27 C
Phnom Penh

ជនជាប់ចោទ​បដិសេធថាមិន​បាន​បោកប្រាស់​អ្នកភូមិ​ចេញពីដី​ទេ

ដោយ ឌឹ ខេមបូឌា ដេលី

បទវិភាគ

អង្គភាពប្រឆាំង​​អំពើ​​ពុករលួយ​បាន​ឲ្យដឹងកាល​ពីម្សិលមិញថា ​ប្រធាន​​ភូមិ​ម្នាក់​និង​សន្តិ​សុខម្នាក់​នៅក្នុងខេត្តកំពង់ឆ្នាំង​​បាន​បដិសេធ​​ចំពោះការ​ចោទប្រកាន់​ដែលថា ​ពួកគាត់​​បាន​បោក​ប្រាស់​​​អ្នក​ភូមិ​​ឲ្យចេញ​​​ដីសម្បទានសង្គម​កិច្ច​ទំហំ​២៧០ហិកតា។

អង្គភាព​ប្រឆាំង​​អំពើពុក​រលួយ​បាន​លើកឡើងថា ​អ្នកទាំង​​ពីរ​ក៏បា​ន​បដិសេធ​​​ដែរថា​ មិន​បាន​​​កាប់​​​ឈូស​​​ឆាយ​​​​ដីព្រៃ​ទំហំ​៦០០ហិកតា​ដោយឡែក​មួយ​​​នៅក្នុងខេត្តនេះ​ ដើម្បីលក់​​ឲ្យ​​​អ្នក​​​​មក​ពី​ក្រុង​​ប៉ោយប៉ែត ​ខេត្ត​បន្ទាយមាន​ជ័យ ដើម្បីធ្វើ​ជាចម្ការ​ស្វាយ​និង​​ចម្ការ​ដើម​កៅស៊ូ​​​នោះ​​​ទេ​​​។

នៅក្នុង​សេចក្តីប្រកាសមួយ​បង្ហោះលើ​​គេហទំព័រ​​​របស់​​អង្គភាព​​ប្រឆាំង​​អំ​ពើ​​ពុក​រលួយ​​កាល​ពីម្សិលមិញ ​​អង្គភាពនេះ​បានឲ្យដឹងថា ខ្លួន​បានសាកសួរ​ លោក យឹម ឌឿន ប្រធាន​ភូមិ​ដំណាក់​អម្ពិល​ និងសន្តិសុខ​ ឈ្មោះ នង វណ្ណៈ កាល​​ពីក្នុងខែមេសា បន្ទាប់​​ពី​មាន​​ពាក្យបណ្តឹង​កាលពីក្នុង​ខែ​កុម្ភៈ ​ពីអ្នក​​ភូមិ​នៅក្នុងឃុំក្រាំង​ស្កៀ ស្រុក​​ទឹក​ផុស។

អ្នកភូមិ​បាន​ចោទប្រកាន់​​ថា អ្នកទាំង​​ពីរ​​បាន​ឲ្យពួកគាត់​ផ្តិតមេដៃ​លើឯកសារ​ ​ដើម្បីទទួល​បាន​សម្បទាន​ដីសង្គម​កិច្ច​២៧០ហិកតា​​​ពីរដ្ឋាភិបាល និង​​​ក្រោយ​​​មក​​​​លក់​​ដី​នោះ​ដោយ​ខុស​ច្បាប់​​​​។ ពួកគាត់​ក៏បាន​ឲ្យដឹង​ដែរថា អ្នក​​ទាំង​​ពីរបាន​កាប់​​​ឈូស​​​ឆាយ​​​ដីព្រៃទំហំ​៦០០​​ហិកតា​​នៅក្នុងជម្រក​សត្វព្រៃ​ដែល​នៅក្បែរនោះ។

លោក ឆាយ សាវុធ អនុប្រធាន​​អង្គភាព​ប្រឆាំង​​អំពើ​​ពុក​រលួយ​​​បានមាន​ប្រសាសន៍ថា “គោល​បំណង​នៃការ​បង្ហោះសេក្តីប្រកាសនេះ គឺ​​ដើម្បី​​ជូនដំណឹង​ដល់​ដើមចោទ​​​ថា អង្គភាព​​​របស់​យើង​​បាន​ចាត់វិធានការ​​សាកសួរ​ជនចាប់ចោទ​​​​រួច​​​ហើយ​​​។ វាជា​​ឱកាស​​សម្រាប់​ដើមចោទ​ផ្តល់​ភ័ស្តុតាង​ជាក់​​​លាក់​​​​មក​​​អង្គភាព​ប្រឆាំង​​អំពើពុករលួយ​ នៅពេល​មាន​ការ​ឆ្លើយតប​នេះ​​ពី​ចុងចោទ​ប្រសិនបើ​​ពួកគាត់​មិនអាច​ទទួល​ចម្លើយ​ផ្តល់ដោយ​​​ចុង​ចោទ​​ទាំង​​ពីរ”​។

លោក សាវុធ បានមាន​ប្រសាសន៍ថា ” វិធាន​​​ការ​​​បន្ទាប់​​​របស់​​អង្គភាព​ប្រឆាំង​អំពើ​ពុក​រលួយ នឹង​ផ្អែកលើ​​​ថាតើ​អ្នកភូមិ​”ពេញចិត្ត​នឹង​ចម្លើយ​​​ពី​មន្ត្រី​​ទាំង​​ពីររូប​នេះ​ដែរ​ឬ​​អត់​”។

លោក​​​ប្រធាន​ភូមិ យឹម ឌឿន ​​បាន​បដិសេធតាម​​ទូរស័ព្ទ​កាលពីម្សិលមិញថា លោកគ្មាន​ចំណែក​ណាមួយ​ក្នុង​​​ការ​កាន់​កាប់​ដីសម្បទាន​​​ដោយ​អ្នក​ជំនួញ​​ទេ។

លោក​​​បានមាន​ប្រសាសន៍​​​ថា “ដីដែល​អ្នក​​​ភូមិ​​​បាន​​​ស្នើ​​​សុំ​ និង​​​ផ្តល់​ឲ្យ​​​យើង​ ត្រូវបាន​អ្នក​​ជំនួញ​កាន់កាប់ ប៉ុន្តែខ្ញុំ​មិន​​​ពាក់​​ព័ន្ធ​ក្នុងការ​លក់​​ដី​ឲ្យពួកគេ​​ទេ។វា​​​ជា​​​ការរំលោភ​យកដី​”។

លោក គង់ សំអុឹម មេឃុំ​ក្រាំងស្កៀ បានបញ្ជាក់​​ថា សម្បទាន​ដី​ត្រូវបា​ន​​អ្នកភូមិ​ធ្វើ​ញត្តិ​ ប៉ុន្តែ​លោកបាន​បដិសេធ​​ថា លោក​​​មិន​​​បាន​​​ពាក់​​​ព័ន្ធ​​​ទេ​​​។

លោកបាន​មាន​ប្រសាសន៍ថា ” អ្នកភូមិខ្លះ​​បាន​ផ្តិតមេដៃ​ស្នើ​សុំ​សម្បទានដីសង្គម​កិច្ច​​​ពីរដ្ឋា​​ភិបាល​ ប៉ុន្តែខ្ញុំ​បាន​បដិសេធ​មិន​​ចុះហត្ថលេខា​លើឯកសារស្នើសុំ​​របស់​​ពួកគេ​​​ទេ នៅពេល​​​ពួកគេ​មករក​ខ្ញុំ​រយៈពេល​ពីរបីឆ្នាំ​មុន”៕ ប៊ុននី

​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស