អង្គការសិទ្ធិមនុស្ស និងនាយកដ្ឋានពន្ធនាគារបានលើកឡើងថា ចំនួនអ្នកទោសដែលបានស្លាប់ក្នុងពន្ធនាគារនៅក្នុងប្រទេសកម្ពុជានៅត្រីមាសទី១នៃឆ្នាំនេះបានថយចុះមកត្រឹមប្រាំបួននាក់ បើប្រៀបធៀបទៅនឹងរយៈពេលដូចគ្នានេះកាលពីឆ្នាំមុន ដែលមាន១៥នាក់។
យោងតាមលោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូ បានឲ្យដឹងថា ចាប់ពីខែមករា ដល់ខែមេសា អ្នកទោសប្រាំបួននាក់ បុរសប្រាំនាក់ និងស្ត្រីបួននាក់តាមព័ត៌មានថា បានស្លាប់ក្នុងពន្ធនាគារ។ មណ្ឌលអប់រំកែប្រែទី២ ក្នុងរាជធានីភ្នំពេញមានអ្នកទោសស្លាប់ពីរនាក់ ចំណែកឯពន្ធនាគារខេត្តបន្ទាយមានជ័យក៏មានអ្នកទោសស្លាប់ពីរនាក់ដែរ។
លោក អំ សំអាត បានមានប្រសាសន៍ថា អំឡុងរយៈពេលដូចគ្នានេះកាលពីឆ្នាំមុន មានអ្នកទោស១៥នាក់បានស្លាប់ក្នុងពន្ធនាគារចំនួន១៨ដែលត្រូវបានឃ្លាំមើលដោយអង្គការនេះ។
លោក បេ ទៀឡេង អគ្គនាយកនៃអគ្គនាយកដ្ឋានពន្ធនាគារបានបញ្ជាក់ពីតួលេខនេះ ដោយលើកឡើងថា ជំងឺលើសឈាម ការដាច់សរសៃឈាមខួរក្បាល និងជំងឺគាំងបេះដូងជាមូលហេតុចម្បងនៃការស្លាប់នេះ។
លោក ទៀឡេង បានបន្ថែមថា កង្វះការធ្វើលំហាត់ប្រាណក៏ជាចំណែកមួយចំពោះអត្រានៃការស្លាប់ផងដែរ ហើយលោកបានលើកឡើងថា នាយកដ្ឋានពន្ធនាគារកំពុងប្រឹងប្រែងធ្វើឲ្យប្រាកដថា អ្នកទោសចំណាយពេលគ្រប់គ្រាន់ក្នុងការហាត់ប្រាណ។
លោកបានមានប្រសាសន៍ថា “ការស្លាប់ភាគច្រើនបណ្ដាលមកពីជំងឺរ៉ាំរ៉ៃ ដែលអ្នកទោសមានមុនពេលពួកគេជាប់ពន្ធនាគារ។ យើងកំពុងធ្វើឲ្យប្រាកដថា អ្នកទោសត្រូវបានអនុញ្ញាតឲ្យហាត់ប្រាណ…។ ពីមុនពួកគេគ្រាន់តែហូប ដេក និងនៅខាងក្នុងពន្ធនាគារ ដែលអាចបណ្ដាលឲ្យកើតជំងឺទាំងនេះ”។
ប៉ុន្តែលោក អំ សំអាត បានមានប្រសាសន៍ថា ចំនួនអ្នកទោសណែនណាន់តាន់តាប់ក៏ជាកត្តាសំខាន់បណ្ដាលឲ្យមានការស្លាប់ដែរ។ លោកបានមានប្រសាសន៍ថា “យើងកត់សម្គាល់ឃើញថា ពន្ធនាគារមួយចំនួនមានអ្នកទោសណែនណាន់តាន់តាប់ ហើយបរិយាកាសអួអាប់ ដែលបណ្ដាលឲ្យមានបញ្ហាផ្លូវដង្ហើម ភាពតានតឹងក្នុងអារម្មណ៍ ការដាច់សរសៃឈាមខួរក្បាល និងជំងឺគាំបេះដូង”។លោកកត់សម្គាល់ថា មូលហេតុនៃការស្លាប់បែបនេះមិនដែលត្រូវបានផ្តល់ឲ្យដឹងទេ។ លោកបានមានប្រសាសន៍ថា “យើងមិនត្រូវបានអនុញ្ញាតឲ្យចូលរួមក្នុងដំណើរការធ្វើកោសល្យវិច័យឡើយ”។
លោក គា សុវណ្ណា ប្រធានមណ្ឌលអប់រំកែប្រែទី៣ បានមានប្រសាសន៍ថា ជារឿយៗអ្នកទោសដែលបានស្លាប់នោះគឺមានជំងឺរ៉ាំរ៉ៃ។ លោកបានមានប្រសាសន៍ថា “ពួកគេមានជំងឺរ៉ាំរ៉ៃ ដូចជាជំងឺអេដស៍ និងជំងឺរបេងជាដើមមុនពេលពួកគេជាប់ពន្ធនាគារ”។ លោកបានបន្ថែមថា “នៅទីនេះ មានអ្នកទោសម្នាក់ទៅពីរនាក់ស្លាប់រៀងរាល់ឆ្នាំ។ វាជាការធម្មតាទៅហើយ យើងមិនអាចចៀសបានឡើយ។ សូម្បីតែនៅក្រៅពន្ធនាគារក៏មានមនុស្សស្លាប់ដែរ”៕ សារុន