30 C
Phnom Penh

អាជ្ញា​ធរ​រារាំង​អ្នកភូមិ​មិន​ឲ្យ​ដាក់ពាក្យ​ប្តឹង​ភរិយារដ្ឋមន្ត្រី​ក្រសួង​រ៉ែ និង​ថាមពល

ដោយ ឌឹ ខេមបូឌា ដេលី

បទវិភាគ

អាជ្ញា​ធរ​ខេត្ត​​កំពង់​ឆ្នាំ​ងត្រូវ​បានចោទប្រកាន់​ថា បាន​ចាក់​សោ​មិន​ឲ្យក្រុមអ្នក​ភូមិ​ចូល​ក្នុងសាលា​ខេត្ត​បន្ទាប់​ពីពួកគា​ត់​ជាច្រើននាក់​បាន​មក​ដាក់ពាក្យ​ប្តឹង​ភរិយា​លោក ស៊ុយ សែម រដ្ឋ​មន្ត្រី​ក្រសួង​រ៉ែ និង​ថាម​ពល​ មុន​ពេលចាក់សោទ្វារ​​មិន​ឲ្យ​សមាជិកក្រុម​ប្រឹក្សា​ដែល​ត្រូវ​បាន​តែង​តាំង​ថ្មី​​និង​ដែល​បាន​ចាក​ចេញ​ពី​អគារ​ទៅ​និយាយ​ជាមួយ​ពួកគាត់​ចូលដែរ។

ក្រុម​អ្នក​ភូមិ​ដែល​មក​ពីឃុំ​តាជេស​ បាន​ជាប់​ពាក់​ព័ន្ធ​នឹង​វិវាទ​ដី​ធ្លី​ជា​មួ​ុ​យ​ក្រុម​ហ៊ុន ខេឌីស៊ី របស់​អ្នក​ស្រី ជា ខេង ចាប់​តាំង​ពី​ឆ្នាំ​២០០៧​មក​​ជុំ​វិញ​ដី​ទំហំ​១៤៥​ហិកតា​។ ​លោក រាជ សីមា តំណាង​អ្នក​ភូមិ​បាន​និយាយ​ថា អ្នក​ភូមិ​មួយ​ក្រុម​មាន​គ្នា​៤០​នាក់​បាន​ប្រមូល​ផ្តុំ​គ្នា​នៅ​សាលាខេត្ត​ដើម្បីដាក់​ពាក្យ​បណ្តឹង​ ខណៈ​ដែល​ក្រុម​​មន្ត្រី​ជាន់​ខ្ពស់​បាន​ជួប​ជុំ​គ្នា​ក្នុង​ពិធី​តែង​តាំង​សមាជិក​​ក្រុម​ប្រឹក្សាខេត្ត​ដែល​ទើប​ជាប់​ឆ្នោត​ថ្មី​ចំនួន១៥​រូប​។

លោក​បាន​និយាយ​ថា “ក្រុម​អ្នក​ភូមិ​​បាន​ជួប​ជុំ​គ្នា​ដោយ​សន្តិ​វិធី​នៅ​មុខ​សាលា​ខេត្ត​ ប៉ុន្តែ នៅពេល​នោះ​ទ្វារ​រប​ង​ត្រូវ​បាន​ចាក់​សោ​ ហើយ​នគរ​បាល​និង​កង​រាជ​អាវុធ​ហត្ថ​ជាង​២០​នាក់​នៅក្នុង​បរិវេណ​នោះ មិន​ព្រម​បើក​សោ​ឲ្យ​ពួក​យើង​ទេ​ ដោយ​និយាយ​ថា មាន​បញ្ជា​ពី​ថ្នាក់​លើ​របស់​ខ្លួន​”។

ក្រុម​អ្នក​ភូមិ​ រួម​ទាំង​អ្នក​ដែល​បានទទួល​សំណង​រួច​ហើយ​ពីក្រុម​ហ៊ុន​នេះ​កាល​ពី​ខែ​មុន បាន​​កាន់​បដា​អំពាវ​នាវ​ឲ្យលោក​អភិបាល​ខេត្ត​ជួយអន្តរាគមន៍​ចំពោះវិវាទ​ដីធ្លី​ដែល​អូស​បន្លាយ​​នេះ​។

