ក្រុមមន្ត្រីជាន់ខ្ពស់ និងប្រភពនៅកៀកនឹងលោកនាយករដ្ឋមន្ត្រី ហ៊ុន សែន បានបដិសេធយ៉ាងខ្លាំងទៅនឹងពាក្យចចាមអារ៉ាមកាលពីម្សិលមិញដែលថា លោក ហ៊ុន សែន ដាច់សរសៃឈាមខួរក្បាលធ្ងន់ធ្ងរ ហើយត្រូវបានប្រញាប់ប្រញាល់បញ្ជូនទៅព្យាបាលនៅប្រទេសសិង្ហបុរី។
ពាក្យចចាមអារ៉ាមទាំងនេះបានលេចឡើងទូទាំងបណ្ដាញទំនាក់ទំនងសង្គមកាលពីម្សិលមិញ ដោយអ្នកប្រើប្រាស់បណ្ដាញទំនាក់ទំនងសង្គមបានបញ្ជូនព័ត៌មានតគ្នាថា លោក ហ៊ុន សែន បានដាច់សរសៃឈាមខួរក្បាលធ្ងន់ធ្ងរកាលពីរសៀលថ្ងៃសុក្រ ហើយត្រូវបានប្រញាប់ប្រញាល់បញ្ជូនទៅមន្ទីរពេទ្យកាល់ម៉ែត មុនពេលត្រូវបានបញ្ជូនទៅប្រទេសសិង្ហបុរីដើម្បីព្យាបាលបន្ថែម។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានមានប្រសាសន៍ថា “វាមិនមែនជាការពិតទេ ហើយលោកកំពុងសម្រាកលំហែកាយក្នុងរាជធានីភ្នំពេញ។ វាគ្រាន់តែជាពាក្យចចាមអារ៉ាមតែប៉ុណ្ណោះ។ លោកមិនមានបញ្ហាអ្វីឡើយ ហើយលោកបន្តធ្វើការដូចធម្មតាអ៊ីចឹង”។
នៅពេលត្រូវបានសួរថា ហេតុអ្វីបានជាទីស្តីការគណៈរដ្ឋមន្ត្រីមិនបានកោះប្រជុំគណៈរដ្ឋមន្ត្រីប្រចាំសប្ដាហ៍កាលពីថ្ងៃសុក្រ លោក ផៃ ស៊ីផាន បានមានប្រសាសន៍ថា រដ្ឋមន្ត្រីទាំងអស់មិនមានអ្វីត្រូវពិភាក្សាឡើយ។ លោកបានមានប្រសាសន៍ថា “យើងគ្មានអ្វីត្រូវពិនិត្យមើលទេ។ ច្បាប់ដែលស្នើឡើងនោះត្រូវបានពិនិត្យហើយ”។
លោក ឈួ គឹមនី នាយនគរបាលព្រំដែនប្រចាំនៅអាកាសយានដ្ឋានអន្តរជាតិភ្នំពេញ បានមានប្រសាសន៍ថា លោកនាយករដ្ឋមន្ត្រីមិនបានធ្វើដំណើរតាមច្រកទ្វារអាកាសយានដ្ឋាននៅចុងសប្ដាហ៍ទេ។
លោកបានមានប្រសាសន៍ថា “គ្មានមន្ត្រីជាន់ខ្ពស់ណាម្នាក់បានធ្វើដំណើរទៅប្រទេសសិង្ហបុរីដើម្បីព្យាបាលជំងឺទេ” ។ សមាជិកមួយចំនួននៅកងអង្គរក្សលោកនាយករដ្ឋមន្ត្រី ដែលបានបដិសេធមិនប្រាប់ឈ្មោះ ដោយសារពួកគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយព័ត៌មាន បានបដិសេធស្រដៀងគ្នាចំពោះពាក្យចចាមអារ៉ាមនេះ។
ទោះជាយ៉ាងណា លោក សម រង្ស៊ី មេដឹកនាំគណបក្សប្រឆាំងបានអះអាងថា ព័ត៌មាននេះចេញមកពីប្រភពគួរឲ្យទុកចិត្ត។ លោកបានមានប្រសាសន៍ថា “មានព័ត៌មានថា គាត់ឈឺធ្ងន់ណាស់ ហើយបានធ្វើដំណើរទៅព្យាបាលនៅប្រទេសសិង្ហបុរី។ គាត់មានជំងឺដាច់សរសៃឈាមខួរក្បាលធ្ងន់ធ្ងរ។ គាត់ត្រូវបានបញ្ជូនទៅមន្ទីរពេទ្យកាល់ម៉ែតកាលពីថ្ងៃសុក្រ ហើយបន្ទាប់មកត្រូវបានបញ្ជូនទៅប្រទេសសិង្ហបុរី”។
នៅពេលត្រូវបានសួរអំពីប្រភពព័ត៌មានរបស់លោក លោក សម រង្ស៊ី បានមានប្រសាសន៍ថា “ប្រភពផ្ទៃក្នុងក្នុងគណបក្សប្រជាជនកម្ពុជា។ ហើយឥឡូវនេះ ព័ត៌មាននេះកំពុងត្រូវបានផ្សព្វផ្សាយតាមប្រព័ន្ធអុីនធើណិត”៕សារុន
(រាយការណ៍បន្ថែមដោយ AlexWillemyns)