នៅពេលមន្ត្រីរដ្ឋាភិបាលព្រួយបារម្ភអំពីការឡើងកម្រិតទឹកសមុទ្រនៅពេលអនាគត ខណៈប្រារព្ធទិវាបរិស្ថានពិភពលោកនៅក្នុងខេត្តកែប សកម្មជនប្រមាណ៣០០នាក់មកពីទូទាំងប្រទេសបានយកឱកាសនេះធ្វើការតវ៉ានៅក្នុងរាជធានីភ្នំពេញ កាលពីម្សិលមិញ ដើម្បីប្រឆាំងនឹងការកាប់ឈើខុសច្បាប់ ដែលធ្វើឲ្យព្រៃឈើរបស់ប្រទេសកម្ពុជាហិនហោចយ៉ាងឆាប់រហ័ស។ 
ដោយត្រូវបានដឹកនាំដោយបណ្ដាញយុវជនកម្ពុជា អ្នកតវ៉ាទាំងនោះរួមមានព្រះសង្ឃ និស្សិត និងអ្នកផ្សេងៗទៀតដែលរងផលប៉ះពាល់ដោយសារការបាត់បង់ព្រៃឈើនៅទូទាំងប្រទេស។មានអ្នកខ្លះបានស្លៀកពាក់តុបតែងខ្លួនជាតោ និងសត្វក្រពើ ហើយបានលាបមុខរបស់ខ្លួនពណ៌បៃតង។ ប៉ុន្តែកងសន្តិសុខ និងកងរាជអាវុធហត្ថបានរារាំងពួកគេមិនឲ្យហែក្បួនទៅកាន់ក្រសួងបរិស្ថាន ដើម្បីដាក់ញត្តិស្នើសុំជំនួយ ដោយអះអាងថា ផែនការហែក្បួនរបស់ពួកគេនេះគំរាមកំហែងដល់សិទ្ធិរបស់អ្នកដទៃ។
ក្នុងចំណោមក្ដីព្រួយបារម្ភចម្បងៗរបស់អ្នកតវ៉ា គឺគម្រោងសាងសង់ទំនប់វារីអគ្គិសនីចំនួនពីរ ដែលអាងស្តុកទឹករបស់គម្រោងទាំងនេះនឹងធ្វើឲ្យលិចលង់ព្រៃរាប់ម៉ឺនហិកតា និងបង្ខំឲ្យអ្នកភូមិរាប់រយគ្រួសារចាកចេញពីផ្ទះសំបែងរបស់ខ្លួន។
ញត្តិរបស់អ្នកតវ៉ា គឺស្នើឲ្យរដ្ឋាភិបាលលុបចោលគម្រោងទាំងនេះ។
លោក វ៉ែន វ៉ន ដែលបានចូលរួមនៅក្នុងការតវ៉ានេះដែរនោះ គឺជាជនជាតិដើមភាគតិចជងម្នាក់ក្នុងចំណោមជនជាតិជងរាប់រយនាក់ ដែលនឹងត្រូវចាកចេញពីដី និងព្រៃដូនតារបស់ខ្លួន ដើម្បីបើកផ្លូវឲ្យគម្រោងសាងសង់ទំនប់វារីអគ្គិសនីស្ទឹងឆាយអារ៉ែង ដែលនឹងធ្វើឲ្យលិចលង់ព្រៃដូនតានៅក្នុងខេត្តកោះកុង ហើយបំផ្លាញជម្រករបស់ប្រភេទសត្វជិតផុតពូជមួយចំនួនផងដែរ។
លោកបាននិយាយថា ” ខ្ញុំសង្ឃឹមថា មន្ត្រីរដ្ឋាភិបាលនឹងលុបចោលគម្រោងទំនប់វារីអគ្គិសនីអារ៉ែងនេះ ព្រោះវាគំរាមកំហែងយ៉ាងខ្លាំងដល់ធនធានធម្មជាតិ និងជីវភាពរស់នៅរបស់អ្នកភូមិជនជាតិដើមភាគតិចជង។
អ្នកភូមិនៅជ្រលងអារ៉ែងមិនត្រូវការទំនប់វារីអគ្គិសនីទេ ប្រសិនបើគេសាងសង់វា យើងនឹងបាត់បង់មុខរបរ និងប្រពៃណីរបស់យើង”។
អ្នកភូមិជនជាតិភាគតិចព្នងក៏មកពីខេត្តស្ទឹងត្រែង ជាទីដែលអ្នកភូមិរាប់រយគ្រួសារកំពុងប្រឈមនឹងការបណ្ដេញចេញដើម្បីបើកផ្លូវសម្រាប់គម្រោងវារីអគ្គិសនីទន្លេសេសានក្រោម២ដែរ។
លោក ថៃ សុវណ្ណី បានធ្វើដំណើរមកពីខេត្តព្រះវិហារ ជាទីដែលគាត់បានជួយការពារព្រៃឡង់ ដែលរងការកាប់បំផ្លាញយ៉ាងរាលដាល ហើយនៅមិនទាន់មានការការពារនៅឡើយ។
លោកបាននិយាយថា ” អ្នកជំនួញនិងក្រុមហ៊ុនដែលទទួលបានដីសម្បទានកំពុងតែបំផ្លាញព្រៃឈើ ហើយយើងមើលឃើញថា រដ្ឋបាលព្រៃឈើមិនបានចាត់វិធានការអ្វីដើម្បីបញ្ឈប់ក្រុមហ៊ុនរបស់លោក ទ្រី ភាព កុំឲ្យបំផ្លាញបរិស្ថាននោះទេ”។
លោក ទ្រី ភាព ដែលទទួលបានសិទ្ធិកាន់កាប់ដីសម្បទានមួយចំនួន ទទួលបានសិទ្ធិផ្ដាច់មុខក្នុងការទិញឈើដែលកាប់រួចទាំងអស់នៅក្នុងតំបន់ដីសម្បទានសេដ្ឋកិច្ចក្នុងខេត្តរតនគិរី ហើយទទួលបានសិទ្ធិទិញឈើខុសច្បាប់ដែលអាជ្ញាធររឹបអូសបាន រួចយកទៅដាក់លក់ដេញថ្លៃ។
សហគមន៍ដែលរងផលប៉ះពាល់ និងអង្គការសិទ្ធិមនុស្សបានលើកឡើងថា កិច្ចសន្យាផ្ដល់ដីសម្បទានកំពុងធ្វើឲ្យមានការកាប់ឈើខុសច្បាប់ទូទាំងប្រទេស ប៉ុន្តែតំណាងក្រុមហ៊ុនបានបដិសេធថា ក្រុមហ៊ុនគ្មានជាប់ពាក់ព័ន្ធនៅក្នុងសកម្មភាពខុសច្បាប់ណាមួយឡើយ។
អង្គការសិទ្ធិមនុស្សបានចាត់ទុកការផ្ដល់ដីសម្បទានសេដ្ឋកិច្ច ដូចជាការផ្ដល់ទៅឲ្យក្រុមហ៊ុនលោក ទ្រី ភាព និងក្រុមហ៊ុនកសិឧស្សាហកម្មផ្សេងៗទៀតជាដើម ជាកត្តាដ៏សំខាន់មួយក្នុងចំណោមកត្តាសំខាន់ៗផ្សេងៗទៀត ដែលធ្វើឲ្យព្រៃឈើហិនហោច និងមានការបណ្ដេញចេញដោយបង្ខំនៅក្នុងប្រទេស។ កាលពីខែវិច្ឆិកា ការវិភាគរបស់សាកលវិទ្យាល័យអាមេរិកលើទិន្នន័យផ្កាយរណបរបស់សហរដ្ឋអាមេរិកបានបង្ហាញថា ប្រទេសកម្ពុជាគឺជាប្រទេសជាប់ចំណាត់ថ្នាក់លេខ៥ ក្នុងពិភពលោកខាងកាប់បំផ្លាញព្រៃឈើ។
រដ្ឋាភិបាលបានអះអាងថា ខ្លួនចង់ការពារព្រៃនៅទូទាំងប្រទេសដើម្បីទទូលបានជំនួយឥណទានកាបូនដោយលក់កាបូនឲ្យក្រុមហ៊ុនថែរក្សាបរិស្ថាននៅក្រៅប្រទេស។
ប៉ុន្តែព្រៃឈើនៅក្នុងខេត្តឧត្តរមានជ័យ ជាព្រៃឈើដំបូងរបស់ប្រទេសកម្ពុជាដែលគេគិតថា អាចស្រូបកាបូនបានច្រើននោះ ឥឡូវនេះកំពុងតែបាត់បង់យ៉ាងឆាប់រហ័សដោយសារតែកសិករ ដែលមិនខ្វល់ពីភាពហិនហោច ដោយសារអ្នកកាប់ឈើខុសច្បាប់ និងការសាងសង់បន្ទាយថ្មីរបស់ទាហាន នេះបើយោងតាមការឲ្យដឹងពីសហគមន៍ដែលព្យាយាមថែរក្សាព្រៃឈើ។
អំឡុងការតវ៉ាកាលពីម្សិលមិញ កងរាជអាវុធហត្ថបានបញ្ឈប់សកម្មជនមិនឲ្យហែក្បួនទៅកាន់ក្រសួងបរិស្ថាន ពីកន្លែងដែលពួកគេបានជួបជុំគ្នានៅក្បែរស្ថានទូតរុស្ស៊ី ប៉ុន្តែបានអនុញ្ញាតឲ្យសកម្មជនមួយក្រុមតូចក្នុងចំណោមសកម្មជនទាំងអស់ដាក់ញត្តិរបស់ខ្លួន។
ស្របពេលនោះដែរ មន្ត្រីក្រសួងបរិស្ថានក៏បានប្រារព្ធទិវាបរិស្ថាននេះនៅខេត្តកែបផងដែរ ដោយផ្តោតលើការឡើងកម្រិតទឹកសមុទ្រនាពេលខាងមុខ ដែលបង្កឡើងដោយការប្រែប្រួលអាកាសធាតុពិភពលោក។
លោក កែន សត្ថា អភិបាលខេត្តកែប ដែលបានចូលរួមក្នុងព្រឹត្តិការណ៍នេះបានការពារប្រធានបទនេះ។
លោកបានមានប្រសាសន៍ថា “វាមិនមែនកើតចេញពីកត្តាតែមួយដូចជាការកាប់បំផ្លាញព្រៃឈើនោះទេ គឺមានការពាក់ព័ន្ធទៅនឹងការប្រែប្រួលអាកាសធាតុ។ មានកត្តាជាច្រើន ដូចជាការឡើងកម្ដៅ និងឧស្ម័នផ្ទះកញ្ចក់ជាដើម”។
លោកបានលើកឡើងថា លោក សាបូ អូហ្សាណូ រដ្ឋលេខាធិការក្រសួងបរិស្ថាននឹងថ្លែងសុន្ទរកថាទៅកាន់អ្នកភូមិ និស្សិត និងមន្ត្រីប្រហែល៥០០នាក់ ស្ដីពីការខិតខំរបស់រដ្ឋាភិបាលដើម្បីប្រយុទ្ធប្រឆាំង និងត្រៀមខ្លួនទប់ទល់ការប្រែប្រួលអាកាសធាតុ។ លោកក៏បានជួយដាំដើមឈើថ្មីចំនួន២០០ដើមផងដែរ៕ ស៊ុយឈាង