29 C
Phnom Penh

រដ្ឋាភិបាល​រឹបអូស​​​នាវា​បួនគ្រឿង​​ដោយសារ​​រំលោភ​​បម្រាម​បូម​ខ្សាច់​

ដោយ ឌឹ ខេមបូឌា ដេលី

បទវិភាគ

ក្រសួងធន​​ធានទឹក​​និងឧតុនិយមបាន​រឹប​អូស​​​នាវា​​ចំនួន​​បួន​គ្រឿង​​កាល​ពី​ថ្ងៃ​​​ពុធ​​ដោយ​​សារ​​រំលោភ​បម្រាម​​​​​របស់​រដ្ឋាភិបាល​មិន​​ឲ្យ​បូម​ខ្សាច់​ក្នុងទន្លេ​​ នៅរាជធានីភ្នំពេញ​ និង​កំពុង​​តែ​​​តាម​រក​ម្ចាស់​​នាវា​ទាំងនេះ។

សាលារាជធានី​​ភ្នំពេញបានចេញ​បម្រាម​​​នេះ​កាល​ពី​​ឆ្នាំមុន ​ជាការ​​ឆ្លើយតប​​ទៅនឹង​​​​​ការ​ផ្គត់​ផ្គង់​​ហួស​កម្រិត​​របស់​នាវា​បូម​ខ្សាច់​គ្មាន​​អាជ្ញា​​ប័ណ្ណ​នៅក្នុង​រាជធានី​ភ្នំពេញ​។ សកម្មភាព​​​របស់​នា​វា​នេះ​​ត្រូវបាន​ស្តីបន្ទោស ដោយសារលំនៅ​ដ្ឋាន​​មួយចំនួន​នៅតាម​មាត់​ទ​ន្លេក្នុង​រាជ​ធានី បានបាក់​ស្រុត​ចូល​ទៅ​ក្នុង​ទឹក បើទោះជា​​សាលារាជធានី​បាន​សន្មតថា ការ​បាក់​ស្រុត​នេះ​ ដោយសារការ​ច្រោះ​តាម​ធម្មជាតិ​ក៏ដោយ។

កាលពីម្សិលមិញ លោក លឹម គានហោ ​រដ្ឋ​មន្ត្រី​ក្រសួង​ធន​​ធាន​​ទឹក​និងឧតុនិយម បានមាន​ប្រសាសន៍​ថា នាវាទាំង​បួន​គ្រឿងនេះ​ត្រូវបា​ន​រឹប​​អូស​ និង​​រក្សាទុក​កាល​​​ពី​រសៀល​ថ្ងៃ​​​ពុធ​ ដោយសារ​រំលោភ​បម្រាប​​។

លោកបានមាន​ប្រសាសន៍ថា ” នាវា​បួនគ្រឿង​នេះ ត្រូវបាន​រឹប​អូស​ ខណៈដែល​កម្មករ​​កំពុង​​​បូម​ខ្សាច់​​​ពីទន្លេ។ ការ​បូម​ខ្សាច់មិនត្រូវបាន​អនុញ្ញាត​​ ចាប់តាំងពី​មុនការ​បោះឆ្នោត​​ជ្រើស​​តាំង​តំណាង​រាស្ត្រ​​កាល​​ពីខែ​​កក្កដាមក​”។

​លោក គានហោ ​បានមាន​ប្រសាសន៍ថា ​នាវាយ៉ាង​តិច​​២០គ្រឿង​ត្រូវបាន​រឹបអូស​ ចាប់​តាំង​​ពី​បម្រាម​នេះ​ចូល​​ជាធរមាន​មក។

លោក ច័ន្ធ យុត្ថា អ្នកនាំពាក្យ​​​របស់​​ក្រសួង​​ធន​ធាន​​ទឹក​​បានមាន​ប្រសាសន៍ថា ​គ្មាន​នរណា​ម្នាក់​ត្រូវបាន​ចាប់​​ខ្លួន​​​ នៅអំឡុងពេល​​រឹប​​អូស​​​នាវានោះទេ ពីព្រោះ​​អ្នកនៅលើនាវា​នោះ​​បាន​លោត​​​ទៅ​ក្នុងទឹក ហើយរត់គេចខ្លួន។ លោកបានមាន​ប្រសាសន៍ថា ​រដ្ឋាភិបាល​​មិនស្គាល់​​ម្ចាស់នាវាទាំង​​បួន​គ្រឿង​ ​ដែល​​កំពុងប្រតិបត្តិការ​​នៅ​​តំបន់​ផ្សេងៗ​​នៃ​​ទន្លេនេះ​ ប៉ុន្តែ​កំពុង​ធ្វើ​ការ​ស៊ើបអង្កេត​។

​ទោះជាមាន​បម្រាម​ក៏ដោយ ក៏លោក យុត្ថា ​បានមាន​ប្រសាសន៍ថា ​​នាវាទាំង​​នេះ​នៅ​​តែ​ត្រូវបាន​អនុញ្ញាត​​ឲ្យបូម​ខ្សាច់​នៅ​ក្នុង​តំបន់​​ពីរ​​​ក្នុងរាជធានីភ្នំពេញ​ នៅទល់មុខ​ព្រះ​បរមរាជ​វាំង​ និង​នៅ​ក្បែរ​កោះ​ឧកញ៉ាតី ​ដើម្បី​យក​ដីល្បប់​ ដែល​​អាច​រាំង​ស្ទះ​រំហូរ​​ទឹក​ទន្លេ៕ ប៊ុននី​​

​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស