្យ​ក្រសួង​ការ​ងារ​​​​ចូល​រួម​​ពាក់​​ព័ន្ធ​​ដែរ”។ លោកបានមាន​ប្រសាសន៍ថា លោក​បានស្នើ​រដ្ឋមន្ត្រី​ “សូមបញ្ជូនមន្ត្រី​​​លោក​ឬអនុ​រដ្ឋមន្ត្រី​​របស់​លោក ​ទៅ​ពន្យល់​​​អំពីលក្ខខណ្ឌ​​គោល​​នៃ​ច្បាប់ការងារ​”។

លោក គីម ​បានមាន​ប្រសាសន៍ថា កូដកម្ម​​ចប់​ហើយ។ លោកបានមាន​ប្រសាសន៍ថា កូដករ​​បាន​យល់ព្រម​លប់ចោល​កា​រ​​ទាមទារ​ប្រាក់​​​អតីត​ភាព​​​របស់​​ខ្លួន ហើយ​ត្រឡប់​ទៅ​ធ្វើ​ការ​​​វិញ​​នៅថ្ងៃនេះ​ ជាមួយ​នឹង​ការ​សន្យាថា រោងចក្រនឹង​បន្ត​​ចរចា​អំពី​ការ​​​បង្កើន​ផល​ប្រយោ​ជន៍ និង​ប្រាក់ឧបត្ថម្ភសម្រាប់​​កម្មករ។

លោក ឡូយ លន់ ប្រធាន​សម្ព័ន្ធសហជីព​ខ្មែរ ​បានមាន​ប្រសាសន៍ថា ​កូដកម្ម​​នេះ​នឹង​ចាប់​ផ្តើម​វិញ​ ប្រសិន​បើ​ការ​ចរចា​​មិន​បាន​ទទួល​លទ្ធ​ផល​ជាផ្លែផ្កា​ក្នុង​រយៈពេល​ពីរសប្តាហ៍ទេ។

លោកក៏បានបញ្ជាក់​ផងដែរថា លោក ខៀវ សាវុធ ​​អនុប្រធាន​នាយកដ្ឋាន​​ដោះស្រាយ​វិវាទ​ការងារ​​​នៅក្រសួង​ការងារ និងបណ្តុះបណ្តាលវិជ្ជា​​ជីវៈ ​បាន​ចុះ​ទៅដល់​រោងចក្រនេះ​​ដើម្បី​ពន្យល់​​អំពីច្បាប់ការងារ​​ប្រាប់​កម្មករ​។ ប៉ុន្តែ​លោកបាន​​មានប្រសាសន៍ថា បាន​ចុះ​​ទៅ​ទីនោះ​​កាលពីថ្ងៃ​ច័ន្ទ ឬ​​ថ្ងៃ​​អង្គារ​ មុន​​ពេលជំនួប​​​របស់លោក គីម ​​ជាមួយ​លោក​ សំហេង។

លោក​ សាវុធ ​បានបដិសេធ​មិនព្រម​ធ្វើ​អត្ថាធិប្បាយ​​ឡើយ ហើយបាន​បង្វែរសំណួរ​​​ទៅ​លើក ហេង សួ ​​អ្នកនាំពាក្យ​​របស់​ក្រសួង​​ការងារ​ ដែល​​មិនអាច​​ទាក់​ទងបាន​។ Cambo Handsome មិនបាន​តបនឹង​សំណើ​សុំការ​អត្ថាធិប្បាយ​​ទេ។ ​ Cambo Handsome ជារោងចក្រមួយ​ក្នុង​ចំណោម​រោងចក្រ​ចំនួន​ប្រាំពីរ​​នៅ​ក្នុងប្រទេស​កម្ពុជា​ដែល​ជា​របស់​​ក្រុមហ៊ុន Hansoll ជាក្រុមហ៊ុន​ធំ​​របស់​កូរ៉េ​ខាងត្បូង​ ដែល​​មាន​រោងចក្រ​​ជាច្រើន​នៅ​អាស៊ីអាគ្នេយ៍​ ​​អាមេរិកកណ្តាល និងសហរដ្ឋអាមេរិក។

លោក គីម ​បានមានប្រសាសន៍ថា ​ក្រុមហ៊ុន Hansoll កំពុង​ត្រៀម​វិនិយោគ​​ទឹកប្រាក់​៤០​លានដុល្លារ​​ទៀត​ ដើម្បី​​សាងសង់​រោងចក្រកាត់​ដេរ​បន្ថែមទៀត​នៅក្នុងប្រទេស​កម្ពុជា​ ប៉ុន្តែ​​​បានសម្រេចផ្អាក​ ដោយសារ​កូដកម្ម​នៅឯ​រោងចក្រនេះ​។ លោក​បាន​​ឲ្យ​ដឹងថា ការវិនិយោគ​​​អាច​បង្កើន​កម្លាំង​ការ​ងារ​ប្រមាណ​១២.០០០នាក់​នេះ​ទ្វេដង​ ដែល​រោង​ចក្រ​​​​របស់​​ខ្លួន​នៅទីនេះ​ជួល​ ហើយថា ​ការ​ខាតបង់​​របស់​​ខ្លួន​​នឹង​​ជា​​”ផល​ប៉ះ​​ពាល់​​​ធំបំផុត​​ដល់​សេដ្ឋកិច្ច​កម្ពុជា​​”៕ ប៊ុននី​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស