អ្នកនាំពាក្យនគរបាលជាតិបានឲ្យដឹងកាលពីម្សិលមិញថា នគរបាលជាតិមានផែនការបង្កើតកាសែតជាភាសាខ្មែរផ្ទាល់ខ្លួន ដើម្បីផ្ដល់ព័ត៌មានច្បាស់ការស្ដីពីសន្តិសុខ និងបទល្មើសផ្សេងៗនៅក្នុងប្រទេសកម្ពុជាទៅឲ្យសាធារណជន និងដើម្បីលើកកម្ពស់ការយល់ដឹងអំពីច្បាប់ចរាចរណ៍ និងគ្រោះថ្នាក់នៃគ្រឿងញៀន។
លោកឧត្តមសេនីយ៍ឯក គៀត ច័ន្ទថារិទ្ធ បានលើកឡើងថា វាលឿនពេកហើយដែលនិយាយថា ពេលណាដែលកាសែតគ្រប់គ្រងដោយរដ្ឋាភិបាលនេះនឹងត្រូវបើកឲ្យដំណើរការនោះ ព្រោះវាចាំបាច់ត្រូវតែទទួលបានភ្លើងខៀវពីលោក ស ខេង រដ្ឋមន្ត្រីក្រសួងមហាផ្ទៃជាមុនសិន។
លោកបានមានប្រសាសន៍ថា “អង្គភាពរបស់យើងមានគម្រោងបង្កើតកាសែតផ្ទាល់ខ្លួន ប៉ុន្តែយើងចាំាបាច់ត្រូវតែមានការអនុញ្ញាតជាមុន”។ លោកបានបន្ថែមថា ការស្នើជាផ្លូវការនឹងត្រូវធ្វើឡើងក្នុងពេលឆាប់ៗ ហើយលោកសង្ឃឹមថា កាសែតនេះនឹងចេញប្រឡូកក្នុងពេលឆាប់ៗនេះ។
កាសែតរបស់នគរបាលជាតិដែលរាយការណ៍អំពីបទល្មើសផ្សេងៗ និងស្ថិតិគ្រោះថ្នាក់ចរាចរណ៍ ព្រមទាំងផ្ដល់ការណែនាំអំពីរបៀបទប់ស្កាត់បទល្មើសនេះ ជាធម្មតាមិនសូវមាននោះទេ នៅក្នុងប្រទេសជាច្រើន ។
ឧត្តមសេនីយ៍ឯក គៀត ច័ន្ទថារិទ្ធ បានមានប្រសាសន៍បន្ថែមថា “ទេ វាមិនមែនឥតគិតថ្លៃនោះទេ កាសែតនេះនឹងលក់ដូចកាសែតផ្សេងៗដែរ ព្រោះយើងត្រូវការរកប្រាក់ចំណេញដើម្បីដំណើរការកាសែត”។ លោកបានបន្តថា តម្លៃសម្រាប់កាសែតមួយច្បាប់ និងថវិកាដើម្បីបង្កើតកាសែតទាំងមូលនៅមិនទាន់កំណតនៅឡើយទេ។ នគរបាលជាតិនឹងជ្រើសរើសអ្នកកាសែតអាជីពដើម្បីគ្រប់គ្រងកាសែតនេះ ហើយរាយការណ៍ព័ត៌មានជាមួយលោក អាត ប៊ុននី អ្នកយកព័ត៌មានជាន់ខ្ពស់នៅស្ថានីយទូរទស្សន៍បាយ័ន និងជាអតីតអ្នកយកព័ត៌មានឲ្យវិទ្យុអាស៊ីសេរី។
ឧត្តមសេនីយ៍ឯក គៀត ច័ន្ទថារិទ្ធ បានលើកឡើងថា ប្រាក់ខែគោលសម្រាប់អ្នកយកព័ត៌មាននឹងមានកម្រិតស្មើនឹងប្រាក់ខែរបស់មន្ត្រីរាជការដែរ ប៉ុន្តែគេរំពឹងថា នឹងមានប្រាក់ឧបត្ថម្ភផ្សេងៗដើម្បីឲ្យប្រាក់ខែមានកម្រិតប្រហាក់ប្រហែលនឹងប្រាក់ខែរបស់អ្នកយកព័ត៌មានសម្រាប់កាសែតប្រកួតប្រជែងផ្សេងៗ។ ឧត្តមសេនីយ៍ឯក គៀត ច័ន្ទថារិទ្ធ បានឲ្យដឹងបន្តថា ការទទួលបានព័ត៌មានពីនគរបាលមិនដែលធ្លាប់មាននេះ នឹងទំនងជាធ្វើឲ្យកាសែតនេះទទួលបានជោគជ័យលើគូប្រកួតប្រជែងខ្លាំងៗផ្សេងទៀត។
លោកបានមានប្រសាសន៍ថា “ខ្ញុំគិតថា ពលរដ្ឋនឹងជឿជាក់លើយើងច្រើនជាងកាសែតផ្សេងៗ ព្រោះយើងជាអ្នកជំនាញ។ យើងបង្កើតកាសែតនេះ ពីព្រោះពលរដ្ឋភាគច្រើនចង់ដឹងអំពីសន្តិសុខ គ្រោះថ្នាក់ផ្សេងៗ និងចង់ដឹងឲ្យបានច្រើនអំពីច្បាប់ចរាចរណ៍”។ មានកាសែតភាសាខ្មែរ និងស្ថានីយទូរទស្សន៍ជាច្រើនដែលគ្រប់គ្រងដោយរដ្ឋាភិបាល ឬក្រុមហ៊ុនឯកជន។ នៅក្នុងចំណោមប្រទេសចំនួន១៨០ដែលត្រូវបានវិភាគដោយអង្គការសិទ្ធិសារព័ត៌មានឈ្មោះថា Reporterswithout Bordersfortheannual WorldPress FreedomIndex ប្រទេសកម្ពុជាទទួលបានចំណាត់ថ្នាក់អន់ដោយទទួលបានចំណាត់ថ្នាក់ទី១៤៣កាលពីឆ្នាំមុន ហើយធ្លាក់មកចំណាត់ថ្នាក់ទី១៤៤ក្នុងឆ្នាំ២០១៤នេះ។
កាសែត ខ្មែរថែមស៍ (Khmer Times) ដែលផ្សាយជាភាសាខ្មែរ និងអង់គ្លេស បានបើកដំណើរការកាលពីខែមុន ដោយទទួលបានមូលនិធិពីអ្នកជំនួញម្នាក់ឈ្មោះ ធី ម៉ូហាន (TMohan) ដែលមានទំនាក់ទំនងជាមួយរដ្ឋាភិបាល និងអតីតអ្នកនាំពាក្យរដ្ឋាភិបាល ដើម្បីបើកប្រាក់ខែឲ្យបុគ្គលិករបស់ខ្លួន។ ទោះបីជាមានទំនាក់ទំនងជាមួយរដ្ឋាភិបាលក៏ដោយ ប៉ុន្តែគោលការណ៍របស់កាសែតនេះគឺផ្ដោតលើភាពមិនលម្អៀងផ្នែកនយោបាយ។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន បានស្វាគមន៍នគរបាលជាតិដែលផ្សព្វផ្សាយព័ត៌មានសន្តិសុខដល់សាធារណជន ប៉ុន្តែលោកមានចម្ងល់អំពីមូលហេតុដែលបើកកាសែតនេះ។ លោកបានមានប្រសាសន៍ថា “កាសែតនេះនឹងមិនទទួលបានប្រជាប្រិយភាពទេ ប្រសិនបើវាត្រូវបានបង្កើតឡើងសម្រាប់បម្រើនយោបាយនោះ៕ ស៊ុយឈាង