កាលពីម្សិលមិញ អ្នកភូមិ និងសកម្មជនការពារសិទ្ធិមនុស្សបានឲ្យដឹងថា អ្នកភូមិចំនួន១២គ្រួសារដែលមានវិវាទដីធ្លីក្នុងខេត្តកំពត បាននាំគ្នារារាំងក្រុមហ៊ុនសំណង់មួយកាលពីថ្ងៃពុធមិនឲ្យចាក់ដីបំពេញទីវាលដែលពួកគាត់អះអាងថា ជាកម្មសិទ្ធិរបស់ខ្លួន។
អ្នកភូមិជាច្រើនគ្រួសារនេះបានលើកឡើងថា ក្រុមហ៊ុនបានចាប់ផ្ដើមទន្ទ្រានយកដីរបស់ពួកគាត់នៅក្នុងឆ្នាំ២០១១នៅពេលពួកគេបានទិញដីនៅក្បែរៗនោះ។
ចាប់តាំងពីពេលនោះមក អ្នកភូមិទាំង១២គ្រួសារនេះដែលបដិសេធមិនព្រមលក់ដីរបស់ខ្លួនទៅឲ្យក្រុមហ៊ុន វណ្ណ វណ្ណា នៅក្នុងស្រុកកំពង់ត្រឡាច បាននិយាយថា ពួកគាត់បានជួបការលំបាកនៅក្នុងការផ្ដល់ភ័ស្តុតាងដែលបញ្ជាក់ថា ដីនេះជារបស់ពួកគាត់ដោយស្របច្បាប់។
អ្នកភូមិម្នាក់ឈ្មោះ កង ហាវ អាយុ៦៨ឆ្នាំបាននិយាយថា ” យើងបានរស់នៅ ហើយរង់ចាំមន្ទីរសុរិយោដីផ្ដល់ប័ណ្ណកម្មសិទ្ធិដីធ្លីមកឲ្យយើង ប៉ុន្តែឥឡូវនេះខ្ញុំឮថា ក្រុមហ៊ុនបានក្លាយជាម្ចាស់កម្មសិទ្ធិលើដីរបស់ខ្ញុំហើយ។ក្រុមហ៊ុនបានព្យាយាមយកដីរបស់ខ្ញុំជាយូរមកហើយ។ ហើយនៅពេលណាដែលខ្ញុំដាំដើមដូង ពួកគេបានមកដកចេញភ្លាម”។
លោក យន់ ផល្លី អ្នកស៊ើបអង្កេតនៅអង្គការសិទ្ធិមនុស្សលីកាដូ បានឲ្យដឹងថា កាលពីថ្ងៃពុធ រថយន្តដឹកដីមួយចំនួនរបស់ក្រុមហ៊ុនបានទៅដល់ ប៉ុន្តែបានត្រឡប់ទៅវិញ បន្ទាប់ពីអ្នកភូមិបាននាំគ្នាបិទផ្លូវ។
លោកបានមានប្រសាសន៍ថា ” ខ្ញុំបានទៅសួរមេឃុំ ប៉ុន្តែគាត់បានមានប្រសាសន៍ថា គាត់មិនដឹងទេ ថាតើហេតុអ្វីបានជាក្រុមហ៊ុនព្យាយាមបង្ហាញប្រាប់ពលរដ្ឋថា ខ្លួនមានប័ណ្ណកម្មសិទ្ធិដីធ្លីនោះ”។
យោងតាមលោក ផល្លី បានឲ្យដឹងថា ក្រុមហ៊ុន វណ្ណ វណ្ណា បានព្យាយាមទិញដីទំហំមួយហិកតាពីអ្នកភូមិទាំង១២គ្រួសារនេះក្នុងតម្លៃ៤០.០០០ដុល្លារ ប៉ុន្តែពួកគាត់បានបដិសេធមិនលក់ឲ្យទេ។
លោក វុធ វឌ្ឍាណា ប្រធានការិយាល័យអន្តរវិស័យខេត្តកំពត បានលើកឡើងថា ក្រុមហ៊ុនទទួលបានសិទ្ធិអភិវឌ្ឍផ្នែកខ្លះនៃតំបន់នោះជាច្រើនឆ្នាំមកហើយ។
លោកបានមានប្រសាសន៍ថា ក្រុមហ៊ុន វណ្ណ វណ្ណា ទទួលបានការអនុញ្ញាតឲ្យអភិវឌ្ឍជាយូរមកហើយ ប៉ុន្តែទាក់ទិននឹងវិវាទដីធ្លីរវាងក្រុមហ៊ុន និងអ្នកភូមិទាំង១២គ្រួសារនោះវិញ ខ្ញុំមិនដឹងទេ ថាតើក្រុមហ៊ុនមានប័ណ្ណកម្មសិទ្ធិដីធ្លីឬអត់នោះ”។
យោងតាមអង្គការសិទ្ធិមនុស្សក្នុងស្រុកលីកាដូ បានឲ្យដឹងថា កាលពីខែមីនា ក្រុមហ៊ុន វណ្ណ វណ្ណា បានដាក់ពាក្យប្ដឹងដោយអះអាងថា គ្រួសារទាំងនេះមានអាកប្បកិរិយាហិង្សា ហើយបានរារាំងមិនឲ្យខ្លួនធ្វើការអភិវឌ្ឍ។ កាលពីខែមេសា គ្រួសារទាំងនេះបានដាក់ពាក្យប្ដឹងបកវិញ ដោយលើកឡើងថា ក្រុមហ៊ុនបានទន្ទ្រានយកដីរបស់ពួកគាត់ដោយខុសច្បាប់។
លោក ហាវ បាននិយាយថា ” ក្រុមហ៊ុនកំពុងតែគំរាមកំហែងយើង ដោយនិយាយថា ប្រសិនបើយើងមិនផ្ដល់ដីទៅឲ្យគេទេ គេនឹងចាក់ដីលើដីរបស់យើង ទោះបីជាយើងរស់នៅទីនេះជាយូរមកហើយក៏ដោយ”៕ ស៊ុយឈាង