ដោយក្រុមអាជ្ញាធរខេត្តក្រចេះបានចាប់ផ្ដើមបែងចែកដីសម្បទានសង្គមកិច្ចទៅឲ្យអ្នកភូមិ៣០១គ្រួសារ ដែលជាប់ព័ន្ធក្នុងវិវាទដីធ្លីមួួយដែលត្រូវបានដោះស្រាយកាលពីសប្ដាហ៍មុននោះ ក្រុមអ្នកភូមិដែលមានវិវាទដីធ្លីបាននិយាយកាលពីម្សិលមិញថា ជនឱកាសនិយមបានមកឈរតម្រង់ជួរដែរ។
ចាប់តាំងពីថ្ងៃអាទិត្យមក ក្រុមអាជ្ញាធរបានចុះឈ្មោះគ្រួសារទាំងឡាយណាដែលអះអាងថា រស់នៅលើដីសម្បទានទំហំ៧៥០ហិកតាក្នុងស្រុកស្នួល ប៉ុន្តែអ្នកភូមិលើកឡើងថា អ្នកចំណូលថ្មីបានលបចូលក្នុងក្រុមរបស់ខ្លួន ហើយត្រូវបានចុះឈ្មោះដែរ ដោយអះអាងថា ពួកគេក៏ជាអ្នកនៅសេសសល់ពីការបណ្តេញចេញដែលគ្មានដីធ្លីដែរ។
លោក លឹម ចាន់ឌី អាយុ៥៦ឆ្នាំ ដែលក៏ដូចជាអ្្នកនៅសេសសល់ពីការបណ្ដេញចេញបានសម្លឹងមើលផ្ទះរបស់គាត់ត្រូវបានក្រុមហ៊ុនប៊ិញភួក២ (Binh Phuoc 2) ដុតបំផ្លាញកាលពីខែមុននោះបាននិយាយថា ” យើងមានការបារម្ភ ពីព្រោះយើងឃើញអ្នកចំណូលថ្មីជាច្រើនមកចុះឈ្មោះយកដីដែលទុកសម្រាប់ដែលត្រូវបានបណ្ដេញចេញ”។
គាត់បាននិយាយថា ” យើងស្នើឲ្យអាជ្ញាធរផ្អាកដំណើរការចុះឈ្មោះបណ្ដោះអាសន្នសិន ដូច្នេះយើងអាចកំណត់បានអត្តសញ្ញាណគ្រួសារចំណូលថ្មីទាំងនោះ”។ គាត់បានបន្ថែមថាបញ្ជីឈ្មោះអ្នករង់ចាំទទួលដីសម្បទានសង្គមកិច្ចកាន់តែវែងទៅៗរាល់ថ្ងៃ។
ក្រុមតំណាងអ្នកភូមិ៣០១គ្រួសារបានមកដល់រាជធានីភ្នំពេញកាលពីដើមខែមុន ដើម្បីតវ៉ាចំពោះការបណ្ដេញពួកគាត់ចេញ។ ពួកគាត់បានចំណាយពេលស្ទើរតែពីរសប្ដាហ៍ស្នាក់នៅវត្តសាមគ្គីរង្សី មុនពេលឈានដល់កិច្ចព្រមព្រៀង។
លោក ខាន់ ចំណាន អភិបាលរងខេត្តក្រចេះបានបញ្ជាក់កាលពីម្សិលមិញថា ចំនួនគ្រួសារដែលស្នើសុំដីសម្បទានបានកើនឡើងពីចំនួន៣០១គ្រួសារ ហើយថាអ្នកចំណូលថ្មី២០គ្រួសារត្រូវបានចុះឈ្មោះ ប៉ុន្តែបានអះអាងថា ពួកគាត់ក៏បានមកតវ៉ាដោយស្នាក់នៅវត្តសាមគ្គីរង្សីដែរ។
ដោយសំដៅដល់ចំនួនដែលអាជ្ញាធរលើកឡើងថា ត្រូវបានបណ្តេញចេញដំបូងនោះ លោក ចំណាន បានមានប្រសាសន៍ថា យើងបានចុះឈ្មោះអ្នកចំណូលថ្មីជាង២០គ្រួសារ ពីព្រោះពួកគាត់ក៏មានឈ្មោះនៅក្នុងបញ្ជីអ្នកភូមិ៤០៥គ្រួសារដែរ”។
អំឡុងការស្នាក់នៅក្នុងរាជធានីភ្នំពេញ អ្នកភូមិ១០៤គ្រួសារបានឈានដល់កិច្ចព្រមព្រៀងសម្រាប់ដីនៅជាប់ដីសម្បទានដែលកាន់កាប់ដោយក្រុមហ៊ុនប៊ិញភួក២ ជាក្រុមហ៊ុនវៀតណាមដែលធ្វើចម្ការកៅស៊ូនៅក្នុងខេត្តនេះ។
លោក ចំណាន បានមានប្រសាន៍ថា លោកនឹងប្រៀបធៀបបញ្ជីឈ្មោះដែលអាជ្ញាធរបានកត់ត្រានៅពេលនៃការបណ្ដេញចេញជាមួយនឹងបញ្ជីឈ្មោះមុនពេលចុះហត្ថលេខាផ្តល់ដីសម្បទានសង្គមកិច្ច។
លោកបានមានប្រសាសន៍ថា គ្រួសារណាដែលត្រូវបានបណ្តេញចេញចេញដោយក្រុមហ៊ុនប៊ិញភួក២ ដែលមិនមែនជាផ្នែកមួយនៃដីទំហំ៧៥០ហិកតានោះ នឹងត្រូវតាំងទីលំនៅនៅលើដីសម្បទានសង្គមកិច្ចដាច់ដោយឡែកមួយទៀតស្ថិតក្នុងស្រុកសម្បូរ។
លោក គង់ គឹមនី អភិបាលស្រុកស្នួលបានបញ្ជាក់ថា អ្នកចំណូលថ្មីបានព្យាយាមមកចូលរួម ប៉ុន្តែបានអះអាងថា អ្នកភូមិដែលមិនមានដីធ្លីបាននាំពួកគាត់ពីរាជធានីភ្នំពេញទៅកាន់ខេត្តក្រចេះ។
លោក គឹមនី បានមានប្រសាសន៍ថា ” យើងមានដីស្រែបន្តិចបន្តួចតែប៉ុណ្ណោះសម្រាប់ផ្ដល់ជូនគ្រួសារដែលត្រូវបានផ្លាស់ទីលំនៅ។ការពិតគឺថា ពួកគាត់បាននាំមនុស្សពីភ្នំពេញមកទទួលដីសម្បទាននេះ គឺមានន័យថា ពួកគាត់នឹងទទួលបានចំណែកតូចប៉ុណ្ណោះ”៕សារុន