យោងតាមតំណាងសហជីពនិងអាជ្ញាធរបានឲ្យដឹងថា កម្មករប្រមាណ៣០០នាក់មកពីរោងចក្រកាត់ដេរអូសេអង់ (Ocean) នៅក្នុងខណ្ឌពោធិ៍សែនជ័យ រាជធានីភ្នំពេញ ត្រូវបានរារាំងម្ដងទៀតមិនឲ្យធ្វើការតវ៉ានៅខាងក្រៅក្រសួងការងារកាលពីម្សិលមិញ ខណៈការចរចារវាងម្ចាស់រោងចក្រ និងកម្មករនៅតែជាប់គាំងទៀត។
សង្វាក់ផលិតកម្មនៅរោងចក្រនេះ ដែលផលិតសម្លៀកបំពាក់ឲ្យក្រុមហ៊ុនលក់សម្លៀកបំពាក់យីហោល្បីៗ រួមមាន ក្រុមហ៊ុន Gap ជាដើមត្រូវបានផ្អាកចន្លោះពីថ្ងៃទី២៦ ខែឧសភា ដល់ថ្ងៃទី២៦ខែមិថុនា ដោយសារតែគ្មានការបញ្ជាទិញ។ ថៅកែរោងចក្របានផ្ដល់ឲ្យកម្មករចំនួន១៥ដុល្លារសម្រាប់ខែដែលរោងចក្រផ្អាកសង្វាកផលិតកម្មរបស់ខ្លួន រីឯកម្មករវិញបានទាមទារពាក់កណ្ដាលនៃប្រាក់ខែរបស់ពួកគេ។
នៅក្នុងការប៉ុនប៉ងធ្វើការតវ៉ាម្ដងទៀតបន្ទាប់ពីការតវ៉ាកាលពីថ្ងៃអង្គារ កម្មករបានចាប់ផ្ដើមហែក្បួនទៅកាន់ក្រសួងការងារនៅម៉ោងប្រហែល៧និង៣០នាទីព្រឹក ប៉ុន្តែត្រូវបានរារាំងចម្ងាយប្រហែល១គីឡូម៉ែត្រពីរោងចក្រ ហើយការរារាំងលើកនេះ គឺជាការរារាំងដោយនគរបាលនៅជួរទី២ បន្ទាប់ពីក្រុមអ្នកហែក្បួនដែលមានអ្នកខ្លះជិះម៉ូតូផង និងជិះរថយន្តផងបានទម្លុះរបាំងនគរបាលជួរទី១។
បន្ទាប់ពីប្រឈមមុខមួយភ្លែតម្ដងទៀតជាមួយនគរបាល កម្មករប្រមាណ៣០០នាក់ ដែលមានចំនួនមិនដល់ពាក់កណ្ដាលនៃអ្នកតវ៉ាកាលពីថ្ងៃអង្គារផងនោះ បានត្រឡប់ទៅកាន់រោងចក្រដែលវិញ ជាទីដែលការចរចាគ្នារវាងម្ចាស់រោងចក្រ និងកម្មករនៅតែជាប់គាំងដដែល។
សមាជិកសហជីពនៅតែមានភាពមានៈកាលពីម្សិលមិញ ហើយបានប្ដេជ្ញាថា នឹងធ្វើដំណើរទៅកាន់ក្រសួងការងារ និងខុទ្ទកាល័យរបស់លោកនាយករដ្ឋមន្ត្រី ហ៊ុន សែន នៅក្នុងថ្ងៃនេះ។
លោក ហួន វណ្ណា តំណាងសម្ព័ន្ធសហជីពចលនាកម្ពុជា បានមានប្រសាសន៍ថា ” យើងនឹងប្រើរ៉ឺម៉កម៉ូតូកង់បី ម៉ូតូ ឬរថយន្តដើម្បីធ្វើដំណើរទៅកាន់ក្រសួងការងារ និងខុទ្ទកាល័យរបស់លោកនាយករដ្ឋមន្ត្រី ហ៊ុន សែន ដើម្បីស្នើឲ្យជួយធ្វើអន្តរាគមន៍ និងស្វែងរកដំណោះស្រាយសម្រាប់ពួកយើង”។
លោក វណ្ណា បានលើកឡើងថា លោកជឿជាក់ថា សមាគមរោងចក្រកាត់ដេរនៅកម្ពុជា (GMAC) បានរារាំងថៅកែរោងចក្រមិនឲ្យយល់ព្រមចំពោះការទាមទាររបស់កម្មករ។
លោក វណ្ណា បានមានប្រសាសន៍បន្តថា ” រោងចក្រទំនងជាយល់ព្រមជាមួយយើងហើយ ប៉ុន្តែនៅពេលសមាគមរោងចក្រកាត់ដេរនៅកម្ពុជាធ្វើអន្តរាគមន៍ ពួកគេបានសម្រេចបន្តផ្ដល់ប្រាក់ចំនួនត្រឹមតែ១៥ដុល្លារនេះសម្រាប់រយៈពេលផ្អាកពីការងារ”។
លោក ជិន សុផាត បុគ្គលិករដ្ឋបាលនៅរោងចក្រនេះបាននិយាយថា “កម្មករនៅតែទាមទារប្រាក់៥០ភាគរយនៃប្រាក់ខែរបស់ពួកគាត់ រីឯរោងចក្រវិញអាចផ្ដល់តែ១៥ដុល្លារប៉ុណ្ណោះ។ យើងមិនអាចផ្ដល់ឲ្យពួកគាត់បន្ថែមទៀតបានទេ ព្រោះថា យើងនឹងខាតបង់”។
លោក កែន លូ អគ្គលេខាធិការសមាគមរោងចក្រកាត់ដេរនៅកម្ពុជា បានបដិសេធការចោទប្រកាន់នេះ ដោយនិយាយថា លោក ” គ្មានតួនាទីអ្វីធ្វើអន្តរាគមន៍ឡើយ”។
លោកបានមានប្រសាសន៍ថា ប្រសិនបើរោងចក្រមានឆន្ទៈផ្ដល់ប្រាក់ពាក់កណ្ដាលនោះ គឺជាគោលនយោបាយរបស់រោងចក្រ”៕ ស៊ុយឈាង