លោក ដួង​ ចាន់​ត្រា សមាជិក​ក្រុម​ប្រឹក្សា​ខេត្ត​គណបក្ស​សង្គ្រោះ​ជាតិ​ដែល​ទើប​ជាប់​ឆ្នោត​​ថ្មីបាន​មាន​ប្រសាសន៍ថា លោក​បាន​ចាកចេញ​ពី​ពិធី​នេះ​មួយភ្លែតទៅ​និយាយ​ជា​មួ​យ​ក្រុម​អ្នកភូមិ​ប​ន្ទាប់​ពីលោក​​ឮពួកគាត់​ស្រែក​តាម​ឧគ្ឃោសនសព្ទ​។ លោក​បានមាន​ប្រសាសន៍​ថា “ខ្ញុំ​បាន​ប្រាប់​ក្រុម​អ្នក​ភូមិថា ខ្ញុំ​នឹង​ជួយ​ឲ្យ​តំណាង​បី​នាក់​បាន​​ទៅ​ជួប​ជា​មួយលោក​អភិបាល​និង​ដាក់​ពាក្យ​បណ្តឹង​នៅពេលចប់​ពិធី​ផ្លូវ​ការនេះ​”។

​បន្ទាប់​ពី​ចប់ពិធី​​ លោក​បាន​​ត្រឡប់​មក​និយាយ​ជា​មួយ​ពួក​គាត់​ ហើយនៅពេលនោះ ​”​នគរបាល​ និងស​ន្តិសុខ​ក៏​បាន​រារាំង​ខ្ញុំ​មិន​ឲ្យ​ចូល​ក្នុង​​បរិវេណ​ដែរ​ បើ​ទោះ​ណា​ជា​ខ្ញុំ​ទទួល​បានការ​តែង​តាំង​ផ្លូវ​ការ​សម្រាប់​តួនាទី​របស់ខ​្ញុំ​ក៏​ដោយ​”។

យោង​តាម​លោក ចាន់​ត្រា បាន​ឲ្យដឹង​ថា ក្រុម​មន្ត្រី​​ខេត្ត​ដែល​នៅ​សេស​សល់​បាន​ចាក​ចេញ​តាម​ទ្វារ​ក្រោយ​​ដើម្បី​ចៀសវាង​​ដើរកាត​់​ក្រុម​អ្នក​ភូម​ិ​។

ទាំង​លោក អ៊ុក ​រ៉ាប៊ុន រដ្ឋ​មន្ត្រី​ក្រសួង​កសិកម្ម​ដែល​បាន​ចូល​រួម​ជា​អធិបតី​ក្នុង​ពិធី​នោះ និង​លោក ឈួន ចាន់​ឌឿន អភិបាល​ខេត្ត​មិន​អាច​ទាក់ទង​សុំ​អត្ថាធិប្បាយ​បាន​ទេ។

លោក ជួប ចាន់​ធឿន នាយ​ប៉ុស្តិ៍​ឃុំ​តាជេសបាន​បញ្ជាក់​ថា ក្រុម​អ្នក​ភូមិ​បាន​ទៅ​ដាក់​ពាក្យ​បណ្តឹង​មែន​ ប៉ុន្តែ លោក​បាន​មាន​ប្រសាសន៍​ថា លោក​មិន​ដឹង​ពីការ​ចាក់​សោ​ទ្វារ​ទេ។ លោ​ក​បាន​បន្ថែម​ថា “ខ្ញុំ​គិត​ថាវា​មិន​មែន​ជា​រឿង​ពិត​ទេ​។ ពួកគាត់​ប្រហែល​ជា​បាន​ទៅ​អំឡុង​ពេល​បរិភោគ​អាហារ​ថ្ងៃ​ត្រង​់​ ដែល​នៅ​ពេល​នោះ​គ្មាន​នរណាម្នាក់នៅ​កន្លែងធ្វើ​ការ​ទេ​”៕ សារុន​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស