បណ្តាញអង្គការសិទ្ធិមនុស្សពីរទៀតបានបន្ថែមទស្សនៈរបស់ខ្លួនទៅនឹងការរិះគន់កាន់តែខ្លាំងឡើងប្រឆាំងនឹងគម្រោងការមិនទាន់សម្រេចរបស់ប្រទេសអូស្ត្រាលីក្នុងការបញ្ជូនអ្នកស្វែងរកសិទ្ធិជ្រកកោនខ្លះដែលព្យាយាមមករស់នៅលើទឹកដីរបស់ខ្លួនមកកាន់កម្ពុជា ស្របពេលដែលកិច្ចព្រមព្រៀងជិតបានសម្រេច។
អង្គការសិទ្ធិមនុស្សនិងសមាជិកសភាគណបក្សប្រឆាំងនៅក្នុងប្រទេសទាំងពីរនិងសូម្បីតែការិយាល័យឧត្តមស្នងការសហប្រជាជាតិទទួលបន្ទុកជនភៀសខ្លួន (UNHCR)បានរិះគន់គំនិតនេះរួចហើយ ដែលឲ្យប្រទេសអូស្ត្រាលីបញ្ជូនជនភៀសខ្លួនប្រមាណ១.០០០នាក់មករស់នៅក្នុងប្រទេសមួយក្នុងចំណោមប្រទេសក្រីក្រនិងពុករលួយបំផុតនៅក្នុងតំបន់។
នៅក្នុងសេចក្តីប្រកាសមួយកាលពីម្សិលមិញ គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា(CHRAC) ជាបណ្តាញមួយនៃអង្គការក្រៅរដ្ឋាភិបាលក្នុងស្រុកមួយចំនួន បានលើកឡើងថា គម្រោងការនេះរំលោភអនុសញ្ញាស្តីពីជនភៀសខ្លួន ឆ្នាំ១៩៥១ ដែលប្រទេសទាំងពីរបានចុះហត្ថលេខា និងបានអំពាវនាវឲ្យប្រទេសអូស្ត្រាលីពិចារណាគំនិតនេះឡើងវិញ។
សេចក្តីប្រកាសនេះឲ្យដឹងថា យោងតាមអង្គការសហប្រជាជាតិ ប្រទេសម្ចាស់ផ្ទះគួរតែផ្តល់ឲ្យជនភៀសខ្លួននូវការការពារផ្លូវច្បាប់និងរូបវន្តដូចជនជាតិនានាដែរ។
បណ្តាញអង្គការនេះឲ្យដឹងថា ” អ្នកដែលដឹងអំពីស្ថានភាពនៅក្នុងប្រទេសកម្ពុជាយល់ថា ់ សិទ្ធិដែលជនជាតិនានាទទួលបាននៅក្នុងប្រទេសកម្ពុជា មិនដូចសេចក្តីប្រាថ្នាឡើយ” ដោយកងកម្លាំងសន្តិសុខនិងទីភ្នាក់ងាររដ្ឋាភិបាល”ត្រូវបានគេដឹងថាបានប្រព្រឹត្តការរំលោភបំពាន ដូចជាការសម្លាប់ ការធ្វើទារុណកម្ម និងការឃុំខ្លួនតាមតែចិត្ត ដោយគ្មានការទទួលខុសត្រូវ”។
បណ្តាញអង្គការនេះឲ្យដឹងបន្ថែមទៀតថា ” អ្នករស់គ្មានសិទ្ធិអំណាច ងាយទទួលរងការរំលោភបំពានបំផុត”។ បណ្តាញអង្គការនេះបានលើកឡើងពីករណីជនជាតិដើម វីហ្គួ ស្វែងរកសិទ្ធិជ្រកកោនចំនួន២០នាក់ ដែលត្រូវបានបញ្ជូនពីប្រទេសកម្ពុជាទៅប្រទេសចិនវិញតាមសំណើរបស់ក្រុងប៉េកាំងក្នុងឆ្នាំ២០០៩ មុនពេលការអះអាងរបស់ពួកគេត្រូវបានវាយតម្លៃត្រឹមត្រូវ។
សេចក្តីប្រកាសនេះឲ្យដឹងថា ជនភៀសខ្លួននិងអ្នកស្វែងរកសិទ្ធិជ្រកកោនចំនួន៦៨នាក់ដែលបច្ចុប្បន្នរស់នៅក្នុងប្រទេសកម្ពុជា កំពុងត្រូវបានបដិសេធសិទ្ធិស្មើគ្នារួចជាស្រេចទៅហើយ។ ពួកគេមិនត្រូវបានអនុញ្ញាតឲ្យធ្វើការ មិនអាចបើកគណនីធនាគារ ឬទិញអចលនទ្រព្យ និងទទួលបានការអប់រំ និងការគាំពារសុខភាពឡើយ។
នៅក្នុងសេចក្ដីថ្លែងការណ៍មួយរបស់ខ្លួនកាលពីថ្ងៃច័ន្ទ បណ្ដាញសិទ្ធិជនភៀសខ្លួនអាស៊ីបា៉ស៊ីហ្វិក ដែលជាបណ្តុំអង្គការសង្គមស៊ីវិលចំនួន១៨០ និងបុគ្គលមកពីទូទាំងតំបន់អំពាវនាវឲ្យប្រទេសអូស្ត្រាលីបោះបង់ចោលកិច្ចព្រមព្រៀងនេះទាំងស្រុង ដែលខ្លួនក៏លើកឡើងដែរថា ជាការរំលោភអនុសញ្ញាស្ដីពីជនភៀសខ្លួនឆ្នាំ១៩៥១។
យោងតាមអង្គការសហប្រជាជាតិបានឲ្យដឹងថា កុមារជាង៤០ភាគរយនៅក្នុងប្រទេសកម្ពុជាខ្វះអាហារូបត្ថម្ភ។
បណ្ដាញអង្គការនេះឲ្យដឹងថា ” នៅក្នុងប្រទេសមួយដែលកំពុងជួបការលំបាកក្នុងការចិញ្ចឹមប្រជាពលរដ្ឋរបស់ខ្លួន វាគឺជាបន្ទុកដ៏ធ្ងន់សម្រាប់កម្ពុជាក្នុងការផ្ដល់សិទ្ធិជ្រកកោនដល់អ្នកទាំងនោះតំាងលំនៅនៅក្នុងទឹកដីរបស់ខ្លួន”។
រដ្ឋាភិបាលកម្ពុជាបញ្ជាក់ថា ខ្លួននឹងទទួលតែជនភៀសខ្លួនដែលប្រទេសអូស្ត្រាលីបច្ចុប្បន្នកំពុងតែឲ្យរស់នៅក្នុងប្រទេសណូរូ ដែលស្ម័គ្រចិត្តមក។
បណ្ដាញសិទ្ធិមនុស្សនេះលើកឡើងថា ” ទោះយ៉ាងណា ប្រសិនឲ្យជនភៀសខ្លួនជ្រើសរើសការរស់នៅក្នុងប្រទេសកម្ពុជា ឬតាំងលំនៅជាបណ្ដោះអាសន្ននៅក្នុងប្រទេសណូរូ ដោយគ្មានទិដ្ឋភាពច្បាស់លាស់នៃការតាំងលំនៅនៅកន្លែងណានោះ មានការព្រួយបារម្ភថា ជម្រើសបែបនេះមិនមែនជាការស្ម័គ្រចិត្តពិតប្រាកដឡើយ”។
របាយការណ៍ព័ត៌មានដែលមិនបានផ្ទៀងផ្ទាត់និងមិនបានបញ្ជាក់ច្បាស់ថា ប្រទេសអូស្ត្រាលីបានផ្ដល់ឲ្យកម្ពុជានូវប្រាក់ប្រមាណ៤០លានដុល្លារសម្រាប់ការទទួលយកជនភៀសខ្លួនទាំងនេះ។ កាលពីថ្ងៃអង្គារ សារព័ត៌មាន Sydney Morning Herald បានរាយការណ៍ថា ថ្មីៗនេះកម្ពុជាបានបញ្ជូនឲ្យប្រទេសអូស្ត្រាលីនូវសេចក្ដីព្រាងដំបូងនៃកិច្ចព្រមព្រៀង។
លោក ស្កុត ម៉ារីសុន អ្នកនាំពាក្យរបស់រដ្ឋមន្ត្រីអន្តោប្រវេសន៍អូស្ត្រាលីមិនព្រមបញ្ជាក់ ឬបដិសេធចំពោះសេចក្ដីរាយការណ៍នេះ ហើយបានមានប្រសាសន៍ថា ការពិភាក្សាកំពុងតែធ្វើឡើង។ មន្ត្រីនៅឯក្រសួងការបរទេសកម្ពុជាមិនអាចទាក់ទងបានឡើយ៕ ប៊ុននី