26 C
Phnom Penh

សន្តិសុខ​​​ពន្ធនាគារ​​​ត្រូវ​​​បាន​​​ចោទ​​​ប្រកាន់​​​បន្ទាប់​​​ពី​​​មាន​​​ការ​​​ចាប់​​​គ្រឿង​​​ញៀន​​​នៅ​​​មណ្ឌល​​​កែ​​​ប្រែ​​​អប់រំ​​​ទី​​​៤

ដោយ ឌឹ ខេមបូឌា ដេលី

បទវិភាគ

នគរ​​​បាល​​​បាន​​​ឲ្យ​​​ដឹង​​​កាលពីម្សិលមិញ​​​ថា មនុស្ស​​​បួននាក់​​​ រួមទាំង​​​សន្តិសុខ​​​ពន្ធនាគារ​​​ពីរ​នាក់​ផង​ត្រូវ​​បាន​ចាប់​ខ្លួននៅ​ក្នុង​ប្រតិបត្តិ​ការ​សម្ងាត់​នៅ​​​មណ្ឌល​​​អប់រំ​​​កែប្រែទី៤ក្នុង​​​ខេត្ត​​​ពោធិ៍សាត់ និង​​​ត្រូវ​​​​​​​​​បាន​​​ចោទ​​​ប្រកាន់ចំពោះការ​​​ជាប់ពាក់ព័ន្ធ​​​របស់​​​ពួកគេ​​​នៅ​​​ក្នុង​​​ការ​​​នាំ​​​គ្រឿង​​​ញៀនទៅឲ្យ​​​អ្នក​​​ទោស​​​។​​

អ្ន​​​ក​​​ឃ្លាំ​​​មើល​​​សិទ្ធិមនុស្ស​​​បាន​​​និយាយ​​​ថា ការ​​​ចាប់​​​ខ្លួនមនុស្ស​​​ទាំង​​​នេះ​​​គឺ​​​ជា​​​ករណីថ្មី​​​បន្ទាប់ពី​​​មាន​​​ការ​​​ចាប់​​​ខ្លួន​​​ស្រដៀង​​​គ្នា​​​នេះនៅ​​​មណ្ឌលអប់រំកែប្រែ​​​ទី៤ ដែល​​​មាន​​​ការ​​​ចាប់​​​ខ្លួនជន​​​សង្ស័យ​​​១១​​​នាក់​​​ផ្សេង​​​ទៀតក្នុង​​​រយៈពេល​​​មួយ​​​ឆ្នាំ​​​មក​​​នេះ។ ប្រតិបត្តិការ​​​ឆ្មក់ចាប់​​​នេះ​​​ក៏បង្ហាញ​​​ពីនិន្នា​​​ការ​​​ប្រើ​​​ប្រាស់គ្រឿង​​​ញៀន​ច្រើន​​នៅ​​​ក្នុង​​​ពន្ធនាគារ​​​ដែរ​​​។

ក្រៅពី​​​សន្តិសុខ​​​ពន្ធនាគារ​​​ទាំង​​​ពីរ​​​នាក់នេះ ស្ត្រី​​​ពីរ​​​នាក់​​​ទៀត​​​ក៏ត្រូវ​​​បាន​​​ចាប់​​​ខ្លួន​​​ផង​​​ដែរ​​​នៅ​​​ក្នុង​​​ប្រតិបត្តិការ​​​ជាមួ​​​យ​​​គ្នា​​​នេះ​​ ដោយ​​ជន​​​សង្ស័យ​​​ព្យាយាម​​​នាំ​​​មេតំហ្វេតាមីន​​​ទឹក​​​កក​​​ដែល​​​គេ​​​ហៅ​​​ជាទូទៅថា​​​ម៉ាទឹក​​​កកនោះ ចូលទៅ​​​ក្នុងពន្ធនាគារ​​​នៅពេល​​​ទៅ​​​សួរ​​​សុខ​​​ទុក្ខ​​​មិត្តប្រុស​​​របស់ពួកគេ​​​។

យោងតាម​​​សេចក្ដី​​​ប្រកាស​​​នៅ​​​តាម​​​គេហទំព័រ​​​របស់​​​នគរ​​​បាល​​​ជាតិ​​​កាលពីម្សិលមិញ ដែល​​​បាន​​​បញ្ជាក់​​​ពីការ​​​ឃុំ​​ខ្លួន​​​សន្តិសុខពន្ធនាគារ​​​ទាំង​​​នោះ​​​ឲ្យ​​​ដឹង​​​ថា ការ​​​ចាប់​​​ខ្លួន​​​មនុស្ស​​​ទាំង​​​នេះ​​​ធ្វើ​​​ឡើង​​​កាលពីថ្ងៃទី​​​២៦ ខែឧសភា។

យោងតាម​​​លោក វង្ស សាវ៉េត អធិការ​​​នគរ​​​បាល​​​ស្រុក​​​ភ្នំក្រវ៉ាញ បាន​​​ឲ្យ​​​ដឹង​​​ថា មនុស្ស​​​ទាំង​​​បួន​​​នាក់​​​ត្រូវ​​​បាន​​​នាំ​​​ទៅ​​​សាក​​​សួរ​​​នៅ​​​ស្នង​​​ការ​​ដ្ឋាន​​​នគរ​​​បាល​​​ខេត្ត​​​មួយ​​​​ថ្ងៃ​ក្រោយមក​​​។

លោក​​​បាន​​​មាន​​​ប្រសាសន៍​​​ថា ” យើង​​​ដក​​​ហូត​​​បាន​​​មេតំហ្វេតាមីន​​​ទឹក​​​កក​​​ចំនួន​​​៥៤​​​,៤៣​​​ក្រាម​​​ ដែល​​​គេ​​​ដាក់​​​នៅ​​​ក្នុង​​​កញ្ចប់តូចៗ​​​ចំនួន​​​១៤​​​កញ្ចប់​​​”។

លោក សាវ៉េត បាន​​​មាន​​​ប្រសាសន៍​​​ថា នគរ​​​បាល​​​ខេត្ត​​​ពោធិ៍សាត់ ដែល​​​បាន​​​សហការ​​​ជាមួយ​​​នគរ​​​បាល​​​ប្រឆាំង​​​គ្រឿង​​​ញៀន​​​ខេត្ត​​​បាន​​​ចាប់​​​ខ្លួន​​​ឈ្មោះ វ៉ា ម៉ូរ៉ា អាយុ​​​២៥​​​ឆ្នាំ និង​​​ឈ្មោះ ឡាយ សារិទ្ធ អាយុ​​​២៣​​​ឆ្នាំ​​​ ែដលអ្នក​​​ទាំង​​​ពីរ​​​មាន​​​តួនាទី​​​ជា​​​សន្តិសុខ​​​នៅ​​​មណ្ឌល​​​អប់រំកែប្រែទី៤។ មនុស្ស​​​ដែល​​​ត្រូវ​​​បាន​​​ចាប់​​​ខ្លួន​​​ផង​​​ដែរ​​​នោះ​​​ គឺ​​​ស្ត្រីឈ្មោះ ពុំ ម៉ានី នៅ​​​ទីក្រុង​​​ភ្នំពេញ និ​​​ង​​​ លី កែម​​​លីម មកពី​​​ខេត្ត​​​កំពង់ឆ្នាំង។

ទោះបីជា​​​គេ​​​មិន​​​អាច​​​ទាក់​​​ទង​​​មន្ត្រីតុលាការ​​​បាន​​​ក៏ដោយ ក៏លោក​​​ សាវ៉េត បាន​​​មាន​​​ប្រសាសន៍​​​ថា មនុស្ស​​​ទាំងបួននាក់​​​ត្រូវ​​​បាន​​​ចោទ​​​ប្រកាន់​​​កាលពី​​​ថ្ងៃទី​​​២៨ ខែឧសភា ពីបទ​​​ចែក​​​ចាយ​​​គ្រឿងញៀន ​​​ជា​​​បទ​​​ល្មើស​​​ដែល​​​អាច​​​មាន​​​ទោស​​​ជាប់ពន្ធនាគារ​​​រហូ​​​​​​ត​​​ដល់​​​១០​​ឆ្នាំ​និង​​​ពិន័យ​​​ជា​​ប្រាក់​​​រហូត​​​ដល់​​​៥០​​​លាន​​​រៀល ប្រសិន​​​បើ​​​រក​​​ឃើញពិរុទ្ធភាព​​​ នេះ​​​បើ​​​​​​យោងតាម​​​មាត្រា​​​៥០​​​នៃ​​​ច្បាប់​​​ប្រឆាំង​​​គ្រឿងញៀន។

លោក​​​ សាវ៉េត បានមាន​​​ប្រសាសន៍ថា នគរ​​​បាល​​​បាន​​​ធ្វើ​​​ប្រតិបត្តិការ​​​ចាប់​​​ក្រុម​​​នាំ និង​​​ផ្គត់​​​ផ្គង់​​​គ្រឿងញៀន​​​បាន​​​បួន​​​លើក​​​នៅ​​​ក្នុង​​​មណ្ឌល​​​អប់រំ​​​កែប្រែ​​​ទី៤ ក្នុង​​​រយៈពេល​​​មួយ​​​ឆ្នាំមក​​នេះ។ លោក​​​បាន​​​មាន​​​ប្រសាសន៍​​​ថា ក្នុង​​​ចំណោម​​​ជន​​​សង្ស័យ​​​ទាំង​​​១១​​​នាក់​​​ដែល​​​ត្រូវ​​​បា​​​ន​​​ចាប់​​​ខ្លួន​​​នៅ​​​ក្នុង​​​ករណីទាំងនេះ​​​ មាន​​​សន្តិសុខ​​​ពន្ធនាគារ​​​បីនាក់​​​។

លោក យឹម ពៅ ប្រធាន​​​មណ្ឌល​​​អប់រំ​​​កែប្រែ​​​ទី៤ បាន​​​បដិសេធ​​​មិន​​​ធ្វើ​​​អត្ថាធិប្បាយ​​​។

លោក ចាន់ សុវ៉េត អ្នក​​​ស៊ើបអង្កេត​​​ជាន់​​​ខ្ពស់​​​នៅ​​​អង្គការ​​​សិទ្ធិមនុស្ស​​​អាដ​​​ហុក បានមាន​​​ប្រសាសន៍​​​ថា ការ​​​ប៉ុន​​​ប៉ង​​​នាំ​​​ថ្នាំញៀន​​​ចូល​​​ក្នុង​​​ពន្ធនាគារ​​​មិនមែន​​​ជា​​​បញ្ហា​​​ដែល​​កើត​​​ឡើង​​​តែមួយ​​​ដង​​​នោះទេ​​​។

លោក​​​បានមាន​​​ប្រសាសន៍​​​ថា ” យើង​​​បាន​​​ទទួល​​​ព័ត៌មាន​​​ជា​​​ច្រើន​​​អំពីការ​​​ប៉ុន​​​ប៉ង​​​យក​​​គ្រឿង​​​ញៀន​​​ចូលពន្ធនាគារ​​​…​​​មាន​​​ករណីចែក​​​ចាយគ្រឿងញៀន​​​នៅ​​​ក្នុងពន្ធនាគារ​​​​ខេត្ត​​​បន្ទាយ​​​មាន​​​ជ័យដែរ​​​”។

លោក ភួង សុធា អ្នក​​​សម្រប​​​សម្រួល​​​របស់​​​អង្គការ​​​អាដហុក​​​ប្រចាំ​​​ខេត្ត​​​ពោធិ៍សាត់ បាន​​​និយាយ​​​ថា ការ​​​ប្រើ​​​ប្រាស់​​​គ្រឿង​​​ញៀន​​​នៅ​​​ក្នុង​​​ពន្ធនាគារ ដែលជារឿយៗ​​​កើត​​​ឡើង​​​ដោយ​​​សារ​​​តែ​​​អំពើពុក​​​រលួយ​​​របស់​​​បុគ្គលិក​​​ពន្ធនាគារ​​​នោះ​​​ កំពុង​​​មាន​​​ការ​កើន​​​ឡើង​​​។

លោក សូ គឹមហៃ ​​​ប្រធាន​​​មណ្ឌល​​​បន្សាប​​​គ្រឿងញៀន​​​របស់​​​អង្គការKhana បាន​​​មាន​​​ប្រសាសន៍​​​ថា នៅ​​​ពេល​​​ថ្មីៗ​​​នេះ​​​ លោក​​​បាន​​​ធ្វើការ​​​ជាមួយ​​​មនុស្ស​​​ម្នាក់​​​ដែល​​​ត្រូវ​​​បាន​​​ដោះ​​​លែង​​​ចេញពី​​​ពន្ធនាគារ​​​នៅ​​​ទីក្រុង​​​ភ្នំពេញ។

លោក គឹមហៃ បាន​​​និយាយ​​​ថា ” គាត់​​​បាន​​​រាយការណ៍​​​ថា មនុស្ស​​​ប្រហែល​​​ពី៥០​​​ទៅ​​​១០០​​​នាក់​​​កំពុង​​​ប្រើ​​​ប្រាស់​​​ហេរ៉ូអុីន​​​នៅ​​​ក្នុង​​​ពន្ធនាគារ​​​។

គាត់​​​បាននិយាយ​​​ថា មេតំហ្វេតាមីន​​​ក៏ពេញ​​​និយម​​​ផង​​​ដែរ​​​នៅ​​​ក្នុង​​​ពន្ធនាគារ​​​។ ” មនុស្ស​​​នៅក្នុ​​​ង​​​ពន្ធនាគារ​​​អាច​​​មាន​​​ថ្នាំញៀន​​​ប្រើ​​​ប្រាស់​​​ ដែល​​​មាន​​​ន័យ​​​ថា ប្រហែលជាពួកគេ​​​មាន​​​​​​បណ្ដាញ​​​ផ្ដល់​​​គ្រឿងញៀន​​​ទៅ​​​ពន្ធនាគារ​​​។

ខ្ញុំមិន​​​ដឹង​​​ច្បាស់​​​ថា តើ​​​វា​​​កើត​​​ឡើង​​​ដោយសារ​​​តែ​​​សន្តិសុខ​​​ពន្ធនាគារ​​​ ឬយ៉ាង​​​ណានោះទេ ប៉ុន្តែ​​​ថ្នាំញៀន​​​មាននៅ​​​ក្នុង​​​ពន្ធនាគារ​​​”។

ទោះជាយ៉ាងណា​​​មន្ត្រីពន្ធនាគារ​​​ជាតិ​​​អះអា​​​ង​​​ថា ការ​​​ចាប់​​​ខ្លួ​​​នមនុស្សទាំងនេះ​​​មិន​​​បង្ហាញ​​​ថា មាន​​​បញ្ហា​​​គ្រឿង​​​ញៀន​​​ច្រើន​​​នោះទេ។

លោក គុយ ប៊ុនសន អគ្គនាយក​​​នៃ​​​អគ្គនាយក​​​​​​ដ្ឋានពន្ធនាគារ​​​ក្រសួង​​​មហាផ្ទៃ បាន​​​និយាយ​​​ថា កំណើន​​​ក្នុង​​​ការ​​​បង្ក្រាប​​​គ្រឿងញៀន​​​មិន​​​ឆ្លុះបញ្ចាំង​​​ពីការរីក​​​រាល​​​ដាល​​​ទីផ្សារ​​​គ្រឿង​​​ញៀន​​​នៅ​​​ក្នុងពន្ធនាគារ​​​ទេ។

លោក​​​បាន​​​និយាយ​​​ថា ” ពិត​​​ជាមាន​​​កំណើន​​​នៃកា​​​រ​​​ចាប់​​​ខ្លួន​​​មនុស្ស​​​ពាក់ព័ន្ធ​​​គ្រឿង​​​ញៀន​​​នៅ​​​ពន្ធនាគារ​​​មែន​​​ ប៉ុន្តែ​​​វា​​​ដោយសារ​​​តែ​​​មាន​​​ការ​​​រឹត​​​បន្តឹង​​​ក្នុង​​​ការ​​​ឆែក​​​ឆេរ​​​របស់​​​របរ​​​ដែល​​​ភ្ញៀវ​យក​​ចូល​​​ពន្ធនាគារ​​​ពេល​​​ទៅ​​​សួរ​​​សុខទុក្ខ​​​អ្នក​​​ទោស”។

នៅពេល​​​សួរ​​​ថា តើ​​​មាន​​​សន្តិសុខ​​​ពន្ធនាគារ​​​ប៉ុន្មាន​​​នាក់​​​ត្រូវ​​​បាន​​​ចាប់​​​ខ្លួន​​​ពីបទ​​​សង្ស័យ​​​ថា បាន​​​ចែក​​​ចាយ​​​គ្រឿង​​​ញៀននៅ​​​ក្នុង​​​ពន្ធនាគារ​​​នោះ​​​ លោក ប៊ុនសន បាន​​​និយាយ​​​ថា លោក​​​មិន​​​ចាំ​​​ចំនួន​​​ច្បាស់​​​លាស់​​​ទេ។

ទោះជាយ៉ាង​​​ណា លោក​​​បានទទួល​​​ស្គាល់​​​ថា មាន​​​សន្តិសុខ​​​ពន្ធនាគារ​​​ជាច្រើន​​​ ” ត្រូវ​​​បាន​​​ផ្ដន្ទាទោស​​​ ហើយ​​​អ្នក​​​ខ្លះ​​​កំពុង​​​ត្រូវ​​​ឃុំខ្លួន​​​បណ្ដោះអាសន្ន​​​រង់ចាំ​​​សវនាការ​​​”៕ គឹមហឿន

(រាយការណ៍​​​បន្ថែម​​​ដោយ LaurenCrothers)​​​​​​​​​​​​​​​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស