កាលពីម្សិលមិញ ព្រះរាជអាជ្ញាអមសាលាដំបូងខេត្តកំពង់ធំបានដោះលែងបុរសប្រាំពីរនាក់ ដែលបានបង្កើតប៉ុស្តិ៍ត្រួតពិនិត្យខុសច្បាប់មួយកន្លែងបន្ទាប់ពីពួកគេបានចុះហត្ថលេខាលើកិច្ចសន្យាមួយ ឈប់ប្រព្រឹត្តខុសទៀត។
បុរសប្រាំពីរនាក់ មានមន្ត្រីកងរាជអាវុធហត្ថបួននាក់ អ្នកកាសែតម្នាក់ បុគ្គលិកអង្គការក្រៅរដ្ឋាភិបាលម្នាក់ និងមន្ត្រីបរិស្ថានស្រុកម្នាក់ ត្រូវបានចាប់ខ្លួនក្នុងប្រតិបត្តិការទារយកប្រាក់នៅឯប៉ុស្តិ៍ត្រួតពិនិត្យខុសច្បាប់ តាមបណ្តោយផ្លូវជាតិលេខ៦២ ក្នុងស្រុកកំពង់ស្វាយ។
លោក សាយ ណូរ៉ា ព្រះរាជអាជ្ញារងអមសាលាដំបូងខេត្តបានមានប្រសាសន៍កាលពីម្សិលមិញថា នគរបាលកំពុងតាមរកអ្នកសមគំនិតចំនួន១០នាក់ទៀត។ លោកមិនបង្ហាញអត្តសញ្ញាណជនសង្ស័យទាំង១០នាក់នេះទេ គ្រាន់តែឲ្យដឹងថាជាមន្ត្រី។
លោក ណូរ៉ា បានបន្ថែមថា ” យើងបានចាប់ខ្លួនអ្នកកាសែត ពីព្រោះជានិច្ចកាលពួកគេទារយកប្រាក់ពីអ្នកបើកបររថយន្តដឹកឈើប្រណីត គំរាមអ្នកបើកបរដោយយកលេសរាយការណ៍ប្រាប់នគរបាល ឬព្រះរាជអាជ្ញា ប្រសិនបើពួកគេមិនឲ្យប្រាក់។ ខ្ញុំជាព្រះរាជអាជ្ញារងប៉ុន្តែខ្ញុំបើកឡានចាស់ ប៉ុន្តែអ្នកកាសែតទាំងនោះ បើកឡានទំនើប។ តើពួកគេបានលុយពីណាមក?”។
លោក ណូរ៉ា បានមានប្រសាសន៍ថា អ្នកកាសែតជានិច្ចកាលគំរាមទារប្រាក់ពីអ្នកកាប់ឈើខុសច្បាប់ គំរាមពួកគេចុះក្នុងទំព័រកាសែតរៀបរាប់អំពីសកម្មភាពរបស់ពួកគេ។
ទោះយ៉ាងណា លោក ណូរ៉ា បានមានប្រសាសន៍ថា អ្នកកាសែតទាំងនេះនិងអ្នកផ្សេងទៀតក្នុងក្រុមនេះ ត្រូវបានព្រមាន និងដោះលែង ពីព្រោះពួកគេប្រព្រឹត្តល្មើសលើកទី១ ហើយបានយល់ព្រមបិទប៉ុស្តិ៍ត្រួតពិនិត្យខុសច្បាប់នេះ។
លោក ជា ពឿន នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានឲ្យដឹងថា ការស៊ើបអង្កេតក្រុមនេះ បានប្រើពេលពីរខែ។
លោក ជា ពឿន បានមានប្រសាសន៍ថា ” មុនយើងចាប់ខ្លួនពួកគេ យើងក៏បាននិយាយទៅកាន់អ្នកបើកបរនិងអ្នកដំណើរនៃរថយន្តទាំងនោះផងដែរ។ អ្នកទាំងនោះបានប្រាប់យើងថា ជនសង្ស័យទារយកប្រាក់៥.០០០រៀល[១.២៥ដុល្លារ] ទៅ១០.០០០រៀល[ប្រហែល២.៥០ដុល្លារ] នៅតាមប៉ុស្តិ៍ត្រួតពិនិត្យខុសច្បាប់នីមួយៗ”។
លោក ជា ពឿន បានបន្ថែមថា ការស៊ើបអង្កេតរបស់លោកកំពុងដំណើរការ ហើយថា លោកសង្ឃឹមថានឹងចាប់ខ្លួនអ្នកសមគំនិតចំនួន១០នាក់ទៀតឆាប់ៗនេះ។
លោកបានមានប្រសាសន៍ថា “យើងនឹងធ្វើរឿងនេះរហូត។ យើងមិនខ្លាចមន្ត្រីទាំងនោះឡើយ[បុរស១០នាក់ដែលមិនទាន់ចាប់ខ្លួនបាននៅឡើយ]។
លោក ញ៉ែម សារ៉ាត់ អ្នកសង្កេតការណ៍របស់អង្គការសិទ្ធិមនុស្សអាដហុកប្រចាំខេត្តនេះបានរិះគន់ការងាររបស់នគរបាលនិងព្រះរាជអាជ្ញា ដោយចាត់ទុកថាវាជាការរាលដាល។
លោក សារ៉ាត់ បានមានប្រសាសន៍ថា “ប្រសិនបើពួកគេរកឃើញមន្ត្រីទាំងនោះ [បុរស១០នាក់នោះ] អាជ្ញាធរគួរតែអនុវត្តច្បាប់ មិនត្រឹមតែចាប់ខ្លួននិងដោះលែងពួកគេដោយគ្មានការដាក់ពិន័យនោះទេ។ មានរឿងក្តីច្រើនបំផុតនៅក្នុងខេត្តនេះ ជាទីដែលក្រុមមន្ត្រីប្រើតួនាទីរបស់ខ្លួនដើម្បីបង្កើតប៉ុស្តិ៍ត្រួតពិនិត្យខុសច្បាប់”៕ ប៊ុននី